Pakanood sa Pamilyang Tawo ni Jesus

ANO an aram nindo manongod sa pinakaharaning pamilya ni Jesus, idtong mga nakaiba nia sa buhay sagkod na sia nabautismohan, sa enot na 30 taon kan saiyang buhay digdi sa daga? Ano daw an sinasabi sa sato kan pagkasaysay sa Ebanghelyo? Ano an manonodan niato sa pagsiyasat sa saiyang pamilya? Puede kamong makinabang sa mga simbag.

Si Jesus daw namundag sa mayaman na pamilya? Si Jose, an saiyang kag-ampon na ama, nagtatrabaho bilang sarong karpintero. Magabat iyan na trabaho, na sa parate kalabot an pagpalod nin mga kahoy para sa tablon. Kan an tawong mga magurang ni Jesus magduman sa Jerusalem mga 40 aldaw pagkamundag nia, nagdara sinda nin dolot na atang na ipinagboot kan Ley. Sinda daw nagdolot nin lalaking karnero kaiba nin sarong agbaan o sarong pitson, arog kan sinasabi sa Ley? Dai. Minalataw na dai ninda kaya an arog kaiyan na mga dolot. Pero, an Ley igwa nin probisyon para sa mga dukha. Kaoyon kan areglong iyan, si Jose asin Maria nagdolot nin “sarong padis na agbaan o duwang pitson.” Ipinaheling kan pagpili ninda nin bakong gayong mahal na mga hayop na sinda pamilyang dukha.​—Lucas 2:22-24; Levitico 12:​6, 8.

Masasabotan nindo na si Jesu-Cristo, an magigin Namamahala sa bilog na katawohan, namundag sa tahaw nin mga hamak, sa tahaw kan mga kaipuhan na magtrabaho nin magabat tanganing makua an pundamental na mga pangangaipo.  Nagdakula sia bilang karpintero, arog man sana kan saiyang kag-ampon na ama. (Mateo 13:55; Marcos 6:3) “Minsan ngani [si Jesus] mayaman” bilang sarong makapangyarihan na espiritung linalang sa langit kaidto, sinasabi kan Biblia na sia “nagin dukha” para sa sato. Kinua nia an hababang kamugtakan bilang tawo asin nagdakula sa sarong pamilya nin ordinaryong mga tawo. (2 Corinto 8:9; Filipos 2:5-9; Hebreo 2:9) Si Jesus dai namundag sa mayaman na pamilya, asin ini tibaad nakatabang sa nagkapira na makiibaiba sa saiya. Dai nagin dahelan an saiyang posisyon tanganing rumayo sinda. Puede ninda siang apresyaron huli sa saiyang mga katokdoan, sa saiyang nakaaakit na mga kualidad, asin sa saiyang marahayon na mga gibo. (Mateo 7:​28, 29; 9:19-33; 11:​28, 29) Maheheling niato an kadonongan ni Jehova Dios sa pagpangyari na mamundag si Jesus sa sarong ordinaryong pamilya.

Estudyaran niato ngonyan an mga miembro kan pamilya ni Jesus asin helingon kun ano an manonodan niato sa sainda.

Si Jose—Sarong Matanos na Tawo

Kan maaraman ni Jose na bados na an saiyang katrato “bago sinda pinagsaro,” seguradong nasakitan siang marhay na mamili sa saiyang pagkamoot ki Maria asin sa saiyang makuring pagkasurang dawa sa puedeng isipon na garo nangyaring inmoralidad. An bilog na situwasyon garo baga paglapas sa saiyang deretso bilang magigin agom ni Maria. Kan saiyang kaaldawan, an babaeng nakipagtrato nang pakasal ibinibilang na garo man sana agom na kan lalaki. Pagkatapos na mag-isip na marhay, nagdesisyon si Jose na sekretong idiborsio si Maria tanganing dai sia paggapoon bilang sarong parasambay.​—Mateo 1:18; Deuteronomio 22:​23, 24.

Dangan nagpaheling an sarong anghel ki Jose sa pangatorogan asin nagsabi: “Dai ka matakot na ipuli si Maria na saimong agom na babae, huli ta an pinapangyaring ipangidam nia paagi sa banal na espiritu. Sia mangangaki nin sarong lalaki, asin kaipuhan na apodon mo an saiyang ngaran na Jesus, huling ililigtas nia an saiyang banwaan sa saindang mga kasalan.” Kan maresibi an instruksion na iyan nin Dios, sinunod iyan ni Jose asin ipinuli si Maria.​—Mateo 1:20-24.

Huli sa desisyon na ini, an matanos asin fiel na tawong iyan napalabot sa pagkaotob kan itinaram ni Jehova paagi ki propeta Isaias: “Uya! An daraga mismo talagang magbabados, asin mangangaki sia nin lalaki, asin aapodon nia nanggad an ngaran kaini na Emmanuel.” (Isaias 7:14) Si Jose seguradong sarong espirituwal na tawo na pinahahalagahan an pribilehio na magin kag-ampon na ama kan Mesiyas, sa ibong kan katunayan na an panganay na aki ni Maria bako nia mismong aki.

Nagpogol si Jose na makidorog ki Maria sagkod na mamundag an aki kaini. (Mateo 1:25) Para sa mag-agom na ngonyan bagong kasal, tibaad depisil na magpogol sa pagdodorog, alagad minalataw na habo nindang magkaigwa nin ano man na misinterpretasyon sa kun siisay an Ama kan omboy. Kanigoan karahay na halimbawa nin pagpopogol sa sadiri! Inenot ni Jose an pagpapahalaga sa espirituwal na mga bagay kisa saiyang natural na mga pagmawot.

Sa apat na pangyayari, nag-ako si Jose nin instruksion sa mga anghel manongod sa pagpadakula sa saiyang inampon na aki. An tolo kaini mapadapit sa kun saen padadakulaon an aki. Mahalagang marhay an listong pagkuyog tanganing maligtas an aki. Sa gabos na kaso, tolos-tolos na naghiro si Jose, na dinara an saday na aki enot sa Egipto dangan ibinalik sa Israel. Naprotehiran kaini an saday pang si Jesus sa lagdoan na pangadan ni Herodes sa mga omboy. Siring man, an pagkuyog ni Jose nagresulta sa pagkaotob kan mga hula may labot sa Mesiyas.​—Mateo 2:13-23.

Tinokdoan ni Jose si Jesus nin sarong hanap-buhay tanganing masuportaran nia an saiyang sadiri. Huli kaini, namidbid si Jesus bako sanang bilang “an aki kan panday” kundi patin “an panday.” (Mateo 13:55; Marcos 6:3) Isinurat ni apostol Pablo na si Jesus “nabalo na sa gabos na bagay arog niato.” Naturalmenteng kaiba digdi an mahigos na pagtrabaho tanganing tumabang sa pagsuportar sa pamilya.​—Hebreo 4:15.

 Sa katapustapusi, maheheling niato an ebidensia kan debosyon ni Jose sa tunay na pagsamba sa huring pagkasaysay na nasambitan sia sa Kristianong Griegong Kasuratan. Dinara ni Jose an saiyang pamilya sa Jerusalem para sa Paskua. Mga lalaki sana an pinapaatender, alagad kinaugalean na ni Jose na darahon an saiyang pamilya sa Jerusalem “taon-taon.” Dakula an ginigibo niang mga pagsakripisyo, huli ta kinaipuhan nindang maglakaw nin mga 100 kilometros hale sa Nazaret pasiring sa Jerusalem. Pero sa pangyayaring ibinareta sa Kasuratan, si Jesus napasuway sa grupo. Nakua sia sa templo, na naghihinanyog asin naghahapot sa mga paratokdo kan Ley. Minsan ngani 12 anyos sana, nagpaheling si Jesus nin dakulang kadonongan asin kaaraman manongod sa Tataramon nin Dios. Sa pangyayaring ini, maheheling niato na seguradong tinokdoan na marhay si Jesus kan saiyang mga magurang, na pinadakula sia na magin espirituwal an kaisipan na aki. (Lucas 2:41-50) Minalataw na nagadan si Jose pakalihis nin pirang panahon pagkatapos kan pangyayaring ini, huling dai na sia nasambitan sa huring mga pagkasaysay sa Kasuratan.

Iyo, si Jose sarong matanos na tawo na pinangatamanan na marhay an saiyang pamilya, sa espirituwal sagkod sa pisikal. Ineenot daw nindo, arog ni Jose, an espirituwal na intereses sa saindong buhay kun mamansayan nindo kun ano an kabotan nin Dios para sa sato ngonyan? (1 Timoteo 2:​4, 5) Gikan sa boot daw nindong kinukuyog an tingog nin Dios na yaon sa Tataramon nin Dios, na sa paaging iyan ipinaheheling an arog-Joseng pagpapasakop? Tinotokdoan daw nindo an saindong mga aki tangani na makapakipag-olay sinda sa iba dapit sa espirituwal na mga topiko?

Si Maria—Sarong Bakong Maimot na Lingkod nin Dios

Si Maria, na ina ni Jesus, sarong marahayon na lingkod nin Dios. Kan ipaisi ni anghel Gabriel na sia mangangaki, sia nabigla. Huling sarong birhen, dai pa sia ‘nakidorog sa lalaki.’ Kan maaraman na an pangangaki paagi sa banal na espiritu, mapakumbabang inako nia an mensahe, na nagsasabi: “Uya! An oripon na babae ni Jehova! Mangyari logod sa sakuya an siring sa saimong tataramon.” (Lucas 1:30-38) Pinahalagahan niang marhay an espirituwal na pribilehio kaya andam siang tioson an ano man na kasakitan na tibaad kalabot sa saiyang desisyon.

Sa katunayan, nabago an bilog niang buhay bilang sarong babae kan inako nia an sugong iyan. Kan magpasiring sia sa Jerusalem para sa pagdalisay sa saiya, an sarong magalang na gurang na lalaki na an ngaran Simeon sinabihan sia: “Sarong halabang espada an palalagbason sa saimo mismong kalag.” (Lucas 2:25-35) Minalataw na nagtataram sia manongod sa mamamatean ni Maria  kun maheling nia si Jesus na isinisikwal kan dakol asin sa katapustapusi ipako sa sarong hariging pasakitan.

Mantang nagdadakula si Jesus, rinimpos ni Maria sa saiyang isip kun ano an nangyari sa saiyang buhay, “na naghohorophorop sa saiyang puso.” (Lucas 2:​19, 51) Arog ni Jose, sia sarong espirituwal na tawo asin rinimpos an mga pangyayari asin kasabihan na nag-otob sa mga hula. Seguradong tuminadom sa isip nia an sinabi sa saiya ni anghel Gabriel: “An sarong ini magigin dakula asin aapodon na Aki kan Kaharohalangkawe; asin itatao sa saiya ni Jehova Dios an trono ni David na saiyang ama, asin sia mamamahala bilang hade sa harong ni Jacob sagkod lamang, asin dai magkakaigwa nin katapusan an saiyang kahadean.” (Lucas 1:​32, 33) Iyo, sineryoso nia an pribilehio na magin tawong ina kan Mesiyas.

An espirituwalidad ni Maria narisa giraray kan manuparan nia si Elizabet, an saiyang paryente na nagbados man sa milagrosong paagi. Kan maheling sia, inomaw ni Maria si Jehova asin ihinayag an saiyang pagkamoot sa Tataramon nin Dios. Nasambitan nia an pamibi ni Ana na nakasurat sa 1 Samuel kapitulo 2 asin iiniba an mga ideya hale sa ibang libro kan Hebreong Kasuratan. An siring na kaaraman manongod sa Kasuratan nagpapaheling na sia kualipikado na magin deboto asin matatakton sa Dios na ina. Sia makikikooperar ki Jose sa espirituwal na pagpadakula sa saiyang aki.​—Genesis 30:13; 1 Samuel 2:1-10; Malaquias 3:12; Lucas 1:46-55.

May makosog na pagtubod si Maria sa saiyang aki bilang an Mesiyas, asin dai iyan luminuya dawa pagkagadan ni Jesus. Dai nahaloy pagkatapos siang buhayon liwat, kaiba si Maria sa fiel na mga disipulo na nagtiripon tanganing mamibi kaiba an mga apostol. (Gibo 1:​13, 14) Pinagdanay nia an pagigin fiel nia, apisar na kinaipuhan niang tioson an labi-labing kolog na maheling an saiyang mahal na aki na magadan sa sarong hariging pasakitan.

Paano kamo makikinabang sa pakanood manongod sa buhay ni Maria? Inaako daw nindo an pribilehio na paglingkodan an Dios ano man an kalabot na mga pagsakripisyo? Iniisip daw nindo an pagigin seryoso kan pribilehiong ini ngonyan? Isinasaisip daw nindo an mga ihinula ni Jesus asin ikinokomparar iyan sa mga nangyayari ngonyan, ‘na naghohorophorop sa saindong puso’? (Mateo, kapitulo 24 asin 25; Marcos, kapitulo 13; Lucas, kapitulo 21) Inaarog daw nindo si Maria sa pagigin kabisado an Tataramon nin Dios, na ginagamit iyan nin parate sa saindong pakikipag-olay? Papagdadanayon daw nindo an saindong pagtubod ki Jesus sa ibong nin labi-labing kahaditan sa isip na tibaad aagihan nindo huli sa pagigin parasunod nia?

 An mga Tugang na Lalaki ni Jesus—Posible an Pagbago

Garo baga an mga tugang na lalaki ni Jesus nagtubod ki Jesus kaidto sanang pagkagadan nia. Posibleng ini an rason kaya mayo sinda kan sia magadan sa hariging pasakitan asin na kinaipuhan na ipagkatiwala nia an saiyang ina ki apostol Juan. Ipinaheling kan mga paryente ni Jesus na dai ninda sia inaapresyar, na nagsabi pa ngani sarong beses na si Jesus “narurungaw.” (Marcos 3:21) Mantang si Jesus may mga kapamilya na daing pagtubod, nakaseseguro an mga igwa nin daing pagtubod na kapamilya ngonyan na nasasabotan ni Jesus an namamatean ninda kun tinutuyatuya sinda kan mga paryente huli sa saindang pagtubod.

Minsan siring, pakatapos na buhayon liwat si Jesus, minalataw na an saiyang mga tugang na lalaki nagpoon na magtubod sa saiya. Kaiba sinda sa grupo na nagtiripon sa Jerusalem bago an Pentecostes kan 33 C.E. asin odok na namibi kaiba kan mga apostol. (Gibo 1:14) Malinaw na an pagkabuhay liwat kan saindang tugang sa ina an nagpahiro sainda na magbago an puso, sagkod na magin mga disipulo nia. Maninigo na nungka kitang mawaran nin paglaom sa satong mga paryente na bako niatong kapareho an pagtubod.

Si Santiago, an tugang ni Jesus sa ina na personal Niang pinahelingan, ipinamimidbid sa Kasuratan na may pambihirang kabtang sa Kristianong kongregasyon. Nagsurat sia nin ipinasabong nin Dios na surat sa saiyang mga kapwa Kristiano, na sinasadol sinda na papagdanayon an saindang pagtubod. (Gibo 15:6-29; 1 Corinto 15:7; Galacia 1:​18, 19; 2:9; Santiago 1:1) An saro pang tugang sa ina, si Judas, nagsurat nin sarong ipinasabong na surat tanganing parigonon an mga kapagtubod na makipaglaban nin maigot para sa pagtubod. (Judas 1) Mahalagang mangnohon na dai ginamit ni Santiago o ni Judas sa surat ninda an saindang relasyon sa laman ki Jesus tanganing kombensiron an kapwa mga Kristiano. Marahayon nanggad na leksion nin kababaan nin boot an manonodan niato sa sainda!

Kaya, ano an nagkapirang bagay na nanodan niato sa pamilya ni Jesus? Tunay nanggad, mga leksion sa debosyon na puedeng ipaheling sa mga paaging arog kaini: (1) Fiel na magpasakop sa ipinahayag na kabotan nin Dios asin atubangon an gabos na pagbalo na kalabot sa paggibo kaiyan. (2) Enoton an pagpapahalaga sa espirituwal na mga bagay, dawa kun mangahulogan iyan nin paggibo nin mga pagsakripisyo. (3) Sanayon an saindong mga aki oyon sa Kasuratan. (4) Dai mawaran nin paglaom sa mga miembro nin pamilya na bako nindong kapareho an pagtubod. (5) Dai ipaghambog an ano man na tibaad koneksion nindo sa mga prominente sa Kristianong kongregasyon. Iyo, an pakanood manongod sa pamilyang tawo ni Jesus orog kitang irinarani sa saiya asin pinaooswag an satong pag-apresyar sa pagpili ni Jehova nin sarong ordinaryong pamilya tanganing magpadakula ki Jesus durante kan saiyang pagkaniaki.

[Mga Ritrato sa pahina 4, 5]

Kinua ni Jose si Maria bilang saiyang agom asin nagin kalabot sa pagkaotob kan Mesiyanikong mga hula

[Mga Ritrato sa pahina 6]

Tinokdoan ni Jose asin Maria an saindang mga aki nin pagpapahalaga sa espirituwal na mga bagay asin kan kabtang nin pagtrabaho

[Mga Ritrato sa pahina 7]

Minsan ngani pinadakula sa sarong espirituwal na pamilya, an mga tugang na lalaki ni Jesus nagtubod sa saiya kaidto sanang pagkagadan nia

[Mga Ritrato sa pahina 8]

Pinarigon kan mga tugang ni Jesus sa ina na si Santiago asin Judas an mga kapwa Kristiano