Sinda Padagos na Naglalakaw sa Katotoohan

“Dai na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan.”—3 JUAN 4.

1. Sa ano nakasentro an “katotoohan kan maogmang bareta”?

 AN INOOYONAN ni Jehova idto sanang mga nagsasamba sa saiya “sa espiritu asin katotoohan.” (Juan 4:24) Kinukuyog ninda an katotoohan, na inaako an enterong kabilogan kan Kristianong katokdoan basado sa Tataramon nin Dios. An “katotoohan [na ini] kan maogmang bareta” nakasentro ki Jesu-Cristo asin sa pagbindikar kan soberaniya ni Jehova paagi sa Kahadean. (Galacia 2:14) Itinotogot nin Dios na “an sala makaimpluwensia” sa mga mas suno an kaputikan, alagad an kaligtasan nakadepende sa pagkaigwa nin pagtubod sa maogmang bareta asin paglakaw sa katotoohan.​—2 Tesalonica 2:9-12; Efeso 1:​13, 14.

2. Para sa ano espesyalmenteng nagpapasalamat si apostol Juan, asin may anong relasyon sia ki Gayo?

² An mga parabalangibog kan Kahadean “mga kapwa trabahador sa katotoohan.” Arog ni apostol Juan asin kan saiyang katood na si Gayo, sinda marigon na nangapot sa katotoohan asin naglakaw dian. Nasa isip si Gayo, si Juan nagsurat: “Dai na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan.” (3 Juan 3-8) Dawa kun bakong an gurang nang si Juan an nagtokdo kan katotoohan ki Gayo, dahel sa halangkaw nang edad, Kristianong pagkamaygurang, asin sa amang kapadangatan kan apostol, angay na an minalataw na nguhod na lalaking ini ibilang na saro sa espirituwal na mga aki ni Juan.

An Katotoohan Asin Kristianong Pagsamba

3. Ano an katuyohan asin kapakinabangan nin mga pagtiripon na ginigibo kan enot na mga Kristiano?

³ Tanganing manodan an katotoohan, an enot na mga Kristiano nagtitiripon bilang mga kongregasyon, sa parate sa pribadong mga harong. (Roma 16:3-5) Sa siring nag-aako sinda nin pagparigon sa boot asin nagdidinaragkahan sa pagkamoot asin sa marahay na mga gibo. (Hebreo 10:​24, 25) Mapadapit sa naghihingakong mga Kristiano kan huring mga panahon, si Tertuliano (mga 155–​pakatapos nin 220 C.E.) nagsurat: “Nagtitiripon kami tanganing basahon an mga libro nin Dios . . . Paagi sa banal na mga tataramon na iyan sinususteniran niamo an samong pagtubod, pinakokosog niamo an samong paglaom, sinesegurado niamo an samong kompiansa.”​—Apology, kapitulo 39.

4. Ano an kabtang nin pagkanta sa Kristianong mga pagtiripon?

⁴ An pagkanta posibleng marhay na kabtang nin mga pagtiripon kan enot na mga Kristiano. (Efeso 5:19; Colosas 3:16) Si Propesor Henry Chadwick nagsurat na nanompongan kan kritiko kan ikaduwang siglo na si Celso na an minalataw na magayon  pagdangogon na mga kanta na ginagamit kan naghihingakong mga Kristiano “magayonon kaya talagang ikinaanggot nia an epekto kaiyan sa emosyon.” Nagsabi pa si Chadwick: “Si Clemente na taga Alejandria an kaenot-enoteng Kristianong parasurat na nagpaliwanag kun anong klaseng musika an angay na gamiton nin mga Kristiano. Sia nagboot na iyan maninigo na bakong an klase na konektado sa erotikong tugtog sa bayle.” (The Early Church, pahina 274-5) Kun paanong an enot na mga Kristiano minalataw na nagkakaranta kun sinda nagtitiripon, an Mga Saksi ni Jehova sa parate nagkakanta man nin mga awit na basado sa Biblia na kaiba an mapuersang mga himno na irinurukyaw an Dios asin an Kahadean.

5. (a) Paano itinatao an espirituwal na paggiya sa mga kongregasyon kan enot na mga Kristiano? (b) Paano iinaplikar kan tunay na mga Kristiano an mga tataramon ni Jesus na nakasurat sa Mateo 23:​8, 9?

⁵ Sa mga kongregasyon kan enot na mga Kristiano, an mga paraataman an nagtotokdo kan katotoohan, asin an ministeryal na mga lingkod nagtatabang sa mga kapagtubod sa laen-laen na paagi. (Filipos 1:1) Sarong namamahalang grupo na nagsasarig sa Tataramon nin Dios asin sa banal na espiritu an nagtatao nin espirituwal na paggiya. (Gibo 15:​6, 23-31) Dai ginamit an relihiosong mga titulo huli ta pinagbotan ni Jesus an saiyang mga disipulo: “Dai kamo magpaapod nin Rabi, huling saro an saindong paratokdo, mantang kamo gabos magturugang. Siring man, dai kamo mag-apod nin ama sa kiisay man sa daga, nin huli ta saro an saindong Ama, an langitnon na Saro.” (Mateo 23:​8, 9) Digdi asin sa dakol na iba pang bagay, igwa nin mga pagkakaagid an enot na mga Kristiano asin an Mga Saksi ni Jehova.

Pinaglamag Huli sa Paghuhulit kan Katotoohan

6, 7. Minsan ngani nagbabalangibog sinda nin matoninong na mensahe, ano an nagin pagtrato sa tunay na mga Kristiano?

⁶ Minsan ngani nagbabalangibog sinda kan matoninong na mensahe kan Kahadean, an enot na mga Kristiano pinaglamag, siring kan nangyari ki Jesus. (Juan 15:20; 17:14) An historyador na si John L. von Mosheim inapod an mga Kristiano kan enot na siglo na “sarong grupo nin mga tawo na pinakadai nandadanyar asin dai nakauuyam an ugale, na nungkang nagtatanom sa saindang isip nin kamawotan o kaisipan na makadadanyar sa ikararahay kan estado.” Si Dr. Mosheim nagsabi na “an ikinasuya kan mga Romano tumang sa mga Kristiano, iyo an pagigin simple kan saindang pagsamba, na daing kapareho sa sagradong mga seremonya nin arin man na ibang banwaan.” Idinagdag nia: “Mayo sinda nin mga atang, templo, imahen, orakulo, o orden nin mga saserdote; asin igo na ini tanganing sinda pag-olog-ologon nin ignoranteng mga tawo, na nag-isip na dai puedeng magkaigwa  nin relihion kun mayo kan mga ini. Sa siring ibinilang sinda na sarong klase nin mga ateista; asin, paagi sa mga ley kan Roma, an mga kinakasohan nin ateismo ipinahayag na mga peste sa sosyedad nin tawo.”

⁷ An mga saserdote, trabahador, asin iba pa na an hanap-buhay nakadepende sa idolatriya sinutsutan an mga namamanwaan kontra sa mga Kristiano, na dai nakikikabtang sa idolatrosong mga gibo. (Gibo 19:23-40; 1 Corinto 10:14) Si Tertuliano nagsurat: “An mga Kristiano an sinasahotan nindang dahelan kan lambang grabeng kapahamakan sa Estado, kan lambang remalaso kan banwaan. Kun an Tiber bumaha na makaabot sagkod sa mga lanob, kun an Nilo dai maglipwas na makapatubig sa mga oma, kun an kalangitan dai mag-oran o kun maglinog, kun igwa nin tiggutom, kun igwa nin damat, an kurahaw tolos: ‘Aponan an mga Kristiano sa leon!’” Ano man an kaabtan, an tunay na mga Kristiano ‘naglilikay sa mga idolo.’​—1 Juan 5:21.

An Katotoohan Asin Relihiosong mga Selebrasyon

8. Taano ta dai nagseselebrar nin Navidad an mga naglalakaw sa katotoohan?

⁸ An mga naglalakaw sa katotoohan naglilikay sa mga selebrasyon na bakong sono sa Kasuratan huli ta an liwanag ‘mayo nin pakikisumaro sa diklom.’ (2 Corinto 6:14-18) Halimbawa, dai sinda nagseselebrar nin Navidad, na ginigibo kun Disyembre 25. “Mayo nin siisay man na nakakaaram kan eksaktong petsa kan pagkamundag ni Cristo,” an inaadmitir kan The World Book Encyclopedia. An The Encyclopedia Americana (1956 na Edisyon) nagsasabi: “An Saturnalia, sarong Romanong kapiestahan na sineselebrar sa kabangaan nin Disyembre, iyo an sinundan kan dakol sa kostumbre nin kaorogmahan kun Navidad.” An Cyclopædia ni M’Clintock asin Strong nagsasabi: “An pagselebrar nin Navidad bakong pagboot nin Dios, ni iyan nasa B[agong] T[ipan].” Asin an librong Daily Life in the Time of Jesus nagsasabi: “An mga aripompon . . . nasa mga sirongan sa panahon nin tiglipot; asin base sana digdi masasabotan na an tradisyonal na petsa para sa Navidad, kun tiglipot, harayo sa posibilidad na tama, huling an Ebanghelyo nagsasabi na an mga pastor nasa langtad.” ​—Lucas 2:8-11.

9. Taano ta linilikayan kan mga lingkod ni Jehova kan nakaagi asin sa presente an mga selebrasyon nin Pasko?

⁹ An Pasko pagselebrar daa kan pagkabuhay liwat ni Cristo, alagad an masasarigan na mga reperensia ikinokonektar iyan sa falsong pagsamba. An The Westminster Dictionary of the Bible nagsasabi na an Pasko “sa kapoonpooni iyo an kapiestahan kun tigsoli bilang pagtao nin onra sa Teutonicong diosa nin liwanag asin tigsoli na sa Anglo-Saxon inaapod na Eastre,” o Eostre. Sa paano man, an Encyclopædia Britannica (ika-11 Edisyon) nagsasabi: “Mayo nin ipinaririsang pagselebrar kan kapiestahan nin Pasko sa Bagong Tipan.” An Pasko bakong selebrasyon kan enot na mga Kristiano asin dai sineselebrar kan banwaan ni Jehova ngonyan.

10. Anong selebrasyon an pinonan ni Jesus, asin siisay an nag-ootob kaiyan nin tama?

¹⁰ Dai pinagbotan ni Jesus an mga parasunod nia na iselebrar magsalang an pagkamundag nia o an pagkabuhay nia liwat, alagad talagang pinonan nia an Memorial kan saiyang kagadanan bilang atang. (Roma 5:8) Tunay nanggad, ini an solamenteng okasyon na ipinagboot nia sa saiyang mga disipulo na selebraron. (Lucas 22:​19, 20) Inaapod man na an Pamanggihan kan Kagurangnan, an taonan na selebrasyon na ini sineselebrar pa sagkod ngonyan kan Mga Saksi ni Jehova.​—1 Corinto 11:20-26.

An Katotoohan Ipinahahayag sa Bilog na Daga

11, 12. Paano danay na sinusuportaran kan mga naglalakaw sa katotoohan an saindang aktibidad na paghuhulit?

¹¹ Ibinibilang kan mga nakakaaram kan katotoohan na sarong pribilehio an idusay an saindang panahon, kosog, asin iba pang mga rekurso sa gibohon na paghuhulit kan maogmang bareta. (Marcos 13:10) An aktibidad na paghuhulit kan enot na mga Kristiano sustentado nin boluntad na mga donasyon. (2 Corinto 8:12; 9:7) Nagsurat si Tertuliano: “Minsan ngani igwa nin sarong klase nin kaha nin kuarta, iyan bakong kuarta bilang bayad sa paglaog, na garo baga an relihion sarong kontrata. Kada bulan an balang saro may dinadarang dikit na kantidad​—o noarin man gusto nia, asin kun talagang gusto nia sana, asin kun kaya nia; huli ta mayo nin pinipirit; iyan boluntad na dolot.”​​—Apology, kapitulo 39.

¹² An lakop sa globong paghuhulit kan Kahadean kan Mga Saksi ni Jehova sustentado man nin boluntad na mga donasyon. Apuera sa Mga Saksi ni Jehova, ibinibilang kan mapagpasalamat na mga interesado na sarong pribilehio an suportaran an  aktibidad na ini paagi sa saindang mga kontribusyon. Digdi man, may pagkakaagid an enot na mga Kristiano asin an Mga Saksi ni Jehova.

An Katotoohan Asin Personal na Paggawe

13. Mapadapit sa paggawe ninda, anong hatol ni Pedro an hinihimate kan Mga Saksi ni Jehova?

¹³ Bilang mga naglalakaw sa katotoohan, sinunod kan enot na mga Kristiano an hatol ni apostol Pedro: “Papagdanayon na marahay an saindong gawe-gawe sa tahaw nin mga nasyon, tanganing, sa mga bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.” (1 Pedro 2:12) Isinasapuso kan Mga Saksi ni Jehova an mga tataramon na iyan.

14. Ano an Kristianong pagmansay sa inmoral na aling-alingan?

¹⁴ Dawa pakatapos na makalaog an apostasiya, linikayan kan mga Kristiano sa ngaran an inmoral na mga gibo. Si W. D. Killen, propesor sa eklesiastikong kasaysayan, nagsurat: “Kan ikaduwa asin ikatolong siglo an teatro sa lambang dakulang banwaan sentro nin atraksion; asin minsan ngani an mga artista kadaklan mga tawo na malaswang marhay an moral, an saindang dramatikong mga pasale pirmeng nagpapanigo sa bikong mga paghimuyawot kan panahon na idto. . . . An gabos na tunay na Kristiano nababalde sa teatro. . . . Nababalde sinda sa kalaswaan kaiyan; asin an pirmeng pag-arang kaiyan sa paganong mga dios asin diosa nakaiinsulto sa saindang relihiosong mga kombiksion.” (The Ancient Church, pahina 318-​19) Linilikayan man kan tunay na mga parasunod ni Jesus ngonyan an malaswa asin nakararaot sa moral na mga klase nin aling-alingan.​—Efeso 5:3-5.

An Katotoohan Asin an “Superyor na mga Autoridad”

15, 16. Sairisay an “superyor na mga autoridad,” asin paano sinda minimidbid kan mga naglalakaw sa katotoohan?

¹⁵ Sa ibong kan marahay na paggawe kan enot na mga Kristiano, sala an paghusgar sa sainda kan kadaklan na emperador nin Roma. An historyador na si E. G. Hardy nagsasabi na an pagheling sa sainda kan mga emperador “garo daing kuentang mga panatiko.” Maheheling sa mga pagsinuratan ni Gobernador Plinio na Nguhod nin Bitinia asin ni Emperador Trajan na an mga opisyal kadaklan dai nakakaaram kun ano talaga an Kristianismo. Paano minamansay kan mga Kristiano an Estado?

¹⁶ Arog kan enot na mga parasunod ni Jesus, an Mga Saksi ni Jehova nasa relatibong pagpasakop sa “superyor na mga autoridad” nin gobyerno. (Roma 13:1-7) Kun magkasarongat an kahagadan nin tawo asin an kabotan nin Dios, an paninindogan ninda: “Dapat na kuyogon niamo an Dios bilang namamahala imbes na mga tawo.” (Gibo 5:29) Nagsabi an librong After Jesus​​—The Triumph of Christianity: “Minsan ngani an mga Kristiano puedeng dai nakikabtang sa pagsamba sa emperador, sinda bakong mga parasutsut nin pagriribok, asin an saindang relihion, minsan ngani laen asin kun beses nakaaanggot sa pagheling nin pagano, dai nanggad nagin huma sa imperyo.”

17. (a) An enot na mga Kristiano parasuportar sa anong gobyerno? (b) Paano iinaplikar kan tunay na mga parasunod ni Cristo sa saindang buhay an mga tataramon sa Isaias 2:4?

 ¹⁷ An enot na mga Kristiano parasuportar sa Kahadean nin Dios, kun paanong an mga patriarkang si Abraham, Isaac, asin Jacob naggibo nin pagtubod sa ipinanugang ‘siudad [na iyan] na ginibo nin Dios.’ (Hebreo 11:8-10) Arog kan saindang Kagurangnan, an mga disipulo ni Jesus “bakong kabtang kan kinaban.” (Juan 17:14-16) Kun dapit sa guerra asin iriwal nin tawo, pinagmaigotan nindang kamtan an katoninongan paagi sa ‘pagpulpog kan saindang mga espada na magin tarom nin arado.’ (Isaias 2:4) Sa pakarisa sa sarong interesanteng pagkakaagid, an paratokdo sa kasaysayan nin iglesia na si Geoffrey F. Nuttall nagkomento: “An aktitud kan enot na mga Kristiano dapit sa guerra mas kapareho kan aktitud kan mga tawo na inaapod an saindang sadiri na Mga Saksi ni Jehova asin nadedepisilan kitang admitiron iyan.”

18. Taano ta mayo nin gobyerno an may ano man na dahelan na matakot sa Mga Saksi ni Jehova?

¹⁸ Bilang neutral na mga indibiduwal na nagpapasakop “sa superyor na mga autoridad,” an enot na mga Kristiano bakong huma sa arin man na politikal na gobyerno, asin an Mga Saksi ni Jehova bako man. “Sarong imahinasyon na may pagkapanatiko saka sobrang pagsuspetsa asin pagdiskompiar sa iba an maniwala na an Mga Saksi ni Jehova nagtatao nin ano man na klase nin huma sa arin man na politikal na rehimen,” an isinurat nin sarong parasurat nin editoryal sa Amerika del Norte. “Sinda bakong subersibo asin mamomoton sa katoninongan nin siring sa sarong grupong relihioso.” Aram nin naliwanagan na mga autoridad na mayo sindang dapat ikatakot sa Mga Saksi ni Jehova.

19. Mapadapit sa mga buhis, ano an masasabi manongod sa enot na mga Kristiano asin an Mga Saksi ni Jehova?

¹⁹ An sarong paagi na an enot na mga Kristiano nagpaheling nin paggalang “sa superyor na mga autoridad” iyo an pagbayad kan saindang mga buhis. Kan magsurat ki Emperador Antonino Pio (138-​161 C.E.) nin Roma, si Justinong Martir marigon na nagsabi na an mga Kristiano nagbabayad kan saindang mga buhis “nin mas gikan sa boot kisa gabos na tawo.” (First Apology, kapitulo 17) Asin sinabi ni Tertuliano sa mga namamahala sa Roma na an saindang mga parasingil nin buhis igwa nin “utang na boot sa mga Kristiano” huli sa sadiosan na pagbayad ninda nin buhis. (Apology, kapitulo 42) An mga Kristiano nakinabang sa Pax Romana, o Romanong  Katoninongan, kaiba an ley asin orden kaiyan, magayon na mga tinampo, asin medyo daing peligrong pagbiahe sa dagat. Sa pagrekonoser sa saindang utang sa sosyedad, hinimate ninda an mga tataramon ni Jesus: “Itao nindo ki Cesar an mga bagay na ki Cesar, alagad sa Dios an mga bagay na sa Dios.” (Marcos 12:17) Sinusunod kan banwaan ni Jehova ngonyan an hatol na ini asin inoomaw sinda huli sa saindang pagkaonesto, siring sa pagbayad nin buhis.​—Hebreo 13:18.

An Katotoohan​—Sarong Nakapagpapasarong Bogkos

20, 21. Kun manongod sa sarong matoninong na kasararoan nin magturugang, ano an totoo dapit sa enot na mga Kristiano sagkod mga lingkod ni Jehova sa presenteng panahon?

²⁰ Huling sinda naglalakaw sa katotoohan, an enot na mga Kristiano borogkos sa sarong matoninong na kasararoan nin magturugang, arog man kan Mga Saksi ni Jehova ngonyan. (Gibo 10:​34, 35) An sarong surat na inimprenta sa The Moscow Times nagsasabi: “[An Mga Saksi ni Jehova] midbid na marhay na mga tawong mararahay, maboboot, asin mahohoyo na madaling gayong pakiibanan, nungkang namimirit sa ibang tawo asin pirmeng katoninongan an hanap sa saindang relasyon sa iba . . . Mayo sa sainda nin nagpapasuhol, paraburat o adikto sa droga, asin simpleng marhay an dahelan: Hinihingoa sana ninda na magiyahan kan saindang mga kombiksion na basado sa Biblia sa gabos nindang ginigibo o sinasabi. Kun an gabos na tawo sa kinaban kisuerra maghihingoang mamuhay nin sono sa Biblia siring sa Mga Saksi ni Jehova, an satong maringis na kinaban biyong magigin laen.”

²¹ An Encyclopedia of Early Christianity nagsasabi: “Ibinilang kan enot na iglesia an sadiri kaiyan na sarong bagong katawohan kun saen an dating magkalaban na mga grupo, an mga Judio asin Hentil, puedeng mamuhay nin sararo sa katoninongan.” An Mga Saksi ni Jehova saro man na mamomoton sa katoninongan na internasyonal na kasararoan nin magturugang​—tunay nanggad na sarong bagong kinaban na sosyedad. (Efeso 2:11-18; 1 Pedro 5:9; 2 Pedro 3:13) Kan maheling kan namomoon na opisyal sa seguridad kan Pretoria Show Grounds sa Aprika del Sur kun paano an mga Saksi sa gabos na rasa matoninong na nagtiripon duman bilang mga delegado sa kombension, sia nagsabi: “An gabos magalang, mga tawo na maogmang nag-oorolay-olay, an aktitud na ipinaheling sa nakaaging pirang aldaw​—iyan gabos nagpapatunay sa moral na kualidad kan mga miembro kan saindong sosyedad, asin na an gabos namumuhay na sararo siring sa sarong maogmang pamilya.”

Binendisyonan Huli sa Pagtotokdo kan Katotoohan

22. Ano an nangyayari huli ta ipinahahayag kan mga Kristiano an katotoohan?

²² Paagi sa saindang paggawe asin paghuhulit, ‘an katotoohan ikinapahahayag’ ni Pablo asin kan iba pang Kristiano. (2 Corinto 4:2) Dai daw kamo maoyon na an Mga Saksi ni Jehova iyo man an ginigibo asin nagtotokdo kan katotoohan sa gabos na nasyon? An mga tawo sa bilog na daga inaako an tunay na pagsamba asin nagbuburunyog pasiring sa “bukid kan harong ni Jehova” sa padakol nang padakol na kabilangan. (Isaias 2:​2, 3) Kada taon, rinibo an binabautismohan bilang simbolo kan saindang pagdusay sa Dios, na nagreresulta sa pagkaorganisar nin dakol na bagong kongregasyon.

23. Ano an pagheling nindo sa mga nagtotokdo kan katotoohan sa gabos na nasyon?

²³ Minsan ngani laen-laen an pinaghalean, an banwaan ni Jehova nagkakasararo sa tunay na pagsamba. An pagkamoot na ipinaheheling ninda nagpapamidbid sa sainda bilang mga disipulo ni Jesus. (Juan 13:35) Maheheling daw nindo na ‘an Dios tunay nanggad na yaon sa sainda’? (1 Corinto 14:25) Nanindogan na daw kamo sa kampi kan mga nagtotokdo kan katotoohan sa gabos na nasyon? Kun iyo, logod na ipaheling nindo an nagdadanay na pagpasalamat sa katotoohan asin magkaigwa kan pribilehio na maglakaw dian sagkod lamang.

Ano an Isisimbag Nindo?

• Sa paagi nin pagsamba, ano an pagkakaagid kan enot na mga Kristiano asin kan Mga Saksi ni Jehova?

• Ano an solamenteng relihiosong selebrasyon na inootob kan mga naglalakaw sa katotoohan?

• Sairisay an “superyor na mga autoridad,” asin paano sinda minimidbid kan mga Kristiano?

• Paanong an katotoohan sarong nakapagpapasarong bogkos?

[Mga Hapot Para sa Pag-adal]

[Ritrato sa pahina 21]

An Kristianong mga pagtiripon bendisyon na kaidto pa sa mga naglalakaw sa katotoohan

[Mga ritrato sa pahina 23]

Pinagbotan ni Jesus an mga parasunod nia na iselebrar an Memorial kan saiyang kagadanan bilang atang

[Ritrato sa pahina 24]

Arog kan enot na mga Kristiano, an Mga Saksi ni Jehova nagpapaheling nin paggalang sa “superyor na mga autoridad”