Nagngisi ako—dai ko lamang kaya hunaon na relihiyoso palan an amigo ko. “Ano an aram mo manungod sa Bibliya?” an hapot ko saiya. Dai siya tulos nagsimbag. Kan huri, sinabi niya sako na an saiyang ina sarong Saksi ni Jehova; may mga nanudan saiya an amigo ko. Nagkainteres ako, kaya nagparahapot pa ako saiya.

Inabot nin matanga an pag-uulay mi. Sinabi sako kan amigo ko na sinasabi kan Bibliya na si Satanas an tagapamahala kan kinaban. (Juan 14:30) Siguro aram mo na ’yan sa bilog mong buhay, pero sako, bago iyan saka interesante talaga. Pirmi kong nadadangog na sarong mabuot na Diyos an namamahala sa kinaban. Pero ibang-iba iyan sa mga nahihiling ko. Dawa ngani 26 anyos pa lang ako, dakulon na akong nahiling na nakapurisaw sako.

Nagin piloto an ama ko sa United States Air Force. Kaya kan aki pa ako, aram kong marhay na posible talagang magkaigwa nin giyera nuklear; ano man na oras puwede iyan punan kan militar. An giyera sa Vietnam nangyari kan nagkokolehiyo ako sa California. Nag-iiba ako kaidto sa mga protesta nin mga estudyante. Linalapag kami kan mga pulis na may mga batuta, asin nagdadaralagan kami na dai na makahangos saka daing gayo makahiling dahil sa tear gas. Panahon idto nin grabeng kariribukan saka rebelyon. May mga lider nin pulitika na pig-aasasinar, may mga protesta, saka mga rayot. Magkakalain na marhay an opinyon kan mga tawo sa kun ano an dapat gibuhon. Nakakaribaraw talaga.

Kan 1970, nagkaigwa akong trabaho sa amihanan na baybayon kan Alaska asin nakatipon ako nin dakul na kuwarta. Dangan nag-eroplano ako pa-London, nagbakal nin motorsiklo, tapos nagbiyahe pa-sulnupan na mayong nasa isip na destinasyon. Pakalihis nin mga bulan, nakaabot ako sa Aprika. Mantang nasa dalan, may mga nabisto ako na gusto man makabutas dawa paano asin makadulag sa mga problemang napapaatubang sainda.

Kaya huli sa mga nahiling saka nadangog ko, nagin lohikal sako an katukduan kan Bibliya na sarong maraot na espiritung linalang an nagmamanipular  sa mga bagay-bagay sa kinaban. Pero sa gabos na nangyayaring iyan, hain an Diyos? Gusto kong maaraman iyan.

Kan suminunod na mga bulan, naaraman ko an simbag. Asin sa paglihis nin panahon, may mga namidbid man ako saka namutan na dakul na tawo na, ano man an kamugtakan sa buhay, nagin maimbod sa sarong tunay na Diyos.

Pagbalik ko sa London, pigkontak ko an ina kan amigo ko, tapos tinawan niya ako nin Bibliya. Kan magpasiring ako sa Amsterdam, Netherlands, nahiling ako nin sarong Saksi mantang binabasa ko iyan sa may ilaw sa tinampo, asin tinabangan niya ako na mas makanuod pa. Dangan, nagpasiring ako sa Dublin, Ireland, asin nahiling ko an sangang opisina kan Mga Saksi ni Jehova. Nagtuktok ako sa pinto. Duman ko nabisto si Arthur Matthews, sarong madunong saka eksperyensiyadong brother. Nakiulay ako saiya na tukduan niya ako sa Bibliya, asin nag-uyon siya.

Nagmaigot akong marhay sa pag-Bible study, pigparabasa ko an mga libro saka naka-bookbind na mga magasin na ipinublikar kan mga Saksi. Asin siyempre, binasa ko mismo an Bibliya. Maugmahon talaga! Sa mga pagtiripon kan kongregasyon, nahiling ko na maski mga aki aram ninda an simbag sa mga hapot na pigpaparaisip-isip nin madunong na mga tawo sa laog nin mga siglo: ‘Taano ta may karatan? Siisay an Diyos? Ano an nangyayari pag an saro nagadan?’ Duman, mga Saksi sana an amigo ko. Madali sana ’yan ta mayo man akong ibang kabisto sa bilog na nasyon. Tinabangan ninda ako na kamutan si Jehova asin magustuhan man na gibuhon an saiyang kabutan.

Kan 1972, nabawtismuhan ako. Pakalihis nin sarong taon, nagpayunir ako asin nagbalyo sa sarong sadit na kongregasyon sa Newry, Northern Ireland. Nag-arkila ako nin sarong puwerang harong na gibo sa gapo sa may gilid nin bukid. May mga baka duman sa kataid na kahiwasan, asin nagpapraktis ako kan mga pahayag ko sa atubangan ninda. Garo atentibo man sindang nagdadangog mantang nagngunguta-nguta. Dai sinda makatao nin konseho, pero natabangan ninda ako kun paano maghiling sa mga nagdadangog. Kan 1974, ninombrahan ako bilang espesyal payunir asin nagin kapartner ko si Nigel Pitt, na nagin amigo ko puon kaidto.

Nangyayari kaidto sa Northern Ireland an inaapod na “The Troubles”—panahon nin grabeng kariribukan. Kaya an iba inapod an Northern Ireland na “an daga nin mga bomba saka bala.” Normal na sana an mga iriwal sa tinampo, pambabadil nin mga  sniper, baradilan, saka pambobomba nin mga awto. Konektado sa pulitika saka sa relihiyon an mga problema. Dawa arog kaiyan, aram kan mga Protestante saka mga Katoliko na an mga Saksi mayong kinakampihan sa pulitika, kaya nakakapaghulit kami nin buwelo saka ligtas. Sa parati, aram kan mga kagharong kun nuarin asin kun sain magkakaigwa nin kadahasan, asin pinapatanidan ninda kami para malikayan mi iyan.

Pero may delikadong mga sitwasyon pa man giraray. Sarong aldaw, naghulit kami ni Denis Carrigan, na saro man na payunir, sa kaharaning banwaan na mayo nin Saksi asin sarong beses mi pa lang nadumanan. Inakusaran kami nin sarong babayi na kami daa mga espiyang suldados nin Britania, tibaad dahil an pagtaram mi mayo nin puntong Irish. Natakot kami sa akusasyon na iyan. An simpleng pagigin mainamigo sa mga suldados puwede mong ikagadan o magin dahilan na badilon ka sa tuhod. Mantang nakatindog kami sa luwas, na linilipot asin naghahalat na mag-abot an bus, may nahiling kaming kotse na nagpundo sa sadit na café kun sain kami inakusaran kan babayi. Nagluwas an babayi asin kinaulay an duwang lalaki sa kotse tapos pigparatukdo niya kami. Dangan luway-luway na nagmaneho pasiring samo an mga lalaki tapos may pirang ihinapot manungod sa iskedyul kan bus. Pag-abot kan bus, kinaulay ninda an drayber. Dai mi madangog su pinag-uulayan ninda. Mayong ibang pasahero, kaya sigurado kami na may pigpaplano na sindang gibuhon samo sa luwas kan banwaan. Pero dai man iyan nangyari. Kan pababa na ako sa bus, hinapot ko an drayber: “Su mga lalaki po kasubago, naghahapot sinda manungod samo?” Nagsimbag siya: “Sinabi ko sainda na bisto ko kamo. Dai kamo mahadit. Mayong mangyayari saindo.”

Kan 1976 sa sarong pandistritong asembleya a sa Dublin, nabisto ko si Pauline Lomax, sarong espesyal payunir na nagbibisita haling England. Maimbod siya, mapakumbaba, saka magayon na sister. Siya saka an tugang niyang si Ray nagdakula sa pamilyang Saksi. Pakalihis nin sarong taon, nagpakasal kami ni Pauline asin padagos na nag-espesyal payunir sa Ballymena, Northern Ireland.

May panahon na naglingkod kami sa pansirkitong gibuhon sa Belfast, Londonderry, asin sa iba pang delikadong mga lugar. Napahiro kami kan kaimbudan kan mga tugang na binayaan an saindang nakagamot nang marhay na relihiyosong mga paniniwala, pagpalain-lain, saka pagkaungis tanganing maglingkod ki Jehova. Talagang binendisyunan saka prinotektaran sinda ni Jehova!

Nag-istar ako sa Ireland nin sampulong taon. Dangan kan 1981, inimbitaran kami na mag-atender sa ika-72 na klase nin Gilead. Pakagradwar, iinasignar kami sa Sierra Leone, West Africa.

Nag-istar kami duman sa sarong missionary home kaiba nin 11 marahayon na mga tawo. Igwa kami nin sarong kusina, tulong kasilyasan, duwang karigusan, sarong telepono, sarong washing machine, saka sarong dryer. Parating nawawaran nin kuryente saka dai mi aram kun nuarin iyan mawawara. Dakulon nin kino sa kisame, saka may mga kobra na nagkakaranap sa basement.

Bakong gayong komportable an istaran mi, pero maugmahon an ministeryo mi. An mga tawo may paggalang sa Bibliya saka atentibong nagdadangog. Dakul an nagpa-Bible study saka nag-ako kan katotoohan. An mga taga duman inaapod akong “Mister Robert.” An apod man ninda ki Pauline “Missus Robert.” Pero paghaloy-haloy, kan mas dakul na oras na an ginagamit ko sa pagtrabaho sa sangang  opisina asin dai na ako gayong nakakaluwas sa ministeryo, an apod na kan mga tawo ki Pauline, “Missus Pauline.” Ako man nagin nang “Mister Pauline.” Ugmahon kaidto si agom!

Dakul na tugang an tios, pero pirming itinatao ni Jehova an mga pangangaipo ninda, na kun minsan sa makangangalas na mga paagi. (Mat. 6:33) Nagigirumduman ko an sarong sister na an kuwarta igo lang para makabakal nin kakanon sa aldaw na idto para sa saiya saka sa mga aki niya, pero itinao niya iyan gabos sa sarong may hilang na brother na mayong kuwartang pambakal nin bulong sa malaria. Dangan kan aldaw man sanang idto, may sarong babayi na biglang nagdulok sa sister tapos tinawan siya nin kuwarta para magpaayos saiya nin buhok. Dakul na sitwasyon an arog kaiyan.

Nag-istar kami sa Sierra Leone nin siyam na taon. Dangan piglipat kami sa Bethel sa Nigeria. Nasa dakulang sangang opisina na kami. Arog pa man giraray kaidtong sa Sierra Leone an nagin trabaho ko sa opisina, alagad ki Pauline, dakulang pagbabago saka dipisil para saiya an nagin trabaho niya. Kaidto, 130 oras an ginagamit niya sa ministeryo, saka may progresibo siyang mga tinutukduan sa Bibliya. Ngunyan inasignar siya sa tahian, na diyan bilog na aldaw siyang nagpapakarhay nin mga badong may raot. Medyo haloy man bago siya naka-adjust, pero pag-abot nin panahon narealisar niya na inaapresyar na marhay kan iba an trabahong ginigibo niya, saka nagpokus siya sa mga oportunidad na pakusugon an mga kapwa niya Bethelite.

Bago samo an kulturang Nigerian, asin dakulon kaming kaipuhan manudan. Sarong beses, may brother na nagduman sa opisina ko para ipabisto an sarong sister na bagong apod sa Bethel. Kan aabrasahon ko na su sister, luminaob siya sa may pamitisan ko. Nabigla talaga ako! Naglaog tulos sa isip ko an duwang teksto: An Gibo 10:25, 26 saka Kapahayagan 19:10. Inisip ko, ‘Dapat ko daw sabihon saiya na dai ’yan paggibuhon?’ Pero naisip ko man, inako siya sa Bethel kaya aram niya an itinutukdo kan Bibliya.

Medyo alangan ako mantang ipinapabisto su sister, kaya nag-research ako pagkatapos. Naaraman ko na an ginibo kan sister kauyon kan sarong tradisyonal na kostumbre na ginigibo pa kaidto sa nagkapirang parte kan nasyon. Arog man kaidto an ginigibo kan mga lalaki. Pagpahiling iyan nin paggalang, bako nin pagsamba. May mga halimbawa man na kaagid kaiyan sa Bibliya. (1 Sam. 24:8) Maray na lang ta dai ako nakapagsabi nin ano man na tibaad makapasupog sa sister dahil sa kawaran ko nin aram.

 May nabisto kaming dakul na Nigerian na nagpahiling nin pambihirang kaimbudan sa laog nin mga taon. Halimbawa kaiyan si Isaiah Adagbona. b Nanudan niya an katotoohan kan siya hoben pa, pero kan huri na-diagnose siya na igwa siya nin leproso. Ipinadara siya sa sarong lugar para sa mga may leproso na diyan siya lang an Saksi. Sa ibong nin pagkontra, natabangan niya an labing 30 may leproso na akuon an katotoohan asin nakaestablisar duman nin sarong kongregasyon.

Kan 1996 iinasignar kami sa sangang opisina sa Kenya. Iyan su inot kong pagbalik sa nasyon na iyan puon kaidtong magduman ako arog kan sinambit ko sa inutan. Nag-istar kami sa Bethel. Asin kaiba sa mga nagbibisita duman iyo an mga kabalang na vervet. “Pighahabon” kan mga ini sa mga sister an mga dara-dara nindang prutas. Sarong aldaw, nabayaan nin sarong sister sa Bethel na bukas an saiyang bintana. Pagbalik niya, nahiling niya an sarong pamilya nin mga kabalang na pigkakarakan na su kakanon na nakua kan mga iyan sa saiyang kuwarto. Nagkurahaw siya asin nagdalagan paluwas. Nagkabirigla su mga kabalang asin nagrulukso sa bintana.

Nagbalyo kami ni Pauline sa sarong kongregasyon na Swahili. Dai nahaloy, inasignaran ako na magkondukta nin Pag-adal sa Libro kan Kongregasyon (inaapod ngunyan na Pag-adal sa Bibliya kan Kongregasyon). Alagad, garo pa lang sa umboy an pakasabot ko kan lengguwahe duman. Pinag-aadalan ko nin patiinot an materyal, kaya nababasa ko man an mga hapot. Kaya lang, kun an komento kan mga nagdadangog medyo iba sa nakasurat, dai ko na iyan maintindihan. Makasupog talaga! Nahirak ako sa mga tugang. Pero naghanga ako ta mapasensiya asin mapakumbaba nindang inako an areglong idto.

Nagdanay kami sa Kenya nin mayo pang sarong taon. Dangan kan 1997 inimbitaran kami sa Bethel sa Brooklyn, New York. Ngunyan yaon kami sa sarong nasyon na mayaman sa materyal, na puwedeng magdara man nin ibang klaseng mga problema. (Tal. 30:8, 9) Pero dawa yaon sa arog kaiyan na nasyon, makusog an espirituwalidad kan mga tugang. Ginagamit kan satong mga tugang an saindang panahon saka mga pagsadiri, bako para magpayaman, kundi para suportaran an marahay na gibuhon kan organisasyon ni Jehova.

Sa laog nin mga taon, nahiling mi an pagtubod kan mga kapwa mi Saksi sa manlain-lain na kamugtakan. Sa Ireland, makusog an pagtubod dawa may kariribukan. Sa Aprika, makusog an pagtubod dawa napapasuway. Sa Estados Unidos, makusog an pagtubod dawa mayaman. Siguradong maugmahon si Jehova mantang hinihiling niya sa daga an saiyang mga lingkod na ipinapahiling an saindang pagkamuot saiya ano man an saindang kamugtakan!

Marikas na naglihis an mga taon—“mas marikas kisa sa lansadera nin parahabol.” (Job 7:6) Naglilingkod kami ngunyan kaiba kan iba pang mga tugang sa world headquarters sa Warwick, New York, asin maugma kaming padagos na maglingkod kaiba nin mga tawo na talagang namumutan an lambang saro. Kontento kami saka maugmang marhay na gibuhon an makakaya mi para suportaran an satong Hadi, si Cristo Jesus, na sa dai na mahahaloy babalusan an saiyang dai mabilang na maimbod na mga lingkod.—Mat. 25:34.