“Saro sa Pinakamaogmang Aldaw sa Sakong Buhay”

“AN DEPRESYON iyo an pinakaparateng nababareta, asin posibleng an pinakadakulang problema sa kamugtakan kan isip para sa mga hoben,” an paghihingako kan Beyondblue, sarong ahensia na pinopondohan nin gobyerno sa Australia. Ihinahayag nin mga pagsiyasat na mga 100,000 na hoben na Australiano an nagkakadepresyon kada taon.

An hoben na mga Kristiano bakong libre sa depresyon. Minsan siring, an pagtubod ki Jehova nakatabang sa dakol sa sainda na mapaglabanan an negatibong mga saboot asin gibohon na mapanggana an saindang pagkahoben. Sa paggibo kaiyan, sinda nagtatao nin marahayon na impresyon sa iba. Paano?

Estudyaran niato an eksperyensia kan 18 anyos na si Claire. Sia asin an saiyang ina nag-aatender sa sarong kongregasyon nin Mga Saksi ni Jehova sa Melbourne. Kan abandonaron kan ama ni Claire an pamilya, sia nagkadepresyon. Alagad an saiyang pagtubod sa saiyang langitnon na Ama, si Jehova, nagdanay na makosog. Sarong aldaw, an doktor kan pamilya, si Lydia, nagdalaw sa harong ninda ni Claire tanganing kumustahon an ina ni Claire, na may helang. Pagkatapos, maboot na inalok nia si Claire na ihatod sa sentrong pamakalan. Mantang pasiring duman, hinapot nia si Claire kun baga igwa na ini nin kailusyon. Ipinaliwanag ni Claire na bilang saro sa mga Saksi ni Jehova, dai sia basta-basta na nakikipag-date sa mga solterito. Napangalas kaini an doktor. Dangan ipinaliwanag ni Claire kun paano an Biblia nakatabang sa saiya na gumibo nin madonong na mga desisyon sa buhay. Sa katapustapusi, inalok nia an doktor na darahan nin kopya kan sarong publikasyon na basado sa Biblia na nakatabang nin dakula ki Claire. An libro may titulong Questions Young People Ask​—Answers That Work.

Tolong aldaw pakaresibi kan libro, inapodan ni Lydia sa telepono an ina ni Claire tanganing sabihon kun gurano sia kanaogma sa pagbasa kaiyan. Dangan naghagad sia nin anom pang libro para sa saiyang mga katrabaho. Kan ihatod ni Claire an mga libro, ipinaliwanag kan doktor kun gurano sia kanapahanga sa pagtubod ni Claire. Inalok sia ni Claire na mag-adal sa Biblia kaiba nia, asin inako iyan kan doktor.

Sa laog nin nagkapirang bulan, pinamayohan ni Claire an pag-adal sa oras nin pahingalo kan doktor sa udto. Dangan hinapot ni Lydia si Claire kun puede siang magtaram sa sarong seminar manongod sa depresyon sa mga hoben. Minsan nahahandal, uminoyon si Claire. Labing 60 katawo an nag-atender sa seminar. Apat na propesyonal may koneksion sa kamugtakan kan isip​—na gabos nasa edad na​—​an nagpahayag sa mga nagdadangog. Pagkatapos kaiyan turno na ni Claire na magtaram. Idinoon nia kun gurano kahalaga para sa mga hoben na magkaigwa nin relasyon sa Dios. Ipinaliwanag nia na si Jehova Dios nagmamakolog na gayo sa mga hoben asin nagtatabang sa gabos na minadolok sa saiya para sa suporta asin karangahan. Saro pa, ipinahayag nia an saiyang kombiksion na sa dai na mahahaloy hahaleon ni Jehova an gabos na klase nin pisikal asin mental na helang. (Isaias 33:24) Ano an nagin resulta kan marahayon na patotoong ini?

“Dakol an nagrani sa sako pagkatapos kan sesyon tanganing sabihon kun gurano an saindang paghanga na madangog an sarong hoben na nagpapahayag manongod sa Dios,” an sabi ni Claire. “Nakapasakamot ako nin 23 na kopya kan librong Young People Ask. Itinao sa sako nin tolong daragita na kabilang sa mga nagdadangog an saindang mga numero nin telepono. An saro sa mga daragitang ini nag-aadal na ngonyan sa Biblia. Idto saro sa pinakamaogmang aldaw sa sakong buhay.”