Minilyon na tawo sa bilog na kinaban an nagtutubod na an Pasko iyo an selebrasyon kan kumpleanyo o birthday ni Jesu-Cristo. Pero, napag-isip-isip mo na daw kun baga an inot na siglong mga Kristiyano, lalo na idtong mga dayupot ki Jesus, nagselebrar nin Pasko? Asin aram mo daw kun anong sinasabi kan Bibliya dapit sa mga birthday? Makakatabang an simbag sa mga hapot na ini tanganing maaraman niyato kun talagang para sa mga Kristiyano an Pasko.

Inot, mayong sinasabi an Bibliya na nagselebrar nin birthday si Jesus o an siisay man na maimbod na parasamba nin Diyos. Duwang tawo sana an sinasabi kan Kasuratan na nagselebrar kan birthday ninda. Pareho sindang dai nagsasamba ki Jehova, an Diyos na sinasabi sa Bibliya, asin parehong may maraot na nangyari sa selebrasyon kan birthday ninda. (Genesis 40:20; Marcos 6:21) Uyon sa Encyclopædia Britannica, kontra an inot na siglong mga Kristiyano sa “paganong kostumbre na pagselebrar nin mga birthday.”

Dai eksaktong sinasabi kan Bibliya kun kasuarin namundag si Jesus. “Dai masisiyerto sa B[agong] T[ipan] o sa ano pa man na reperensiya an aldaw kun kasuarin namundag si Cristo,” an sabi kan McClintock and Strong’s Cyclopedia. Makakasigurado kita na kun talagang gusto ni Jesus na iselebrar kan mga parasunod niya an saiyang birthday, ipinaaram niya kuta sainda an petsa kan saiyang pagkamundag.

Ikaduwa, mayong sinasabi sa Bibliya na nagselebrar nin Pasko si Jesus o an siisay man sa saiyang mga disipulo. Sigun sa New Catholic Encyclopedia, inot na sinambit an pagselebrar nin Pasko “sa Chronograph of Philocalus, sarong Roman almanac na an ginamit na mga reperensiya ginibo kaidto pang 336 [C.E.].” Malinaw na kan mga panahon na iyan, nakumpleto na an Bibliya asin pirang siglo na an nag-agi kan magdigdi si Jesus sa daga. Kaya sinabi kan McClintock and Strong na “an pagselebrar nin Pasko dai ipinagbuot nin Diyos, ni nakabasar man iyan sa B[agong] T[ipan].” a

Bilang an Dakulang Paratukdo, nagtao si Jesus nin malinaw na mga instruksiyon kun ano an gusto niyang gibuhon kan saiyang mga parasunod, asin mahihiling iyan sa Bibliya. Pero, dai kabali diyan an pagselebrar nin Pasko. Kun paanong habo nin sarong maestro na gibuhon kan mga estudyante niya an labi sa itinaong instruksiyon, habo man ni Jesus na an mga parasunod niya “maglampas sa mga bagay na nasusurat” sa Banal na Kasuratan.—1 Corinto 4:6.

Sa ibong na lado, may sarong mahalagang okasyon na pamilyar na marhay sa inot na mga Kristiyano—an paggirumdom, o Memoryal, kan kagadanan ni Jesus. Sinabi mismo ni Jesus sa saiyang mga disipulo kun nuarin gigirumdumon asin kun paano iseselebrar an okasyon na ini. Nakarekord sa Bibliya an espesipikong mga instruksiyon na ini, pati na an petsa kan saiyang kagadanan.—Lucas 22:19; 1 Corinto 11:25.

Arog kan naaraman ta, an Pasko sarong selebrasyon nin birthday, asin dai isinelebrar kan inot na mga Kristiyano an paganong kostumbreng ini. Saro pa, mayong sinambit sa Bibliya na nagselebrar nin Pasko si Jesus o an siisay man. Huli sa mga katotoohan na ini, minilyon na Kristiyano sa bilog na kinaban an nagsabi na bakong para sa sainda an Pasko.