Nagdadanay na mga Impresyon

KADA taon, nagtitiripon an mga Saksi ni Jehova sa Kristianong mga asamblea asin kombension sa kanya-kanyang nasyon. Ginigibo ninda ini tangani na makamtan an nakaparirigon sa espirituwal na pagtotokdo asin pakikiasosyar. Alagad an iba pang aspekto kan saindang mga pagtiripon puede man na magwalat nin nagdadanay na impresyon sa mga bisita.

Halimbawa, kan Hulyo 1999 rinibong Saksi sa Mozambique an nagtiripon para sa tolong nakapaooswag na aldaw sa “Makahulang Tataramon nin Dios” na Pandistritong mga Kombension. Dakol sa mga presente an nag-atender kan kombension sa kaenot-enote. Natudok an isip ninda bako sanang kan mga tataramon na nadangog ninda hale sa plataporma kundi kan naheling man ninda sa palibot ninda.

An sarong komento sa Maputo Assembly Hall iyo ini: “Dai pa ako noarin man nakaheling nin siring kagayon na lugar na arog kaini sa bilog kong buhay! An mga kasilyasan igwang sabon asin mga salming, asin malinig pa ngani an parong kaiyan. Matoninong an mga kamugtakan sa palibot na mayong ribok nin mga aking nag-iiriwal. Asin mayo nin nagtuturulodan! Naheling ko an maogma, mga hoben na nag-oorolay na nakaparirigon sa boot. Naghanga man ako sa husay na marhay na paggubing kan gabos. Sa masunod, dadarahon ko an sakong mga aki asin kokombensiron ko an sakong agom na dapat niamong atenderan an kombension na ini.”

Iyo, an pagkaonesto, integridad, asin pisikal na kalinigan kan Mga Saksi ni Jehova naririparo. Taano daw ta napapalaen an mga Saksi? Huli ta talagang pinagmamaigotan nindang iaplikar an nanonodan ninda hale sa Biblia. Taano ta dai makipagtipon sa sainda ngonyan na taon sa saindang nasyonal na mga kombension o sa saindang semanal na mga pagtiripon sa lokal na Kingdom Hall asin helingon nindo mismo?

[Ritrato sa pahina 32]

ZAMBIA

[Ritrato sa pahina 32]

KENYA

[Ritrato sa pahina 32]

MOZAMBIQUE