Sarong “Oripon” na Fiel Sagkod May Diskresion

“Siisay man nanggad an fiel asin may diskresion na oripon na ninombrahan kan saiyang kagurangnan na mamahala sa saiyang mga domestiko?”​—MATEO 24:45.

1, 2. Taano ta mahalagang marhay na kita mag-ako nin regular na suplay nin espirituwal na kakanon ngonyan?

KAN Martes na hapon, Nisan 11, 33 C.E., an mga disipulo ni Jesus nagbangon nin sarong hapot na may hararom na kahulogan para sa sato ngonyan. Hinapot ninda sia: “Ano an magigin tanda kan saimong presensia asin kan pagtatapos kan sistema nin mga bagay?” Bilang simbag, si Jesus nagsabi nin sarong pambihirang hula. Sinambit nia an sarong maribok na panahon nin mga guerra, gutom, linog, asin helang. Asin iyan magigin “kapinonan [sana] kan mga kolog nin kasakitan.” Mas grabe pa an maabot. Abaa kanakakukubhan na isip-isipon!​—Mateo 24:​3, 7, 8, 15-22; Lucas 21:​10, 11.

² Poon kan 1914, naotob na an kadaklan na aspekto kan hula ni Jesus. Biyong namamatean kan katawohan an “mga kolog nin kasakitan.” Pero, an tunay na mga Kristiano dai kaipuhan na matakot. Nanuga si Jesus na sususteniran nia sinda nin masustansiang espirituwal na kakanon. Huling nasa langit na ngonyan si Jesus, paano nia iinareglo na kitang mga yaon digdi sa daga mag-ako kan satong suplay nin espirituwal na kakanon?

3. Anong mga areglo an ginibo ni Jesus tanganing kita mag-ako nin “kakanon sa igong panahon”?

³ Itinokdo mismo ni Jesus an simbag sa hapot na iyan. Kan sinasabi nia an saiyang dakulang hula, sia naghapot: “Siisay man nanggad an fiel asin may diskresion na oripon na ninombrahan kan saiyang kagurangnan na mamahala sa saiyang mga domestiko, tanganing magtao sa sainda kan saindang kakanon sa igong panahon?” Dangan nagsabi sia: “Maogma an oripon na iyan kun sa pagdatong kan saiyang kagurangnan makua siang naggigibo nin siring. Totoong sinasabi ko sa saindo, Nonombrahan nia sia na mamahala sa gabos niang rogaring.” (Mateo 24:45-47) Iyo, magkakaigwa kaidto nin sarong “oripon” na inasignaran na magtao nin espirituwal na kakanon, sarong “oripon” na magigin fiel sagkod may diskresion. An oripon daw na iyan sarong partikular na indibiduwal, magkakasunod na mga indibiduwal, o iba pa? Huling an fiel na oripon an nagtatao nin kinakaipuhan na marhay na espirituwal na kakanon, para sa kapakanan niato na aramon an simbag.

Sarong Indibiduwal o Sarong Grupo?

4. Paano niato naaaraman na “an fiel asin may diskresion na oripon” dai puedeng saro sanang tawo?

⁴ “An fiel asin may diskresion na oripon” dai puedeng saro sanang tawo. Taano ta dai? Huli ta an oripon nagpoon na magtao nin espirituwal na kakanon kaidto pang enot na siglo, asin segun ki Jesus, an oripon naggigibo pa kaiyan kan an Kagurangnan dumatong kan 1914. Katimbang iyan nin mga 1,900 na taon nin fiel na paglilingkod para sa sarong indibiduwal. Maski si Matusalem dai nabuhay nin siring kalawig!​—Genesis 5:27.

5. Ipaliwanag kun taano ta an terminong “fiel asin may diskresion na oripon” dai minaaplikar sa lambang indibiduwal na Kristiano.

 ⁵ Bueno, puede daw na sa pankagabsan na sentido umaplikar sa lambang indibiduwal na Kristiano an terminong “fiel asin may diskresion na oripon”? Totoo na an gabos na Kristiano dapat na magin fiel asin may diskresion; minsan siring, malinaw na may iba pang nasa isip si Jesus kan sambiton nia “an fiel asin may diskresion na oripon.” Paano niato iyan naaaraman? Huli ta sinabi nia na ‘sa pagdatong kan kagurangnan’ nonombrahan nia an oripon “na mamahala sa gabos niang rogaring.” Paano mangyayaring nombrahan an lambang indibiduwal na Kristiano na mamahala sa gabos na bagay​—sa “gabos” na rogaring kan Kagurangnan? Imposible!

6. Paano kaidto dapat na magpunsionar an nasyon nin Israel bilang “lingkod,” o “oripon,” nin Dios?

⁶ Kun siring, an solamenteng rasonableng konklusyon iyo na sarong grupo nin mga Kristiano an pinanonongdan ni Jesus kan “fiel asin may diskresion na oripon.” Puede daw na magkaigwa nin oripon na kompuesto nin dakol? Iyo. Siete sientos na taon bago si Cristo, inapod ni Jehova an bilog na nasyon nin Israel na “sakong mga saksi” asin “sakong lingkod na sakong pinili.” (Isaias 43:10) An lambang miembro kan nasyon nin Israel poon kan 1513 B.C.E., kan itao an Ley ni Moises, sagkod kan Pentecostes 33 C.E. kabtang kan grupong lingkod na ini. An kadaklan na Israelita mayo nin direktang kabtang sa pag-administrar sa mga aktibidad kan nasyon o sa pagkoordinar kan programa kaiyan na pagpakakan sa espirituwal. Ginamit ni Jehova an mga hade, hokom, propeta, saserdote, asin Levita na iyo an maggibo kan mga trabahong iyan. Pero, bilang sarong nasyon, an Israel an marepresentar sa soberaniya ni Jehova asin mapahayag kan saiyang mga kaomawan sa mga nasyon. An lambang Israelita dapat na magin saksi ni Jehova.​—Deuteronomio 26:19; Isaias 43:21; Malaquias 2:7; Roma 3:​1, 2.

Pinahale an Sarong “Lingkod”

7. Taano ta nadiskualipikar an suanoy na nasyon nin Israel bilang “lingkod” nin Dios?

⁷ Huling an Israel an “lingkod” nin Dios kaidtong dakol nang siglo an nakaagi, iyan man daw an oripon na sinambit ni Jesus? Bako, huli ta an suanoy na Israel makamomondo na dai nagin fiel ni may diskresion. Sinumaryo ni Pablo an situwasyon kan kotaron nia an mga tataramon ni Jehova sa nasyon: “An ngaran nin Dios pinaglalanghadan dahel sa saindo sa tahaw kan mga nasyon.” (Roma 2:24) Tunay nanggad, an Israel suminagad sa halawig na kasaysayan nin pagrebelde paagi sa pagsikwal ki Jesus, na kan panahon na iyan isinikwal man sinda ni Jehova.​—Mateo 21:​42, 43.

8. Kasuarin ninombrahan an sarong “lingkod” tanganing sumalida sa Israel, asin sa anong mga kamugtakan?

⁸ An pagkabakong fiel na ini kan “lingkod,” an Israel, dai nangahulogan na an fiel na mga parasamba sagkod lamang na mapuputolan nin suplay nin espirituwal na kakanon. Kan Pentecostes 33 C.E., 50 aldaw pakatapos na buhayon liwat si Jesus, an banal na espiritu ibinubo sa mga 120 kan saiyang mga disipulo sa sarong kuarto sa itaas sa Jerusalem. Kan oras na idto, sarong bagong nasyon an namundag. Angay nanggad, ikinapamareta an pagkamundag kaiyan kan pusoan na pinonan kan mga miembro kaiyan na sabihon sa mga nag-eerok sa Jerusalem an manongod sa “makangangalas na mga bagay nin Dios.” (Gibo 2:11) Sa siring, an bagong nasyon na iyan, sarong espirituwal na nasyon, iyo an nagin “lingkod” na mapahayag kan kamurawayan ni Jehova sa mga nasyon asin masuplay nin kakanon sa igong panahon. (1 Pedro 2:9) Angay nanggad, kan huri inapod iyan na “Israel nin Dios.”​—Galacia 6:16.

9. (a) Sairisay an minakompuesto kan “fiel asin may diskresion na oripon”? (b) Sairisay an “mga domestiko”?

 ⁹ An lambang miembro kan “Israel nin Dios” sarong dusay asin bautisadong Kristiano na linahidan nin banal na espiritu asin igwa nin langitnon na paglaom. Huli kaini, an pananaram na “fiel asin may diskresion na oripon” nanonongod sa gabos na miembro kan linahidan na espirituwal na nasyon na iyan bilang grupo digdi sa daga sa arin man na partikular na panahon poon kan 33 C.E. sagkod ngonyan, kun paanong an lambang Israelita na nabubuhay kaidto sa arin man na panahon poon kan 1513 B.C.E. sagkod kan Pentecostes 33 C.E. kabtang kan grupong lingkod bago kan panahon kan mga Kristiano. Pero sairisay an “mga domestiko,” na nag-aako nin espirituwal na kakanon hale sa oripon? Kan enot na siglo C.E., an lambang Kristiano may langitnon na paglaom. Bilang resulta, an mga domestiko linahidan man na mga Kristiano, na minamansay, bakong bilang grupo, kundi bilang mga indibiduwal. An gabos, kabale an mga igwa nin responsableng mga katongdan sa kongregasyon, nangangaipo kaidto nin espirituwal na kakanon hale sa oripon.​—1 Corinto 12:​12, 19-27; Hebreo 5:11-13; 2 Pedro 3:​15, 16.

“Sa Lambang Saro an Saiyang Gibo”

10, 11. Paano niato naaaraman na bakong gabos na miembro kan grupong oripon igwa nin pararehong asignasyon na gibohon?

¹⁰ Minsan ngani an “Israel nin Dios” iyo an grupong fiel asin may diskresion na oripon na igwa nin asignasyon na gibohon, an lambang miembro igwa man nin personal na mga paninimbagan. Linilinaw ini kan mga tataramon ni Jesus na nakasurat sa Marcos 13:34. Sia nagsabi: “Iyan siring sa sarong tawo na mapaduman sa ibang daga na binayaan an saiyang harong asin itinao an autoridad sa saiyang mga oripon, sa lambang saro an saiyang gibo, asin pinagbotan an parabantay sa tata na magdanay na mapagbantay.” Kaya an lambang miembro kan grupong oripon nag-ako nin asignasyon​—padakolon an mga rogaring ni Cristo sa daga. Ginigibo nia an gibohon na ini segun sa saiya mismong abilidad asin mga oportunidad.​—Mateo 25:​14, 15.

¹¹ Dugang pa, nagsabi si apostol Pedro sa linahidan na mga Kristiano kan saiyang kaaldawan: “Kaoyon sa sokol nin balaog na naako kan lambang saro, gamiton iyan sa paglingkod sa lambang saro bilang marahay na mga mayordomo kan dai na kutana maninigong kabootan nin Dios na ipinahahayag sa manlaenlaen na paagi.” (1 Pedro 4:10) Huli kaini, an mga linahidan na idto igwa nin paninimbagan na maglingkod sa lambang saro na ginagamit an mga balaog na itinao nin Dios sa sainda. Dugang pa, an mga tataramon ni Pedro nagpaparisa na bakong gabos na Kristiano igwa nin pararehong kakayahan, paninimbagan, o pribilehio. Minsan siring, an lambang miembro kan grupong oripon puedeng makatabang minsan paano sa pag-oswag kan espirituwal na nasyon. Paano?

12. Paano nakatabang sa pag-oswag kan oripon an lambang miembro kan grupong oripon, baga man lalaki o babae?

¹² Enot, an lambang saro may paninimbagan na magin saksi ni Jehova, na naghuhulit kan maogmang  bareta kan Kahadean. (Isaias 43:10-12; Mateo 24:14) Bago sia nagsakat sa langit, pinagbotan ni Jesus an gabos niang fiel na disipulo, lalaki sagkod babae, na magin mga paratokdo. Sia nagsabi: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan sistema nin mga bagay.”​—Mateo 28:​19, 20.

13. Ano an pribilehio kaidto kan gabos na linahidan?

¹³ Kun nakanonompong kaidto nin bagong mga disipulo, sinda kaipuhan na maingat na tokdoan na otobon an gabos na bagay na ipinagboot ni Cristo sa saiyang mga disipulo. Pag-abot nin panahon, an mga naghihimate nagin kualipikadong magtokdo sa iba. An masustansiang espirituwal na kakanon itinao sa magigin mga miembro kan grupong oripon sa dakol na nasyon. An gabos na linahidan na Kristiano, lalaki asin babae, nakikabtang sa pag-otob kan sugo na gumibo nin disipulo. (Gibo 2:17, 18) An gibohon na ini kaipuhan na magpadagos poon kan panahon na enot na pinonan kan oripon an gibohon kaiyan sagkod sa katapusan kan sistemang ini nin mga bagay.

14. Kiisay sana itinao kaidto an mga pribilehio nin pagtotokdo sa kongregasyon, asin ano an nagin saboot dian kan fiel na linahidan na mga babae?

¹⁴ An bagong bautismohan na mga linahidan nagin kabtang kaidto kan oripon, asin dawa kun siisay an enot na nagtokdo sa sainda, sinda nagpadagos na mag-ako man nin instruksion hale sa mga miembro kan kongregasyon na nakaabot sa mga kualipikasyon sa Kasuratan na maglingkod bilang kamagurangan na lalaki. (1 Timoteo 3:1-7; Tito 1:6-9) Sa siring, an nombradong mga lalaking ini nagkapribilehiong makatabang sa pag-oswag kan nasyon sa sarong espesyal na paagi. An fiel na linahidan na Kristianong mga babae kaidto dai naghinanakit na an Kristianong mga lalaki sana an inasignaran na magtokdo sa kongregasyon. (1 Corinto 14:​34, 35) Imbes, naogma sinda na makinabang sa kahigosan kan lalaking mga miembro kan kongregasyon asin nagpasalamat sinda sa mga pribilehio na bukas sa mga babae, kabale an pagpaabot kan maogmang bareta sa iba. An maigot na linahidan na mga tugang na babae ngonyan nagpapaheling kan iyo man na mapakumbabang aktitud, baga man an nombradong kamagurangan linahidan o bako.

15. Ano an saro sa pangenot na mga gikanan nin espirituwal na kakanon kaidtong enot na siglo, asin siisay an nangenot sa pagtao kaiyan?

¹⁵ An pundamental na espirituwal na kakanon na itinatao kan enot na siglo direktang hale sa mga isinurat kan mga apostol asin kan iba pang disipulo na nangengenot. An mga surat na ginibo ninda​—nangorogna an kabilang sa 27 ipinasabong na surat na minakompuesto kan Kristianong Griegong Kasuratan​—iwinaras sa mga kongregasyon asin daing duwa-duwa na nagin basehan nin pagtotokdo kan lokal na kamagurangan. Paagi kaini, an mga representante kan oripon fiel na nagdistribwir nin masustansiang espirituwal na kakanon sa sinserong mga Kristiano. An grupong oripon kaidtong enot na siglo fiel na inotob an sugo sa sainda.

An “Oripon” Pakalihis nin 19 Siglo

16, 17. Paano fiel na inotob kan grupong oripon an asignasyon ninda kan mga taon sagkod 1914?

¹⁶ Kumusta man ngonyan? Kan magpoon an presensia ni Jesus kan 1914, nakanompong daw sia nin sarong grupo nin linahidan na mga Kristiano na fiel na nagtatao nin kakanon sa igong panahon? Iyo nanggad. An grupong ini mamimidbid nin malinaw huli sa marahayon na bunga kaiyan. (Mateo 7:20) An kasaysayan poon kaidto nagpatunay na tama an midbidan na ini.

¹⁷ Kan panahon kan pagdatong ni Jesus, mga 5,000 na domestiko an sibot na nagpapalakop kan katotoohan sa Biblia. Dikit an mga trabahador, alagad an oripon naggamit nin dakol na madonong na pamamaagi tanganing ipalakop an maogmang bareta. (Mateo 9:38) Halimbawa, ginibo an mga areglo tanganing ikapublikar an mga sermon dapit sa mga topiko sa Biblia sa haros 2,000 na peryodiko. Paagi kaini, an katotoohan kan Tataramon nin Dios nakaabot tolos sa manampulong ribong nagbabasa. Dugang pa, may inandam na walong oras na programa na kombinasyon nin de kolor na mga slide asin pelikula. Sa tabang kan bagong ideyang ini nin presentasyon, an mensahe kan Biblia, poon  sa kapinonan nin Paglalang sagkod sa katapusan kan Sangribong Taon na Paghade ni Cristo, ikinapaabot sa mga nagdalan na may total na labing siyam na milyon sa tolong kontinente. An imprentadong mga babasahon saro pang paagi na ginamit. Halimbawa, kan 1914 mga 50,000 na kopya kan magasin na ini an ipinublikar.

18. Kasuarin ninombrahan ni Jesus an oripon na mamahala sa gabos niang rogaring, asin taano?

¹⁸ Iyo, kan dumatong an Kagurangnan, nanompongan nia an saiyang fiel na oripon na sadiosan na pinakakakan an mga domestiko saka naghuhulit kan maogmang bareta. Mas dakulang mga paninimbagan an naghahalat ngonyan sa oripon na iyan. Si Jesus nagsabi: “Totoong sinasabi ko sa saindo, Nonombrahan nia sia na mamahala sa gabos niang rogaring.” (Mateo 24:47) Ginibo ini ni Jesus kan 1919, pakatapos na makapasar an oripon sa sarong panahon nin pagbalo. Pero taano ta nag-ako nin mas dakulang mga paninimbagan “an fiel asin may diskresion na oripon”? Huli ta nagdakol an mga rogaring kan Kagurangnan. Itinao ki Jesus an paghade kan 1914.

19. Ipaliwanag kun paano inasikaso an espirituwal na mga pangangaipo kan “dakulang kadaklan.”

¹⁹ Ano an mga rogaring na dian ninombrahan kan bagong koronahan na Kagurangnan an saiyang fiel na oripon? An gabos na espirituwal na bagay na sadiri Nia digdi sa daga. Halimbawa, duwang dekada pagkatukaw ni Cristo sa trono kan 1914, “sarong dakulang kadaklan” nin “ibang karnero” an namidbid. (Kapahayagan 7:9; Juan 10:16) An mga ini, bakong linahidan na mga miembro kan “Israel nin Dios,” kundi sinserong mga lalaki asin babae na may daganon na paglaom, na namomoot ki Jehova asin gustong maglingkod sa saiya arog kan mga linahidan. Garo man sana sinasabi ninda sa “fiel asin may diskresion na oripon”: “Maiba kami sa saindo, huli ta nabaretaan niamo na an Dios yaon dian sa saindo.” (Zacarias 8:23) An bagong mabautismohan na mga Kristianong ini nakikabtang sa iyo man sanang masustansiang espirituwal na kakanon kapareho kan linahidan na mga domestiko, asin an duwang grupong ini magkaibanan na nagkakakan sa espirituwal na lamesang ini poon kaidto. Kanigoan na bendisyon ini para sa mga miembro kan “dakulang kadaklan”!

20. Ano an nagin kabtang kan “dakulang kadaklan” sa pagpadakol kan mga rogaring kan Kagurangnan?

²⁰ An mga miembro kan “dakulang kadaklan” maogmang nakikiayon sa linahidan na grupong oripon bilang mga parahulit kan maogmang bareta. Mantang sinda naghuhulit, nadudugangan man an mga rogaring kan Kagurangnan digdi sa daga, na nakadadagdag sa mga paninimbagan kan “fiel asin may diskresion na oripon.” Mantang nagdadakol an mga naghahanap sa katotoohan, kinaipuhan an pinahiwas na mga pasilidad sa pag-imprenta tanganing ikatao an kinakaipuhan na mga babasahon sa Biblia. Inestablisar an mga sangang opisina kan Mga Saksi ni Jehova sa sunod-sunod na kadagaan. Nagsugo nin mga misyonero “sagkod sa kaporoporohi kan daga.” (Gibo 1:8) Poon sa mga limang ribong linahidan kan 1914, an mga paraomaw sa Dios duminakol sa labing anom na milyon ngonyan, na an mayoriya kaiyan kabilang sa “dakulang kadaklan.” Iyo nanggad, an mga rogaring kan Hade nadagdagan nin dakol na beses poon kan sia koronahan kan 1914!

21. Anong duwang parabola an totokaron niato sa sunod na pag-adal niato?

²¹ An gabos na ini nagpapaheling na an oripon nagin ‘fiel sagkod may diskresion.’ Pakatapos tolos na sambiton nia “an fiel asin may diskresion na oripon,” si Jesus nagtao nin duwang parabola na nagtampok kan mga kualidad na iyan: an parabola kan may diskresion asin mangmang na mga daraga saka an parabola kan mga talento. (Mateo 25:1-30) Naiintriga kita! Ano an kahulogan kan mga parabolang iyan para sa sato ngonyan? Totokaron niato an hapot na ini sa masunod na artikulo.

Ano sa Paghona Nindo?

• Sairisay an minakompuesto kan “fiel asin may diskresion na oripon”?

• Sairisay an “mga domestiko”?

• Kasuarin ninombrahan an fiel na oripon na mamahala sa gabos na rogaring kan Kagurangnan, asin taano ta kan panahon na idto?

• Sairisay an nagtabang na padakolon an mga rogaring kan Kagurangnan sa nakaagi pa sanang mga dekada, asin paano?

[Mga Hapot Para sa Pag-adal]

[Mga Ritrato sa pahina 10]

An grupong oripon kan enot na siglo nagin fiel sa sugo sa saiya