1-2. Ano an nangyari mantang an duwa sa mga disipulo ni Jesus naglalakaw pasiring sa Emaus?

 ALDAW kaidto nin Nisan 16, 33 C.E. Nakakamati nin grabeng kamunduan asin takot an mga disipulo ni Jesus. An duwa sa sainda naghali sa Jerusalem asin pasiring sa Emaus, sarong baryo na mga 11 kilometros an rayo sa Jerusalem. Pinangluluyahan na marhay nin buot an mga lalaking ini huling si Jesus—an lalaking sa saiya sinda kaidto nagsusunod—ginadan dai pa sana nahahaloy. Huli kaiyan, an paglaom ninda na magibo an Mesiyas nin marahayon na mga bagay garo baga nawara na. Pero may mangyayaring ikakasurpresa kan mga lalaking ini.

² May sarong estranghero na nagdulok sa sainda asin nagsabay sa sainda sa paglakaw. Inistorya sa saiya kan mga disipulo an namamatian nindang pagkadisganar manungod sa mga nangyari ki Jesus. Dangan nagpuon na ipakipag-ulay kan estranghero an manungod sa mga bagay na nungka nindang malilingawan. “Puon ki Moises asin sa gabos na Mga Propeta,” ipinaliwanag niya kun taano ta kinaipuhan kan Mesiyas na magsakit asin magadan. Kan mag-abot sa Emaus an tulo, ihinayag kan estranghero kun siisay siya—an binuhay liwat na si Jesus! Imahinara na sana kun gurano kaugma an mga disipulo kan maaraman nindang buhay an Mesiyas!—Luc. 24:​13-35.

3-4. Ano an nangyari sa mga disipulo ni Jesus, asin ano an manunudan ta sa artikulong ini? (Gibo 1:3)

³ Nagpahiling si Jesus sa saiyang mga disipulo nin dakul na beses sa huring 40 aldaw niya digdi sa daga. (Basahon an Gibo 1:3.) Durante kan panahon na iyan, an nagmumundong marhay asin natatakot na mga parasunod ni Jesus nagin nang maugma, may kumpiyansa,  asin makusog an buot na hukbo nin mga parahulit asin paratukdo kan Kahadian. a

⁴ Makikinabang kita sa pag-adal manungod sa interesanteng marhay na panahon na ini sa buhay ni Jesus. Sa artikulong ini, aaramon ta kun paano ginamit ni Jesus an panahon na ini (1) tanganing pakusugon an buot kan saiyang mga disipulo, (2) tanganing pararumon an saindang pakasabot sa Kasuratan, asin (3) tanganing sanayon sinda na magsaabaga nin urog pang mga responsabilidad. Sa kada saro kaiyan, hihilingon ta kun paano ta maaarog an halimbawa ni Jesus.

PAKUSUGON AN BUOT KAN IBA

5. Taano ta kaipuhan kan mga disipulo ni Jesus nin pampakusog nin buot?

⁵ Kaipuhan kan mga disipulo ni Jesus nin pampakusog nin buot. Taano? An nagkapira sa sainda binayaan an saindang harong, pamilya, asin negosyo tanganing magsunod ki Jesus nin bilog na panahon. (Mat. 19:27) An iba trinatar nin bakong makatanusan huling nagin mga disipulo niya sinda. (Juan 9:22) Ginibo ninda an mga pagsasakripisyong ini huling nagtutubod sinda na si Jesus an ipinanugang Mesiyas. (Mat. 16:16) Pero kan ginadan si Jesus, garo baga nagadan man an saindang paglaom kaya namundo saka nadisganar sindang marhay.

6. Ano an ginibo ni Jesus pagkabuhay liwat sa saiya?

⁶ Nasasabutan nanggad ni Jesus na an grabeng pagmundo kan saiyang mga disipulo bakong senyales nin kaluyahan sa espirituwal, kundi normal na reaksiyon sana sa pagkagadan niya. Kaya kan mismong aldaw na binuhay siya liwat, pinunan niyang pakusugon an buot kan saiyang mga amigo. Halimbawa, nagpahiling siya ki Maria Magdalena mantang naghihibi ini sa saiyang lulubngan. (Juan 20:​11, 16) Nagpahiling man siya sa duwang disipulo na ilinadawan sa kapinunan kan artikulong ini. Saka nagpahiling siya ki apostol Pedro. (Luc. 24:34) Ano an manunudan ta sa halimbawa ni Jesus? Pag-isipan an nangyari durante kan saiyang inot na pagpahiling.

7. Arog kan mababasa sa Juan 20:​11-16, ano an nahiling ni Jesus na ginigibo ni Maria kan amay na aga nin Nisan 16, asin napahiro kaiyan si Jesus na gibuhon an ano? (Hilingon man an ritrato.)

⁷ Basahon an Juan 20:​11-16. Kan amay na aga nin Nisan 16, nagkapirang maimbod na babayi an nagduman sa lulubngan kun sain ilinaag si Jesus. (Luc. 24:​1, 10) Magpokus kita sa eksperyensiya kan saro sa mga babaying iyan, si Maria Magdalena. Pag-abot ni Maria sa lulubngan, nahiling niyang mayo iyan nin laog. Nagdalagan  siya pasiring ki Pedro asin Juan tanganing sabihon ini sa sainda. Dangan nagsunod siya sa sainda mantang naghihiridali an mga ini pasiring sa lulubngan. Kan makumpirmar kan duwang lalaki na mayong laog an lulubngan, nagpuli sinda sa harong. Pero si Maria, dai. Nagdanay lang siya diyan, naghihibi. An dai niya aram, pinagmamasdan palan siya ni Jesus. Nahiling ni Jesus an mga luha kan maimbod na babaying ini asin napahiro siyang marhay. Kaya nagpahiling siya ki Maria asin may ginibong sarong simpleng bagay na nakapakusog na marhay sa babaying ini. Kinaulay niya si Maria asin tinawan ini nin sarong mahalagang asignasyon—an ibareta sa saiyang mga tugang an manungod sa saiyang pagkabuhay liwat.​—Juan 20:​17, 18.

8. Paano ta maaarog si Jesus?

⁸ Paano ta maaarog si Jesus? Dakula an magigibo ta tanganing mamotibar an satong mga tugang na padagos na maglingkod ki Jehova kun, arog ni Jesus, aram ta an mga ikinakahadit ninda asin kun makikipag-ulay kita sa sainda nin may empatiya. Pag-isipan an eksperyensiya nin sarong sister na an pangaran Jocelyn, na an tugang na babayi nagadan sa sarong teribleng aksidente. “Sa laog nin dakul na bulan, purupirming grabe an kamunduan ko,” an sabi niya. Pero, inimbitaran siya nin sarong mag-agom na tugang sa saindang harong, nagdangog sinda sa saiya nin may empatiya, asin inasigurar sa saiya na mahalaga siya sa paghiling nin Diyos. Sinabi ni Jocelyn: “Namatian ko na garo baga ginamit sinda ni Jehova tanganing hawason ako sa sarong madiklom asin mabagyong dagat asin isakay ako sa sarong lifeboat. Tinabangan ninda akong magkaigwa giraray kan pagmawot na padagos na maglingkod ki Jehova.” Mapapakusog ta man an buot kan iba paagi sa atentibong pagdangog mantang sinasabi ninda an gabos na nasa puso ninda asin paagi sa pagtaram nin may empatiya, tanganing mapakusog sinda na padagos na maglingkod sa Diyos.​—Roma 12:15.

TABANGAN AN IBA NA MANGATANUSAN GAMIT AN KASURATAN

9. Napaatubang sa anong kadipisilan an mga disipulo ni Jesus, asin paano niya sinda tinabangan?

⁹ Inako kan mga disipulo ni Jesus an Tataramon nin Diyos asin pinagmaigutan nindang isabuhay iyan. (Juan 17:6) Alagad, dai ninda masabutan kun taano ta kaipuhan na magadan si Jesus bilang kriminal sa hariging pasakitan. Narealisar ni Jesus na may mga pagduda sinda bako dahil maraot an saindang puso, kundi dahil kulang an saindang pakasabot. (Luc. 9:​44, 45; Juan 20:9) Kaya tinukduan niya sindang mangatanusan gamit an Kasuratan. Pag-isipan kun paano niya iyan ginibo kan magpahiling siya sa duwang disipulo kan sinda nasa dalan pasiring sa Emaus.

10. Paano kinumbinsir ni Jesus an saiyang mga disipulo na siya talaga an Mesiyas? (Lucas 24:​18-27)

¹⁰ Basahon an Lucas 24:​18-27. Mangnuhon na dai tulos sinabi ni Jesus sa mga lalaki kun siisay siya. Imbes, may mga ihinapot siya. Taano? Posibleng dahil gusto niyang ipahayag ninda kun ano an nasa isip asin puso ninda. Asin ginibo ninda iyan. Sinabi ninda sa saiya na linauman nindang ililigtas ni Jesus an Israel sa pang-aapi kan mga Romano. Pagkatapos nindang malinaw na ipahayag an mga ikinakahadit ninda, ginamit ni Jesus an Kasuratan tanganing tabangan an mga lalaki na masabutan kun ano an nangyari. b Kan banggi man sanang idto, nakipagtipon si Jesus sa iba pang mga disipulo asin ipinaliwanag man sa sainda an manungod sa mga katotoohan na iyan. (Luc. 24:​33-48) Ano an manunudan ta sa salaysay na ini?

11-12. (a) Ano an mga manunudan ta sa paagi nin pagtukdo ni Jesus kan mga katotoohan sa Bibliya? (Hilingon man an mga ritrato.) (b) Paano si Nortey tinabangan kan nagtutukdo sa saiya sa Bibliya?

¹¹ Paano ta maaarog si Jesus? Inot, pag nagtutukdo sa mga Bible study, maghapot nin mataktikang  mga hapot na makakatabang na maipahayag ninda an nasa isip asin puso ninda. (Tal. 20:5) Pag nasabutan mo na an saindang mga sabuot, ipahiling sa sainda kun paano maghanap nin espesipikong mga teksto na aplikado sa kamugtakan ninda. Dangan likayan na sabihan sinda kan gigibuhon ninda. Imbes, tabangan sinda na mangatanusan gamit an Kasuratan asin na masabutan kun paano ninda isasabuhay an mga prinsipyo sa Bibliya. Pag-isipan an eksperyensiya nin sarong brother sa Ghana na an pangaran Nortey.

¹² Si Nortey 16 anyos kaidto kan magpuon siyang mag-adal nin Bibliya. Pero dai nahaloy, pigkontra siya kan saiyang pamilya. Ano an nakatabang sa saiya na magdanay na marigon? Ginamit kan nagtutukdo sa saiya sa Bibliya an Mateo kapitulo 10 para ipaliwanag na an tunay na mga Kristiyano pepersegiron. “Kaya kan magpuon an pagpersegir sa sako,” an sabi ni Nortey, “kumbinsido akong nahanap ko na an katotoohan.” Tinabangan man siya kan nagtutukdo sa saiya kun paano iaaplikar an Mateo 10:16 tanganing magin maingat siya asin magalang pag ipinapaliwanag sa saiyang mga kapamilya an manungod sa saiyang mga tinutubod. Pagkatapos kan saiyang bawtismo, gusto ni Nortey na magpayunir, pero inaasahan saiya kan saiyang ama na maeskuwela siya sa unibersidad. Imbes na sabihan si Nortey kan gigibuhon niya, naggamit nin mga hapot an nagtutukdo sa saiya para maaraman an sabuot niya asin tinabangan siyang mangatanusan gamit an mga prinsipyo sa Kasuratan. An resulta? Nagdesisyon si Nortey na maglaog sa bilog na panahon na paglilingkod. Pinalayas siya kan saiyang ama. Ano an namatian ni Nortey sa mga nangyari sa saiya? “Kumbinsido ako na tama an nagin desisyon ko,” an sabi niya. Pag tinatawan ta man nin panahon an iba para tabangan sindang mangatanusan gamit an Kasuratan, matatabangan ta sinda na magin mga Kristiyanong may masarig na pundasyon.​—Efe. 3:​16-19.

TABANGAN AN MGA LALAKI NA MAKUWALIPIKAR NA MAGIN “MGA BALAOG NA TAWO”

13. Ano an ginibo ni Jesus tanganing masigurado na padagos na maisasagibo an gibuhon kan saiyang Ama? (Efeso 4:8)

¹³ Mantang yaon digdi sa daga, perpektong naisagibo ni Jesus an gibuhon na itinao sa saiya kan saiyang Ama. (Juan 17:4) Pero mayo si Jesus kan kaisipan na, ‘Kun gusto mong magibo nin tama an sarong bagay, ika mismo dapat an gumibo kaiyan.’ Durante kan saiyang tulo may kabangang taon na pagmiministeryo, may mga sinanay siya na magsagibo kan gibuhon. Bago magbalik sa langit, ipinagkatiwala ni Jesus sa saiyang  mga disipulo—na an nagkapira tibaad mga labing 20 anyos—an paninimbagan na atamanon an mahalagang marhay na mga karnero ni Jehova asin panginutan an gibuhon na paghuhulit asin pagtutukdo. (Basahon an Efeso 4:8.) Paano ginamit ni Jesus an huring 40 aldaw niya para tabangan an dusay, maimbod, asin mahigos na mga lalaking ini na makuwalipikar na magin “mga balaog na tawo”?​—Hilingon an study note sa Efeso 4:8.

14. Paano tinabangan ni Jesus an saiyang mga disipulo na magtalubo sa espirituwal durante kan huring 40 aldaw niya digdi sa daga? (Hilingon man an ritrato.)

¹⁴ Tinawan ni Jesus an saiyang mga disipulo nin direkta pero mamumuton na sadol. Halimbawa, narisa niya na an nagkapira sa sainda may tendensiyang magduwa-duwa, kaya sinadol niya sinda. (Luc. 24:​25-27; Juan 20:27) Idinuon niya sa sainda na kaipuhan nindang magtao nin mas urog na atensiyon sa gibuhon na pagpapastor kisa sa saindang sekular na mga karera. (Juan 21:15) Ipinagirumdom niya sa sainda na dai magparapokus sa kun anong mga pribilehiyo an tibaad inaako kan iba sa paglilingkod ki Jehova. (Juan 21:​20-22) Asin itinanos niya an pirang salang pakaintindi ninda manungod sa Kahadian saka tinabangan sinda na magpokus sa paghuhulit kan maugmang bareta. (Gibo 1:​6-8) Ano an manunudan kan mga elder ki Jesus?

15-16. (a) Sa anong mga paagi maaarog kan mga elder si Jesus? Ipaliwanag. (b) Paano nakinabang sa konseho si Patrick?

¹⁵ Paano maaarog kan mga elder si Jesus? Dapat sindang magsanay nin mga brother, kabali na an tibaad mga medyo hoben pa, asin tabangan an mga ini na makuwalipikar para sa urog pang mga responsabilidad. c An mga elder dai naglalaom nin pagkaperpekto sa mga sinasanay ninda. Dapat ninda sindang tawan nin mamumuton na konseho tanganing magkaigwa nin eksperyensiya an mga hoben na brother asin mahiling na kaipuhan nindang magin mapakumbaba, maimbod, asin andam na maglingkod sa iba.​—1 Tim. 3:1; 2 Tim. 2:2; 1 Ped. 5:5.

¹⁶ Pag-isipan kun paano nakinabang sa konseho an sarong brother na an pangaran Patrick. Kan siya hoben pa, makulog siyang magtaram saka bakong mabuot an pagtratar niya sa iba, dawa sa mga sister. Narisa nin sarong maygurang na elder an mga kaluyahan ni Patrick kaya tinawan  niya ini nin mabuot pero prangkang konseho. “Maugma ako na ginibo niya idto,” an sabi ni Patrick. “Kaidto nangluluya an buot ko pag an ibang mga brother nag-aako nin mga pribilehiyong gusto ko. Pero nakatabang sako an konseho kan elder na idto na mahiling na kaipuhan kong magpokus sa kun paano ko mapakumbabang paglilingkudan an mga tugang imbes na sa pag-ako nin katungdan o pribilehiyo sa kongregasyon.” Bilang resulta, ninombrahan si Patrick bilang elder kan siya 23 anyos.​—Tal. 27:9.

17. Paano ipinahiling ni Jesus na may tiwala siya sa saiyang mga disipulo?

¹⁷ Tinawan ni Jesus an saiyang mga disipulo bako lang kan responsabilidad na maghulit kundi pati man magtukdo. (Hilingon an study note na “itinuturo sa kanila” sa Mateo 28:20.) Tibaad namatian kan mga disipulo na bako sindang kuwalipikado para sa asignasyon na iyan. Alagad, dai nagduda si Jesus na kaya nindang gibuhon iyan, asin sinabi niya iyan sa sainda. Mahihiling niyato na lubos an tiwala ni Jesus sa sainda kan sabihon niya: “Kun paanong isinugo ako kan Ama, isinusugo ko man kamo.”​—Juan 20:21.

18. Paano maaarog kan mga elder si Jesus?

¹⁸ Paano maaarog kan mga elder si Jesus? An eksperyensiyadong mga elder nagdedelegar nin mga responsabilidad. (Fil. 2:​19-22) Halimbawa, puwedeng patabangon kan mga elder an mga hoben sa paglinig asin pagmentenar kan Kingdom Hall. Pagkatapos nindang idelegar an sarong trabaho, maipapahiling nindang may kumpiyansa sinda sa mga piniling magsagibo kaiyan paagi sa pagsasanay sa sainda asin pagtitiwalang magigibo ninda nin tama an saindang trabaho. An sarong bagong elder na an pangaran Matthew nagsabi na talagang naaapresyar niya an eksperyensiyadong mga elder na lubos na nagsasanay sa saiya sa pag-asikaso nin sarong asignasyon asin sa pagtitiwala sa saiya na matatapos niya iyan. Sinabi niya, “Nakinabang ako dahil minansay ninda an mga sala kong nagigibo bilang parte kan pakanuod ko tapos tinabangan ninda akong mas mapakarhay pa an trabaho ko.” d

19. Ano an dapat na determinado tang gibuhon?

¹⁹ Ginamit ni Jesus an huring 40 aldaw niya digdi sa daga para pakusugon, tukduan, asin sanayon an iba. Lugod na magin determinado kitang sundan na marhay an saiyang halimbawa. (1 Ped. 2:21) Tatabangan niya kitang magibo iyan. Tutal, nanuga siya: “Kaibanan nindo ako sa gabos na aldaw sagkod sa pagtatapos kan sistema nin mga bagay.”​—Mat. 28:20.