INUUTRO kun minsan kan mga kagsurat kan Bibliya an iyo man sanang mga frase nin termino por termino. Pag-isipan an tulong posibleng dahilan kun taano ta arog kaiyan an ginibo kan mga kagsurat:

Kun kasuarin iyan isinurat. Sa suanoy na Israel, an kadaklan sa mga tawo mayo nin mga personal na kopya kan Katugunan. Nadadangog nindang binabasa an Katugunan panginot na pag nagtitiripon an banwaan sa tabernakulo. (Deu. 31:10-12) Posibleng marhay na may mga puwedeng makadisturbo sainda mantang nagdadangog asin nagtitindog kaiba an dakulang grupo nin mga tawo sa halawig na oras. (Neh. 8:2, 3, 7) Sa siring na mga pagtiripon, an pag-utro sa mahalagang mga frase mas makakatabang sa mga tawo na matandaan an kasuratan asin iaplikar an mga iyan. An pag-utro sa partikular na mga tataramon makakatabang sainda na magirumduman lalo na an detalyadong mga bagay, arog kan mga regulasyon asin mga ipinapautob na desisyon nin Diyos.​—Lev. 18:4-22; Deu. 5:1.

Kun paano iyan isinurat. Mga diyes porsiyento kan laog kan Bibliya mga kanta​—kaiba na an libro nin Mga Salmo, Awit ni Solomon, asin Lamentasyon. Kun minsan, an mga kanta igwa nin mga koro, na nagduduon kan tema kan kanta asin nagtatabang sa mga nagdadangog na matuom an mga tataramon. Halimbawa, mangnuhon an mga tataramon na mababasa sa Salmo 115:9-11: “O Israel, magtiwala kamo ki Jehova​—Siya an saindang tabang asin an saindang kalasag. O mga gikan ni Aaron, magtiwala kamo ki Jehova​—Siya an saindang tabang asin an saindang kalasag. Kamong mga may pagkatakot ki Jehova, magtiwala kamo ki Jehova​—Siya an saindang tabang asin an saindang kalasag.” Nahihiling mo daw kun paano puwedeng nakatabang sa mga parakanta an pag-utro kan mga tataramon tanganing an mahalagang mga katotoohan makatadom sa isip asin puso ninda?

Tanganing iduon an mahalagang mga bagay. Inuutro kun minsan kan mga kagsurat kan Bibliya an mahalagang mga frase. Halimbawa, kan pinagbutan ni Jehova an mga Israelita na dai magkakan nin dugo, dakul na beses niyang ipinautro ki Moises an dahilan kan pagbuot na iyan. Gustong iduon nin Diyos na an buhay kan sarong linalang nasa dugo, kaya, an dugo nagrerepresentar sa buhay. (Lev. 17:11, 14) Kan huri, kan isurat kan mga apostol asin kan mga kamagurangan sa Jerusalem an importanteng mga bagay na dapat likayan para mapaugma an Diyos, idinuon giraray ninda na kaipuhan na maglikay sa dugo.​—Gibo 15:20, 29.

Bakong katuyuhan ni Jehova na magin sarong ritwal an pag-utro sa mga frase sa Kasuratan. Halimbawa, sinabi ni Jesus: “Pag namimibi, dai nindo pagparauruutruhon an iyo man sanang mga tataramon.” (Mat. 6:7) Dangan nagtao siya nin mga bagay na angay tang ipamibi na kauyon kan kabutan nin Diyos. (Mat. 6:9-13) Kaya maski ngani linilikayan tang pagparauruutruhon an iyo man sanang mga tataramon sa satong mga pamibi, puwede niyatong pauruutrong ipamibi an manungod sa sarong tema o bagay na hinahagad ta.​—Mat. 7:7-11.

Kaya, may marahay na mga dahilan kun taano ta inuutro kan ipinasabong na Tataramon nin Diyos an partikular na mga tataramon asin mga frase. Saro iyan sa dakul na paagi nin pagtutukdo kan satong Pinakanangungurog na Instruktor tanganing makinabang kita.​—Isa. 48:17, 18.