1. Anong kadipisilan an inaatubang kan dakul sa sato?

 NAGKAIGWA ka na daw nin sarong espirituwal na pasuhan pero nasakitan kang abuton iyan? b Kun iyo, dai ka nagsosolo. Halimbawa, gusto ni Philip na mapauswag an kalidad kan saiyang mga pamibi asin gusto niya na mas parating gibuhon iyan, pero nasasakitan siyang maghanap nin panahon para mamibi. Pasuhan ni Erika na mag-abot nin amay sa mga pagtiripon bago maglingkod sa langtad; pero, nahuhuri man giraray siyang mag-abot sa haros kada pagtiripon. Pirang beses man na pinurbaran ni Tomas na basahon an bilog na Bibliya. Sinabi niya: “Dai ko lang talaga ma-enjoy an pagbasa nin Bibliya. Tulong beses ko iyan na pinurbaran, pero nakakaabot lang ako sa Levitico tapos dai ko na naipapadagos.”

2. Taano ta dai kita dapat madisganar kun may espirituwal na pasuhan kita na dai ta pa naaabot?

² Kun may pasuhan ka ngunyan na dai mo pa man giraray naaabot, dai tabi madisganar. An pag-abot dawa nin sarong simpleng pasuhan sa parati nangangaipo nin panahon asin paghihinguwa. An katunayan na gusto mo pa man giraray na abuton an saimong pasuhan nagpapahiling na pinapahalagahan mong marhay an relasyon mo ki Jehova asin na gusto mong itao sa saiya an saimong pinakamakakaya. Pinapahalagahan na marhay ni Jehova an saimong mga paghihinguwa. Siyempre, dai siya nag-aasa saimo nin labi sa makakaya mo. (Sal. 103:14; Mik. 6:8) Kaya dapat rasonable an mga pasuhan mo, kauyon sa itinutugot kan saimong kamugtakan. Kun igwa ka na nin rasonableng pasuhan, ano an magigibo mo para maabot iyan? Pag-ulayan ta an nagkapirang suhestiyon.

3. Taano ta mahalaga an motibasyon?

³ Mahalagang marhay an motibasyon sa pag-abot nin espirituwal na mga pasuhan. An sarong tawo na igwa nin makusog na motibasyon naghihinguwang marhay para maabot an saiyang pasuhan. An motibasyon puwede tang iagid sa duros na nagtutulod sa sarong bangkang de-layag pasiring sa destinasyon kaiyan. Kun padagos an paghuyop kan duros, posibleng marhay na makaabot an paralayag sa saiyang destinasyon. Asin kun makusog an duros, puwede pa ngani siyang makaabot nin amay. Sa kaparehong paagi, pag mas motibado kita, mas posibleng marhay na maabot ta an satong mga pasuhan. “Pag motibado ka, mas magmamaigot ka,” an sabi ni David na sarong brother sa El Salvador. “Dai mo tutugutan an ano man na makapugol sa saimo na maabot an saimong pasuhan.” Kaya, ano an puwede mong gibuhon para mas magin motibado?

4. Ano an puwede tang ipamibi? (Filipos 2:13) (Hilingon man an ritrato.)

⁴ Mamibi na mas magin motibado ka. Paagi sa saiyang espiritu, puwede kang tawan ni Jehova nin motibasyon na abuton an saimong pasuhan. (Basahon an Filipos 2:13.) Naggigibo kita kun minsan nin mga pasuhan huling aram ta na iyan an dapat gibuhon, asin marahay iyan. Pero tibaad mayo talaga kita nin pagmawot na abuton iyan. Arog kaiyan an nangyari sa sarong sister sa Uganda na si Norina. Nagin pasuhan niya na magkaigwa nin tinutukduan sa Bibliya, dawa ngani bako man siyang motibado dahil pagmati niya bako man siyang mahusay na paratukdo. Ano an nakatabang sa saiya? Sinabi niya: “Pinunan kong hagadon ki Jehova aroaldaw na tabangan niya akong pakusugon an sakong pagmawot na makapagkondukta nin sarong pag-adal sa Bibliya. Kauyon kan sakong mga pamibi, hininguwa kong pauswagon an sakong kakayahan sa pagtutukdo. Pakalihis nin pirang bulan, narisa ko na mas nagkusog an pagmawot ko. Kan taon man sanang iyan, nakapuon ako nin duwang pag-adal sa Bibliya.”

5. Ano an puwede tang hurop-hurupon tanganing magkaigwa kita nin makusog na motibasyon?

⁵ Hurop-hurupon kun ano na an ginibo ni Jehova para sa saimo. (Sal. 143:5) Hinurop-hurop ni apostol Pablo an daing kapantay na kabuutan ni Jehova sa saiya, asin nakamotibar iyan saiya na magmaigot na marhay para ki Jehova. (1 Cor. 15:9, 10; 1 Tim. 1:12-14) Kun mas huhurop-hurupon mo man an mga ginibo ni Jehova para sa saimo, mas magigin motibado ka man na abuton an saimong pasuhan. (Sal. 116:12) Pag-isipan kun ano an nakatabang sa sarong sister na taga Honduras para maabot niya an saiyang pasuhan na magin regular payunir. Sinabi niya: “Hinurop-hurop ko kun gurano ako kanamumutan ni Jehova. Tinabangan niya ako na manumpungan an saiyang banwaan. Nagmamalasakit siya sa sako asin pinoprotektaran niya ako. An arog kaiyan na paghurop-hurop nagpakusog kan sakong pagkamuot sa saiya asin kan sakong motibasyon.”

6. Ano pa an makakatabang sa sato para pakusugon an satong motibasyon?

⁶ Magpokus sa mga bendisyon na makakamtan mo. Mangnuhon kun ano an nakatabang ki Erika, na sinambit kasubago, na magibo an pasuhan niya na mag-abot nin amay. Sinabi niya: “Narealisar ko na dakulon akong napapalampas dahil sa  pagigin huri sa ministeryo. Pero paagi sa pag-abot nin amay, nakukumusta ko an mga tugang asin may panahon ako para makaulay sinda. Saka nakakakua ako nin praktikal na mga suhestiyon na makakatabang sa sako na ma-enjoy asin mapauswag ko an sakong ministeryo.” Nagpokus si Erika sa mga bendisyon nin pag-abot nin amay asin nagibo niya an pasuhan niyang iyan. Anong mga bendisyon an puwede mo man na isip-isipon? Kun pasuhan mo na mapauswag an saimong pagbasa nin Bibliya o pagpamibi, pag-isipan kun paano iyan makakapakusog kan saimong pakikiamigo ki Jehova. (Sal. 145:18, 19) Kun pasuhan mo na pauswagon an sarong Kristiyanong kuwalidad, magpokus sa kun paano iyan makakatabang para magkaigwa ka nin mas marahay na relasyon sa iba. (Col. 3:14) Puwede ka daw gumibo nin sarong lista kan gabos na dahilan kun taano ta gusto mong maabot an saimong pasuhan? Pirming balikan an listang iyan. Si Tomas, na sinambit kasubago, nagsabi: “Pag mas dakul an dahilan ko na abuton an sarong pasuhan, mas determinado man ako na abuton iyan.”

7. Ano an nakatabang ki Julio asin sa agom niya na maabot an saindang pasuhan?

⁷ Makiiba-iba sa mga makakamotibar sa saimo. (Tal. 13:20) Mangnuhon kun ano an nakatabang ki Julio asin sa agom niya na maabot an saindang pasuhan na pahiwason an saindang ministeryo. Sinabi niya: “Nakipag-amigo kami sa mga makakadagka sa samo na maabot an samong pasuhan, asin ipinapakipag-ulay mi iyan sa sainda. Naabot na kan dakul sa sainda an pasuhan na gusto mi man na maabot, kaya makakatao sinda sa samo nin kapaki-pakinabang na mga suhestiyon. Kinukumusta man kan mga amigo mi an mapadapit sa samong mga plano, asin pinapakusog ninda kami pag kaipuhan mi iyan.”

8. Ano an puwedeng mangyari kun mahinguwa kita na abuton an satong pasuhan sa panahon sana na motibado kita? (Hilingon man an ritrato.)

⁸ Minsan siring, may mga panahon talaga na kulang an satong motibasyon. Buot sabihon daw kaiyan mayo na kitang magigibo sa pag-abot kan satong pasuhan? Dai. Para iilustrar: An duros puwedeng magin sarong mapuwersang pantulod sa bangkang de-layag para makaabot iyan sa destinasyon. Alagad, nagbuburubago an kusog nin duros, asin may mga aldaw na mayo talagang duros. Buot sabihon daw kaiyan dai na puwedeng umabante an paralayag? Dai man. Halimbawa, may mga bangkang de-layag na may makina; an iba may sagwan. Puwede iyan gamiton kan paralayag tanganing padagos na umabante pasiring sa destinasyon. An satong motibasyon puwedeng ikumparar sa duros; an kusog kan satong motibasyon puwedeng iba-iba sa kada aldaw. Asin may mga aldaw na tibaad pagmati ta mayo kitang motibasyon o gana para maghinguwa na maabot an satong pasuhan. Kaya kun hihinguwahon tang abuton an satong pasuhan sa panahon sana na pagmati ta motibado kita, tibaad dai ta talaga iyan maabot. Pero kun paanong an paralayag naghahanap nin ibang paagi para makaabot sa saiyang destinasyon, puwede man giraray kitang maghinguwa para maabot an satong pasuhan dawa kun pagmati ta bako kitang motibado. Dawa nangangaipo iyan nin disiplina sa sadiri, kapaki-pakinabang nanggad an resulta. Bago  ta pag-ulayan kun ano an puwede tang gibuhon, simbagon ta nguna an sarong hapot na puwedeng magbangon.

9. Dapat ta daw na padagos na hinguwahon na abuton an sarong espirituwal na pasuhan dawa bako kitang motibado na gibuhon iyan? Ipaliwanag.

⁹ Gusto ni Jehova na maugma asin gikan sa buot kitang maglingkod sa saiya. (Sal. 100:2; 2 Cor. 9:7) Kaya dapat daw na padagos na maghinguwa na abuton an sarong espirituwal na pasuhan dawa bako kitang motibado na gibuhon iyan? Pag-isipan an halimbawa ni apostol Pablo. Sinabi niya: ‘Istrikto kong dinidisiplina an sakuyang hawak asin ginigibo iyan na magin siring sa uripon.’ (1 Cor. 9:25-27) Pinuwersa ni Pablo an sadiri niya na gibuhon an tama dawa kan bako siyang motibado na gibuhon iyan. Ikinaugma daw ni Jehova an paglilingkod ni Pablo? Siyerto nanggad! Asin binalusan siya ni Jehova sa saiyang mga paghihinguwa.—2 Tim. 4:7, 8.

10. Ano an mga pakinabang pag hinihinguwa tang maabot an sarong pasuhan dawa pag bako kitang motibado?

¹⁰ Sa kaparehong paagi, nauugma si Jehova na mahiling kitang naghihinguwa na abuton an satong pasuhan dawa pag bako kitang motibado na gibuhon iyan. Nauugma siya ta dawa ngani bako man sa gabos na pagkakataon gustong-gusto tang gibuhon iyan, aram niya na ginigibo ta iyan huling namumutan ta siya. Kun paanong binendisyunan ni Jehova si Pablo, bebendisyunan Niya man an satong mga paghihinguwa. (Sal. 126:5) Asin mantang naeeksperyensiyahan ta an bendisyon ni Jehova, puwede pa nganing magpuon nang kumusog an satong motibasyon. Si Lucyna, sarong sister na taga Poland, nagsabi: “Kun minsan, habo kong mag-service, lalo na pag pagal ako. Pero an kaugmahan na namamati ko pagkatapos mag-service, saro talagang marahayon na regalo.” Kaya aramon ta kun ano an puwede tang gibuhon kun kulang an satong motibasyon.

11. Paano kita puwedeng tabangan ni Jehova na mapakusog an satong pagpupugol sa sadiri?

¹¹ Mamibi na magkaigwa ka nin pagpupugol sa sadiri. An pagpupugol sa sadiri iyo an kakayahan kan saro na kontrulon an saiyang pagmati asin paggawi. Sa parati an ekspresyon na iyan nagpaparisa nin pagpugol sa satong sadiri na gumibo nin sala. Alagad, an pagpupugol sa sadiri kaipuhan man para mapahiro kita na gumibo nin tama, lalo na kun masakit gibuhon an sarong bagay o kun mayo kita nin motibasyon. Tandaan na an pagpupugol sa sadiri kabtang kan bunga kan espiritu, kaya hagadon ki Jehova an saiyang banal na espiritu para tabangan ka na mapatalubo an mahalagang kuwalidad na iyan. (Luc. 11:13; Gal. 5:22, 23) Si David, na sinambit kasubago, nagpaliwanag kun paano siya natabangan nin pamibi. Gusto niya na mas magin regular an saiyang personal study. Sinabi niya: “Hinagad ko ki Jehova na tabangan niya akong mapatalubo an pagpupugol sa sadiri. Sa tabang niya, nagibo ko na makapuon nin sarong marahay na programa sa pag-adal asin magibo iyan nin regular.”

12. Paano makakatabang an prinsipyo sa Eclesiastes 11:4 na maabot ta an satong espirituwal na pasuhan?

¹² Dai maghalat nin perpektong sitwasyon. Sa kinaban na ini, posibleng marhay na nungka kitang magkakaigwa nin perpektong sitwasyon. Kun hahalaton ta iyan, tibaad dai ta nuarin man maabot an satong pasuhan. (Basahon an Eclesiastes 11:4.) An brother na si Dayniel nagsabi: “Mayong perpektong sitwasyon. Nagigin pinakamarahay an sitwasyon pag nagpuon na kita.” Sinabi ni Paul, sarong brother sa Uganda, an saro pang rason kun taano ta dai kita dapat magpaliman-liman: “Pag nagpuon na kita dawa masakit an sitwasyon, tinatawan ta si Jehova nin dahilan para bendisyunan kita.”—Mal. 3:10.

13. Ano an mga pakinabang nin pagpuon sa saradit na mga pasuhan?

¹³ Magpuon sa sadit. Puwedeng kulang kita sa motibasyon huling an satong pasuhan garo masakiton na maabot. Kun arog kaiyan an sitwasyon mo, puwede mo daw banga-bangaon sa saradit an pasuhan mo? Kun pasuhan mo na patalubuon an sarong kuwalidad, puwede mo daw hinguwahon na ipahiling nguna iyan sa simpleng  mga paagi? Kun pasuhan mo na basahon an bilog na Bibliya, puwede mo daw punan iyan paagi sa pag-iskedyul nin haralipot na oras nin pagbasa? Si Tomas, na sinambit sa kapinunan, nasakitan sa pasuhan niya na basahon an Bibliya sa laog nin sarong taon. Sinabi niya: “Nahiling ko na an pinili ko palan na iskedyul nin pagbasa marikason para sa sako. Kaya pinurbaran ko giraray, pero sa pagkakataon na ini, iniskedyul ko na magbasa nin haralipot na parapo kada aldaw asin hurop-hurupon iyan. Bilang resulta, nagpuon na akong mag-enjoy sa pagbasa.” Huling nag-e-enjoy na si Tomas sa pagbasa, pinunan niyang magbasa nin mas huruhalawig na oras. Sa huri, nabasa niya an bilog na Bibliya. c

14. Anong mga ulang an tibaad mapaatubang sa sato?

¹⁴ Nakakamundo, gurano man kakusog kan satong motibasyon o disiplina sa sadiri, may mga ulang pa man giraray kitang maeeksperyensiyahan. Halimbawa, an “dai linalauman na mga pangyayari” puwedeng makaagaw kan satong panahon na kaipuhan ta sa pag-abot kan satong pasuhan. (Ecl. 9:11) Puwede kitang mapaatubang sa sarong kadipisilan na huli kaiyan madisganar kita asin pangluyahan. (Tal. 24:10) An satong pagkabakong perpekto puwedeng magtulod sa sato na gumawi sa paaging dai makakatabang na maabot ta an satong pasuhan. (Roma 7:23) O puwedeng makamati kita nin kapagalan. (Mat. 26:43) Ano an makakatabang sa sato na mapangganahan an sarong ulang?

15. Pag may ulang, nangangahulugan daw iyan na dai mo na maaabot an pasuhan mo? Ipaliwanag. (Salmo 145:14)

¹⁵ Tandaan na pag may ulang dai iyan nangangahulugan na dai mo na maaabot an pasuhan mo. Sinasabi kan Bibliya na puwedeng pauruutro kitang makaeksperyensiya nin mga problema o kasakitan. Minsan siring, malinaw man kaiyan na sinasabi na puwede man giraray kitang magpadagos, lalo na paagi sa tabang ni Jehova. (Basahon an Salmo 145:14.) An brother na si Philip, na sinambit kasubago, sinusukol an kapangganahan sa arog kaining paagi: “An sakong kapangganahan dai nakabase sa kun pirang beses akong natumba. Imbes, nakabase iyan sa kun pirang beses ako minabangon giraray para magpadagos.” Si David,  na sinambit kasubago, nagsabi: “Hinihinguwa kong mansayon an mga kadipisilan bako bilang ulang, kundi bilang mga oportunidad para ipahiling ko ki Jehova kun gurano ko siya kanamumutan.” Iyo, paagi sa dai pagpundo sa ibong nin sarong ulang, pinapatunayan mo ki Jehova na gusto mong mapaugma siya. Siguradong nauugmang marhay si Jehova pag nahihiling kang nagpapadagos sa paghihinguwang abuton an saimong pasuhan!

16. Ano an puwede tang manudan sa naeksperyensiyahan tang ulang?

¹⁶ Makanuod sa ulang na naeksperyensiyahan mo. Pag-isipan kun ano an nagin dahilan kaiyan, asin haputon an sadiri, ‘Ano an puwede kong gibuhon para malikayan iyan sa sunod?’ (Tal. 27:12) Pero kun minsan, puwedeng ipahiling kan mga ulang na bakong realistiko an sarong pasuhan arog kan iniisip ta. Kun pagmati mo arog kaiyan an sitwasyon mo, pag-isipan giraray an pasuhan mo para mahiling kun baga rasonable pa man giraray iyan para saimo. d Dai ibibilang ni Jehova na bako kang mapanggana huling dai mo naabot an sarong pasuhan na bakong praktikal sa saimo.—2 Cor. 8:12.

17. Taano ta dapat tang pag-isipan kun ano na an nagibo ta?

¹⁷ Pag-isipan kun ano na an nagibo mo. Sinasabi kan Bibliya na “an Diyos bakong biko para lingawan niya an saindong ginibo.” (Heb. 6:10) Kaya dai mo man iyan paglingawan. Pag-isipan kun ano na an nagibo mo—iyan man pagkaigwa nin haraning relasyon ki Jehova, pakikipag-ulay sa iba manungod sa saiya, o pagpabawtismo. Kun paanong nag-uswag ka asin naabot mo an espirituwal na mga pasuhan mo kaidto, puwede man na padagos kang umuswag para maabot an pasuhan mo ngunyan.—Fil. 3:16.

18. Ano an dapat tang girumdumon mantang hinihinguwa tang abuton an satong pasuhan? (Hilingon man an ritrato.)

¹⁸ Sa tabang ni Jehova, makakaya mo na maabot an saimong pasuhan, arog nin sarong paralayag na maugmang nakakaabot sa saiyang destinasyon. Pero tandaan na dakul na paralayag an ikinakaugma man mismo an paglayag. Sa kaparehong paagi, mantang hinihinguwa mong maabot an saimong espirituwal na pasuhan, dai paglingawan na ikaugma an mga nahihiling mong paagi ni Jehova para tabangan ka asin an mga bendisyon niya sa saimo mantang inaabot mo an saimong pasuhan. (2 Cor. 4:7) Kun dai ka masuko, maako ka nin mas urog pa nganing mga bendisyon.—Gal. 6:9.