1. Taano ta masasabi ta na nabubuhay kita sa interesanteng panahon?

 NABUBUHAY kita sa interesanteng panahon! Sa kada aldaw, hiling-hiling ta kun paano nauutob an mga propesiya sa Bibliya. Halimbawa, nahihiling ta an pagdinaugan kan “hadi kan norte” asin kan “hadi kan timog” huli sa pagmawot kan duwang ini na dominaron an kinaban. (Dan. 11:​40, nota sa ibaba) Nahihiling tang ihinuhulit an maugmang bareta kan Kahadian nin Diyos sa bilog na kinaban, asin minilyon an naghihimati diyan. (Isa. 60:22; Mat. 24:14) Saka nakakaresibi kita nin abundang espirituwal na kakanon “sa tamang panahon.”​—Mat. 24:​45-47.

2. Ano an sigurado ta, pero ano man an dapat tang tandaan?

² Padagos kitang tinatabangan ni Jehova na magkaigwa nin mas malinaw na pakasabot sa importanteng mga mangyayari sa dai na mahahaloy. (Tal. 4:18; Dan. 2:28) Makakasigurado kita na pag nagpuon na an dakulang kasakitan, maaaraman ta an gabos na kaipuhan tang maaraman para maimbod na makatagal asin magdanay na nagkakasararo sa masakit na panahon na iyan. Minsan siring, dapat ta man na tandaan na may mga bagay na dai ta talaga aram manungod sa mangyayari sa maabot. Sa artikulong ini, pag-ulayan ta nguna kun taano ta kinonsiderar ta giraray an sinabi ta kaidto manungod sa nagkapira sa mga pangyayaring iyan. Dangan rerepasuhon ta an nagkapirang bagay na aram ta manungod sa mangyayari sa maabot asin kun paano mahiro an satong Ama sa langit.

 KUN ANO AN DAI TA ARAM

3. Ano an sinasabi ta kaidto mapadapit sa kun nuarin isasara na ni Jehova sa mga tawong dai nagtutubod sa saiya an oportunidad na umiba sa sato, asin taano ta iyan an nagin kongklusyon ta?

³ Kaidto, sinabi niyato na pag nagpuon na an dakulang kasakitan, mayo nang oportunidad an mga tawong dai nagtutubod ki Jehova na kumampi sa saiya asin makaligtas sa Armagedon. Nasabi ta iyan ta iniisip ta kaidto na an mga nangyari kan Baha sarong propetikong paglaladawan. Halimbawa, ipinapaliwanag ta kaidto na kun paanong sinarahan ni Jehova an pinto kan arka bago magpuon an Baha, sasarahan niya man nin pinto an sistema nin mga bagay ni Satanas sa pagpuon kan dakulang kasakitan. Kaya mayo nang tawong magkakaoportunidad na maligtas.​—Mat. 24:​37-39.

4. Ibinibilang ta daw sa ngunyan na sarong propetikong paglaladawan an pagkasaysay manungod sa Baha? Ipaliwanag.

⁴ Dapat ta daw isipon na an nangyari kan Baha sarong propetikong paglaladawan? Dai. Taano? Huling mayong direktang sinasabi an Kasuratan na nagsusuportar diyan. a Iyo, ikinumparar ni Jesus an “mga aldaw ni Noe” sa panahon kan saiyang presensiya, pero mayong nagpaparisa na ibinibilang niya an Baha na sarong propetikong paglaladawan, na an kada persona asin pangyayari igwa nin antitipikong kahulugan; asin dai niya man sinabi na an pagsara kan pinto kan arka igwa nin mas dakulang kautuban sa maabot. Pero dai man ini nangangahulugan na mayo kitang manunudan sa istorya manungod ki Noe asin sa Baha.

5. (a) Ano an ginibo ni Noe bago an Baha? (Hebreo 11:7; 1 Pedro 3:20) (b) Mapadapit sa gibuhon na paghuhulit, paano ta maikukumparar an sitwasyon ta ngunyan sa panahon ni Noe?

 ⁵ Kan madangog ni Noe an nagpapatanid na mensahe ni Jehova, pinatunayan niya an saiyang pagtubod paagi sa pagtugdok kan arka. (Basahon an Hebreo 11:7; 1 Pedro 3:20.) Sa kaparehong paagi, an mga tawo na nakadangog kan maugmang bareta manungod sa Kahadian nin Diyos dapat na humiro kauyon kan saindang nanudan. (Gibo 3:​17-20) Inapod ni Pedro si Noe na “sarong parahulit nin katanusan.” (2 Ped. 2:5) Minsan siring, arog kan tinukar sa nakaaging artikulo, dai ta aram kun baga pinanginutan ni Noe an sarong kampanya nin paghuhulit para mapaabutan nin mensahe an gabos na nabubuhay sa daga bago an Baha. Sa ngunyan, kaiba kita sa sarong gibuhon na paghuhulit sa bilog na kinaban, asin hinihinguwa tang magin maigot sa pakikikabtang diyan. Alagad, gurano man an pagmamaigot ta, dai man giraray posible na mapaabutan ta an gabos digdi sa daga kan maugmang bareta bago mag-abot an katapusan. Taano?

6-7. Taano ta masasabi niyato na dai ta mapapaabutan an gabos sa bilog na daga kan maugmang bareta bago mag-abot an katapusan? Ipaliwanag.

⁶ Pag-isipan an sinabi ni Jesus manungod sa hiwas kan satong gibuhon na paghuhulit. Ihinula niya na an maugmang bareta ihuhulit “sa bilog na kinaban bilang patotoo sa gabos na nasyon.” (Mat. 24:14) An propesiyang iyan nauutob na ngunyan nin urog kisa kasuarin man. An mensahe kan Kahadian naipupublikar sa labing 1,000 lengguwahe, asin paagi sa website na jw.org, puwede iyan manudan kan haros gabos na tawo sa bilog na kinaban.

⁷ Pero, sinabi man ni Jesus sa saiyang mga disipulo na dai ninda ‘matatapos na libuton an mga siyudad,’ o hulitan an gabos na tawo bago siya mag-abot. (Mat. 10:23; 25:​31-33) An mga sinabi ni Jesus totoo man sa panahon ta sa ngunyan. Minilyon na tawo an nakaistar sa mga lugar na ipinagbabawal na marhay an paghuhulit. Apuwera kaiyan, ginatos na umboy an namumundag kada minuto. Totoo, ginigibo ta an satong pinakamakakaya para mapaabutan kan maugmang bareta an mga tawo sa “lambang nasyon asin tribo asin lengguwahe.” (Kap. 14:6) Pero dai ta talaga makakaya na mapaabutan kan maugmang bareta an lambang indibidwal digdi sa daga bago mag-abot an katapusan.

8. Ano an mga tibaad maihapot ta manungod sa maabot na mga paghusgar ni Jehova? (Hilingon man an mga ritrato.)

⁸ Kaya tibaad maihapot ta: Paano man idtong mga dai nagkaigwa nin tsansa na madangog an maugmang bareta bago mag-abot an dakulang kasakitan? Paano sinda huhusgaran ni Jehova saka kan saiyang Aki, na pinagkatiwalaan niyang magsagibo kaiyan? (Juan 5:​19, 22, 27; Gibo 17:31) Sinasabi sa temang teksto kan artikulong ini na “habo [ni Jehova na] malaglag an siisay man.” Imbes, gusto niya na “an gabos makapagsulsol.” (2 Ped. 3:9; 1 Tim. 2:4) Dawa arog kaiyan, dapat tang tandaan na dai pa sato ihinayag ni Jehova kun ano an gigibuhon niya bilang simbag sa hapot na iyan. Siyempre, dai siya obligado na sabihon sa sato an gabos na bagay manungod sa mga ginibo o gigibuhon niya.

9. Ano an ihinayag sato ni Jehova sa Bibliya?

⁹ Sa saiyang Tataramon, ihinayag sato ni Jehova an pira sa mga bagay na gigibuhon niya. Halimbawa, sinasabi sa sato kan Bibliya na bubuhayon ni Jehova an “mga bakong matanos” na tawo na dai nagkaigwa nin oportunidad na madangog an maugmang bareta asin baguhon an saindang buhay. (Gibo 24:15; Luc. 23:​42, 43) Kaya may mahalaga pang mga hapot na minabangon.

10. Ano pang ibang mga hapot an minabangon?

¹⁰ An gabos daw na magagadan sa panahon kan dakulang kasakitan biyo nang malalaglag na mayo nang paglaom na buhayon liwat? Malinaw na sinasabi kan Kasuratan na dai na bubuhayon liwat an mga nagtutumang ki Jehova na lalaglagon  niya asin kan saiyang hukbo sa Armagedon. (2 Tes. 1:​6-10) Pero paano man an iba pa, arog kan mga nagadan sa panahon kan dakulang kasakitan huli sa hilang, paggurang o aksidente, o ginadan kan ibang tawo? (Ecl. 9:11; Zac. 14:13) Igwa daw sa sainda na mapapabilang sa “mga bakong matanos” na bubuhayon liwat sa bagong kinaban? Dai ta aram.

KUN ANO AN ARAM TA

11. Sa anong basehan huhusgaran ni Jesus an mga tawo?

¹¹ May nagkapirang bagay na aram ta manungod sa mangyayari sa maabot. Halimbawa, aram niyato na huhusgaran ni Jesus an mga tawo bilang karnero o kanding base sa kun paano ninda trinatar an mga tugang ni Cristo. (Mat. 25:40) An mga nakapagpahiling nin suporta sa mga linahidan asin ki Cristo, huhusgaran bilang karnero. Aram ta man na an pira sa mga tugang ni Cristo yaon pa sa daga pagkatapos na magpuon an dakulang kasakitan sagkod na darahon na sinda sa langit dai mahahaloy bago magpuon an Armagedon. Sagkod na yaon pa digdi sa daga an mga tugang ni Cristo, posible na magkaigwa nin oportunidad an mga tawong sadiyosan an puso na suportaran sinda asin an saindang gibuhon. (Mat. 25:​31, 32; Kap. 12:17) Taano ta importante an mga detalyeng iyan?

12-13. Ano an tibaad magin reaksiyon kan nagkapira pagkatapos na mahiling an paglaglag sa “Dakulang Babilonya”? (Hilingon man an mga ritrato.)

¹² Dawa nagpuon na an dakulang kasakitan, posible na magirumduman kan nagkapira na nakahiling kan paglaglag sa “Dakulang Babilonya” na iyo iyan idtong haloy nang sinasabi kan Mga Saksi ni Jehova. Posible daw na magpahiling sinda nin pagtubod ki Jehova?—Kap. 17:5; Ezek. 33:33.

¹³ Kun mangyari iyan, magigin kapareho iyan kan nangyari sa Ehipto kan panahon ni Moises. Tandaan na “sarong dakulang grupo na manlain-lain an lahi” an uminiba sa Israel sa paghali ninda sa Ehipto. An pira sa sainda tibaad nagpuon na magkaigwa nin pagtubod kan mahiling ninda na nagkakatotoo an patanid ni Moises manungod sa Sampulong Damat. (Exo. 12:38) Kun arog man kaiyan an mangyari pagkatapos na laglagon an Dakulang Babilonya, iisipon ta daw na bakong makatanusan kun may  mga tawo na makakaiba sa sato sa halipot sanang panahon bago mag-abot an katapusan? Siyempre dai! Gusto tang ipahiling an personalidad kan satong Ama sa langit, na “sarong Diyos na mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan.” b—Exo. 34:6.

14-15. An oportunidad daw kan sarong tawo na mabuhay nin daing katapusan nakadepende kun nuarin siya nagadan o kun sain siya nakaistar? Ipaliwanag. (Salmo 33:​4, 5)

¹⁴ Kun minsan, may madadangog kita na nagsasabing, “Kun magadan an paryente kong bakong Saksi, mas marahay kun mangyari iyan bago magpuon an dakulang kasakitan para may paglaom siyang buhayon giraray.” Siguradong may marahay na motibo sa pagsabi ninda kaiyan. Pero an puturo kan sarong tawo dai nakadepende kun kasuarin siya nagadan. Si Jehova an perpektong Hukom—an mga desisyon niya pirming tama asin makatanusan. (Basahon an Salmo 33:​4, 5.) Makakapagtiwala kita na an “Hukom kan bilog na daga” gigibuhon kun ano an tama.​—Gen. 18:25.

¹⁵ Rasonable man na isipon na an pagkaigwa nin oportunidad kan sarong tawo na mabuhay nin daing katapusan dai nakadepende sa kun sain siya nakaistar. Imposible nanggad na awtomatikong ibilang ni Jehova na “mga kanding” an minilyon na tawo na nakaistar sa mga lugar na diyan dai lamang sinda nagkaigwa nin oportunidad na makanuod manungod sa mensahe kan Kahadian. (Mat. 25:46) Mas urog nanggad kisa sa sato an pagmalasakit kan matanos na Hukom  kan bilog na daga sa mga indibidwal na iyan. Dai ta aram kun paano mamaniobrahon ni Jehova an mga mangyayari sa panahon nin dakulang kasakitan. An nagkapira sa mga indibidwal na iyan puwedeng magkaigwa nin oportunidad na makanuod manungod ki Jehova, magpahiling nin pagtubod sa saiya, asin manindugan sa lado ni Jehova pag pinabanal na niya an sadiri niya sa atubangan kan gabos na nasyon.​—Ezek. 38:16.

16. Ano an naaraman ta manungod ki Jehova? (Hilingon man an ritrato.)

¹⁶ Sa pag-adal ta kan Bibliya, naaraman ta kun gurano kahalaga ki Jehova an buhay kan mga tawo. Itinao niya an buhay kan saiyang Aki tanganing magin posible para sa sato gabos na magkaigwa nin paglaom na mabuhay nin daing katapusan. (Juan 3:16) Namamati ta gabos an mapagpadangat na pagkamuot ni Jehova. (Isa. 49:15) Aram niya an pangaran kan kada saro sa sato. Sa katunayan, midbid niya kitang marhay bilang indibidwal kaya dawa pa magadan kita, kaya niyang gibuhon giraray an lambang detalye asin lambang memorya na minabilog sa pagkatawo ta! (Mat. 10:​29-31) Iyo, igwa kita nin marahay na dahilan para magtiwala na an satong mamumuton na Ama sa langit huhusgaran sa perpektong paagi an lambang indibidwal huling si Jehova madunong, matanos, asin mahihirakon.​—Sant. 2:13.

17. Ano an pag-uulayan ta sa sunod na artikulo?

¹⁷ Huli sa mga paglilinaw na ini, nahihiling ta kun taano ta dapat kitang magin mas apurado ngunyan sa gibuhon na paghuhulit. Taano ta nasabi ta iyan? Asin ano an nagmomotibar sa sato na padagos na magin maigot sa paghuhulit kan maugmang bareta? Detalyado tang pag-uulayan an mga simbag sa mga hapot na iyan sa sunod na artikulo.