Taano ta Dapat Kultibaron an Birtud?

AN SARONG medyo may edad nang Hapon na an ngaran Kunihito nag-imigrar sa Estados Unidos kasuarin pa sana. * Pirang semana pa sana pakaabot nia, napaatubang sia sa sarong situwasyon na nakaraot kutana sa saiyang karera. Isinasaysay ni Kunihito: “Kan hinapot ako kan sakong superbisor kun puede kong akoon an sarong responsibilidad, kompiado akong marhay sa boot ko na akoon iyan. Pero, huling pinadakula na mansayon na sarong birtud an kababaan nin boot, nagsimbag ako: ‘Dai ko segurado kun magigibo ko iyan, alagad hihingoahon kong gibohon an sakong pinakamakakaya.’ Para sa sakong superbisor na Amerikano, ini garo baga nagpaparisa na ako daing kakayahan asin daing kompiansa. Kan iyan maaraman ko, narealisar ko na kaipuhan kong gumibo nin mga pagliliwat.”

Si Maria, na nag-eerok sa Siudad nin Nueva York, sarong marahayon na estudyante, na pirmeng andam na tumabang sa saiyang mga kaklase. Si Juan sarong kapwa estudyante na kun minsan nagpapatabang ki Maria. Alagad nagkaigwa man sia nin romantikong interes ki Maria asin naghingoang pahangaon sia. Sa ibong kan saiyang pagmawot na magdanay na mabini sa moral, si Maria nagpadaog sa mga alok ni Juan asin napalabot sa salang gawe-gawe sa sekso.

An pagpaheling nin birtud sa kinaban ngonyan na may laen-laen na kultura asin marigsok sa moral talagang sarong angat. Kaya taano ta dapat kultibaron an birtud? Huli ta an birtuosong gawe-gawe nasosonoan nin Dios, asin an kadaklan sa sato siertong nagmamawot na kamtan an saiyang pabor.

An Tataramon nin Dios, an Biblia, sinasadol an mga nagbabasa kaiyan na kultibaron an birtud. Halimbawa, si apostol Pablo nagsurat: “Ano man na birtud asin ano man na inoomaw, padagos na horophoropon an mga bagay na ini.” (Filipos 4:8) Asin si apostol Pedro sinasadol kita na ‘odok na maghingoang idagdag sa satong pagtubod an birtud.’ (2 Pedro 1:5) Alagad ano an birtud? Iyan daw puedeng itokdo sa klase? Paano ta iyan makukultibar?

[Nota sa Ibaba]