Dai Na Nabubuhay Para sa Sato Man Sana

“[Si Cristo] nagadan para sa gabos tanganing idtong mga nabubuhay dai na mabuhay para sa sainda man sana.”​—2 CORINTO 5:15.

1, 2. Anong pagboot sa Kasuratan an nagpahiro sa enot na siglong mga parasunod ni Jesus na pangganahan an pagigin makasadiri?

HURING banggi na kaidto ni Jesus digdi sa daga. Pirang oras na sana, itatao na nia an saiyang buhay para sa gabos na matubod sa saiya. Kan bangging iyan, isinabi ni Jesus sa saiyang maimbod na mga apostol an dakol na mahalagang bagay. Kabilang sa mga iyan an pagboot mapadapit sa sarong kualidad na magigin an nagpapamidbid na tanda kan saiyang mga parasunod. “Tinatawan ko kamo nin bagong togon,” an sabi nia, “na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.”​—Juan 13:​34, 35.

² An tunay na mga Kristiano dapat na ipaheling an mapagsakripisyong pagkamoot para sa lambang saro asin enoton an mga pangangaipo kan saindang mga kapagtubod kisa kan sa sainda. Dai sinda maninigong mag-alangan dawa na ‘itao an saindang kalag para sa saindang mga katood.’ (Juan 15:13) Paano naghimate an enot na mga Kristiano sa bagong togon? Sa saiyang bantog na librong Apology, an parasurat kan ikaduwang siglo na si Tertuliano kinotar an iba na nagsabi manongod sa mga Kristiano: ‘Helinga nindo kun gurano an pagkaminorootmootan ninda asin kun gurano sinda kaandam pa ngani na magadan para sa lambang saro.’

3, 4. (a) Taano ta maninigo niatong labanan an pagigin makasadiri? (b) Ano an eestudyaran niato sa artikulong ini?

³ Kita man kaipuhan na ‘padagos na magturowangan sa pagabat sa lambang saro, asin sa siring maotob an ley kan Cristo.’ (Galacia 6:2) Minsan siring, an pagigin makasadiri saro sa pinakadakulang olang sa pagkuyog sa ley kan Cristo asin sa ‘pagkamoot ki Jehova na satong Dios sa bilog niatong puso, kalag, patin isip asin pagkamoot sa satong kapwa nin siring sa sato man sana.’ (Mateo 22:37-​39) Huling bakong sangkap, may tendensia kitang sadiri sana niato an intindihon. Idagdag pa  digdi an tension kan pangaroaldaw na buhay, an korompetensiahan sa eskuelahan o sa pinagtatrabawohan, asin an maigot na paghihingoa na makua an mga pangangaipo sa buhay, asin minakosog an natural na tendensiang ini. An inklinasyon na ini na magin makasadiri dai nagluluya. Si apostol Pablo nagpatanid: “Sa huring mga aldaw . . . an mga tawo magigin biyong sadiri sana an iniintindi.”—2 Timoteo 3:​1, 2, Phillips.

⁴ Sa huring kabtang kan saiyang ministeryo sa daga, tinawan ni Jesus an saiyang mga disipulo nin tolong-lakdang na proseso na makakatabang sa sainda na pangganahan an pagigin makasadiri. Ano daw iyan, asin paano kita makikinabang sa saiyang mga instruksion?

Sarong Seguradong Pangontra!

5. Mantang naghuhulit sa amihanan na Galilea, ano an ihinayag ni Jesus sa saiyang mga disipulo, asin taano ta nakakabigla iyan para sa sainda?

⁵ Naghuhulit kaidto si Jesus harani sa Cesarea ni Felipe sa amihanan na Galilea. An toninong, magayon na lugar na ini tibaad garo baga mas angay para sa paglibang kisa pagdehar sa sadiri. Minsan siring, mantang yaon duman, pinonan na ipahayag ni Jesus sa saiyang mga disipulo na “sia kaipuhan na magduman sa Jerusalem asin magtios nin dakol na bagay sa kamagurangan na lalaki asin mga poon na saserdote patin mga eskriba, asin gadanon, asin sa ikatolong aldaw buhayon liwat.” (Mateo 16:21) Siertong nakakabigla nanggad para sa mga disipulo ni Jesus an ihinayag na ini, huling sagkod kaidto linalaoman ninda na eestablisaron kan saindang Poon an saiyang Kahadean digdi sa daga!​—Lucas 19:11; Gibo 1:6.

6. Taano ta makosog na sinaway ni Jesus si Pedro?

⁶ Tolos-tolos na “isiniblag ni Pedro [si Jesus] asin pinonan na sawayon sia, na sinasabi: ‘Maherak ka sa saimong sadiri, Kagurangnan; dai ini noarin man mangyayari sa saimo.’” Ano an nagin reaksion ni Jesus? “Sa pagsalingoy, sia nagsabi ki Pedro: ‘Padian ka sa hudian ko, Satanas! Ika sarong singkogan sa sako, huli ta iniisip mo, bakong an mga kaisipan nin Dios, kundi an sa mga tawo.’” Kanigoan an kalaenan kan duwang punto de vistang ini! Gikan sa boot na inako ni Jesus an pagsasakripisyo na iinasignar nin Dios sa saiya​—pagsasakripisyo na masagkod sa saiyang kagadanan sa hariging pasakitan sa laog nin pira na sanang bulan. An irinekomendar ni Pedro iyo an pagigin komportable. “Maherak ka sa saimong sadiri,” an sabi nia. Daing duda na may marahay na intension si Pedro. Sa ibong kaiyan, sinaway sia ni Jesus huling sa okasyon na iyan tinogotan ni Pedro na maimpluwensiahan sia ni Satanas. An inisip ni Pedro “bakong an isip nin Dios, kundi an sa mga tawo.”​—Mateo 16:​22, 23; nota sa ibaba.

7. Siring kan nakasurat sa Mateo 16:​24, anong paghiro an sinabi ni Jesus na dapat gibohon kan saiyang mga parasunod?

⁷ Madadangog ngonyan an mga tataramon na kaagid kan sinabi ni Pedro ki Jesus. An kinaban parateng nagsasadol sa tawo na ‘magin maboot ka sa saimong sadiri’ o ‘gibohon mo an pinakamadali para saimo.’ Sa ibong na lado, irinekomendar ni Jesus an biyong napapalaen na mental na aktitud. Sinabihan nia an saiyang mga disipulo: “Kun an siisay man boot na magsunod sa sako, paindahan nia an saiyang sadiri asin pasanon an saiyang hariging pasakitan patin padagos akong sundan.” (Mateo 16:24) “An mga tataramon na ini bakong imbitasyon sa pagkadisipulo para sa mga bako pang disipulo,” an sabi kan The New Interpreter’s Bible, “kundi sarong imbitasyon na horophoropon an kahulogan kan pagkadisipulo para sa mga naghimate na sa pangapodan ni Cristo.” An tolong lakdang na sinabi ni Jesus, na nakasurat sa tekstong iyan, dapat na gibohon kan mga may pagtubod. Saro-saro niatong estudyaran an kada lakdang.

8. Ipaliwanag an kahulogan kan pagpainda sa saindong sadiri.

⁸ Enot, dapat niatong paindahan an satong sadiri. An Griegong tataramon para sa “paindahan an sadiri” nagpaparisa nin pagigin andam na sayumahan an makasadiring mga kamawotan o personal na kagianan. An pagpainda sa satong sadiri bako sanang an paminsanminsan na paglingaw nguna niato sa nagkapirang kasingawan; ni nangangahulogan man iyan na kita magin  ascetiko o ipahamak an satong sadiri. ‘Bako na niatong sadiri an sato man sana’ huling boluntad niatong isinusuko ki Jehova an satong bilog na buhay asin an gabos na yaon dian. (1 Corinto 6:​19, 20) Imbes na makasadiri, an satong buhay nagigin maka-Dios. An pagpainda sa satong sadiri nagpaparisa nin determinasyon na gibohon an kabotan nin Dios, dawa ngani tibaad kontra ini sa sato mismong bakong sangkap na mga inklinasyon. Ipinapaheling niato na eksklusibo kitang dusay sa Dios kun ginigibo niato an pagdusay sa saiya asin nagpapabautismo. Dangan pinagmamaigotan niato na otobon an satong pagdusay sagkod na kita nabubuhay.

9. (a) Kan si Jesus yaon sa daga, ano an irinerepresentar kan hariging pasakitan? (b) Sa anong paagi na pinapasan niato an satong hariging pasakitan?

⁹ An ikaduwang lakdang iyo na dapat niatong pasanon an satong hariging pasakitan. Kan enot na siglo, an hariging pasakitan nagrerepresentar sa pagdusa, kasusupgan, asin kagadanan. Sa parate, mga kriminal sana an ginagadan sa hariging pasakitan o ibinibitin an saindang bangkay sa sarong harigi. Sa pananaram na ini, ipinaheling ni Jesus na an sarong Kristiano dapat na preparadong akoon an paglamag, pagduhagi, o dawa kagadanan, huling bako siang kabtang kan kinaban. (Juan 15:18-​20) Napapalaen kita dahelan sa satong Kristianong mga pamantayan, kaya an kinaban tibaad ‘magtaram na may panlilibak manongod sa sato.’ (1 Pedro 4:4) Puedeng mangyari ini sa eskuelahan, sa lugar kan satong trabaho, o dawa sa laog nin pamilya. (Lucas 9:23) Minsan siring, andam niatong tagalan an pagduhagi kan kinaban huling dai na kita nabubuhay para sa sato man sana. Si Jesus nagsabi: “Maogma kamo kun an mga tawo pinag-oolog-olog kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako. Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan.” (Mateo 5:​11, 12) Tunay nanggad, an pagkamit kan pabor nin Dios iyo an pinakamahalaga.

10. Ano an kalabot sa padagos na pagsunod ki Jesus?

¹⁰ Ikatolo, sinabi ni Jesu-Cristo na dapat kitang padagos na sumunod sa saiya. Oyon sa An Expository Dictionary of New Testament Words, ni W. E. Vine, an pagsunod nangangahulogan na magin kaibaiba​—“magkaibanan sa sarong dalan.” An Enot na Juan 2:6 nagsasabi: “An nagsasabing sia nagdadanay na kasaro [nin Dios] may paninimbagan man na maglakaw arog kan paglakaw kan sarong iyan [ni Cristo].” Paano naglakaw si Jesus? An pagkamoot ni Jesus sa saiyang langitnon na Ama asin sa saiyang mga disipulo dai nagtao nin lugar sa pagigin makasadiri. “Si Cristo dai nagpanigo sa saiya man sana,” an isinurat ni Pablo. (Roma 15:3) Dawa kan pagal na sia o nagugutom, inenot ni Jesus an mga pangangaipo kan iba bago an sa saiya. (Marcos 6:​31-​34) Naghingoa man si Jesus nin maigot sa paghuhulit kan Kahadean asin pagtotokdo. Bako daw na maninigo niatong arogon sia mantang may kaigotan niatong inootob an sugo sa sato na ‘gumibo nin mga disipulo sa mga tawo kan gabos na nasyon, na tokdoan sinda na otobon an gabos na bagay na ipinagboot ni Jesus’? (Mateo 28:​19, 20) Sa gabos na ini, nagwalat si Cristo nin modelo para sa sato, asin dapat niatong ‘sunodon nin estrikto an saiyang mga lakad.’​—1 Pedro 2:21.

11. Taano ta mahalaga na paindahan niato an satong sadiri, pasanon an satong hariging pasakitan, asin padagos na sumunod ki Jesu-Cristo?

¹¹ Mahalagang marhay na paindahan niato an satong sadiri, pasanon an satong hariging pasakitan, asin padagos na sumunod sa satong Arogan. Sa paggibo kaiyan malalabanan niato an pagigin makasadiri​—sarong seguradong olang sa pagpaheling nin mapagsakripisyong pagkamoot. Dugang pa, si Jesus nagsabi: “An siisay man na boot na magligtas kan saiyang kalag mawawaran kaiyan; alagad an siisay man na mawaran kan saiyang kalag dahel sa sako makakakua kaiyan. Huli ta ano an pakikinabangon nin sarong tawo kun makamtan nia an bilog na kinaban alagad mawara naman an saiyang kalag? o ano an itatao nin tawo bilang karibay kan saiyang kalag?”​—Mateo 16:​25, 26.

Dai Kita Makakapaglingkod sa Duwang Kagurangnan

12, 13. (a) Ano an problema nin sarong hoben na namamahala na naghagad nin sadol ki Jesus? (b) Anong hatol an itinao ni Jesus sa barobata, asin taano?

¹² Nagkapirang bulan pagkatapos na idoon ni Jesus an pangangaipo na paindahan kan saiyang mga disipulo an saindang sadiri, sarong mayaman na hoben na namamahala an nagrani sa saiya asin nagsabi: “Paratokdo, anong karahayan an dapat kong gibohon tanganing magkamit nin buhay na daing katapusan?” Sinabi saiya ni Jesus na ‘padagos  na otobon an mga togon’ dangan sinambit nia an nagkapira kaiyan. An barobata nagsabi: “Inotob ko an gabos na ini.” Minalataw na sinsero an lalaki asin ginibo an pinakamakakaya nia tanganing kuyogon an mga togon kan Ley. Kaya sia naghapot: “Ano pa an kulang sa sako?” Bilang simbag, ipinaabot ni Jesus sa barobata an napapalaen na pangagda, na sinasabi: “Kun ika boot na magin sangkap [“kompleto,” New American Standard Bible], pabakalan an saimong mga sadiri asin tawan iyan sa mga dukha asin magkakaigwa ka nin kayamanan sa langit, asin madia sumunod ka sa sako.”​—Mateo 19:16-​21.

¹³ Naheling ni Jesus na tanganing makapaglingkod ki Jehova nin bilog na kalag an barobata, kaipuhan niang haleon an dakulang disturbo sa saiyang buhay​—an saiyang materyal na kayamanan. An tunay na disipulo ni Cristo dai makakapaglingkod sa duwang kagurangnan. Dai sia “makakapaglingkod sa Dios asin sa Kayamanan.” (Mateo 6:24) Kaipuhan nia an ‘simpleng mata’ na nakapokus sa espirituwal na mga bagay. (Mateo 6:22) An paghale sa mga rogaring nin saro asin pagtao kaiyan sa mga dukha sarong akto nin pagsasakripisyo. Bilang karibay para sa materyal na pagsasakripisyong ini, iinalok ni Jesus sa hoben na namamahala an daing kaagid sa halaga na pribilehio nin pagtipon nin kayamanan sa langit​—sarong kayamanan na mangangahulogan nin buhay na daing katapusan para sa saiya asin magiya sa paglaom na mamahala kaiba ni Cristo sa langit pag-abot nin panahon. An barobata bakong andam na paindahan an saiyang sadiri. “Naghale siang mamondo, huli ta kadakol siang rogaring.” (Mateo 19:22) Minsan siring, kabaliktaran an nagin reaksion kan ibang parasunod ni Jesus.

14. Paano naghimate an apat na parasira sa pangagda ni Jesus na sumunod sa saiya?

¹⁴ Mga duwang taon bago kaiyan, itinao ni Jesus an kaagid na pangagda sa apat na parasira na an ngaran Pedro, Andres, Santiago, asin Juan. Duwa sa sainda an naninira sa panahon na idto, asin an duwa pa sibot sa pagsursi kan saindang mga hikot. Sinabi ni Jesus sa sainda: “Sumunod kamo sa sako, asin gigibohon ko kamong mga parasira nin mga tawo.” Binayaan sa katapustapusi kan apat an saindang negosyo nin paninira asin nagsunod ki Jesus sa bilog nindang buhay.​—Mateo 4:​18-​22.

15. Paano ginibo kan sarong Saksi ni Jehova sa presenteng aldaw an mga pagsasakripisyo tanganing sumunod ki Jesus?

¹⁵ Dakol na Kristiano ngonyan an nag-arog sa halimbawa kan apat na parasira imbes na kan mayaman na hoben na namamahala. Isinakripisyo ninda an kayamanan asin oportunidad sa kinaban na ini tanganing makapaglingkod ki Jehova. “Kan 22 anyos ako, kaipuhan kong gumibo nin magabat na desisyon,” an sabi ni Deborah. Sia nagpapaliwanag: “Nag-adal ako sa Biblia nin mga anom na bulan, asin gusto ko nang idusay an sakong buhay ki Jehova, alagad kontrang marhay an sakong pamilya. Multimilyonaryo sinda, asin iniisip ninda na an pagigin Saksi ko magtatao sa sainda nin kasusupgan sa sosyedad. Tinawan ninda ako nin 24 oras tanganing magdesisyon kun ano an pipilion ko​—an maluhong buhay o an katotoohan. Kun dai ko puputolon an gabos na koneksion sa mga Saksi, dai ako papamanahan kan sakong pamilya. Tinabangan ako ni Jehova sa paggibo nin tamang desisyon asin tinawan ako kan kosog tanganing otobon iyan. Ginamit ko an nakaaging 42  na taon sa bilog na panahon na paglilingkod, asin mayo akong pinagbabasolan na ano man. Paagi sa pagtalikod ko sa makasadiri, mahilig sa kasingawan na estilo nin pamumuhay, nalikayan ko an pakamate nin kadaihan nin halaga kan buhay asin kamondoan na naheheling ko sa mga miembro kan sakong pamilya. Kaiba an sakong agom, natabangan ko an labi sa sanggatos katawo na manodan an katotoohan. Orog pa nanggad na mahalaga para sa sako an espirituwal na mga aking ini kisa ano man na materyal na mga kayamanan.” Minilyon na iba pang Saksi ni Jehova an igwa kan kaparehong saboot nia. Kumusta man kamo?

16. Paano niato ikakapaheling na dai na kita nabubuhay para sa sato man sana?

¹⁶ An kamawotan na dai na mabuhay para sa sainda man sana nagpahiro sa rinibong Saksi ni Jehova tanganing maglingkod bilang mga payunir, o bilog na panahon na mga parabalangibog kan Kahadean. An iba, na an mga kamugtakan dai nagtotogot sa sainda na makikabtang sa bilog na panahon na ministeryo, kinukultibar an espiritu nin pagpapayunir asin sinusuportaran an paghuhulit kan Kahadean sa pinakamakakaya ninda. Ipinapaheling kan mga magurang an kaparehong espiritu kun idinudusay ninda an dakol nindang panahon asin isinasakripisyo ninda an personal na mga interes tanganing magtao nin espirituwal na pagsasanay sa saindang mga aki. Minsan paano, ikakapaheling niato gabos na ineenot niato sa satong buhay an intereses kan Kahadean.​—Mateo 6:33.

Kiisay na Pagkamoot an Nagtutulod sa Sato?

17. Ano an nagmomotibar sa sato na gumibo nin mga pagsasakripisyo?

¹⁷ An pagpaheling nin mapagsakripisyong pagkamoot bakong iyo an pinakamadaling gibohon. Alagad horophoropa kun ano an nagtutulod sa sato. Si Pablo nagsurat: “Itinutulod kami kan pagkamoot na yaon sa Cristo, huli ta iyo ini an samuyang paghusgar, na an sarong tawo nagadan para sa gabos . . . Asin sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Corinto 5:​14, 15) An pagkamoot ki Cristo an nagtutulod sa sato na dai na mabuhay para sa sato man sana. Mapuersa nanggad na motibasyon iyan! Mantang si Cristo nagadan para sa sato, bako daw na namamatean niato an moral na obligasyon na mabuhay para sa saiya? Total, an pagpasalamat sa rarom kan pagkamoot na ipinaheling sato nin Dios asin ni Cristo an nagtulod sa sato na idusay an satong buhay sa Dios asin magin disipulo ni Cristo.​—Juan 3:​16; 1 Juan 4:​10, 11.

18. Taano ta may pakinabang an pagsasakripisyo?

¹⁸ May pakinabang daw an pagigin dai na nabubuhay para sa sato man sana? Pagkatapos na sayumahan kan mayaman na hoben na namamahala an pangagda ni Cristo asin maghale, si Pedro nagsabi ki Jesus: “Uya! Binayaan mi na an gabos na bagay asin nagsunod saimo; ano man nanggad an yaon para sa samo?” (Mateo 19:27) Si Pedro asin an ibang apostol talagang pinaindahan an saindang sadiri. Ano an magigin balos sa sainda? Enot na nagtaram si Jesus manongod sa pribilehio nindang mamahala kaiba nia sa langit. (Mateo 19:28) Sa panahon man sanang idto, sinambit ni Jesus an mga bendisyon na kakamtan kan gabos niang parasunod. Sia nagsabi: “Dai nin siisay man na nagbaya sa harong o mga tugang na lalaki o mga tugang na babae o ina o ama o mga aki o mga oma huli sa sako asin huli sa maogmang bareta na dai magkakamit nin mananggatos ngonyan sa panahon na ini . . . asin sa madatong na sistema nin mga bagay buhay na daing katapusan.” (Marcos 10:​29, 30) An inaako niato labi pa sa isinakripisyo niato. Bako daw na an satong espirituwal na mga ama, ina, tugang na lalaki, tugang na babae, asin aki mas mahalaga nanggad kisa ano man na tinalikdan niato para sa Kahadean? Siisay daw kaya an nagkaigwa nin pinakanakakakontentong buhay​—si Pedro o an mayaman na hoben na namamahala?

19. (a) Sa ano nakadepende an tunay na kaogmahan? (b) Ano an eestudyaran niato sa sunod na artikulo?

 ¹⁹ Paagi sa saiyang mga tataramon asin gibo, ipinaheling ni Jesus na an kaogmahan naggigikan sa pagtatao asin sa paglilingkod, bakong sa pagigin makasadiri. (Mateo 20:28; Gibo 20:35) Kun kita dai na nabubuhay para sa sato man sana kundi padagos na nagsusunod ki Cristo, kita makakaeksperyensia nin dakulang pagkakontento sa buhay ngonyan asin mapapasato an esperansang magkamit nin buhay na daing sagkod sa ngapit. Siempre, kun pinapaindahan niato an satong sadiri, si Jehova an nagigin Kagsadiri sa sato. Sa siring nagigin kitang mga oripon nin Dios. Taano ta nakakakontento an kaoripnan na ini? Paano kaiyan naaapektaran an mga desisyon na ginigibo niato sa buhay? Ipapaliwanag kan sunod na artikulo an mga hapot na ini.

Nagigirumdoman daw Nindo?

• Taano ta maninigo niatong labanan an satong makasadiring mga tendensia?

• Ano an kahulogan kan paindahan an satong sadiri, pasanon an satong hariging pasakitan, asin padagos na sumunod ki Jesus?

• Ano an nagmomotibar sa sato na dai na mabuhay para sa sato man sana?

• Taano ta may pakinabang an pamumuhay na mapagsakripisyo?

[Mga Hapot Para sa Pag-adal]

[Ritrato sa pahina 11]

“Maherak ka sa saimong sadiri, Kagurangnan”

[Ritrato sa pahina 13]

Ano an nakaolang sa hoben na namamahala sa pagsunod ki Jesus?

[Mga Ritrato sa pahina 15]

Pagkamoot an nagtutulod sa mga Saksi ni Jehova tanganing maglingkod bilang maigot na mga parabalangibog kan Kahadean