Pagsabot sa Biblia—Ano an Makakatabang sa Saindo?

“MAINGAT mong itinago an mga bagay na ini sa mga madonong asin intelektuwal, asin ihinayag iyan sa mga omboy.” (Lucas 10:21) An mga tataramon na ini ni Jesus sa saiyang langitnon na Ama nagpaparisa na tanganing masabotan an Biblia, kaipuhan na igwa kita nin tamang aktitud. An kadonongan ni Jehova nahayag paagi sa pagtao nia nin sarong libro na talagang masasabotan sana kan mga tawong mapakumbaba asin madaling tokdoan.

An kapakumbabaan depisil na ipaheling kan kadaklan sa sato. Gabos kita nagmana kan tendensia na magin orgolyoso. Dugang pa, nabubuhay kita sa “huring mga aldaw,” sa tahaw kan mga tawong “mga mamomoton sa sainda man sana, . . . mga matagas an payo, mga maabhaw huli sa pag-orgolyo.” (2 Timoteo 3:1-4) Mga aktitud ini na makakaolang sa sato na masabotan an Tataramon nin Dios. An makamomondo, minsan paano gabos kita naiimpluwensiahan kan mga nakapalibot sa sato. Kun siring, paano kamo magkakaigwa kan aktitud na kaipuhan tanganing masabotan an Biblia?

Pag-andam sa Puso Asin Isip

Si Esdras, sarong suanoy na namomoon sa banwaan nin Dios, ‘inandam an saiyang puso na konsultahon an ley ni Jehova.’ (Esdras 7:10) Igwa daw nin mga paagi na maaandam niato an satong puso? Igwa. Puedeng magpoon kita paagi sa pagkaigwa nin tamang pagmansay sa Kasuratan. Sa kapwa mga Kristiano, si apostol Pablo nagsurat: “Kan akoon nindo an tataramon nin Dios, na nadangog nindo sa samo, iyan inako nindo, bakong siring sa tataramon nin tawo, kundi, siring sa iyo man nanggad, siring sa tataramon nin Dios.” (1 Tesalonica 2:13) Minsan ngani mga tawo an ginamit sa pagsurat kan Kasuratan, an isinurat ninda hale ki Jehova. An pagrekonoser kan mahalagang marhay na katotoohan na iyan an magibo sa sato na mas andam na akoon an satong binabasa.—2 Timoteo 3:16.

An saro pang paagi sa pag-andam kan satong puso iyo an pamibi. Mantang an Biblia ipinasabong kan banal na espiritu, masasabotan niato an mensahe kaiyan sa tabang kan espiritung iyan. Kaipuhan na mamibi kita para sa siring na tabang. Mangnoha kun paanong ini an nasa isip kan salmista na nagsurat: “Papangyarihon mong ako makasabot, tanganing maotob ko an saimong ley asin maotob ko iyan sa bilog na puso.” (Salmo 119:34) Kaipuhan na mamibi kita na logod magkaigwa bako sanang kan kakayahan nin isip na masabotan an nakasurat dian kundi pati kan kamugtakan nin puso na matogot sa sato na akoon iyan. Tanganing masabotan an Biblia, kaipuhan na andam kita na akoon kun ano an totoo.

Mantang naghohorophorop kamo tanganing magkaigwa nin tamang kamugtakan nin isip, isipon kun paano makakatabang sa saindo an pag-adal sa Biblia. Dakol kitang marahayon na dahelan na konsultahon an Tataramon nin Dios, alagad an pinakamahalaga iyo na natatabangan kita kaiyan  na rumani sa Dios. (Santiago 4:8) Mantang binabasa niato kun ano an mga reaksion ni Jehova sa laen-laen na kamugtakan, kun paano nia inaapresyar an mga namomoot sa saiya, asin kun ano an pagtratar nia sa mga minabaya sa saiya, naririsa niato kun anong klase siang persona. An pangenot na motibo niato sa pagbasa kan Biblia maninigong pirme na tanganing orog na mamidbid an Dios asin sa siring mapakosog an satong relasyon sa saiya.

Mga Olang sa Pagkaigwa nin Tamang Aktitud

Ano an tibaad makaolang sa sato na masabotan an Tataramon nin Dios? An sarong olang iyo an napasalang pakamate nin kaimbodan. Halimbawa, tibaad pinapangaptan nindo an mga paniniwala asin opinyon nin nagkapirang tawo na halangkaw an pagheling nindo. Minsan siring, paano kun an mga indibiduwal na ini dai man talaga nagsusuportar o nagpapahalaga sa katotoohan kan Tataramon nin Dios? Sa arog kaiyan na mga kamugtakan, tibaad magin angat an pagsabot sa kun ano talaga an itinotokdo kan Biblia. Huli kaini, ineenkaminar kita kan Biblia na maingat na turotimbangon kun ano an itinokdo sa sato.—1 Tesalonica 5:21.

An ina ni Jesus, si Maria, napaatubang sa siring na angat. Sia pinadakula oyon sa Judiong tradisyon. Maingat niang inotob an Ley ni Moises asin daing duwa-duwa na nagduduman sia sa sinagoga. Kan huring kabtang kan saiyang buhay narealisar nia na an paagi kan pagsamba na itinokdo sa saiya kan saiyang mga magurang dai na inaako nin Dios. Bilang resulta, inako ni Maria an katokdoan ni Jesus asin nakabilang sa enot na mga miembro kan Kristianong kongregasyon kaidto. (Gibo 1:13, 14) Bako ining pagpaheling nin kawaran nin paggalang sa saiyang mga magurang o sa mga tradisyon ninda; imbes, iyan kapahayagan kan saiyang pagkamoot sa Dios. Tanganing makinabang kita sa Biblia, arog ni Maria kaipuhan na ipaorog niato an kaimbodan sa Dios kisa kaimbodan sa siisay man.

Makamomondo, dakol na tawo an dai nagpapahalaga sa katotoohan sa Biblia. May mga kontento na sanang sumunod sa relihiosong mga tradisyon na nakabasar sa kaputikan. An iba nagpapaheling nin kawaran nin paggalang sa katotoohan paagi sa saindang pagtaram asin pamumuhay. Huli kaiyan, an pag-ako kan katotoohan sa Biblia may karibay na sakripisyo: Tibaad ilaag kamo kaiyan sa kamugtakan na magigin kakontra nindo an mga katood, kataed, katrabaho, asin an kapamilya pa ngani nindo. (Juan 17:14) Minsan siring, an madonong na tawo nagsurat: “Bakalon mismo an katotoohan asin dai iyan ipabakal.” (Talinhaga 23:23) Kun halangkaw an pagpahalaga nindo sa katotoohan, tatabangan kamo ni Jehova na masabotan an Biblia.

Pero an saro pang olang sa pagsabot sa mensahe kan Biblia iyo an pagsayumang iaplikar an sinasabi kaiyan. Sinabihan ni Jesus an saiyang mga disipulo: “Itinao sa saindo an pakasabot kan sagradong mga hilom kan kahadean kan kalangitan, alagad dai iyan itinao sa mga tawong idto. Huli ta an puso kan banwaan na ini nagin dai nag-aako, asin sa saindang mga talinga sinda nagdangog na daing paghimate.” (Mateo 13:11, 15) An kadaklan kan hinulitan ni Jesus dai naghimate, habong magbago. Bako nanggad na arog kan nagbibiaheng negosyante na nasambitan ni Jesus sa sarong ilustrasyon! Kan manompongan an sarong perlas na halangkaw an halaga, ipinabakal tolos kan negosyante an gabos niang sadiri tanganing bakalon iyan. An pakasabot kan katotoohan sa Biblia maninigong magin arog man kaiyan an halaga sa sato.—Mateo 13:45, 46.

An Angat sa Pagigin Tinotokdoan

An sarong dakulang angat sa pagsabot sa Biblia iyo an pagigin madaling tokdoan. An sarong tawo tibaad madepisilan na akoon an bagong mga ideya hale sa saro na garo baga hamak. Pero, an mga apostol ni Jesu-Cristo mga tawong “daing inadalan asin ordinaryo.” (Gibo 4:13) Ipinapaliwanag kun taano, si Pablo nagsurat: “Naheling nindo an saiyang pagkaapod sa saindo, mga tugang, na bakong dakol na madonong sa laman an inapod, bakong dakol na makapangyarihan, bakong dakol na namundag nin noble; kundi pinili nin Dios an mga lolong sa kinaban, tanganing supogon nia an mga madonong.” (1 Corinto 1:26, 27) Kun nadedepisilan kamong magpaheling nin kapakumbabaan kun tinotokdoan kamo nin saro na hamak, girumdomon na sia ginagamit sana nin Dios tanganing tokdoan kamo. May maorog pa daw sa pribilehio na magin tinokdoan ni Jehova, an satong “Kaharohalangkaweng Paratokdo”?—Isaias 30:20; 54:13.

An Siriong komandante militar na si Naaman nadepisilan na umako nin instruksion hale sa saro na hamak. Naghahanap nin pampaomay sa saiyang  daot, sia nagpasiring sa propeta ni Jehova na si Eliseo. Alagad an mga instruksion nin Dios sa pagpaomay ipinaabot ki Naaman paagi sa sarong surugoon. An mensahe asin an paagi kan pagpaabot kaiyan nagin angat sa kapakumbabaan ni Naaman, kaya kan primero nagsayuma siang magsunod sa tataramon kan propeta nin Dios. Paghaloyhaloy, binago ni Naaman an saiyang aktitud asin sia naomayan. (2 Hade 5:9-14) Napapaatubang kita sa kaparehong angat kun kita nag-aadal kan Biblia. Tibaad naaraman niato na tanganing maomayan sa espirituwal asin moral, kaipuhan niatong sunodon an sarong bagong paagi nin pamumuhay. Magigin mapakumbaba daw kita na togotan an saro na tokdoan kita kan kaipuhan niatong gibohon? Idto sanang mga madaling tokdoan an magkakamit nin pakasabot sa Biblia.

Sarong marahay na aktitud an ipinaheling nin sarong nasa kapangyarihan sa irarom ni Candace, an reyna kan mga taga Etiopia. Sia pabalik na sa Aprika lunad sa saiyang karuwahe kan an disipulong si Felipe duminalagan sa kataed nia asin nakipag-olay sa saiya. Hinapot ni Felipe an tawong iyan kun nasasabotan nia an saiyang binabasa. Igo an kapakumbabaan kan opisyal tanganing magsimbag: “Paano ko magigibo iyan, kun daing gumiya sa sako?” Kan magkaigwa nin pakasabot sa Tataramon nin Dios, nabautismohan an tawong iyan. Pagkatapos kaiyan, sia “nagdagos na naggagayagaya.”—Gibo 8:27-39.

Sa pankagabsan an Mga Saksi ni Jehova ordinaryong mga tawo. Kada semana naggigibo sinda nin mga pag-adal sa Biblia sa labing anom na milyon katawo. Mantang an Biblia nagtotokdo kan pinakamarahay na paagi nin pamumuhay, nagpapaliwanag kan solamenteng siertong paglaom para sa katawohan, asin nagsasabi kun paano mamimidbid an Dios, nanompongan nin minilyon na an pag-adal kan Biblia asin pagsabot sa sinasabi kaiyan sarong kawilihan na dai masokol. Iyan sarong kawilihan na bukas sa saindo.

[Ritrato sa pahina 7]

Nadepisilan si Naaman na akoon an mga instruksion hale sa sarong hamak na surugoon

[Ritrato sa pahina 7]

An pakasabot sa Biblia nakakapaogma sa satong puso