Paadalan sa Gilead—60 Taon nin Pagsasanay sa Pagmimisyonero

“HULI sa samong konsentradong marhay na pag-adal sa Biblia, mas nagin dayupot kami ki Jehova asin nakanood nin dugang pa manongod sa saiyang organisasyon. Ini an nag-andam samo para sa buhay sa destino sa ibang nasyon.” Iyan an pagkaladawan nin sarong naggradwar sa enot na klase dapit sa kurso na inadalan nia sa Paadalan sa Biblia kan Watchtower sa Gilead. Poon kan iintrodusir iyan 60 taon na an nakalihis, an Paadalan nin Gilead nagsusugo nin mga misyonero. Kan Marso 8, 2003, an gradwasyon kan ika-114 klase ginibo sa Sentro nin Edukasyon kan Watchtower sa Patterson, Nueva York. An 6,404 nagtiripon sa auditoryum asin sa dugang na mga lugar na nakakonektar paagi sa telebisyon atentong naghinanyog sa programa, na kompuesto nin mga pahayag, interbio, asin sarong grupong pag-orolay.

Si Theodore Jaracz, na miembro kan Namamahalang Grupo, iyo an tsirman. Dinara kan pambukas na mga tataramon nia an atension sa pagigin internasyonal kan mga nagdadangog, na kompuesto nin mga bisita hale sa Asia, Caribe, Amerika Sentral asin del Sur, saka Europa. Ibinabasar an saiyang mga komento sa 2 Timoteo 4:​5, idinoon ni Tugang na Jaracz an pangenot na gibohon nin sarong misyonero na sinanay sa Gilead​—tanganing ‘gibohon an gibohon nin sarong paraebanghelyo.’ An mga misyonero nagpapatotoo sa katotoohan paagi sa pagtokdo kan Biblia sa mga tawo.

Inako kan mga Estudyante an Pangultimong mga Instruksion

Bilang enot sa sunod-sunod na haralipot na pahayag, si John Larson, sarong miembro kan Komite kan Sanga sa Estados Unidos, nagpahayag dapit sa nakapakokosog sa pagtubod na temang “Kun an Dios Nasa Kampi Niato, Siisay an Matumang sa Sato?” (Roma 8:31) Ipinaliwanag kan ispiker an basehan sa Biblia tanganing an mga estudyante magkaigwa nin absolutong kompiansa sa kapangyarihan ni Jehova na tabangan sindang mapangganahan an ano man na olang na tibaad mapaatubang sa sainda sa saindang destino. Ginagamit an Roma 8:​38, 39, sinadol ni Tugang na Larson an mga estudyante: “Pumondo asin horophoropon an kapangyarihan na ginagamit nin Dios para sa saindo, asin girumdomon na mayo nin ano man na puedeng makaraot kan personal na pagkamuya ni Jehova sa saindo.”

An suminunod sa programa iyo si Guy Pierce, sarong miembro kan Namamahalang Grupo. Pinili nia an temang “Papagdanayon na Maogma an Saindong mga Mata!” (Lucas 10:23) Ipinaliwanag nia na kalabot sa tunay na kaogmahan an pakamidbid ki Jehova asin pakasabot sa saiyang daing sagkod na katuyohan saka an pakaheling sa kaotoban kan mga hula sa Biblia. Saen man sinda magduman, mapagdadanay kan mga estudyante an tunay na kaogmahan paagi sa pagpadanay na maogma kan saindang mga mata. Inenkaminar ni Tugang na Pierce an mga naggradwar na horophoropon na marhay an karahayan ni Jehova asin ipokus an saindang isip asin puso sa paggibo kan Saiyang kabotan. (Salmo 77:12) Paagi sa pagpapadanay nin positibong aktitud, mapanggaganahan kan mga naggradwar an ano man na problema na tibaad mapaatubang sa sainda.

Dangan inako kan klase an panhuring mga tataramon nin pagparigon sa boot hale sa duwa kan mga instruktor na aroaldaw na nagtokdo sa sainda. “Naghahanap daw Kamo nin Kamurawayan?” an ihinapot ni Lawrence Bowen sa titulo kan saiyang pahayag. Hinohona kan kadaklan na tawo na an kamurawayan may  koneksion sa kaomawan, onra, asin kabantogan para sa saindang sadiri. Minsan siring, nasabotan kan salmistang si Asaf an tunay na kamurawayan​—an daing kaagid sa halaga na kayamanan nin pagkaigwa nin maogmang relasyon ki Jehova. (Salmo 73:​24, 25) Inenkaminar an mga estudyanteng naggradwar na papagdanayon an dayupot na relasyon ki Jehova paagi sa padagos na hararom na pag-adal kan Biblia. An mga anghel “nagmamawot na makamansay” kan mga detalye mapadapit sa pagkaotob kan mga katuyohan ni Jehova paagi ki Cristo. (1 Pedro 1:12) Gusto nindang manodan sagkod sa mapupuede an manongod sa saindang Ama tangani na ikapabanaag ninda an saiyang kamurawayan. Dangan sinadol kan ispiker an mga estudyante na pamurawayon si Jehova sa saindang mga asignasyon sa pagmimisyonero paagi sa pagtabang sa iba na makua an kayamanan na daing kaagid sa halaga.

Tinapos kan rehistrador sa paadalan, si Wallace Liverance, an sunod-sunod na pambukas na mga pahayag sa temang “Itaram an Kadonongan nin Dios sa Sarong Sagradong Hilom.” (1 Corinto 2:7) Manongod sa ano an diosnon na kadonongan na ini na ipinahayag ni apostol Pablo durante kan saiyang paglilingkod bilang misyonero? Iyan an may kadonongan asin makapangyarihan na paagi ni Jehova sa pagpangyari nin unibersal na katoninongan asin pagkasararo. An kadonongan na ini nakasentro ki Jesus. Imbes na maghulit nin ebanghelyo para sa reporma sosyal, tinabangan ni Pablo an mga tawo na  maheling kun paano hahaleon nin Dios an mga epekto kan kasalan ni Adan. (Efeso 3:​8, 9) Sinadol kan ispiker an mga nagdadangog sa saiya: “Gamiton an saindong pribilehio nin paglilingkod arog kan ginibo ni Pablo, na minansay an saiyang asignasyon na pagmimisyonero bilang oportunidad tanganing tabangan an mga tawo na masabotan kun paano isasagibo ni Jehova an saiyang katuyohan.”

Kasunod kaini, pinangenotan ni Mark Noumair, saro pang instruktor sa Gilead, an entusiastikong pakikipag-olay sa nagkapirang estudyante kan klase. Idinoon kan temang “An Pag-adal kan Tataramon nin Dios Nagbubunga nin Maigot na mga Ministro” an mga tataramon ni Pablo sa Roma 10:10. Isinaysay kan mga estudyante an dakol na nagin eksperyensia ninda sa paglilingkod sa langtad mantang yaon sa paadalan. Pinatunayan kan mga eksperyensia ninda na kun kita nag-aadal asin naghohorophorop sa Tataramon nin Dios, an satong puso mapapano nin marahayon na mga bagay may labot ki Jehova Dios asin sa saiyang Kahadean asin isasabi niato iyan sa iba. Durante kan limang bulan ninda sa Sentro nin Edukasyon kan Watchtower, an mga estudyante nakapoon nin labing 30 pag-adal sa Biblia sa mga interesado sa pirme nang nagigibong mga teritoryo sa kaharaning mga kongregasyon.

Nagtao nin Sadol an mga Maygurang

Durante kan saindang pag-eskuela, an mga estudyante nakinabang sa pakikiasosyar sa mga miembro kan pamilyang Bethel sa Estados Unidos. An mga miembro kan sangang opisina na si Robert Ciranko asin Robert P. Johnson ininterbio an nagkapirang haloyan nang fiel na lingkod ni Jehova, kaiba an nagbibiaheng mga paraataman na sa presenteng idto nag-aako nin espesyal na pagsasanay sa Sentro nin Edukasyon kan Watchtower. An gabos na ininterbio naggradwar sa Gilead na kaidto naglingkod bilang mga misyonero. Nakapakokosog liwat sa boot kan mga estudyante asin kan saindang mga pamilya saka mga katood na madangog an mga tataramon nin kadonongan hale sa eksperyensiado asin espirituwal na mga lalaking ini.

Kaiba sa saindang sadol an: “Sagkod sa mapupuede magdanay na sibot sa ministeryo asin sa kongregasyon.” “Dai kamo labi-labing magpahalaga sa sadiri. Magkonsentrar sa saindong katuyohan bilang misyonero, asin gibohon an saindong destino na sadiri nindong lugar.” Ipinaheling kan iba pang nakatatabang na mga komento kun paano sinasangkapan kan pagsasanay sa Gilead an sarong ministro para sa marahay na gibo, saen man sia idestino. Uya an nagkapira kaiyan: “Nanodan ming magkooperar asin magtarabangan.” “Tinabangan kami kan paadalan na akoon an bagong mga kultura.” “Tinokdoan kaming gamiton an Kasuratan gikan sa ibang punto de vista.”

Itinao ni John E. Barr, sarong haloyan nang miembro kan Namamahalang Grupo, an pangenot na pahayag kan programa. An saiyang tema na sono sa Kasuratan iyo an “An Saindang Tingog Nakalakop sa Bilog na Daga.” (Roma 10:18) Ihinapot nia an, Naotob daw kan banwaan nin Dios an depisil na gibohon na ini ngonyan? Iyo nanggad! Poon pa kaidtong 1881, hinapot an mga parabasa kan magasin na an Torrengbantayan: “Naghuhulit daw kamo?” Dangan ipinagirumdom kan ispiker sa gabos na nagdadangog an makasaysayan na pangapodan sa kombension kan 1922 sa Cedar Point, Ohio, E.U.A.: “Ipaisi, an Hade asin an saiyang Kahadean!” Sa pag-agi nin panahon, an kaigotan kan fiel na mga lingkod nin Dios pinahiro sinda na ipahayag an makangangalas na mga katotoohan manongod sa Kahadean sa gabos na nasyon. Paagi sa inimprentang mga babasahon asin paagi sa berbal na kapahayagan, an mga tataramon kan maogmang bareta nakaabot sa kaporoporohi kan ineerokan na daga​—an gabos para sa onra asin kaomawan ni Jehova. Sa nakapupukaw sa boot na konklusyon, sinadol ni Tugang na Barr an mga naggradwar na bilangon an saindang mga bendisyon, na nagsasabi: “Aroaldaw, kun kamo namimibi ki Jehova sa dinestinohan sa saindo, odok sa pusong pasalamatan sia sa kabtang nindo sa kaotoban kan saiyang mga tataramon na, ‘An saindang tingog nakalakop sa bilog na daga.’”

Pagkatapos kan pahayag na ini, binasa an mga pataratara, asin itinao kan tsirman an diploma sa lambang naggradwar. Dangan, sa tahaw kan saralak na emosyon nin kagayagayahan asin kamondoan sa paghale sa namomotan na marhay na paadalan, binasa kan sarong representante kan klase an sarong odok sa pusong resolusyon para sa Namamahalang Grupo asin sa pamilyang Bethel, na nagpapahayag sa determinasyon kan mga naggradwar na omawon si Jehova “magpoon ngonyan asin sagkod sa panahon na daing talaan.”​—Salmo 115:18.

Ipinamimibi niato na an mga naggradwar na ini makaadaptar sa bago nindang istaran asin makatabang sa pag-oswag kan pambilog na kinaban na paghuhulit, arog kan ginibo kan nagkaerenot sa sainda sa laog na nin mga 60 taon.

[Kahon sa pahina 23]

ESTADISTIKA KAN KLASE

Bilang nin mga nasyon na irinepresentar: 12

Bilang nin mga nasyon na inasignaran: 16

Bilang nin mga estudyante: 48

Promedyong edad: 34.4

Promedyong taon sa katotoohan: 17.6

Promedyong taon sa bilog na panahon na ministeryo: 13.5

[Ritrato sa pahina 24]

Ika-114 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.