Pag-asikaso sa mga May Edad Na—Sarong Kristianong Responsibilidad

“Dawa sagkod sa kagurangan nin saro ako an Saro na iyo man sana; asin sagkod sa pagkaubanon nin saro ako mismo padagos na magpapasan.”​—ISAIAS 46:4.

1, 2. Ano an kalaenan kan pagmalasakit kan satong langitnon na Ama sa pagmalasakit nin mga magurang na tawo?

INAATAMAN nin dedikadong mga magurang an saindang mga aki sa panahon nin pagkaomboy, sa pagkaniaki, asin sa mga taon nin pagkatinedyer. Dawa kun an mga hoben magkaedad na asin magkaigwa na nin sadiri nindang pamilya, an saindang ama asin ina padagos na nagtatao sainda nin mamomoton na atension asin suporta.

² Minsan ngani limitado an magigibo nin mga tawo para sa saindang mga aki, an satong langitnon na Ama pirmeng nakakatao nin mamomoton na atension asin suporta sa saiyang maimbod na mga lingkod. Kaolay an saiyang piniling banwaan kan suanoy na mga panahon, si Jehova nagsabi: “Dawa sagkod sa kagurangan nin saro ako an Saro na iyo man sana; asin sagkod sa pagkaubanon nin saro ako mismo padagos na magpapasan.” (Isaias 46:4) An mga tataramon na ini nakakapakosog nanggad liwat sa boot para sa gurang nang mga Kristiano! Dai binabayaan ni Jehova an mga nagdadanay na maimbod sa saiya. Imbes, nanunuga siang sususteniran, susuportaran, asin gigiyahan sinda sa bilog nindang buhay, sagkod pa ngani na gumurang.​—Salmo 48:14.

3. Ano an pag-oolayan sa artikulong ini?

³ Paano niato maaarog an mamomoton na pagmalasakit ni Jehova sa mga may edad na? (Efeso 5:​1, 2) Pag-olayan niato an mga paagi kun paano maaasikaso nin mga aki, mga paraataman sa kongregasyon, asin indibiduwal na mga Kristiano an mga pangangaipo nin gurang nang mga miembro kan satong pambilog na kinaban na kasararoan nin magturugang.

An Responsibilidad Niato Bilang mga Aki

4. Ano an responsibilidad nin Kristianong mga aki sa saindang mga magurang?

⁴ “Tawan mo nin onra an saimong ama asin an  saimong ina.” (Efeso 6:2; Exodo 20:12) Paagi sa simple pero makahulogan na kotasyon na ini hale sa Hebreong Kasuratan, ipinagirumdom ni apostol Pablo sa mga aki an responsibilidad ninda sa saindang mga magurang. Alagad paano an mga tataramon na ini minaaplikar sa pag-asikaso sa mga may edad na? An sarong nakakaogmang halimbawa kaidtong mga panahon bago kan mga Kristiano makakatabang sa sato na simbagon an hapot na ini.

5. (a) Ano an nagpapaheling na dai nalingawan ni Jose an saiyang mga obligasyon sa magurang? (b) Ano an boot sabihon nin pagtao nin onra sa satong mga magurang, asin anong marahayon na halimbawa an itinao ni Jose sa bagay na ini?

⁵ Sa laog nin labing 20 taon, si Jose mayo nin komunikasyon sa saiyang may edad nang ama, an patriarkang si Jacob. Minsan siring, malinaw na dai nawara ni Jose an saiyang pagkamoot ki Jacob bilang magurang. Sa katunayan, kan magpamidbid si Jose sa saiyang mga tugang, sia naghapot: “Ano buhay pa an sakong ama?” (Genesis 43:​7, 27; 45:3) Kan panahon na idto, an daga nin Canaan apektadong marhay nin tiggutom. Sa siring, nagpatogon si Jose sa saiyang ama, na an sabi: “Pumadigdi ka sa sakuya. Dai ka mag-atraso. Asin mag-erok ka sa daga nin Gosen, asin magdanay ka sa harani ko . . . Asin tatawan taka nin kakanon duman.” (Genesis 45:9-11; 47:12) Iyo, kabale sa pagtao nin onra sa gurang nang mga magurang an pagprotehir sa sainda asin pagsuportar sa sainda sa materyal kun dai na ninda kayang sustentohan an saindang sadiri. (1 Samuel 22:1-4; Juan 19:25-27) Maogmang inako ni Jose an responsibilidad na ini.

6. Paano ipinahayag ni Jose an tunay na pagkamoot sa saiyang ama, asin paano niato maaarog an saiyang halimbawa?

⁶ Sa bendisyon ni Jehova, si Jose nagin saro sa pinakamayaman asin pinakamakapangyarihan na tawo sa Egipto. (Genesis 41:40) Alagad dai nia inisip na sia importanteng marhay o sibot na marhay tanganing tawan nin onra an saiyang 130 anyos na ama. Kan maaraman na padangadang na si Jacob (o Israel), “ipinaandam ni Jose an saiyang karuwahe asin sinabat sa Gosen si Israel na saiyang ama. Kan puminaheling sia sa saiya tolos-tolos niang kinugos an saiyang liog asin nagparahibi sa saiyang liog.” (Genesis 46:​28, 29) An pagsabat na ini bako sanang sarong pormalidad na pagrespeto. Namotan na marhay ni Jose an saiyang gurang nang ama asin dai sia nasupog na ipahayag an saiyang pagkamoot. Kun igwa kita nin naggugurang nang mga magurang, kita daw bako man na kuripot sa satong mga pagpahayag nin kapadangatan sa sainda?

7. Taano ta mawot ni Jacob na duman sia sa Canaan ilobong?

⁷ An debosyon ni Jacob ki Jehova nagdanay na makosog sagkod sa katapusan kan saiyang buhay. (Hebreo 11:21) Huli sa pagtubod nia sa mga panuga nin Dios, hinagad ni Jacob na an saiyang bangkay ilobong sa Canaan. Tinawan nin onra ni Jose an saiyang ama paagi sa pag-otob sa kahagadan na ini, apisar kan kalabot na darudakulang gastos asin paghihingoa.​—Genesis 47:29-31; 50:7-14.

8. (a) Ano an pangenot na nagmomotibar sa sato sa pag-asikaso sa may edad nang mga magurang? (b) Ano an ginibo nin sarong bilog na panahon na lingkod tanganing asikasohon an saiyang naggugurang nang mga magurang? (Helingon an kahon sa pahina 17.)

⁸ Ano an nagmotibar ki Jose na asikasohon an saiyang ama? Minsan ngani nakakontribwir digdi an pagkamoot asin pakamate nin utang na boot sa nagtao sa saiya nin buhay saka nagpadakula sa saiya, daing duda na si Jose nakamate man nin odok na pagmawot na paogmahon si Jehova. Kaya maninigo na iyo man kita. Si Pablo nagsurat: “Kun an siisay man na balo igwa nin mga aki o makoapo, pabayaan nguna an mga ini na makanood na maggibo nin diosnon na debosyon sa saindang kasararo sa harong asin padagos na magtao nin nanonongod na balos  sa saindang mga magurang asin apoon, huli ta ini makawiwili sa pagheling nin Dios.” (1 Timoteo 5:4) Tunay nanggad, an pagkamoot ki Jehova asin reberensial na takot sa saiya an mapahiro sa sato na asikasohon an satong naggugurang nang mga magurang, ano man na mga kadepisilan an tibaad kalabot sa paggibo kaiyan. *

Kun Paano Ipinapaheling nin Kamagurangan na Sinda Nagmamalasakit

9. Siisay an ninombrahan ni Jehova na magpastor sa aripompon, kabale an may edad nang mga Kristiano?

⁹ Kan harani na an katapusan kan saiyang halawig na buhay, sinambit ni Jacob si Jehova bilang “an tunay na Dios na nagpapastor sa sako durante kan bilog kong pagkabuhay sagkod sa aldaw na ini.” (Genesis 48:15) Ngonyan, pinapastoran ni Jehova an saiyang mga lingkod digdi sa daga paagi sa Kristianong mga paraataman, o kamagurangan, na ginigiyahan kan saiyang Aki, si Jesu-Cristo, “an poon na pastor.” (1 Pedro 5:2-4) Paano maaarog kan mga paraataman si Jehova mantang inaasikaso ninda an gurang nang mga miembro kan aripompon?

10. Ano an ginibo tanganing tumao nin materyal na tabang sa may edad nang mga Kristiano? (Helingon an kahon sa pahina 19.)

¹⁰ Pagkapoon pa sana kan Kristianong kongregasyon, an mga apostol nagnombrar nin “pitong lalaki na marahay an dangog . . . na pano nin espiritu asin kadonongan” tanganing mag-asikaso sa “aroaldaw na pagwaras” nin kakanon sa daing sukat na Kristianong mga babaeng balo. (Gibo 6:1-6) Kan huri, ininstruksionan ni Pablo an paraataman na si Timoteo na iiba an arogan na gurang nang mga babaeng balo sa lista kan mga tinogotan na mag-ako nin materyal na tabang. (1 Timoteo 5:​3, 9, 10) Kaagid kaiyan, an mga paraataman sa kongregasyon ngonyan gikan sa boot na nag-aareglo nin praktikal na tabang para sa may edad nang mga Kristiano kun kinakaipuhan ini. Minsan siring, bako sana iyan an kalabot sa pag-asikaso sa maimbod na mga gurang.

11. Ano an sinabi ni Jesus manongod sa daing sukat na babaeng balo na nagtao nin sadit na kontribusyon?

¹¹ Kan madali nang matapos an saiyang ministeryo sa daga, nagtukaw si Jesus sa templo asin “pinagmasdan kun paano an kadaklan naghoholog nin kuarta sa mga kaha.” Dangan may saro na nakaapod kan saiyang atension. Nagsabi an pagkasaysay: “Sarong dukhang babaeng balo an nagdatong asin nagholog nin duwang saradit na sinsilyo, na kadikiton an halaga.” Pinarani ni Jesus sa saiya an saiyang mga disipulo asin sinabi sa sainda: “Totoong sinasabi ko sa saindo na an dukhang babaeng balong ini nagholog nin labi kisa sa gabos na nagholog nin kuarta sa mga kaha; huli ta sinda gabos nagholog gikan sa saindang kalabihan, alagad sia, gikan sa saiyang kadaihan, nagholog kan gabos na yaon sa saiya, an saiyang bilog na pagbuhay.” (Marcos 12:41-44) Kun sa kantidad, sadit an kontribusyon kan babaeng balo, alagad aram ni Jesus kun gurano an pagpahalaga kan saiyang langitnon na Ama sa siring na bilog na kalag na mga kapahayagan nin debosyon. Sa ibong  kan edad kan dukhang babaeng balo, dai inignoro ni Jesus an ginibo kaini.

12. Paano ikakapaheling kan kamagurangan an saindang apresasyon para sa ikinakatabang kan may edad nang mga Kristiano?

¹² Arog ki Jesus, dai iniignoro kan Kristianong mga paraataman an ginigibo kan mga may edad na tanganing paoswagon an tunay na pagsamba. May dahelan an kamagurangan na tawan nin komendasyon an mga gurang huli sa saindang kabtang sa ministeryo, sa saindang partisipasyon sa mga pagtiripon, sa saindang positibong impluwensia sa kongregasyon, asin sa saindang pakatagal. An sinserong kapahayagan nin pagparigon sa boot puedeng makatabang sa mga may edad na na makamate nin ‘dahelan na mag-ogma’ sa saindang sagradong paglilingkod, na sa siring linilikayan ninda an nakakapanluya sa boot na pagkokomparar sa nakakayang gibohon nin ibang Kristiano o sa sainda mismong mga nagigibo kaidto.​—Galacia 6:4.

13. Sa anong mga paagi puedeng gamiton kan kamagurangan an mga talento asin eksperyensia nin mga gurang?

¹³ Puedeng pasalamatan kan kamagurangan an mahalagang ikinakatabang kan gurang nang mga Kristiano paagi sa paggamit kan saindang eksperyensia asin mga talento. An arogan na mga may edad na puedeng gamiton paminsanminsan sa mga demonstrasyon o interbio. “An mga presente talagang odok na naghihinanyog kun iniinterbio ko an sarong gurang na tugang na lalaki o babae na nagpadakula nin mga aki sa katotoohan,” an sabi nin sarong magurang sa kongregasyon. An kamagurangan sa saro pang kongregasyon nagbareta na an sarong 71 anyos na tugang na babaeng payunir mapanggana sa pagtabang sa mga parahayag kan Kahadean na magin regular sa paglilingkod sa langtad. Ineenkaminar nia man sinda na gibohon an “pundamental na mga bagay,” arog baga kan pagbasa sa Biblia asin pan-aroaldaw na teksto dangan paghorophorop sa saindang binasa.

14. Paano ipinaheling nin sarong grupo nin kamagurangan an apresasyon sa sarong gurang nang kapwa paraataman?

¹⁴ Pinapahalagahan man kan kamagurangan an ikinakatabang nin gurang nang mga kapwa paraataman. Si Jose, na labi nang 70 anyos asin dakol nang dekada na naglilingkod bilang magurang sa kongregasyon, nag-agi nin mayor na operasyon kasuarin pa sana. Huli sa pamamalaymay pakatapos nin operasyon, inisip niang butasan an saiyang pribilehio nin paglilingkod bilang nangengenot na paraataman sa kongregasyon. “Nabigla ako sa reaksion kan ibang kamagurangan,” sabi ni Jose. “Imbes na akoon an  suhestion ko, hinapot ninda kun anong praktikal na tabang an kaipuhan ko tanganing padagos na maasikaso ko an sakong mga paninimbagan.” Sa tabang nin sarong mas nguhod na magurang sa kongregasyon, nakapadagos si Jose na magayagayang maglingkod bilang nangengenot na paraataman, asin ini nagin sarong bendisyon sa kongregasyon. An sarong kapwa magurang nagsabi: “Inaapresyar na marhay kan mga tugang an ginigibo ni Jose bilang magurang sa kongregasyon. Namomotan asin iginagalang ninda sia huli sa saiyang eksperyensia asin halimbawa nin pagtubod. Nakakarahay sia sa samong kongregasyon.”

Pagmalasakit sa Lambang Saro

15. Taano ta maninigong magin interesado an gabos na Kristiano sa ikakarahay kan may edad nang kairiba ninda?

¹⁵ Bako sanang mga aki na may gurang nang mga magurang asin nombradong mga lingkod an maninigo na magmalasakit sa mga may edad na. Ikinokomparar an Kristianong kongregasyon sa hawak nin tawo, si Pablo nagsurat: “Binaragay nin Dios an hawak, na tinawan nin orog na kagalangan an kabtang na nagkukulang, tanganing dai magkaigwa nin pagkabaranga dian sa hawak, kundi magkaigwa nin pararehong pangataman sa lambang saro an mga kabtang kaiyan.” (1 Corinto 12:​24, 25) An saro pang traduksion nagsasabi: “An gabos na manlaenlaen na kabtang kan [hawak dapat na] pararehong magmalasakit sa kapakanan nin lambang saro.” (Knox) Tanganing magpunsionar na may pagkaoroyon an Kristianong kongregasyon, an lambang miembro dapat na magmalasakit sa ikakarahay kan saiyang mga kapagtubod, kabale an mga may edad na.​—Galacia 6:2.

16. Paano niato ikakapaheling an interes sa mga may edad na kun kita nag-aatender sa Kristianong mga pagtiripon?

¹⁶ An Kristianong mga pagtiripon nagtatao nin marahayon na oportunidad na ipaheling an satong interes sa mga may edad na. (Filipos 2:4; Hebreo 10:​24, 25) Nagtatao daw kita nin panahon na makipag-olay sa mga gurang sa siring na mga okasyon? Minsan ngani angay na kumustahon an saindang kapakanan sa pisikal, puede daw kitang ‘maghiras nin espirituwal na balaog,’ tibaad paagi sa pag-estorya nin nakakapakosog na eksperyensia o ideya sa Kasuratan? Huling dai nang gayo nakakahiro an nagkapirang gurang, sarong kabootan na kita an rumani sa sainda imbes na halaton na sinda an rumani sa sato. Kun may problema sia sa pagdangog, tibaad kaipuhan kitang magtaram nin luway-luway asin malinaw. Asin tanganing magkaigwa nin totoong “pagparinigonan sa boot,” dapat kitang maghinanyog nin atento sa sinasabi kan gurang.​—Roma 1:​11, 12.

17. Paano niato ikakapaheling an satong pagmalasakit sa may edad nang mga Kristiano na dai nakakaluwas sa harong?

¹⁷ Paano kun an nagkapirang gurang dai makakaatender sa Kristianong mga pagtiripon? Ipinapaheling kan Santiago 1:27 na obligasyon niato na ‘atamanon an mga ilo asin babaeng balo sa saindang kasakitan.’ An sarong kahulogan kan berbo sa  Griego na trinadusir na “atamanon” iyo an “songkoon.” (Gibo 15:36) Asin inaapresyar nanggad kan mga may edad na an satong pagsongko! Mantang nakabilanggo sa Roma kaidtong mga 65 C.E., an “gurang nang lalaki” na si Pablo haros nagsosolo na. Mawot nia na maheling an saiyang kapwa trabahador na si Timoteo asin nagsurat: “Gibohon mo an bilog mong makakaya na pumadigdi tolos sa sako.” (Filemon 9; 2 Timoteo 1:​3, 4; 4:9) Minsan ngani bako sindang literal na mga bilanggo, an nagkapirang may edad na dai nakakaluwas sa harong huli sa mga problema sa salud. Tibaad garo man sana sinda nagsasabing, ‘Tabi, gibohon mo an pinakamakakaya mo na songkoon tolos ako.’ Hinihimate daw niato an siring na mga pakiolay?

18. Anong mga pakinabang an puedeng ibunga kan satong pagsongko sa mga may edad na?

¹⁸ Nungkang menoson an kapakipakinabang na mga epekto nin pagsongko sa sarong may edad nang tugang sa espirituwal. Kan nasa Roma an sarong Kristiano na an ngaran Onesiforo, maigot niang hinanap si Pablo, nanompongan sia, asin pakatapos kaiyan ‘parate nia siang pinaginhawa.’ (2 Timoteo 1:​16, 17) “Gustong-gusto kong makaibanan an mga hoben,” an sabi nin sarong may edad nang tugang na babae. “An pinakanagugustohan ko iyo na tinatrato ninda ako na siring sa miembro kan saindang pamilya. Napapakosog akong marhay kaiyan.” An saro pang gurang nang Kristiano nagsabi: “Talagang inaapresyar ko kun may nagpapadara sako nin kard, nag-aapod sako sa telepono nin pira sanang minuto, o nagsosongko sako nin madali lang. Garo iyan huyop nin preskong doros.”

Tinatawan ni Jehova nin Balos an mga Nagmamalasakit

19. Anong mga bendisyon an ibinubunga nin pagmalasakit sa mga may edad na?

¹⁹ An pagmalasakit sa mga gurang nagbubunga nin dakol na bendisyon. An pakiibaiba sa mga may edad na asin paggamit sa saindang kaaraman asin eksperyensia saro na mismong pribilehio. An mga nag-aasikaso sa sainda nakakaeksperyensia nin mas dakulang kaogmahan gikan sa pagtao, saka nakakamate sinda nin pagigin may nagiginibo asin nin panlaog na katoninongan huli sa pakaotob ninda sa saindang sono sa Kasuratan na responsibilidad. (Gibo 20:35) Dugang pa, an mga nag-aasikaso sa mga may edad na dai kaipuhan na matakot na sinda mismo papabayaan kun gurang na man sinda. An Tataramon nin Dios nag-aasegurar sa sato: “An matinaong kalag mismo patatabaon, asin an saro na sueltong nagbabaribi sa iba mismo man na sueltong mababaribian.”​—Talinhaga 11:25.

20, 21. Paano minamansay ni Jehova an mga nag-aasikaso sa mga may edad na, asin ano an maninigo na magin determinasyon niato?

²⁰ Tinatawan ni Jehova nin balos an may takot sa Dios na mga aki, mga paraataman, asin iba pang nagmamalasakit na Kristiano huli sa daing kaimotan na pag-asikaso sa mga pangangaipo kan may edad nang mga kapagtubod. Kaoyon kan talinhagang ini an siring na espiritu: “An nagpapaheling nin pabor sa hamak nagpapautang ki Jehova, asin an saiyang pagtratar Saiyang babayadan sa saiya.” (Talinhaga 19:17) Kun an pagkamoot an nagpapahiro sa sato na magpaheling nin pabor sa mga hamak asin dukha, an siring na pagtatao ibinibilang nin Dios na utang na babayadan nia nin mga bendisyon. Binabayadan man nia kita huli sa satong mamomoton na pagmalasakit sa satong gurang nang mga kapwa parasamba, na an dakol sa sainda ‘dukha dapit sa kinaban alagad mayaman sa pagtubod.’​—Santiago 2:5.

²¹ Bastante nanggad an ibinabayad nin Dios! Kabale dian an buhay na daing katapusan. Para sa dakulang mayoriya kan mga lingkod ni Jehova, iyan buhay na daing sagkod sa sarong paraisong daga, kun saen hahaleon na an mga epekto kan minanang kasalan asin ibabalik an dating kakosogan nin pagkahoben kan maimbod na mga may edad na. (Kapahayagan 21:3-5) Mantang hinahalat niato an maogmang panahon na iyan, logod na padagos niatong otobon an satong Kristianong responsibilidad na asikasohon an mga may edad na.

[Nota sa Ibaba]

Ano an Isisimbag Nindo?

• Paano matatawan nin onra kan mga aki an gurang nang mga magurang?

• Paano ipinapaheling kan kamagurangan an apresasyon sa gurang nang mga miembro kan aripompon?

• Ano an puedeng gibohon kan indibiduwal na mga Kristiano tanganing ipaheling an saindang tunay na interes sa mga may edad na?

• Anong mga bendisyon an ibinubunga kan pagmalasakit sa may edad nang mga Kristiano?

[Mga Hapot Para sa Pag-adal]

[Kahon sa pahina 17]

Kan Mangaipo nin Tabang an Saiyang mga Magurang

Si Philip naglilingkod bilang boluntaryong trabahador sa konstruksion sa Liberia kaidtong 1999 kan ibareta saiya na grabe an helang kan saiyang ama. Kombensido na dai makakaya kan saiyang ina na atubangon nin solo an problema, nagdesisyon sia na magpuli tanganing iareglo an medikal na pag-asikaso sa saiyang ama.

“Bakong pasil an magpuli,” an nagigirumdoman ni Philip, “alagad namatean ko na an enot kong obligasyon sa sakong mga magurang.” Durante kan suminunod na tolong taon, ibinalyo nia an saiyang mga magurang sa mas angay na harong asin sa tabang kan lokal na mga kapwa Kristiano pinakarhay nia an istaran tanganing ibagay sa partikular na mga pangangaipo kan saiyang ama.

An ina ni Philip mas andam na ngonyan na kayanon na atubangon an grabeng mga problema sa salud kan saiyang ama. Kasuarin pa sana, nahimo ni Philip na akoon an imbitasyon na magtrabaho bilang boluntaryo sa sangang opisina kan Mga Saksi ni Jehova sa Macedonia.

[Kahon sa pahina 19]

Dai Ninda Inignoro an Saiyang mga Pangangaipo

Kan si Ada, sarong 85 anyos na Kristianang taga Australia, dai na nakakaluwas sa saiyang harong huli sa maluyang salud, iinareglo kan kamagurangan sa kongregasyon na tumao nin asistensia. Nag-organisar sinda nin sarong grupo nin mga kapagtubod na makakatabang sa saiya. An mga tugang na lalaki asin babaeng ini naogmang asikasohon an mga trabaho na arog nin paglinig, paglaba, pagluto, asin mga bagay na dapat na lakawon.

Pinonan an asistensiang iyan kaidtong haros sarong dekada na an nakaagi. Sagkod sa presente, labing 30 kapwa Saksi ni Jehova an nakatabang na sa pag-asikaso ki Ada. Padagos ninda siang sinosongko, binabasahan sia nin mga publikasyon sa Biblia, pirmeng iniimpormaran sia manongod sa espirituwal na pag-oswag kan mga kakongregasyon, asin regular na namimibi kaiba nia.

An sarong lokal na Kristianong magurang sa kongregasyon nagkomento: “Ibinibilang kan mga nag-aasikaso ki Ada na sarong pribilehio an pagtabang sa saiya. Dakol an nainspirar kan saiyang maimbod na paglilingkod sa nag-aging mga dekada, asin dai nanggad lamang ninda iisipon na ignorohon an saiyang mga pangangaipo.”

[Ritrato sa pahina 16]

Pirme daw kitang nagpapahayag nin kapadangatan sa satong may edad nang mga magurang?

[Mga Ritrato sa pahina 18]

Ikakapaheling kan gabos sa kongregasyon an saindang pagkamoot sa may edad nang mga kapagtubod