Dai ta pag-isipon na miling mayo kaidto an 70 disipulo kan punan ni Jesus an Pamanggihan kan Kagurangnan, isinikwal na sinda ni Jesus o na binayaan na ninda siya. Gusto man lang na makaibanan ni Jesus an saiyang mga apostol sa okasyon na iyan.

An 12 asin an 70 gabos mga disipulo ni Jesus. Nagpili nguna si Jesus nin 12 lalaki hali sa dakul niyang disipulo, asin inapod niya sindang mga apostol. (Luc. 6:​12-16) Nasa Galilea siya kan “tinipon niya an Dose” asin “isinugo niya sinda na ihulit an Kahadian nin Diyos saka magpaumay.” (Luc. 9:​1-6) Dangan, sa Judea, “nagpili [si Jesus] nin 70 iba pa asin isinugo sinda na manduwa-duwa.” (Luc. 9:51; 10:1) Bilang resulta, nagkaigwa si Jesus nin mga parasunod sa manlain-lain na lugar kun sain ihinuhulit an saiyang mensahe.

An mga Judio na nagin disipulo ni Jesus padagos pa man giraray kaidtong nagseselebrar kan taunan na Paskuwa, posibleng marhay na kaiba an saindang mga pamilya. (Exo. 12:​6-11, 17-20) Kan madali na an saiyang kagadanan, nagduman sa Jerusalem si Jesus asin an saiyang mga apostol. Pero dai niya hinagad sa gabos niyang disipulo—hali sa Judea, Galilea, asin Perea—na magduruman asin magselebrar nin Paskuwa kaiba niya. Malinaw na gusto ni Jesus na makaibanan an saiyang mga apostol sa okasyon na iyan. Sinabi niya sa sainda: “Pighahalat ko nanggad an pagkakataon na ini na makaibanan kamong magkakan sa Paskuwang ini bago mangyari an sakuyang pagsakit.”​—Luc. 22:15.

May marahay na dahilan si Jesus. Madali na siyang magadan bilang “an Kordero nin Diyos na naghahali kan kasalan kan kinaban.” (Juan 1:29) Mangyayari iyan sa Jerusalem, na diyan haloy nang nagdudulot nin mga atang para sa Diyos. An kagadanan ni Jesus matao nin katalingkasan na mas dakula nanggad kisa sa naitao kan kordero na kinakan kan mga pamilyang Israelita kan bangging maghali sinda sa Ehipto. (1 Cor. 5:​7, 8) An ginibo ni Jesus nagpagin posible para sa Dose na magin parte kan pundasyon kan Kristiyanong kongregasyon. (Efe. 2:​20-22) Interesanteng mangnuhon na an banal na siyudad nin Jerusalem igwang “12 gapong pundasyon” asin nakasurat sa mga iyan “an 12 pangaran kan 12 apostol kan Kordero.” (Kap. 21:​10-14) Iyo, an maimbod na mga apostol igwang dakulang papel sa pag-utob kan katuyuhan nin Diyos. Huli kaiyan, masasabutan niyato kun taano ta gusto ni Jesus na makaibanan niya sinda para sa huring Paskuwang iyan asin sa kun ano an nagsunod tulos diyan—an Pamanggihan kan Kagurangnan.

An 70 asin an iba pang mga disipulo bakong kaibanan ni Jesus sa pamanggihan na iyan. Dawa arog kaiyan, an gabos na disipulong nagin maimbod makikinabang sa kun ano an pinunan ni Jesus—an Pamanggihan kan Kagurangnan. An gabos na nagin linahidan na mga Kristiyano pag-abot nin panahon makikipagtipan para sa sarong kahadian, na sinambit ni Jesus sa mga apostol kan bangging idto.​—Luc. 22:​29, 30.