An Angat sa Pagsasanay sa Aki Ngonyan

SA KAMATANGAAN nin banggi, an kagsadiri nin sarong restawran nag-aandam nang magsira asin mag-uli. Dangan duwang babae asin sarong aki an luminaog asin nag-order nin kakanon. Huling pagalon na, an kagsadiri natentaran na sabihon sainda na sirado na an restawran, alagad nagdesisyon sia na serbihan sinda. Mantang an duwang babae nag-oolay asin nagkakakan, an aki nagdudurudalagan sa laog kan restawran, na ihinoholog an mga biskuit sa salog asin rinoronot ini kan saiyang bitis. Imbes na sawayon sia, an ina kan aki naghuyom sana. Kan huminale na an mga nagkarakan, an pagal-pagal nang kagsadiri kaipuhan pang linigon an warak.

Siring kan posibleng marhay na aram nindo, malinaw na ipinapaheling kan aktuwal na situwasyon na ini na sa dakol na pamilya, an pagsasanay sa aki dai ginigibo nin epektibo. Nagkakalaenlaen an mga dahelan. May mga magurang na kinokonsinte an saindang mga aki na gibohon an gusto ninda, na nagsasaboot na an mga aki maninigong padakulaon na may katalingkasan. O huling sinda sibot na marhay, an mga magurang mayo nin panahon na tawan an saindang mga aki nin maingat na atension asin kinakaipuhan na pagsasanay. May mga magurang na nagsasaboot na an pag-eskuela kan saindang aki an pinakaimportante, kaya tinatawan ninda an aki nin haros daing limiteng katalingkasan basta makakua sia nin haralangkaw na marka sa eskuelahan asin makalaog sa sarong midbid na kolehio.

Pero, may mga nagsasabi na an pamantayan sa kun ano an mahalaga kan mga magurang asin kan sosyedad sa pankagabsan nangangaipong pakarhayon. Nagrarason sinda na an mga aki naiimbuelto na sa gabos na klase nin krimen asin an kadahasan sa eskuelahan nag-oorog aroaldaw. Huli kaini, idinoon nin prinsipal sa sarong eskuelahan na intermedia sa Seoul, Republika nin Korea, na maninigong ipaorog an pagsasanay sa personalidad. Sia nagsabi: “Pagkatapos nindong mapatalubo an sarong marahay na ugale masunod na an pagkua nin kaaraman.”

An dakol na magurang na gustong paeskuelahon sa kolehio asin magin mapanggana sa buhay an saindang aki nagbubungogbungogan sa mga patanid. Kun kamo sarong magurang, gusto nindong magin anong klaseng tawo an saindong aki? Saro daw na nasa edad na na may sentido nin moralidad asin paninimbagan? Saro daw na makonsiderasyon sa iba, madaling makibagay, asin may positibong aktitud? Kun iyo, estudyare tabi an masunod na artikulo.