An Giya nin Dios sa Pagpili nin Aagomon

“Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakatorohok sa saimo.”—SALMO 32:8.

1. Ano an mga kaipuhan para sa mapangganang pag-agom?

AN SARONG sirkero uminulabyog hale sa saiyang trapesio, kuminurba, asin ekspertong buminalintong sa aire. Pakatapos na maliksing ideretso an hawak, inunat nia an saiyang takyag asin sinalo sa kamot kan nakasuwing sirkero hale sa ibong. An sarong magkapadis suabeng nag-iiskeyting sa niebe. Bigla na sana, itinuon kan lalaki an saiyang kapadis asin iinitsa sa aire. Nag-itok an babae, magayon an hiro na huminugpa na sarong iskeyt an nakatungtong, asin padagos na naglibotlibot sa niebe kaiba kan lalaki. An duwang ginigibo na iyan garo baga haros pasilon. Pero, siisay daw ngani an maprobar kaiyan na daing praktis, mayo nin may kakayahan na kapadis, asin partikularmente nin tamang klase nin giya o instruksion. Kaagid kaiyan, an mapangganang pag-agoman tibaad garo baga nagkakanorongod na sana. Minsan siring, iyan minadepende man sa marahay na kapadis, sa may koordinasyon na paghihingoa, asin nangorogna sa madonong na hatol. Tunay nanggad, kaipuhan an tamang giya.

2. (a) Siisay an nag-establisar kan areglo nin pag-agom, asin para sa anong katuyohan? (b) Paano ginigibo an nagkapirang areglo sa pag-agom?

² Normal sa sarong hoben na dai pang agom na lalaki o babae na mag-isip manongod sa aagomon​—sarong kapadis sa buhay. Poon pa kan establisaron iyan ni Jehova Dios, an pag-agoman nin lalaki asin babae nagin nang normal sa buhay. Alagad an enot na lalaki, si Adan, bakong iyo an nagpili kan saiyang agom. Mamomoton na itinao ni Jehova sa saiya si Eva. (Genesis 2:​18-​24) An enot na mag-agom magpapakadakol tangani na an daga sa katapustapusi mapapano nin mga tawo. Pakatapos kan enot na pag-agom na idto, an mga areglo sa pag-agom sa parate ginigibo kan mga magurang kan nobya asin nobyo, kun beses pakatapos na makua an konsentimiento kan mga tawong kalabot. (Genesis 21:21; 24:2-4, 58; 38:6; Josue 15:​16, 17) Baga man kaugalean pa sagkod ngonyan sa nagkapirang kadagaan asin kultura an iinaareglong pag-agom, an dakol ngonyan sinda mismo an nagpipili nin aagomon.

3. Paano maninigo na pilion an aagomon?

³ Paano maninigong pumili nin aagomon? An nagkapira naiimpluwensiahan nin itsura​—kun ano an para sa sainda magayon asin nakasosono sa pagheling. An iba naghahanap nin materyal na mga pakinabang, nin saro na mag-aasikaso nin marahay sa sainda asin matao kan saindang mga kaipuhan asin gusto. Alagad an arin man daw sa saro sana kan mga paaging ini magbubunga nin maogma asin nakakokontentong relasyon? “An pan-akit tibaad falso, asin an kagayonan tibaad basang sana,” sabi kan Talinhaga 31:​30, “alagad an babae na natatakot ki Jehova iyo an nag-aako nin kaomawan para sa saiya man sana.” Asin dian manonompongan an sarong importanteng punto: Konsideraron si Jehova kun nagpipili nin aagomon.

Mamomoton na Giya Hale sa Dios

4. Anong tabang an itinatao nin Dios mapadapit sa pagpili nin aagomon?

⁴ An satong mamomoton na langitnon na Ama, si Jehova, itinao an saiyang nasusurat na Tataramon tanganing gumiya sa sato sa gabos na bagay. Sia nagsabi: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” (Isaias 48:17) Bakong makangangalas, kun siring, na manompongan sa Biblia an probado na nin panahon na mga giya sa pagpili nin aagomon. Boot ni Jehova na an satong pag-agom magdanay asin maogma. Kun siring, nagtao sia nin tabang tanganing masabotan asin ikaaplikar niato an mga giyang ini. Bako daw na iyan an lalaoman niato sa satong mamomoton na Kaglalang?​—Salmo 19:8.

5. Ano an kinakaipuhan na marhay para sa nagdadanay na kaogmahan sa pag-agom?

 ⁵ Kan establisaron ni Jehova an areglo sa pag-agom, katuyohan nia na iyan magin nagdadanay na bogkos. (Marcos 10:6-12; 1 Corinto 7:​10, 11) Iyan an rason kun taano ta “saiyang ikinaongis an pagdidiborsio,” na tinotogotan sana iyan kun an dahelan “pakikisaro.” (Malaquias 2:13-16; Mateo 19:9) Kun siring, an pagpili nin aagomon saro sa pinakaseryosong mga lakdang na puede tang gibohon asin dai dapat na basta-bastahon sana. Pipira sanang desisyon an igwa nin posibilidad na magbunga nin kaogmahan o nin kamondoan. Minsan ngani an marahay na pagpili puedeng magpaoswag sa kualidad nin buhay nin saro asin gibohon iyan na nakakokontento, an salang pagpili puedeng magbunga nin daing katapusan na kamondoan. (Talinhaga 21:19; 26:21) Tanganing magpadagos an kaogmahan, mahalagang marhay na pumili nin may kadonongan asin magin andam na gumibo nin nagdadanay na kapanugaan, ta inestablisar nin Dios an pag-agom bilang relasyon nin magkapadis na matalubo sa pagkakaoyon asin kooperasyon.​—Mateo 19:6.

6. Taano an mga hoben na lalaki asin babae ta nangorognang kaipuhan na mag-ingat kun nagpipili nin aagomon, asin paano sinda makagigibo kan pinakamadonong na desisyon?

⁶ An mga hoben na lalaki asin babae nangorognang kaipuhan na mag-ingat na an pisikal na atraksion asin kapusokan dai makaraot sa saindang paghusgar kun sinda nagpipili nin aagomon. Tunay nanggad, an relasyon na basado sana sa siring na mga bagay puedeng marikas na rumaot pasiring sa pagigin katuyaan o pagkaongis pa ngani. (2 Samuel 13:15) Sa ibong na kampi, an nagdadanay na pagkamoot puedeng pataluboon mientras na namimidbid niato an satong aagomon asin mantang orog man niatong naiintindihan an satong sadiri. Kaipuhan man niatong marealisar na an pinakamarahay para sa sato tibaad bako an enot na minamawot kan satong puso. (Jeremias 17:9) Iyan an dahelan kun taano ta importanteng marhay an giya nin Dios na nasa Biblia. Tinatabangan kita kaiyan na mamansayan kun paano kita makagigibo kan pinakamadonong na mga desisyon sa buhay. Irinepresentar kan salmista si Jehova na sinasabing: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakatorohok sa saimo.” (Salmo 32:8; Hebreo 4:12) Baga man puedeng panigoan kan pag-agom an satong kanaturalan nang pangangaipo nin pagkamoot asin kaibaiba, iyan nag-aatubang man nin mga angat na nagkakaipo nin pagkamaygurang asin pakamansay.

7. Taano ta dai inaako nin nagkapira an hatol na basado sa Biblia manongod sa pagpili nin aagomon, pero ano an puedeng ibunga kaini?

⁷ Madonong na himateon an sinasabi kan Kagtugdas nin pag-agom kun dapit sa pagpili nin aagomon. Pero, tibaad magsayuma tolos kita kun tinatawan  kita nin hatol na basado sa Biblia kan mga magurang o kan Kristianong kamagurangan. Tibaad magsaboot kita na dai ninda kita lubos na naiintindihan, asin tibaad itulod kita nin makosog na emosyonal na pagmawot na sunodon an inklinasyon kan puso. Minsan siring, kun yaon na an tunay na mga kamugtakan, tibaad magbasol kita na dai ta hinimate an madonong na hatol na itinao para sa satong ikararahay. (Talinhaga 23:19; 28:26) Tibaad manompongan ta na kita yaon sa pag-agoman na mayo nin pagkamoot, na may aki na nasasakitan kitang asikasohon asin tibaad daing pagtubod pa ngani an satong naagom. Abaa kamakamomondo kun an areglo na puede kutanang nagtao sa sato nin dakulang kaogmahan magin gikanan nin dakulang kasakitan!

Diosnon na Debosyon—Sarong Bagay na Nagdedeterminar

8. Paano an diosnon na debosyon nakatatabang sa pag-agom na magdanay asin magbunga nin kaogmahan?

⁸ Totoo, an pagkaakit kan saro sa saro nagtatabang na magin marigon an pag-agoman. Alagad an mga prinsipyo sa buhay na pinagkakaoyonan mas mahalaga pa ngani tanganing an pagsasaro nin mag-agom magdanay asin magbunga nin kaogmahan. An magkaparehong debosyon ki Jehova Dios an nagmomolde nin nagdadanay na bogkos asin nagpapaoswag nin pagkakasaro sa paagi na dai nagigibo nin ibang bagay. (Eclesiastes 4:12) Kun isinesentro nin Kristianong mag-agom an saindang buhay sa tunay na pagsamba ki Jehova, sinda nagkakasaro sa espirituwal, isip, asin moral. Magkaibanan nindang pinag-aadalan an Tataramon nin Dios. Magkaibanan sindang namimibi, asin pinagsasaro kaiyan an saindang puso. Nag-iibanan sinda sa Kristianong mga pagtiripon asin nagpapadis sa ministeryo sa langtad. Ini gabos nagtatabang na pormahon an espirituwal na bogkos na orog na nagpapadayupot sa balang saro. Orog pa nganing mahalaga, nagbubunga iyan nin bendisyon ni Jehova.

9. Ano an ginibo ni Abraham mapadapit sa paghanap nin agom para ki Isaac, asin ano an resulta?

⁹ Huli sa saiyang diosnon na debosyon, an fiel na patriarkang si Abraham naghingoang paogmahon an Dios kan umabot na an panahon na pumili nin aagomon para sa saiyang aki na si Isaac. Sa saiyang pinagtitiwalaan na surugoon sa harong, si Abraham nagsabi: “Pasusumpaon taka sa ngaran ni Jehova, an  Dios kan kalangitan asin an Dios kan daga, na dai ka makua nin agom na babae para sa sakong aki gikan sa mga aking babae kan mga Cananeo na sa tahaw ninda nag-eerok ako, kundi maduman ka sa sakuyang daga asin sa sakuyang mga paryente, asin makua ka nanggad nin agom na babae para sa sakuyang aking lalaki, para ki Isaac. . . . Isusugo [ni Jehova] an saiyang anghel nin enot sa saimo, asin makua ka nanggad nin agom na babae para sa sakuyang aking lalaki hale duman.” Si Rebeca nagin marahayon na agom, na namotan na marhay ni Isaac.​—Genesis 24:​3, 4, 7, 14-21, 67.

10. Anong sono sa Kasuratan na mga obligasyon an itinatao sa mga agom na lalaki asin agom na babae?

¹⁰ Kun kita daing agom na mga Kristiano, tatabangan kita kan diosnon na debosyon na mapatalubo an mga kualidad na magpapangyari sa sato na maabot an sono sa Kasuratan na mga kahagadan sa pag-agom. Kabale sa mga obligasyon kan mga agom na lalaki asin mga agom na babae an sinitar na ini ni apostol Pablo: “Magpasakop an mga agom na babae sa saindang agom na lalaki nin siring sa Kagurangnan . . . Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon asin iinatang an saiya man sana dahel kaiyan . . . An mga agom na lalaki kaipuhan na mamoot sa saindang agom na babae siring sa saindang sadiring hawak. . . . An lambang saro sa saindo mamoot sa saiyang agom na babae arog kan pagkamoot nia sa saiyang sadiri; sa ibong na kampi, an agom na babae maninigong magkaigwa nin hararom na paggalang sa saiyang agom.” (Efeso 5:22-33) Siring kan maheheling niato, idinodoon kan ipinasabong na mga tataramon ni Pablo an pangangaipo nin pagkamoot asin paggalang. Kalabot sa pagsunod sa hatol na ini an reberensial na pagkatakot ki Jehova. Nagkakaipo iyan nin bilog na pusong kapanugaan sa marahay sagkod sa masakit na mga kamugtakan. An mga Kristiano na nagpaplano nang mag-agom maninigo na kaya nang isaabaga an responsibilidad na ini.

Pagdesisyon Kun Noarin Maagom

11. (a) Anong hatol manongod sa kun noarin maagom an itinatao sa Kasuratan? (b) Anong halimbawa an nagpapaheling kan kadonongan nin pagsunod sa hatol kan Biblia na nasusurat sa 1 Corinto 7:36?

¹¹ Mahalagang marhay na maaraman kun noarin kita andam nang mag-agom. Huling magkakalaen digdi an lambang indibiduwal, an Kasuratan daing sinasabing edad. Minsan siring, sinasabi nanggad kaiyan na mas marahay na maghalat sagkod na kita “lihis na sa pagbukad nin pagkabarobata,” na an kapusokan sa sekso puedeng makaraot sa tamang paghusgar. (1 Corinto 7:36) “Kun naheheling ko an sakong mga katood na nagde-date asin nag-aaragom, na an dakol mga tinedyer pa, kun beses masakit na iaplikar an hatol na ini,” an sabi ni Michelle. “Alagad narealisar ko na an hatol na iyan hale ki Jehova, asin sinasabi sana nia sa sato an para sa satong kapakinabangan. Mantang naghahalat na makapag-agom, nakapagkonsentrar ako sa sakong relasyon ki Jehova asin nakakua nin eksperyensia sa buhay, na posibleng dai nindo makukua sa saindong pagkatinedyer. Pakalihis nin pirang taon, mas andam na ako na atubangon an mga responsibilidad saka mga problema na minalataw sa pag-agoman.”

12. Taano ta madonong na dai mag-apura na mag-agom mantang hoben pa?

¹² Parateng nadidiskobre kan mga nag-aapura nang mag-agom mantang medyo hoben pa na an saindang mga pangangaipo asin kamawotan nagbabago mantang sinda nag-eedad. Dangan saindang narerealisar na an mga bagay na kan enot nagugustohan ninda bako nang gayong importante ngonyan. An sarong hoben na Kristiana nagdesisyon na mag-agom kan sia 16 anyos. Iyan an edad kan saiyang lola kan ini mag-agom, iyo man an saiyang ina. Kan an hoben na lalaking nagugustohan nia magsayumang pakasalan sia kan panahon na iyan, nagpili sia nin iba na andam na pakasalan sia. Pero kan huri sa buhay nia, pinagbasolan nia an saiyang apuradong desisyon.

13. An mga nag-agom na mayo pa sa panahon sa parate mayo pa nin ano?

¹³ Kun nagpaplano nang mag-agom, importante na magkaigwa nin maygurang na pakasabot sa gabos na bagay na kalabot. An mayo pa sa panahon na pag-agom puedeng magbunga nin kadakol na problema na posibleng marhay na dai pa andam na atubangon nin hoben pang mag-agom. Tibaad mayo pa sinda nin eksperyensia asin pagkamaygurang na kaipuhan sa pag-atubang sa mga tension sa pag-agoman asin sa pagpadakula sa mga aki. An pag-agom maninigo na gibohon sana kun kita andam na sa pisikal, isip, asin espirituwal na laogon an nagdadanay na pag-agoman.

14. Ano an kaipuhan sa pag-atubang sa nakakatension na mga situwasyon sa pag-agoman?

¹⁴ Si Pablo nagsurat na an mga nag-aagom “magkakaigwa nin kahorasaan sa saindang laman.” (1 Corinto 7:28) Malataw an mga problema huli ta  igwa nin duwang magkalaen na personalidad, asin magbabago an mga punto de vista. Huli sa mga pagkabakong sangkap nin tawo, tibaad depisil na otobon an satong sono sa Kasuratan na katongdan sa areglo nin pag-agom. (1 Corinto 11:3; Colosas 3:​18, 19; Tito 2:​4, 5; 1 Pedro 3:​1, 2, 7) Kaipuhan an pagkamaygurang asin espirituwal na karigonan sa paghagad asin pagsunod sa giya nin Dios tanganing husayon sa mamomoton na paagi an nakakatension na mga situwasyon.

15. Ano an puedeng magin papel nin mga magurang sa pag-andam sa saindang mga aki para sa pag-agom? Iilustrar.

¹⁵ An mga magurang puedeng andamon an saindang mga aki para sa pag-agom paagi sa pagtabang sa sainda na masabotan an kahalagahan nin pagsunod sa giya nin Dios. Paagi sa ekspertong paggamit sa Kasuratan asin Kristianong mga publikasyon, matatabangan kan mga magurang an saindang mga aki na makapagdesisyon kun baga sinda o an saindang kinukursonadang agomon andam nang gumibo kan kapanugaan sa pag-agom. * An 18 anyos na si Blossom naghona na sia namomoot na sa sarong hoben na lalaki sa saiyang kongregasyon. An lalaki bilog na panahon na ministrong payunir, asin gusto na nindang magpakasal. Alagad an saiyang mga magurang pinapaghalat sia nin sangtaon, ta iniisip ninda na sia hoben pang marhay. Si Blossom kan huri nagsurat: “Nagpapasalamat akong marhay na hininanyog ko an madonong na sadol na idto. Sa laog kan taon na idto, minsan paano nagin maygurang ako asin nagpoon na maheling ko na an hoben na lalaking ini mayo kan mga kualidad na makontribwir sa pagigin marahay na agom. Pag-abot nin panahon naghale sia sa organisasyon, asin nalikayan ko an kutana kapahamakan sa sakong buhay. Kanigoan karahay an magkaigwa nin madonong na mga magurang na masasarigan an paghusgar!”

‘Magpakasal Sana sa Kagurangnan’

16. (a) Paano puedeng mabalo an mga Kristiano kun dapit sa ‘pagpakasal sa Kagurangnan’? (b) Kun nasusugotan na mag-agom nin daing pagtubod, ano an maninigong horophoropon nin mga Kristiano?

¹⁶ Malinaw na marhay an instruksion ni Jehova sa mga Kristiano: ‘Magpakasal sana sa Kagurangnan.’ (1 Corinto 7:39) An Kristianong mga magurang asin an saindang mga aki puedeng mabalo sa bagay na ini. Taano man? An mga hoben tibaad gusto nang mag-agom, alagad mayo nin nakukuang aagomon sa laog kan kongregasyon. Minsan paano garo baga iyan an kamugtakan. Tibaad mas dikit an lalaki kisa babae sa sarong lugar, o tibaad garo mayo nin angay sa lugar na iyan. An sarong hoben na lalaki na bakong nagdusay na miembro kan kongregasyon tibaad kinukursonada an sarong hoben na Kristiana (o an kabaliktaran), asin garo baga yaon an tendensia na ikompromiso an mga pamantayan ni Jehova. Sa siring na kamugtakan, marahay na pensaron an halimbawa ni Abraham. An sarong paagi nin pagpadanay nia kan saiyang marahay na relasyon sa Dios iyo an pagsierto na an saiyang aking si Isaac makaagom nin sarong tunay na nagsasamba ki Jehova. Iyo man an ginibo ni Isaac sa saiyang aking si Jacob. Nagkaipo ini nin paghihingoa kan gabos na tawong kalabot, alagad nakapaogma iyan sa Dios asin nagbunga kan saiyang bendisyon.​​—Genesis 28:​1-4.

17. Taano an pag-agom sa daing pagtubod ta posibleng marhay na magigin kapahapahamak, asin ano an pinakaimportanteng dahelan na ‘magpakasal sana sa Kagurangnan’?

¹⁷ Sa pipira sanang kaso, an daing pagtubod nagin Kristiano pag-abot nin panahon. Minsan siring, an pag-agom sa daing pagtubod parateng nagigin kapahapahamak. An mga nakipagsakal na bakong timbang bakong magkapareho an mga tinutubod, pamantayan, o pasohan. (2 Corinto 6:14) Puede ining magkaigwa nin maraot na epekto sa komunikasyon asin sa kaogmahan nin mag-agom. Halimbawa, ipinagmondong marhay nin sarong Kristiana an bagay na pakatapos nin sarong nakapakokosog na pagtiripon, dai sia makapuli asin ipakipag-olay an dapit sa espirituwal na mga bagay sa saiyang daing pagtubod na agom. Orog na mahalaga, siempre, ‘an pagpakasal sa Kagurangnan’ pagpaheling nin kaimbodan ki  Jehova. Kun sinusunod ta an Tataramon nin Dios, dai kita kinokondenar kan satong puso, ta ginigibo ta an “nakapaoogma sa saiyang mga mata.”​—1 Juan 3:​21, 22.

18. Kun nagpaplano nang mag-agom, anong importanteng mga bagay an maninigo na tawan nin atension, asin taano?

¹⁸ Kun nag-iisip nang mag-agom, an birtud asin espirituwalidad kan kinukursonadang agomon maninigo na pangenot na konsideraron. An Kristianong personalidad, na may pagkamoot sa Dios asin bilog na pusong debosyon sa saiya, mas mahalagang marhay kisa pagigin kaakit-akit sa pisikal. An pag-oyon nin Dios yaon sa mga nagpapahalaga asin nag-ootob sa saindang obligasyon na magin agom na makosog sa espirituwal. Asin an pinakangkakosogan nin mag-agom minagikan sa magkaparehong debosyon sa Kaglalang asin lubos na pag-akseptar sa saiyang giya. Paagi kaini si Jehova natatawan nin onra, asin an pag-agoman minapoon sa masarig na espirituwal na pundasyon na makontribwir sa nagdadanay na pag-agoman.

[Nota sa Ibaba]

Ano an Isisimbag Nindo?

• Taano ta kaipuhan an giya nin Dios sa pagpili nin marahay na aagomon?

• Paano an diosnon na debosyon makatatabang na mapakosog an bogkos nin pag-agoman?

• Paano puedeng andamon nin mga magurang an saindang mga aki para sa pag-agom?

• Taano ta importante na ‘magpakasal sana sa Kagurangnan’?

[Mga Hapot Para sa Pag-adal]

[Mga Ritrato sa pahina 17]

An pag-aplikar kan hatol nin Dios sa pagpili nin aagomon nindo puedeng magbunga nin dakulang kaogmahan

[Mga Ritrato sa pahina 18]

Abundang bendisyon an ibinubunga kan ‘pagpakasal sana sa Kagurangnan’