An mga Milagro ni Jesus—Totoo o Eroestorya?

“DINARA sa saiya [ki Jesu-Cristo] nin mga tawo an dakol na sinaniban nin demonyo; asin pinaluwas nia an mga espiritu paagi sa sarong tataramon, asin pinaomayan nia an gabos na may kamatean.” (Mateo 8:16) “Sia [si Jesus] nagmata asin sinaway an doros patin sinabihan an dagat: ‘Toninong! Ontok!’ Asin an doros naghupa, asin nagkaigwa nin dakulang pagkalma.” (Marcos 4:39) Ano an opinyon nindo sa mga tataramon na ini? Nagtutubod daw kamo na naglaladawan iyan nin totoo asin makasaysayan na mga pangyayari, o nagsasaboot daw kamo na iyan talinhaga sanang mga osipon asin eroestorya sana?

Dakol ngonyan an nagpapahayag nin grabeng mga pagduda manongod sa pagigin totoo sa kasaysayan kan mga milagro ni Jesus. Huli sa kapanahonan na ini kan teleskopyo asin mikroskopyo, nin eksplorasyon sa espasyo asin nin inhenyeriya henetika, garo baga dai na tinutubod an mga bareta manongod sa mga milagro asin mga ngangalasan na gibo nin Dios.

May mga nagsasaboot na an mga pagkasaysay dapit sa mga milagro imahinasyon sana o talinhaga. Oyon sa kagsurat nin sarong libro na naghihingakong siniyasat an “totoong” Jesus, an mga estorya manongod sa mga milagro ni Cristo “pan-enganyar” sana tanganing palakopon an Kristianismo.

An iba man minamansay an mga milagro ni Jesus bilang direktang pandadaya. Kun beses ki Jesus mismo isinasahot an panloloko. Oyon ki Justinong Martir kan ikaduwang siglo C.E., an mga nagkikritikar ki Jesus “nangahas pa nganing apodon siang sarong madyikero asin nandadaya sa mga tawo.” May mga nag-aalegar na “dai ginibo [ni Jesus] an saiyang mga milagro bilang sarong  propetang Judio, kundi bilang sarong madyikero, saro na sinanay sa paganong mga templo.”

Kun Ano an Kahulogan kan Imposible

Tibaad nagsasaboot kamo na sa likod kan siring na mga pagduda, igwa nin sarong pundamental na dahelan kun taano ta an mga tawo nagduduwaduwang maniwala sa mga milagro. Depisil asin imposible pa ngani para sainda na akoon an ideya na puedeng mga puersang lihis sa natural an naggigibo nin milagro. “An mga milagro dai man talaga nangyayari​—dai talaga,” an sabi nin sarong hoben na nagsasabing sia sarong agnostiko. Dangan kinotar nia an mga tataramon kan pilosopong Eskoses kan ika-18 siglo na si David Hume, na nagsurat: “An milagro sarong pagbalga sa mga ley nin naturalesa.”

Minsan siring, dakol an mag-iingat na marhay sa pag-insistir na imposible an sarong pangyayari. Inaapod kan The World Book Encyclopedia an milagro na “sarong pangyayari na dai kayang ipaliwanag paagi sa aram na mga ley nin naturalesa.” Paagi sa pakahulogan na iyan, an pagbiahe sa espasyo, komunikasyon paagi sa radyo telegrapiya, asin pagnabigar paagi sa satelayt magigin garo baga “mga milagro” para sa dakol na tawo kan nakaaging siglo sana. Daing duwa-duwa na bakong madonong na iinsistir na imposible an mga milagro huli sana ta dai niato ikapaliwanag iyan basado sa presenteng kaaraman.

Kun sisiyasaton niato an nagkapirang ebidensia sa Kasuratan may koneksion sa mga milagro na iinaatribwir ki Jesu-Cristo, ano an manonompongan niato? An mga milagro daw ni Jesus totoo o eroestorya?