An Dios daw May Pagmakolog sa Sato?

KAMO daw nasasakitan sa emosyonal na pasan huli sa mga problema sa saindong pamilya, salud, trabaho, o iba pang magagabat na responsibilidad? An dakol na tawo iyo. Asin siisay sa ngonyan an bakong apektado kan inhustisya, krimen, asin kadahasan? Sa katunayan, siring nanggad kaiyan an sinasabi kan Biblia: “An gabos na linalang padagos na nag-aaragrangay nin iriba asin nagtitios nin kolog nin iriba sagkod ngonyan.” (Roma 8:22) Bakong makangangalas na dakol na tawo an naghahapot: ‘An Dios daw may pagmakolog? Sia daw matabang sa sato?’

An madonong na si Hadeng Salomon nagsabi sa Dios sa pamibi: “Ika sana an nakamimidbid nanggad sa puso kan mga aki nin katawohan.” May tiwala si Salomon na bako sanang midbid kita nin Dios kundi nagmamakolog man sia sa sato bilang mga indibiduwal. Nagibo niang hagadon sa Dios na ‘dangogon sa kalangitan’ asin simbagon an mga pamibi nin lambang matatakton sa Dios na indibiduwal na ihinahayag sa Dios “an saiyang sadiring damat asin an saiyang sadiring kolog.”​—2 Cronica 6:​29, 30.

Ngonyan, si Jehova Dios nagmamakolog pa man giraray sa sato asin inaagda kitang mag-arang sa saiya sa pamibi. (Salmo 50:15) Sia nanunuga na sisimbagon an odok sa pusong mga pamibi na kaoyon kan saiyang kabotan. (Salmo 55:​16, 22; Lucas 11:​5-​13; 2 Corinto 4:7) Iyo, dinadangog ni Jehova an “ano man na pamibi, an ano man na kahagadan para sa pabor na tibaad gibohon nin siisay man na tawo o kan bilog [niang] banwaan.” Huli kaini, kun kita magtitiwala sa Dios, mamimibi para sa saiyang tabang, asin marani sa saiya, mamamatean niato an saiyang mamomoton na pagmakolog asin paggiya. (Talinhaga 3:​5, 6) Sinisierto sa sato kan kagsurat sa Biblia na si Santiago na: “Rumani kamo sa Dios, asin sia marani sa saindo.”​— Santiago 4:8.