“Rumani Kamo sa Dios, Asin Sia Marani sa Saindo”

Bago Asin Pakatapos—An mga Prinsipyo sa Biblia Nagkaepekto

KAN hoben pa, si Adrian pano-pano nin kabangisan asin paghinanakit. An pagigin mainiton kan saiyang payo kaidto minasagkod sa madahas na pagputok nin kaanggotan. Sia nagburat, nanigarilyo, asin namuhay sa inmoral na paagi. Midbid si Adrian bilang sarong pangkista asin nagpatatu na nagpabanaag kan saiyang paniniwala sa anarkiya. Sa paglaladawan sa mga taon na idto, saiyang sinabi: “Nagpabulog ako sa pinagkatodan na bulog kan mga pangkista, pinatindog ko an sakong buhok paagi sa makosog na kola, asin kun beses tinitina ini nin pula o ibang kolor.” Pinalabotan pa ngani ni Adrian an saiyang dongo.

Buminalyo si Adrian sa sarong rapak nang harong kairiba nin iba pang rebeldeng hobenes. Duman sinda nagburat asin nagdroga. “Naggamit ako nin shabu asin kasabay kaini an pag-ineksion ko nin Valium asin nin ano man na makukua ko,” an paggirumdom ni Adrian. “Kun mayo nin makukuang droga o kola na masisingot, sinisigop ko an gasolina sa mga kotse nin mga tawo asin nagpapakaburat dian.” Nin huli sa pagigin kalabot na marhay sa mga krimen sa kalye, si Adrian nagin nakatatakot asin labi-labi kadahas. An mga tawo sa pankagabsan habong makilabot sa saiya. Kasabay kaiyan, an saiyang reputasyon nag-enganyar nin maraot na mga pag-iriba.

Luway-luway na narealisar ni Adrian na an saiyang mga “amigo” nakikiiba saiya huli sana sa makukua ninda. Dugang pa, nagin konklusyon nia na “an gabos na kaanggotan asin kadahasan mayo nin nagibong ano man.” Sa pakamate na sia daing direksion asin desganado, binayaan nia an saiyang kairiba. Kan makanompong sia nin sarong kopya kan An Torrengbantayan sa sarong lugar nin konstruksion, naakit sia sa basado sa Bibliang mensahe kaini, asin ini nagbunga nin pag-adal sa Biblia kaiba kan mga Saksi ni Jehova. Galagang inako ni Adrian an imbitasyon na: “Rumani kamo sa Dios, asin sia marani sa saindo.” (Santiago 4:8) Bilang resulta, dai nahaloy na naheling ni Adrian an pangangaipong ponan nang iaplikar an mga prinsipyong manonompongan sa Banal na Kasuratan.

An nagtatalubong kaaraman sa Biblia nagkaigwa nin marahay na epekto sa konsensia ni Adrian asin binago an direksion kan saiyang pamumuhay. Natabangan sia na daogon an pagigin mainiton kan saiyang payo asin kultibaron an pagpopogol sa sadiri. Huli sa puersa kan Tataramon nin Dios, biyong nagbago an personalidad ni Adrian.​—Hebreo 4:12.

Pero, paano puedeng magkaigwa nin arog kaiyan kamapuersang epekto an Biblia? An kaaraman sa Kasuratan nakatatabang sa satuya na “magsolog kan bagong personalidad.” (Efeso 4:24) Iyo, nababago an satong personalidad paagi sa pag-aplikar kan tamang kaaraman na manonompongan sa Biblia. Alagad paano nababago kan siring na kaaraman an mga tawo?

Enot, sinasabi kan Biblia an bakong kawiliwiling mga ugale na kaipuhan na haleon. (Talinhaga 6:​16, 19) Ikaduwa, dinadagka kita kan Kasuratan na ipaheling an kawiliwiling mga kualidad na bunga kan banal na espiritu nin Dios. Kaiba digdi an “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.”​—Galacia 5:​22, 23.

An mas hararom na pakasabot sa mga kahagadan nin Dios nakatabang ki Adrian na siyasaton an saiyang sadiri asin aramon kun anong mga ugale an kaipuhan niang kultibaron asin an mga maninigo niang  haleon. (Santiago 1:22-25) Alagad kapinonan pa sana iyan. Dugang pa sa kaaraman, kaipuhan an motibasyon​—sarong bagay na mapahiro ki Adrian tanganing mawoton niang magbago.

Nanodan ni Adrian na an kawiliwiling bagong personalidad minomolde “segun sa ladawan kan Saro na naglalang kaiyan.” (Colosas 3:10) Saiyang narealisar na an personalidad nin sarong Kristiano kaipuhan na kapareho kan mismong personalidad nin Dios. (Efeso 5:1) Paagi sa pag-adal kan Biblia, nanodan ni Adrian an tratamiento ni Jehova sa katawohan asin naobserbaran nia an marahay na mga kualidad nin Dios, arog baga kan saiyang pagkamoot, kabootan, karahayan, pagkaherak, asin katanosan. Pinahiro si Adrian kan siring na kaaraman na kamotan an Dios asin magmaigot na magin an klase nin tawo na inooyonan ni Jehova.​—Mateo 22:37.

Pag-abot nin panahon asin sa tabang kan banal na espiritu nin Dios, nakaya ni Adrian na kontrolon an saiyang madahas na templada kan payo. Sia asin an saiyang agom sibot ngonyan sa pagtabang sa iba na bagohon an saindang pamumuhay sa tabang kan kaaraman hale sa Biblia. “Bakong arog kan dati kong mga katood na ngonyan garadan na, buhay ako asin may maogmang buhay pampamilya,” an sabi ni Adrian. Sia sarong buhay na ebidensia sa puersa kan Biblia na pakarhayon an buhay.

[Blurb sa pahina 25]

“An gabos na kaanggotan asin kadahasan mayo nin nagibong ano man”

[Kahon sa pahina 25]

Mga Prinsipyo sa Biblia na Epektibo

An minasunod iyo an nagkapirang prinsipyo sa Biblia na nakatabang sa dakol na mabangis asin madahas na tawo na magin matoninong:

“Makipagkatoninongan sa gabos na tawo. Dai kamo magbalos, mga namomotan, kundi magtao nin lugar sa kabangisan.” (Roma 12:​18, 19) Togotan an Dios na iyong magdeterminar kun noarin asin kun kiisay matao nin pagbalos. Kaya niang gibohon iyan na may lubos na kaaraman sa mga detalye, asin maheheling an saiyang sangkap na hustisya sa ano man na balos na naghahale sa saiya.

“Maanggot kamo, pero dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.” (Efeso 4:​26, 27) May mga okasyon na an sarong tawo may katanosan na maanggot. Kun mangyari man ini, dai sia maninigong magdanay na “may kaanggotan.” Taano man? Nin huli ta puede ining makadagka saiya na gumibo nin sarong bagay na maraot, sa siring tinatawan nin “lugar an Diablo” na nagbubunga kan pagdesaprobar ni Jehova Dios.

“Pabayae an kaanggotan asin bayae an kabangisan; dai ka mag-init tangani sanang makagibo nin maraot.” (Salmo 37:8) An daing pakundangan na mga emosyon nagbubunga nin dai makontrol na mga gibo. Kun an saro mapadara sa kabangisan, sia posibleng marhay na makataram o makagibo nin mga bagay na makakokolog sa gabos na kalabot.