Ano an Kahulogan sa Saindo kan Pamanggihan nin Kagurangnan?
Ano an Kahulogan sa Saindo kan Pamanggihan nin Kagurangnan?
“An siisay man na kumakan kan tinapay o uminom kan kopa kan Kagurangnan na bakong angay magkakasala mapadapit sa hawak asin sa dugo kan Kagurangnan.”—1 CORINTO 11:27.
1. Ano an pinakamahalagang okasyon na plinano para sa taon 2003, asin ano an ginikanan kaiyan?
AN PINAKAMAHALAGANG okasyon na plinano para sa taon 2003 gigibohon pagkasolnop kan saldang sa Abril 16. Sa panahon na iyan matiripon an Mga Saksi ni Jehova tanganing selebraron an Memorial kan kagadanan ni Jesu-Cristo. Siring kan ipinaheling sa sinundan na artikulo, inestablisar ni Jesus an selebrasyon na ini, na inaapod man na Pamanggihan nin Kagurangnan, pakatapos na selebraron ninda kan saiyang mga apostol an Paskua kan Nisan 14, 33 C.E. An mga emblema sa Memorial na tinapay na daing lebadura asin mapulang arak nagsisimbolisar sa daing kasalan na hawak ni Cristo asin sa saiyang pinabolos na dugo—an solamenteng atang na makababalukat sa katawohan sa minanang kasalan asin kagadanan.—Roma 5:12; 6:23.
2. Anong patanid an nakasurat sa 1 Corinto 11:27?
2 An mga nakikikabtang sa mga emblema sa Memorial dapat na gibohon iyan na angay. Lininaw iyan ni apostol Pablo kan magsurat sia sa mga Kristiano sa suanoy na Corinto, kun saen dai sineselebrar sa tamang paagi an Pamanggihan nin Kagurangnan. (1 Corinto 11:20-22) Nagsurat si Pablo: “An siisay man na kumakan kan tinapay o uminom kan kopa kan Kagurangnan na bakong angay magkakasala mapadapit sa hawak asin sa dugo kan Kagurangnan.” (1 Corinto 11:27) Ano an kahulogan kan mga tataramon na iyan?
An Nagkapira Sinelebrar Iyan na Bakong Angay
3. Paano guminawe an dakol na Kristianong taga Corinto sa mga selebrasyon kan Pamanggihan nin Kagurangnan?
3 An dakol na Kristianong taga Corinto nakikabtang sa Memorial na bakong angay. Nagkakabaranga sinda, asin kisuerra sa laog nin dikit na panahon, an nagkapira binalon an saindang pamanggihan asin kinakan iyan bago o durante kan pagtiripon, na sa parate nagpapangana sa pagkakan asin pag-inom. Sinda bakong listo sa isip ni sa espirituwal. Nagin dahelan ini na sinda ‘nagkasala mapadapit sa hawak asin sa dugo kan Kagurangnan.’ Gutom asin nadisturbo an mga mayo nin pamanggihan. Iyo, dakol an nakikabtang na mayo nin paggalang asin lubos na pakamansay sa pagkaseryoso kan okasyon. Bakong makangangalas na hinokoman sinda dahel man sana sa sainda!—1 Corinto 11:27-34.
4, 5. Taano ta kaipuhan na magsiyasat sa sadiri an mga pirme nang nakikikabtang sa mga emblema sa Memorial?
4 Sa pagdangadang kan Memorial kada taon, an mga pirme nang nakikikabtang sa mga emblema kaipuhan na magsiyasat sa sadiri. Tanganing makikabtang nin tama sa pagkakan na ini para sa pakikikabtang, sinda dapat na nasa marahay na espirituwal na kamugtakan. An siisay man na nagpapaheling nin dai paggalang, nin pagduhagi pa ngani, sa atang ni Jesus namemeligrong ‘pohoon sa banwaan nin Dios,’ arog nin sarong Israelita na nakikabtang sa pagkakan para sa pakikikabtang sa nasa marigsok na kamugtakan.—Levitico 7:20; Hebreo 10:28-31.
5 An Memorial ibinaing ni Pablo sa sarong pagkakan para sa pakikikabtang sa suanoy na Israel. Nagtaram sia manongod sa iribanan na mga nakikikabtang dian ki Cristo dangan nagsabi: “Dai kamo puedeng uminom sa kopa ni Jehova asin sa kopa nin mga demonyo; dai kamo puedeng makikakan sa ‘lamesa ni Jehova’ asin sa lamesa nin mga demonyo.” (1 Corinto 10:16-21) Kun makagibo nin seryosong kasalan an saro na parate nang nakikikabtang sa mga emblema sa Memorial, maninigo nia ining ituga ki Jehova asin humagad man nin espirituwal na tabang sa kamagurangan na lalaki sa kongregasyon. (Talinhaga 28:13; Santiago 5:13-16) Kun sia tunay na nagsosolsol asin nagpapaheling kan bunga na angay sa pagsolsol, dai sia makikikabtang na bakong angay.—Lucas 3:8.
Pag-atender Bilang Magalang na mga Nagmamasid
6. Kiisay sana itinao nin Dios an pribilehio na makikabtang sa Pamanggihan nin Kagurangnan?
6 Maninigo daw na makikabtang sa Pamanggihan nin Kagurangnan an mga naggigibo nin marahay ngonyan sa natatada kan 144,000 na tugang ni Cristo? (Mateo 25:31-40; Kapahayagan 14:1) Dai. An pribilehiong iyan itinao sana nin Dios sa mga indibiduwal na linahidan nia nin banal na espiritu na magin “kaibang mga paramana ni Cristo.” (Roma 8:14-18; 1 Juan 2:20) Ano, kun siring, an kamugtakan kan mga may paglaom na mabuhay sagkod lamang sa sarong pambilog na globong paraiso sakop kan pamamahala kan Kahadean? (Lucas 23:43; Kapahayagan 21:3, 4) Huling bako sindang kaibang mga paramana ni Jesus na may langitnon na paglaom, sinda nag-aatender sa Memorial bilang magalang na mga nagmamasid.—Roma 6:3-5.
7. Taano ta aram kan mga Kristiano kan enot na siglo na maninigo sindang makikabtang sa mga emblema sa Memorial?
7 An tunay na mga Kristiano kan enot na siglo linahidan nin banal na espiritu. An dakol sa sainda nagamit an saro o labi pang balaog kan espiritu na paggibo nin milagro, arog kan pagtaram nin laen-laen na tataramon. Kun siring, bakong depisil para sa siring na mga indibiduwal na maaraman na sinda linahidan nin espiritu asin maninigo na makikabtang sa mga emblema sa Memorial. Minsan siring, sa panahon niato, ini puedeng maaraman basado sa ipinasabong na mga tataramon na arog kaini: “An gabos na ginigiyahan kan espiritu nin Dios, ini an mga aki nin Dios. Huli ta kamo dai nag-ako nin espiritu nin kaoripnan na ginigikanan giraray nin takot, kundi kamo nag-ako nin espiritu nin pag-ampon bilang mga aki, na paagi kan espiritung ini kita nagkukurahaw: ‘Abba, Ama!’”—Roma 8:14, 15.
8. Sairisay an irinerepresentar kan “trigo” asin kan “mga doot” na nasambitan sa Mateo kapitulo 13?
8 Sa nag-aging mga siglo, an tunay na mga linahidan nagtubo bilang “trigo” sa sarong oma nin “mga doot,” o falsong mga Kristiano. (Mateo 13:24-30, 36-43) Poon kan mga taon nin 1870, an “trigo” paorog nang paorog na nahayag, asin pakalihis nin nagkapirang taon sinabihan an linahidan na Kristianong mga paraataman: “An kamagurangan . . . maninigo na iatubang sa mga matiripon [para sa Memorial] an mga kondisyon na ini,—(1) pagtubod sa dugo [ni Cristo]; asin (2) pagkonsagrar sa Kagurangnan asin sa paglilingkod sa saiya, dawa sagkod sa kagadanan. Sa panahon na iyan maninigo nindang imbitaran an gabos na may siring kaiyan na kaisipan asin sa siring konsagrado na makiiba sa pagselebrar sa kagadanan kan Kagurangnan.”—Studies in the Scriptures, Series VI, The New Creation, pahina 473. *
Paghanap sa “Ibang Karnero”
9. Paano lininaw kan 1935 kun siisay an “dakulang kadaklan,” asin paano ini nakaapektar sa nagkapira na nakikikabtang sa mga emblema sa Memorial?
9 Pag-abot nin panahon, pinonan kan organisasyon ni Jehova na magkonsentrar sa iba pa apuera sa linahidan na mga parasunod ni Cristo. An sarong lataw na pangyayari may koneksion digdi nangyari kaidtong mga 1935. Bago kaiyan, an pagmansay kan banwaan nin Dios sa “dakulang kadaklan” sa Kapahayagan 7:9 sarong sekondaryong espirituwal na grupo na makakaibanan sa langit kan 144,000 na linahidan na binuhay liwat—garo mga abay sa kasal o kairiba kan nobya ni Cristo. (Salmo 45:14, 15; Kapahayagan 7:4; 21:2, 9) Alagad kan Mayo 31, 1935, sa sarong diskurso sa sarong kombension kan Mga Saksi ni Jehova sa Washington, D.C., E.U.A., ipinaliwanag basado sa Kasuratan na an “dakulang kadaklan” (“dakulang kaburunyogan,” King James Version) nanonongod sa “ibang karnero” na nabubuhay durante kan panahon kan katapusan. (Juan 10:16) Pagkatapos kan kombension na iyan, an nagkapira na dati nakikikabtang sa mga emblema sa Memorial nagpondo sa pakikikabtang huli ta narealisar ninda na an paglaom ninda daganon, bakong langitnon.
10. Paano nindo ilaladawan an paglaom asin mga paninimbagan kan “ibang karnero” sa presenteng panahon?
10 Nangorogna poon kan 1935 ginibo an paghanap sa mga nagigin “ibang karnero,” na nagtutubod sa pantubos, idinudusay an saindang sadiri sa Dios, asin sinusuportaran an linahidan na “sadangoton na aripompon” sa paghuhulit kan Kahadean. (Lucas 12:32) An ibang karnerong ini naglalaom na mabuhay sagkod lamang sa daga, alagad sa gabos na iba pang bagay, sinda kapareho kan presenteng aldaw na natatada kan mga paramana kan Kahadean. Arog kan mga nakikihimanwa sa suanoy na Israel na nagsamba ki Jehova asin nagpasakop sa Ley, inaako kan ibang karnero sa presente an Kristianong mga paninimbagan, arog baga kan paghuhulit kan maogmang bareta kaiba kan mga miembro kan espirituwal na Israel. (Galacia 6:16) Minsan siring, kun paanong mayo nin nakikihimanwa na puedeng magin hade o saserdote sa Israel, mayo sa ibang karnero na ini an puedeng mamahala sa langitnon na Kahadean o maglingkod bilang mga saserdote.—Deuteronomio 17:15.
11. Taano an petsa nin pagdusay nin saro ta igwa nin koneksion sa saiyang paglaom?
11 Kun siring, kan mga taon nin 1930, nagigin malinaw kaidto na, sa pankagabsan, napili na an langitnon na grupo. Sa laog nin dakol nang siglo ngonyan, ginigibo an paghanap para sa ibang karnero, na an paglaom daganon. Kun an sarong linahidan magin bakong fiel, posibleng marhay na an saro na haloy nang fiel na naglilingkod sa Dios bilang saro sa ibang karnero aapodon tanganing panoan an pagkabakante sa 144,000.
Kun Taano ta May mga Napapasala sa Paghona
12. Sa anong mga kamugtakan maninigo na pumondo an saro sa pakikikabtang sa mga emblema sa Memorial, asin taano?
12 An linahidan na mga Kristiano lubos na nakasesegurado na igwa sinda nin langitnon na pag-apod. Alagad paano kun an nagkapirang indibiduwal na mayo kan pag-apod na ini nakikikabtang sa mga emblema sa Memorial? Ngonyan na aram na ninda na nungka sindang nagkaigwa nin langitnon na paglaom, segurado na pahihiroon sinda kan saindang konsensia na pumondo na sa pakikikabtang. Dai nasosonoan nin Dios an siisay man na nagsasabing sia saro na inapod na magin langitnon na hade asin saserdote mantang aram nia na mayo man talaga sia kan siring na pag-apod. (Roma 9:16; Kapahayagan 20:6) Ginadan ni Jehova an Levitang si Core huli sa may kapangahasan na paghihingoang makua an Aaronikong pagkasaserdote. (Exodo 28:1; Bilang 16:4-11, 31-35) Kun marealisar nin siisay man na Kristiano na sia napasala sa pakikikabtang sa mga emblema sa Memorial, sia maninigo na pumondo sa pakikikabtang asin mapakumbabang mamibi para sa kapatawadan ni Jehova.—Salmo 19:13.
13, 14. Taano ta an nagkapira tibaad napapasala sa paghona na igwa sinda kan langitnon na pag-apod?
13 Taano ta an nagkapira tibaad napasala sa paghona na sinda igwa kan langitnon na pag-apod? An pagkagadan nin agom o iba pang trahedya tibaad magin dahelan na sinda mawaran nin interes sa buhay digdi sa daga. O tibaad mawot man nindang magkaigwa kan kaparehong kaaabtan nin sarong dayupot na katood na nagsasabi na sia linahidan na Kristiano. Siempre, mayong inasignaran an Dios na manreklutar nin iba pa para sa pribilehiong ini. Asin dai nia linalahidan an mga paramana kan Kahadean paagi sa pagpadangog sa sainda nin mga tingog na may mga mensaheng nagpapatunay kaiyan.
14 An falsong relihiosong ideya na an gabos na marahay na tawo mapalangit tibaad nagin dahelan tanganing honaon nin nagkapira na igwa sinda nin langitnon na pag-apod. Huli kaini, kaipuhan kitang magmaan na dai maimpluwensiahan nin nakaaging salang mga punto de vista o iba pang dahelan. Halimbawa, puedeng hapoton nin nagkapira an saindang sadiri: ‘May ginagamit daw akong mga bolong na nakakaapektar sa sakong emosyon? May tendensia daw akong magin masyadong emosyonal kaya puedeng mapasala ako sa paghona?’
15, 16. Taano ta may pira na tibaad napapasala sa pagkonklusyon na sinda linahidan?
15 An nagkapira puedeng hapoton an saindang sadiri: ‘Gusto ko daw na magin prominente? Nag-aambisyon daw akong magkaigwa nin autoridad ngonyan o mapabilang sa magigin kaibang paramana ni Cristo?’ Kan an mga paramana kan Kahadean apodon kan enot na siglo, bakong gabos sa sainda igwa nin responsableng katongdan sa kongregasyon. Asin an mga indibiduwal na may langitnon na pag-apod dai nagmamawot na magin prominente o ipinaghahambog an pagigin linahidan. Ipinaheheling ninda an kapakumbabaan na inaasahan sa mga igwa “kan isip ni Cristo.”—1 Corinto 2:16.
16 An nagkapira tibaad nagkonklusyon na igwa sinda nin langitnon na pag-apod huli ta igwa sinda nin dakol na kaaraman sa Biblia. Alagad an paglahid nin espiritu dai nagbubunga nin ekstraordinaryong pakasabot, ta kinaipuhan kaidto ni Pablo na tokdoan asin hatolan an nagkapirang linahidan. (1 Corinto 3:1-3; Hebreo 5:11-14) An Dios igwa nin areglo para sa pagtao nin espirituwal na kakanon sa bilog niang banwaan. (Mateo 24:45-47) Kaya mayo nin maninigong mag-isip na an pagigin linahidan na Kristiano nagtatao sa saiya nin kadonongan na nakalalabi sa kadonongan kan mga igwa nin daganon na paglaom. An paglahid nin espiritu dai maheheling sa kahusayan sa pagsimbag sa mga hapot sa Kasuratan, paghuhulit, o pagtao nin mga pahayag sa Biblia. An mga Kristiano na may daganon na paglaom mahusay man sa mga bagay na ini.
17. An paglahid nin espiritu nakadepende sa ano asin kiisay?
17 Kun may sarong kapagtubod na maghapot manongod sa langitnon na pag-apod, puede iyan na ipakipag-olay sa saiya nin sarong magurang sa kongregasyon o iba pang maygurang na Kristiano. Minsan siring, an saro dai puedeng gumibo kan desisyon na ini para sa iba. An saro na totoong igwa kan pag-apod na ini dai na kaipuhan pang maghapot sa iba kun baga igwa sia kan pag-apod na ini. An mga linahidan “tinawan nin bagong pagkamundag, bakong sa malalapaon, kundi sa bakong malalapaon na banhi na nagdadakol, paagi sa tataramon kan nabubuhay asin nagdadanay na Dios.” (1 Pedro 1:23) Paagi sa saiyang espiritu asin Tataramon, itinatanom nin Dios an “banhi” na minagibo sa sarong indibiduwal na magin “bagong linalang,” na may langitnon na paglaom. (2 Corinto 5:17) Asin si Jehova an nagpipili. An paglahid “nakadepende, bakong sa saro na nagmamawot ni sa saro na nagdadalagan, kundi sa Dios.” (Roma 9:16) Kaya paano masesegurado nin saro na igwa sia kan langitnon na pag-apod?
Kun Taano ta Nakasesegurado Sinda
18. Paano an espiritu nin Dios nagpapatotoo kaiba kan espiritu kan mga linahidan?
18 An patotoo kan espiritu nin Dios an nagkokombensir sa linahidan na mga Kristiano na igwa sinda kan langitnon na paglaom. “Kamo nag-ako nin espiritu nin pag-ampon bilang mga aki,” an surat ni Pablo, “na paagi kan espiritung ini kita nagkukurahaw: ‘Abba, Ama!’ An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kaibang mga paramana ni Cristo, basta kita iribang magdusa tangani man kitang iribang mapamuraway.” (Roma 8:15-17) Sa impluwensia kan banal na espiritu, an espiritu, o nangingibabaw na aktitud, kan mga linahidan nagpapahiro sa sainda na iaplikar sa saindang sadiri an sinasabi kan Kasuratan manongod sa espirituwal na mga aki ni Jehova. (1 Juan 3:2) An espiritu nin Dios nagtatao sa sainda nin pakamate nin pagigin aki nia asin pinupukaw sa sainda an sarong daing kaagid na paglaom. (Galacia 4:6, 7) Iyo, marahayon an buhay na daing katapusan sa daga bilang sangkap na mga tawo na kairiba an mga miembro nin pamilya asin mga katood, alagad bako iyan an itinao nin Dios na paglaom ninda. Paagi sa saiyang espiritu, pinukaw nin Dios sa sainda an makosogon na langitnon na paglaom na iyan kaya andam sindang isakripisyo an gabos na koneksion asin oportunidad digdi sa daga.—2 Corinto 5:1-5, 8; 2 Pedro 1:13, 14.
19. Ano an papel kan bagong tipan sa buhay nin sarong linahidan na Kristiano?
19 An linahidan na mga Kristiano nakakasierto sa saindang langitnon na paglaom, sa saindang pagigin dinara sa bagong tipan. Nasambitan iyan ni Jesus kan establisaron nia an Memorial asin nagsabi: “An kopang ini nangangahulogan kan bagong tipan paagi sa sakong dugo, na papaboloson para sa saindo.” (Lucas 22:20) An mga partisipante sa bagong tipan iyo an Dios asin an mga linahidan. (Jeremias 31:31-34; Hebreo 12:22-24) Si Jesus an parapangoltanan. Nagkaigwa nin puersa paagi sa pinabolos na dugo ni Cristo, an bagong tipan nagkua bako sanang sa mga Judio kundi pati sa mga nasyon nin sarong banwaan para sa ngaran ni Jehova asin ginibo sindang kabtang kan “banhi” ni Abraham. (Galacia 3:26-29; Gibo 15:14) An “tipan [na ini] na daing katapusan” an nagpapangyari sa gabos na espirituwal na Israelita na buhayon liwat sa inmortal na buhay sa langit.—Hebreo 13:20.
20. An mga linahidan dinara sa anong tipan kaiba ni Cristo?
20 An mga linahidan nakasesegurado sa saindang paglaom. Dinara sinda sa saro pang tipan, an tipan para sa Kahadean. May labot sa saindang pagigin kaiba ni Cristo, si Jesus nagsabi: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” (Lucas 22:28-30) An tipan na ini sa pag-oltanan ni Cristo asin kan saiyang kairibang hade nagdadanay na may puersa sagkod lamang.—Kapahayagan 22:5.
An Panahon nin Memorial—Sarong Maogmang Panahon
21. Paano niato makakamtan an dakulang pakinabang sa panahon nin Memorial?
21 Dakol an bendisyon sa panahon nin Memorial. Puede kitang makinabang sa pagbasa sa Biblia na nakaiskedyul sa panahon na ini. Iyan saro man na espesyalmenteng marahay na panahon para sa pamimibi, sa paghorophorop sa daganon na buhay asin kagadanan ni Jesus, asin sa pakikikabtang sa paghuhulit kan Kahadean. (Salmo 77:12; Filipos 4:6, 7) An selebrasyon mismo nagpapagirumdom sa sato kan pagkamoot na ipinaheling nin Dios asin ni Cristo may koneksion sa atang na pantubos ni Jesus. (Mateo 20:28; Juan 3:16) An probisyon na ini nagtatao sa sato nin paglaom asin karangahan patin maninigo na magpakosog kan satong determinasyon na gibohon an arog kan ginibo ni Cristo. (Exodo 34:6; Hebreo 12:3) An Memorial maninigo man na magpakosog sa sato na otobon an satong pagdusay bilang mga lingkod nin Dios asin magin maimbod na mga parasunod kan saiyang mahal na Aki.
22. Ano an nakalalabi sa gabos na balaog nin Dios sa katawohan, asin ano an sarong paagi tanganing ipaheling an pag-apresyar dian?
22 Kanigoan karahay na mga balaog an itinatao sa sato ni Jehova! (Santiago 1:17) Yaon sa sato an paggiya kan saiyang Tataramon, an tabang kan saiyang espiritu, asin an paglaom na buhay na daing sagkod. An nakalalabi sa gabos na balaog nin Dios iyo an atang ni Jesus para sa kasalan kan mga linahidan asin kan gabos na iba pang nagtutubod. (1 Juan 2:1, 2) Kaya gurano kadakula an kahulogan sa saindo kan kagadanan ni Jesus? Magigin kabilang daw kamo sa mga mapaheling nin pagpasalamat dian paagi sa pagtiripon pagkasolnop kan saldang sa Abril 16, 2003, tanganing selebraron an Pamanggihan nin Kagurangnan?
[Nota sa Ibaba]
^ par. 8 Ipinublikar kan Mga Saksi ni Jehova alagad mayo nang iniimprenta ngonyan.
Ano an Simbag Nindo?
• Siisay an maninigo na makikabtang sa mga emblema sa Memorial?
• Taano an “ibang karnero” ta nag-aatender sa Pamanggihan nin Kagurangnan bilang magalang na mga nagmamasid sana?
• Paano naaaraman kan linahidan na mga Kristiano na maninigo sindang makikabtang sa tinapay asin arak sa Memorial kan kagadanan ni Cristo?
• An panahon nin Memorial sarong marahay na panahon para sa ano?
[Mga Hapot Para sa Pag-adal]
[Graph/Mga Ritrato sa pahina 18]
(Para sa aktuwal na format, hilingon an publikasyon)
Kabilangan nin Nag-atender sa Memorial
MINILYON
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Ritrato sa pahina 18]
Magigin presente daw kamo sa Pamanggihan nin Kagurangnan ngonyan na taon?
[Mga Ritrato sa pahina 21]
An panahon nin Memorial sarong marahay na panahon para sa orog pang pagbasa kan Biblia asin pakikikabtang sa paghuhulit kan Kahadean