May mga tawong nag-iisip kun baga nabago an nasusurat na Tataramon nin Diyos. Sinabi ni propeta Isaias na an tataramon nin Diyos ‘nagdadanay sagkod nuarin pa man.’ (Isaias 40:8) Paano kita nakakasigurado na an mga panuga nin Diyos napreserbar asin dai nabago?

May kapangyarihan an Diyos na mapreserbar an saiyang Tataramon saka maingatan na dai maliwat. Kan suanoy na mga panahon, pag naggigibo nin mga surat-kamot na kopya, binibilang kan maingat na mga parakopya an kada letra sa banal na kasuratan tanganing masigurado na mayong nadagdag, nabago, o nahali diyan. Pero dahil bakong perpekto an mga tawo, an iba sa mga parakopya nasasala man nin dikit.

Igwa nin ribo-ribong kopya nin suanoy na mga manuskrito kan Banal na Kasuratan. Pag an sarong kopya igwa nin dawa dikit na pagkakalain, puwede iyan na ikumparar sa iba pang mga kopya tangani na makumpirmar kun ano an tama.—Para sa dagdag na impormasyon, hilingon an artikulong “Nabago Ba o Sinadyang Baguhin ang Bibliya?” sa jw.org/tl.

Halimbawa, pag-isipan an suanoy na dokumentong inaapod na Dead Sea Scrolls, na nadiskubre kan mga Bedouin sa mga kuweba harani sa Dead Sea kan 1947. Sa suanoy na mga manuskritong ini may mababasang mga porsiyon kan Banal na Kasuratan na isinurat labing 2,000 na taon na an nakaagi. Ikinumparar kan mga eksperto an suanoy na mga manuskritong ini sa Banal na Kasuratan na igwa kita ngunyan. Ano an nadiskubre ninda?

Nadiskubre kan mga iskolar na an mensahe na yaon sa Tataramon nin Diyos na ginagamit ta ngunyan kapareho kan nasa orihinal na mga manuskrito. a An maingat na pagsiyasat sa mas haloy nang mga manuskrito nagpapatunay na an nababasa niyato sa Banal na Kasuratan iyo an orihinal na mensahe nin Diyos. Makakasigurado kita na maingat na prineserbar nin Diyos an saiyang Banal na Kasuratan nin daing kasala-sala para sa sato ngunyan.

Kaya, mababasa ta an Tataramon nin Diyos na may bilog na pagtitiwala asin kumpiyansa sa pagigin eksakto kaiyan. Siyasaton niyato ngunyan kun ano an manunudan ta manungod sa Diyos paagi sa saiyang mga propeta.