Binalosan an Sarong Halawig na Paghanap

“JEHOVA? Siisay si Jehova?” Naheling kan otso anyos na si Silvia an ngaran na iyan sa Biblia na Armeniano, sarong mahalagang saray kan pamilya na ipinaheling sa saiya kan saro pang aking babae. Naghapothapot sia, alagad mayo ni saro sa Yerevan, Armenia, na dian sia nag-eerok kaidto an nakapagsabi sa saiya kun siisay si Jehova—maski mga magurang nia, maski mga maestro nia, maski ngani an mga ministro sa lokal na iglesia.

Si Silvia nagdakula, natapos sa pag-eskuela, asin nagkatrabaho, alagad dai pa man giraray nia midbid si Jehova. Bilang nasa edad nang hoben, kinaipuhan niang dumulag hale sa Armenia, asin paghaloyhaloy nakaabot sia sa Polandia, na nag-iistar sa sarong sadit na kuarto kaiba nin ibang mga dulag. An saro sa saiyang mga kakuarto igwang regular na mga bisita. “Sairisay an mga bisita mo?” an hapot ni Silvia. “Mga Saksi ni Jehova sinda, na yaon digdi tanganing tokdoan ako sa Biblia,” an simbag.

An puso ni Silvia napalukso sa kagayagayahan kan madangog nia an ngaran na Jehova. Sa katapustapusi, nagpoon na siang makanood kun siisay si Jehova asin kun gurano kamamomoton na Dios sia. Pero, dai nahaloy, kinaipuhan niang maghale sa Polandia. Naghagad sia nin proteksion sa Dinamarca, sa ibong kan Dagat Baltiko. Kakadikit kan dara niang rogaring, alagad kabilang dian an mga babasahon sa Biblia na ipinublikar kan Mga Saksi ni Jehova. Sa likod na pahina nin sarong publikasyon, nanompongan ni Silvia an lista nin adres kan mga sangang opisina kan Watch Tower Society. Saro iyan sa mga pinakaimportanteng rogaring nia—an saiyang nagsasalbar na koneksion ki Jehova!

Sa Dinamarca, si Silvia dinara sa sarong kampo nin mga dulag, asin tolos-tolos niang pinonan na hanapon an mga Saksi ni Jehova. Basado sa lista nin mga adres na nasa saiya, aram nia na an sangang opisina kan Watch Tower Society sa Dinamarca nasa banwaan nin Holbæk. Alagad saen iyan? Si Silvia ibinalyo sa ibang kampo sakay nin tren, asin kan paduman, an tren nag-agi sa Holbæk! Sa giraray, an saiyang puso napalukso sa kagayagayahan.

Sa sarong masaldang na aldaw dai nahaloy pakatapos kaiyan, si Silvia nagsakay sa tren pabalik sa Holbæk asin naglakaw hale sa estasyon pasiring sa sangang opisina. Nagigirumdoman nia: “Kan lumaog ako sa hardin, nagtukaw ako sa sarong bangko asin sinabi ko sa sakong sadiri, ‘Ini paraiso!’” Sia mainit na inako sa sangang opisina asin sa katapustapusi nagibo na niang mag-adal sa Biblia.

Alagad suminunod an nagkapirang pagbalyo. Sa sunod-sunod na mga lugar nin mga dulag, kinaipuhan ni Silvia na hanapon an mga Saksi ni Jehova asin ponan an saiyang pag-adal sa Biblia nin paorootro. Sa ibong kaiyan, pakalihis nin duwang taon, igo na an saiyang nanodan tangani na idusay nia an saiyang buhay ki Jehova. Sia nabautismohan asin dai nahaloy pakatapos kaiyan naglaog sa bilog na panahon na ministeryo. Kan 1998 tinawan sia nin proteksion kan mga autoridad na Danes.

Si Silvia 26 anyos na ngonyan asin naglilingkod sa lugar na nagpagirumdom sa saiya kan paraiso, an sangang opisina kan Mga Saksi ni Jehova sa Dinamarca. “Ano an masasabi ko?” an sinasabi nia ngonyan. “Pigparahanap ko si Jehova poon kan ako aki pa. Ngonyan nanompongan ko na sia. Nangarap ako na gamiton an sakong buhay sa paglilingkod sa saiya, asin yaon na ako digdi sa Bethel. Ipinamimibi ko na ini magin sakong erokan sa maabot pang mga taon!”