“Padagos Kamong Magkaigwa nin Kosog sa Kagurangnan”
“Padagos Kamong Magkaigwa nin Kosog sa Kagurangnan”
“Padagos kamong magkaigwa nin kosog sa Kagurangnan asin sa kapangyarihan kan saiyang kosog.”—EFESO 6:10.
1. (a) Anong ekstraordinaryong labanan an nangyari mga 3,000 na taon na an nakaagi? (b) Taano ta si David an nanggana?
MGA 3,000 na taon na an nakaagi, naghampangan an duwang parapakilaban sa pag-oltanan nin duwang magkalaban na hukbo sa langtad nin ralaban. An nguhod sarong solteritong pastor na an ngaran David. An kahampang nia si Goliat, sarong lalaki na pambihira an kosog asin langkaw. An saiyang gubing na batbat mga 57 kilos an gabat, asin may dara siang dakulaon na budyak asin dakulang espada. Mayo lamang kasurusulog na pangalasag si David, asin an solamenteng armas nia sarong lagpitaw. Nainsulto an higanteng Filisteo na an Israelitang kalaban nia saro sanang solterito. (1 Samuel 17:42-44) Para sa mga nagmamasid sa mag-ibong na lado, garo baga segurado na an magigin resulta. Alagad bako pirme an makosog an nanggagana sa ralaban. (Eclesiastes 9:11) Si David an nanggana huli ta sia nakipaglaban paagi sa kosog ni Jehova. “Ki Jehova an ralaban,” an sabi nia. An rekord kan Biblia nagsasabi na “si David, paagi sa lagpitaw asin gapo, napatunayan na mas makosog sa Filisteo.”—1 Samuel 17:47, 50.
2. Sa anong klaseng pakikipaglaban kalabot an mga Kristiano?
2 An mga Kristiano dai nakikilaban sa pisikal na paagi. Minsan ngani sinda nakikipagkatoninongan sa gabos na tawo, sinda talagang nakikipaglaban sa sarong espirituwal na ralaban tumang sa makapangyarihan na marhay na mga kalaban. (Roma 12:18) Sa ultimong kapitulo kan saiyang surat sa mga taga Efeso, ilinadawan ni Pablo an sarong ralaban na kalabot an lambang Kristiano. Sia nagsurat: “Kita nakikipaggumolan, bakong tumang sa dugo asin laman, kundi tumang sa mga gobyerno, tumang sa mga autoridad, tumang sa mga namamahala sa kinaban sa kadikloman na ini, tumang sa maraot na mga puersang espiritu sa langitnon na mga lugar.”—Efeso 6:12.
3. Segun sa Efeso 6:10, ano an kaipuhan niato tanganing masegurado an satong panggagana?
3 An “maraot na mga puersang espiritu” na iyan iyo si Satanas asin an mga demonyo, na gustong raoton an satong relasyon ki Jehova Dios. Huling sinda mas makosog nanggad kisa sato, kita nasa kamugtakan na kaagid kan ki David, asin dai kita manggagana apuera sana kun madepende kita sa Dios para sa kosog. Tunay nanggad, sinasadol kita ni Pablo na “padagos [na] magkaigwa nin kosog sa Kagurangnan asin sa kapangyarihan kan saiyang kosog.” (Efeso 6:10) Pakatapos itao an konsehong iyan, ilinadawan kan apostol an espirituwal na mga probisyon asin an Kristianong mga kualidad na kaipuhan tanganing kita manggana.—Efeso 6:11-17.
4. Anong duwang prinsipal na punto an totokaron niato sa artikulong ini?
4 Siyasaton niato ngonyan an sinasabi kan Kasuratan manongod sa mga kakosogan asin taktika kan satong kalaban. Dangan totokaron niato an estratehiya sa pagdepensa na dapat niatong gamiton tanganing protehiran an satong sadiri. Kun susunodon niato an mga instruksion ni Jehova, makakakompiar kita na dai manggagana tumang sa sato an satong mga kalaban.
Pakipaggumolan Tumang sa Maraot na mga Puersang Espiritu
5. Paanong an paggamit kan terminong “nakikipaggumolan” sa Efeso 6:12 nagpapangyaring maaraman niato an estratehiya ni Satanas?
5 Ipinapaliwanag ni Pablo na kita “nakikipaggumolan . . . tumang sa maraot na mga puersang espiritu sa langitnon na mga lugar.” Siempre, an pangenot na maraot na espiritu iyo si Satanas na Diablo, “an namamahala sa mga demonyo.” (Mateo 12:24-26) Ilinaladawan kan Biblia an satong pakikipaglaban na ‘pakikipaggumolan.’ Sa mga kompetisyon na gumolan sa suanoy na Grecia, an lambang partisipante naghihingoang halean nin panimbang an saiyang kalaban tanganing itumba ini. Kaagid kaiyan, gusto kan Diablo na mawaran kita nin panimbang sa espirituwal. Paano nia ini magigibo sa sato?
6. Ipaheling paagi sa Kasuratan kun paanong an Diablo puedeng gumamit nin manlaenlaen na taktika tanganing paluyahon an satong pagtubod.
6 An Diablo puedeng humiro na garo halas, nagngangarob na leon, o anghel nin liwanag pa ngani. (2 Corinto 11:3, 14; 1 Pedro 5:8) Puede siang gumamit nin mga tawo tanganing lamagon o paluyahon an satong boot. (Kapahayagan 2:10) Huling kontrolado ni Satanas an bilog na kinaban, puede niang aprobetsaran an mga kamawotan asin pan-akit kaiyan tanganing siodon kita. (2 Timoteo 2:26; 1 Juan 2:16; 5:19) Puede niang gamiton an kinabanon o apostatang kaisipan tanganing ilagalag kita, kun paanong dinaya nia si Eva.—1 Timoteo 2:14.
7. Ano an mga limitasyon kan mga demonyo, asin igwa kita nin anong mga bentaha?
7 Minsan ngani garo baga nakakalunos an mga armas asin kapangyarihan ni Satanas asin kan saiyang mga demonyo, may mga limitasyon iyan. Dai kita puedeng puersahon kan maraot na mga espiritung ini na gumibo nin maraot na mga bagay na nakakapamondo sa satong langitnon na Ama. Igwa kita nin sadiring boot, asin kontrolado niato an satong isip asin paghiro. Dugang pa, dai kita nakikilaban nin solo. An nagin totoo kan panahon ni Eliseo totoo man sa satong kaaldawan: “Mas dakol an nasa sato kisa nasa sainda.” (2 Hade 6:16) Inaasegurar kita kan Biblia na kun kita mapasakop sa Dios asin tutumangon an Diablo, sia madulag sa sato.—Santiago 4:7.
Aram an mga Pakana ni Satanas
8, 9. Anong mga pagbalo an ginibo ni Satanas ki Job tanganing raoton an saiyang integridad, asin anong espirituwal na mga peligro an napapaatubang sa sato ngonyan?
8 Bako kitang ignorante sa mga pakana ni Satanas huli ta ihinahayag kan Kasuratan an saiyang pundamental na mga taktika. (2 Corinto 2:11) Tumang sa matanos na tawong si Job, an Diablo naggamit nin grabeng mga problema sa pagbuhay, pagkagadan nin mga namomotan, pagtumang nin kapamilya, pisikal na pagdusa, asin daing basehan na pagkritika nin falsong mga katood. Si Job nagmondo nin makuri asin nagsaboot na binayaan na sia nin Dios. (Job 10:1, 2) Minsan ngani tibaad dai man direktang gamiton ni Satanas an mga problemang ini ngonyan, an siring na mga kasakitan talagang nakakaapektar sa dakol na Kristiano, asin puede iyan na aprobetsaran kan Diablo.
9 An espirituwal na mga peligro marikas na duminakol sa panahon na ini kan katapusan. Nabubuhay kita sa sarong kinaban na dian an espirituwal na mga pasohan nasasalidahan kan materyal na mga pinag-aaabot. Daing ontok na ipinapaheling kan media an bawal na sekso bilang gikanan nin kaogmahan imbes na kamondoan. Asin an mayoriya nagin “mga mamomoton sa kasingawan imbes na mga mamomoton sa Dios.” (2 Timoteo 3:1-5) Puedeng isapeligro kan kaisipan na ini an satong espirituwal na pagkatimbang kun dai kita ‘makikipaglaban nin maigot para sa pagtubod.’—Judas 3.
10-12. (a) Ano an sarong patanid na itinao ni Jesus sa saiyang ilustrasyon kan parasabwag? (b) Iilustrar kun paano puedeng malimitaran an pagpahalaga sa espirituwal na mga bagay.
10 An saro sa pinakamapangganang mga taktika ni Satanas iyo an pagpangyari sa sato na mabangkag sa kinaban na ini asin sa materyalistikong mga pinag-aaabot kaiyan. Sa saiyang ilustrasyon kan parasabwag, nagpatanid si Jesus na sa nagkapirang kamugtakan “an kahaditan kan sistemang ini nin mga bagay asin an mapandayang kapangyarihan nin kayamanan minapuot kan tataramon [kan Kahadean].” (Mateo 13:18, 22) An termino sa Griego na trinadusir digdi na “minapuot” nangangahulogan na “biyong minatilok.”
11 Sa mga kadlagan sa tropiko, an saro puedeng makanompong nin higuerrang naninilok. Luway-luway na nagdadakula iyan mantang pinupuropotan kaiyan an sarong poon nin kahoy. Dikit-dikit, kukurapotan kan tinanom na iyan an poon nin kahoy paagi sa saiyang mga gamot na paposog nang paposog. Sa kahurihurihi sinusupsop kan kadakol na gamot kan higuerrang naninilok an kadaklan na sustansia sa daga sa may poon kan kahoy, mantang an liwanag dai na makataros sa poon kan kahoy huli sa marambong na mga dahon kan higuerra. Sa katapustapusi, an nakukurapotan na poon nin kahoy nagagadan.
12 Sa kaagid na paagi, an mga kahaditan sa sistemang ini asin an paghanap nin kayamanan patin maginhawang estilo nin pamumuhay puedeng luway-luway asin paorog nang paorog na makaubos kan satong panahon asin kosog. Huling nalilingling na kita sa mga bagay kan kinaban, tibaad madali na sana niatong mapabayaan an personal na pag-adal sa Biblia asin magin nang ugale an pagpalta sa Kristianong mga pagtiripon, sa siring dai na nakakakakan nin espirituwal na kakanon. Nasasalidahan na ngonyan nin materyalistikong mga pasohan an espirituwal na mga aktibidad, asin sa katapustapusi kita nagigin madaling mabiktima ni Satanas.
Kaipuhan Kitang Marigon na Manindogan
13, 14. Paano kita kaipuhan na manindogan kun tinutumang ni Satanas?
13 Sinadol ni Pablo an mga kapagtubod na ‘marigon na manindogan tumang sa mga pakana kan Diablo.’ (Efeso 6:11) Siempre, dai niato kayang daogon an Diablo asin an saiyang mga demonyo. Ki Jesu-Cristo itinao nin Dios an trabahong iyan. (Kapahayagan 20:1, 2) Minsan siring, sagkod na dai pa hinahale si Satanas, dapat kitang ‘marigon na manindogan’ tanganing dai kita madaog kan saiyang mga pagsalakay.
14 Idinoon man ni apostol Pedro an pangangaipong marigon na manindogan tumang ki Satanas. “Magmata kamo, magpuka kamo,” an isinurat ni Pedro. “An saindong kaiwal, an Diablo, naglalakaw na siring sa nagngangarob na leon, na naghahanap nin masisiba. Alagad tumangon sia nindo, na marigon sa pagtubod, sa pakaaram na an siring man na mga pagtios nangyayari sa bilog na kasararoan nin saindong mga tugang sa kinaban.” (1 Pedro 5:8, 9) An totoo, an suporta kan satong espirituwal na mga tugang na lalaki asin babae importante tanganing kita marigon na makapanindogan kun sumalakay an Diablo siring sa nagngangarob na leon.
15, 16. Magtao nin halimbawa sa Kasuratan na nagpapaheling kun paanong an suporta kan mga kapagtubod makakatabang sa sato na marigon na manindogan.
15 Kun magngarob sa kaawagan nin Aprika an sarong haraning leon, tibaad an gigibohon nin usa dumalagan parayo nin marikason sagkod na mayo na sinda sa peligro. Minsan siring, an mga elepante nagtatao nin halimbawa nin pagsuportar kan saro sa saro. An librong Elephants—Gentle Giants of Africa and Asia nagpapaliwanag: “An sarong paagi nin depensa na parateng ginagamit kan tipikong grupo nin mga elepante iyo na minataraed sinda nin pabilog, na an mga dakula na an nakahampang sa peligro sa luwas asin an aki pang mga elepante an protehido sa laog kan sirkulo.” Kun napapaatubang na sa siring na pagpaheling nin kosog asin suporta, bihira nang sumalakay an mga leon dawa sa mga aki pang elepante.
16 Kun hinuhuma ni Satanas asin kan saiyang mga demonyo, kaipuhan niatong magdanay na iribanan sa kaagid na paagi, na daramay kaiba an satong mga tugang na marigon an pagtubod. Rinekonoser ni Pablo na may nagkapirang kapwa Kristiano na nagin “tabang na nagpapakosog” sa saiya durante kan saiyang pagkabilanggo sa Roma. (Colosas 4:10, 11) An termino sa Griego na trinadusir na “tabang na nagpapakosog” minalataw nin sarong beses sana sa Kristianong Griegong Kasuratan. Segun sa Expository Dictionary of New Testament Words ni Vine, “an pormang berbo kan terminong iyan nangangahulogan nin mga bolong na nakakahale nin haldat.” Siring sa pampaginhawang panlahid, an suporta kan maygurang na mga nagsasamba ki Jehova puedeng makaina sa kolog na causa nin emosyonal o pisikal na pagsakit.
17. Ano an makakatabang sa sato na magin maimbod sa Dios?
17 An pamparigon sa boot hale sa mga kapwa Kristiano ngonyan puedeng makapakosog sa satong determinasyon na maimbod na paglingkodan an Dios. Nangorognang galagang tumao nin espirituwal na tabang an Kristianong kamagurangan. (Santiago 5:13-15) Kabilang sa mga pantabang tanganing magin maimbod an regular na pag-adal sa Biblia asin pag-atender sa Kristianong mga pagtiripon, asamblea, asin kombension. An satong dayupot na relasyon sa Dios nakakatabang sa sato na magdanay na maimbod sa saiya. Tunay nanggad, kita man nagkakakan, nag-iinom, o ano pa man an ginigibo ta, maninigong mawoton niato na gibohon an gabos na bagay sa ikakamuraway nin Dios. (1 Corinto 10:31) Naturalmente, an mapagngayongayong pagsarig ki Jehova mahalagang marhay tanganing magdanay sa dalan na nakakapaogma sa saiya.—Salmo 37:5.
18. Taano ta dai kita maninigong umontok dawa pinapanluya kita nin makamomondong mga kamugtakan?
18 Kun minsan minasalakay si Satanas kun kita bakong makosog sa espirituwal. An sarong leon minaatake sa sarong nanluluyang hayop. An mga problema sa pamilya, kasakitan sa pagbuhay, o helang puedeng makaubos kan satong espirituwal na kosog. Alagad dai kita mag-ontok sa paggibo kan nakakapaogma sa Dios, ta si Pablo nagsasabi: “Kun noarin ako maluya, saka man ako mapuersa.” (2 Corinto 12:10; Galacia 6:9; 2 Tesalonica 3:13) Ano an boot niang sabihon? An boot niang sabihon kayang hipnoan kan kapangyarihan nin Dios an satong mga kaluyahan bilang tawo, kun kita maasa ki Jehova para sa kosog. An panggagana ni David tumang ki Goliat nagpapaheling na kayang pakosogon asin talagang pinapakosog nin Dios an saiyang banwaan. An Mga Saksi ni Jehova sa presenteng aldaw makakapagpatunay na sa mga panahon nin grabeng krisis, namatean ninda an nagpapakosog na kamot nin Dios.—Daniel 10:19.
19. Magtao nin halimbawa na nagpapaheling kun paano puedeng pakosogon ni Jehova an saiyang mga lingkod.
19 Mapadapit sa suporta na itinao nin Dios sa sainda, nagsurat an sarong mag-agom: “Sa nag-aging mga taon, naglingkod kami ki Jehova bilang mag-agom asin nagkamit nin dakol na bendisyon patin dakol kaming nakamidbid na marahayon na tawo. Sinanay asin pinakosog man kami ni Jehova na mapangganang matagalan an mga kasakitan. Arog ni Job, dai mi pirmeng nasasabotan kun taano ta siring kaiyan an mga nangyayari, alagad talagang aram niamo na si Jehova pirmeng yaon tanganing tabangan kami.”
20. Anong prueba sa Kasuratan an nagpapaheling na pirmeng sinusuportaran ni Jehova an saiyang banwaan?
20 An kamot ni Jehova bakong halipoton tanganing suportaran asin pakosogon an saiyang maimbod na banwaan. (Isaias 59:1) Si salmista David nag-awit: “Si Jehova nagtatabang sa gabos na napupukan, asin binabangon an gabos na napapalaob.” (Salmo 145:14) Sa katunayan, “sa aroaldaw dinadara [kan satong langitnon na Ama] an pasan para sa sato” asin itinatao nia kun ano talaga an kaipuhan niato.—Salmo 68:19.
Kaipuhan Niato an “Bilog na Pangalasag Hale sa Dios”
21. Paano idinoon ni Pablo an pangangaipo para sa espirituwal na pangalasag?
21 Natokar na niato an nagkapira sa mga paagi ni Satanas asin nasabotan niato an pangangaipo na marigon na manindogan kun napapaatubang sa saiyang mga pagsalakay. Ngonyan dapat na tokaron niato an saro pang mahalagang marhay na probisyon tanganing mapangganang ikadepensa niato an satong pagtubod. Duwang beses sa saiyang surat sa mga taga Efeso, nasambitan ni apostol Pablo an sarong mahalagang marhay na bagay tanganing marigon na makapanindogan tumang sa mga pakana ni Satanas asin manggana sa satong pakipaggumolan tumang sa maraot na mga puersang espiritu. Si Pablo nagsurat: “Isulog nindo an bilog na pangalasag hale sa Dios tanganing kamo marigon na makapanindogan tumang sa mga pakana kan Diablo . . . Gamita nindo an bilog na pangalasag hale sa Dios, tanganing makapanumang kamo sa maraot na aldaw asin, pakagiboha nindo nin lubos kan gabos na bagay, marigon na tumindog.”—Efeso 6:11, 13.
22, 23. (a) Ano an kabale sa satong espirituwal na pangalasag? (b) Ano an totokaron niato sa sunod na artikulo?
22 Iyo, kaipuhan niatong isulog “an bilog na pangalasag hale sa Dios.” Kan isurat ni Pablo an saiyang surat sa mga taga Efeso, ginuguardiahan sia nin sarong Romanong soldados, na tibaad kun beses nakasulog nin bilog na pangalasag. Minsan siring, an pasabong nin Dios an nagpahiro sa apostol na ipaliwanag an espirituwal na pangalasag na kaipuhan na marhay kan lambang lingkod ni Jehova.
23 Kabale sa tao nin Dios na pangalasag na ini an mga kualidad na dapat yaon sa sarong Kristiano siring man an espirituwal na mga probisyon na itinatao ni Jehova. Sa sunod na artikulo, sisiyasaton niato an kada kabtang kan espirituwal na pangalasag. Makakatabang ini sa sato na maaraman kun gurano na kita kaandam para sa satong espirituwal na pakikilaban. Kadungan kaiyan, maheheling niato kun paano kita matatabangan kan marahayon na halimbawa ni Jesu-Cristo na manggana sa paglaban ki Satanas na Diablo.
Ano an Isisimbag Nindo?
• Anong pakikipaglaban an ginigibo kan gabos na Kristiano?
• Iladawan an nagkapira sa mga taktika ni Satanas.
• Paano makakapakosog sa sato an suporta kan mga kapagtubod?
• Kiisay na kosog kita dapat magsarig, asin taano?
[Mga Hapot Para sa Pag-adal]
[Mga Ritrato sa pahina 11]
An mga Kristiano ‘nakikipaggumolan tumang sa maraot na mga puersang espiritu’
[Ritrato sa pahina 12]
An mga kahaditan kan sistemang ini puedeng makapuot sa tataramon kan Kahadean
[Ritrato sa pahina 13]
An mga kapwa Kristiano puedeng magin “tabang na nagpapakosog”
[Ritrato sa pahina 14]
Namimibi daw kamo sa Dios para sa kosog?