Ihiniras Nia an Saiyang mga Paniniwala sa Saiyang mga Kaklase

GUSTO daw nindong tabangan an saindong mga kaklase na magkaigwa nin mas marahay na pakasabot sa saindong basado sa Bibliang mga paniniwala? Si Magdalena, sarong 18 anyos na estudyante sa haiskul sa Polandia, parateng nakikipag-olay sa saiyang mga kaklase manongod sa saiyang mga paniniwala bilang saro sa Mga Saksi ni Jehova. Bilang resulta, parateng ihinahapot sa saiya an mga hapot na siring kan, ‘Ano an kahulogan kan pagigin saro sa Mga Saksi ni Jehova?’ asin ‘Dai ka naniniwala ki Jesu-Cristo?’ Paano nia matatabangan an saiyang mga kaklase? Namibi si Magdalena ki Jehova para sa paggiya asin naghiro kaoyon kan saiyang mga pamibi.​—Santiago 1:5.

Sarong aldaw, nakiolay si Magdalena sa sarong maestra na iginagalang an saiyang paniniwala kun puede niang ipasale sa klase an video na Jehovah’s Witnesses​—The Organization Behind the Name. * Nag-oyon dian an maestra. Sa siring sinabihan ni Magdalena an saiyang mga kaklase: “Iinaareglo ko na an saro kong amigo mag-atubang nin 90 minutong programa sa klase. Kaiba dian an pasale sa video asin pagtokar manongod sa Mga Saksi ni Jehova. Gusto daw nindong mag-atender?” An gabos nagsimbag nin iyo. Si Magdalena asin si Wojciech, sarong eksperyensiadong bilog na panahon na ebanghelisador, nagpoon na mag-andam para sa pradyek.

An plano iyo na poponan an pag-atubang paagi sa 20 minutos na pahayag na basado sa brosyur na Jehovah’s Witnesses​—Who Are They? What Do They Believe? * na susundan nin sarong hapot-simbagan. Dangan ipapasale an video sa libreriya kan eskuelahan. An kada estudyante sa klase tatawan nin sarong regalo​—sarong dakulang sobre na may laog na nagkapirang brosyur, librong Questions Young People Ask​—Answers That Work, * asin nagkapirang pulyeto asin magasin.

Sa aldaw kan pag-atubang, kaiba sa mga nagdadangog an 14 kaklase, maestra, asin 4 na iba pang estudyante na natagbong yaon duman sa libreriya. Enot na ipinaliwanag ni Wojciech na an nagkapirang Polacong poeta asin parasurat naggamit kan banal na ngaran, an Jehova, sa saindang mga publikasyon. Sinambit man nia an nagkapirang lumang katesismo sa Katoliko na igwa kan ngaran nin Dios. Sa pagpaliwanag kan aktibidad kan Mga Saksi ni Jehova sa presenteng aldaw, ipinaheling nia an mga brosyur kan manlaenlaen na sangang opisina asin mga retrato kan dakol na Assembly Hall.

Suminunod an maogmang pag-orolay. Ginamit ni Magdalena asin Wojciech an Biblia sa pagsimbag sa mga hapot. Napahanga kaini an mga nagdadangog asin nakombensir sinda na an Mga Saksi ni Jehova dai naghuhulit kan sadiri nindang mga ideya. Ano an nagkapira sa mga hapot, asin paano iyan sinimbag?

Hapot: Kadakol sa Biblia nin malibog na pananaram asin metapora, na puedeng interpretaron sa manlaenlaen na paagi. Paano mahihimo na makapamuhay kaoyon kan sinasabi sa Biblia?

Simbag: May mga nagsasabi na an Biblia arog nin sarong biolin na puede mong tugtogon sa ano man na tono na gusto mo. Alagad isipa: Kun gusto mong maaraman kun ano an boot sabihon kan kagsurat sa saiyang mga tataramon, bako daw na pinakamarahay na hapoton na sana sia? Bakong arog kan gadan nang mga kagsurat nin  mga libro nin tawo, an Autor kan Biblia, si Jehova Dios, buhay. (Roma 1:​20; 1 Corinto 8:​5, 6) An konteksto nin sarong teksto puedeng magsabi kan tamang interpretasyon. Saro pa, an Biblia parateng nagtotokar nin iyo man sanang tema sa nagkapirang kabtang kaiyan, kaya makakatabang an pagkomparar kan mga ini. Sa siring tinotogotan niato na giyahan nin Dios an satong kaisipan, na garo baga sia mismo an nagpapaliwanag kan teksto sa sato. Paagi sa paggibo kaiyan, puede kitang makaaram asin makapamuhay kaoyon kan saiyang kabotan na ihinayag sa Biblia, bako daw?

Hapot: Ano an pagkakalaen kan mga Kristiano asin kan Mga Saksi ni Jehova?

Simbag: Mga Kristiano kami! Alagad imbes na maghingako sana na mga Kristiano, an Mga Saksi ni Jehova nagmamaigot na mamuhay kaoyon kan saindang tinutubod asin kan itinotokdo sa sainda nin Dios para sa kapakinabangan ninda. (Isaias 48:​17, 18) Mantang an gabos nindang katokdoan nakabasar sa Biblia, aram ninda na yaon sainda an katotoohan.​—Mateo 7:​13, 14, 21-​23.

Hapot: Taano ta dinodolok nindo an mga dai nindo kamidbid asin iiniinsistir na makipag-olay sa sainda? Bako daw na pagpirit iyan kan saindong pagtubod sa iba?

Simbag: Sa paghona nindo, sala daw kun may magalang na makikipag-olay sa saindo sa kalye asin hahagadon an saindong opinyon sa sarong bagay? (Jeremias 5:1; Sofonias 2:​2, 3) (Dangan idinemonstrar ni Wojciech asin Magdalena kun paano ninda kinakaolay an mga nag-aaragi kun baga may pagmakolog an Dios sa mga naapektaran sa nakaagi pa sanang pagbaha sa Polandia.) Pakatapos na madangog an opinyon nin saro, itinotokdo niamo an Biblia. Kun an saro habong makipag-olay, nagpapaaram kami sa saiya dangan minabalyo sa iba. (Mateo 10:11-​14) Iyan daw pagpirit sa iba na makipag-olay? O maninigo daw na an mga tawo dai na makipag-olay?

Hapot: Taano ta dai kamo nagseselebrar nin mga kapiestahan?

Simbag: Kinukuyog niamo an solamenteng pangyayari sa Biblia na ipinagboot sa samo na selebraron​—an Memorial kan kagadanan ni Jesu-Cristo. (1 Corinto 11:23-​26) Kun dapit sa mga kapiestahan, maaaraman nindo an manongod sa ginikanan kan mga ini paagi sa pagkonsulta sa mga ensiklopedya asin iba pang masasarigan na mga reperensia. Kun gigibohon nindo iyan, madali nindong masasabotan kun taano ta dai niamo sineselebrar an siring na mga okasyon.​—2 Corinto 6:​14-​18.

Dakol pang mga hapot an ihinapot asin sinimbag. An pag-orolay naghaloy na marhay na kinaipuhan na ioktaba an pagpasale kan video.

Ano an nagin reaksion kan mga estudyante? Togoti si Magdalena na sabihon sa sato: “Nasorpresa ako na an nagkapirang estudyante na parateng may kalokohan kun minagawe asin nagtutuyatuya sa iba naghapot nin seryosong mga hapot. Minsan ngani naghihingako sindang mga ateista, durante kan pag-orolay nagpahayag sinda nin pagtubod sa Dios!” An mga nag-atender may pagpapasalamat na inako an mga regalo​—may total na 35 libro, 63 na brosyur, asin 34 magasin an ikinapasakamot sa sainda.

Marahayon nanggad na mga resulta nin sarong pradyek sa eskuelahan! Bako sanang nakatabang iyan sa mga kaklase ni Magdalena na orog na mamidbid asin masabotan an Mga Saksi ni Jehova kundi inenkaminar man kaiyan an dakol na hoben na isip-isipon an manongod sa katuyohan nin buhay. Taano ta dai maghingoang tabangan an saindong mga kaklase na makanood nin orog manongod sa saindong tinutubod?

[Mga Nota sa Ibaba]

[Ritrato sa pahina 31]

Nag-aandam si Magdalena asin Wojciech para sa pag-orolay