“Kun maghagad kamo nin ano man sa Ama, itatao niya iyan sa saindo sa ngaran ko.”—Juan 16:23.

Malinaw na ipinapahiling kan mga tataramon ni Jesus na gusto ni Jehova na mamibi kita sa saiya, bakong paagi sa mga imahen, santo, anghel, o nagadan na mga apuon, kundi sa ngaran ni Jesu-Cristo. Pag namimibi kita sa Diyos sa ngaran ni Jesus, ipinapahiling niyato na minimidbid ta an mahalagang marhay na papel ni Jesus. “Mayo nin makakaduman sa Ama kun bakong paagi sa sako,” an sabi ni Jesus.—Juan 14:6.

“Sabihon nindo sa saiya an laog kan saindong puso.”—Salmo 62:8, NWT.

Pag namimibi kita ki Jehova, magtaram kita arog kan pakikipag-ulay ta sa sarong mamumuton na ama. Imbes na makipag-ulay sa paagi na nagbabasa nin libro o nagsasambit nin tinuom na mga tataramon, dapat magalang kitang makipag-ulay sa saiya asin hali sa puso.

“Ano man na bagay na hagadon niyato kauyon kan saiyang kabutan, dinadangog niya kita.”—1 Juan 5:14.

Sa Bibliya, sinasabi sa sato kan Diyos na Jehova kun ano an gigibuhon niya para sa sato asin kun ano an gusto niya na gibuhon niyato para sa saiya. Tanganing akuon nin Diyos an satong mga pamibi, kaipuhan tang mamibi “kauyon kan saiyang kabutan.” Para magibo iyan, kaipuhan tang mag-adal nin Bibliya tanganing mamidbid ta siyang marhay. Kun gigibuhon ta iyan, an satong mga pamibi makakapaugma sa saiya.

Ipamibi an Saimong mga Pangangaipo. Puwede tang ipamibi sa Diyos an satong pangangaipo sa aroaldaw—kakanon, bado, asin istaran. Puwede man kitang mamibi na tawan nin kadunungan na makagibo nin tamang mga desisyon asin nin kusog na matagalan an mga pagbalo. Puwede kitang mamibi na tawan nin pagtubod, mamibi para sa kapatawadan, asin tabang nin Diyos.—Lucas 11:3, 4, 13; Santiago 1:5, 17.

Ipamibi an Iba. Nauugma an mamumuton na mga magurang pag an saindang mga aki namumutan an lambang saro. Gusto man ni Jehova na an saiyang mga aki digdi sa daga namumutan an lambang saro. Angay na ipamibi niyato an satong agom, mga aki, kapamilya, saka mga amigo. “Ipamibi an lambang saro,” an isinurat kan disipulong si Santiago.—Santiago 5:16.

Magpasalamat. Sinasabi kan Bibliya manungod sa satong Kaglalang: ‘Naggigibo siya nin karahayan, na tinatawan kamo nin uran hali sa langit saka nin abundang ani, asin tinatawan kamo nin igong kakanon saka pinapano nin kaugmahan an saindong mga puso.’ (Gibo 14:17) Pag iniisip ta an gabos na ginibo nin Diyos para sa sato, mapapahiro kita na magpasalamat sa saiya sa pamibi. Siyempre, kaipuhan man niyatong ipahiling an satong pasasalamat sa Diyos paagi kan satong pamumuhay.—Colosas 3:15.

Kun minsan, tibaad pangluyahan kita nin buot huling dai tulos sinisimbag an satong sinserong mga pamibi. Buot sabihon daw kaiyan dai interesado sa sato an Diyos? Dai man. Pag-isipan an minasunod na mga eksperyensiya na nagpapahiling na tibaad an kaipuhan ta sana padagos na mamibi.

Si Steve, na sinambit sa inot na artikulo, nagsabi, “Kun dai ako padagos na namibi, haloy na kutana akong suminuko sa buhay.” Ano an nakapabago sa sabuot niya? Nagpuon siya na mag-adal nin Bibliya asin nanudan niya na kaipuhan na mamibi asin magin matiyaga sa pagpamibi. “Namibi ako sa Diyos para pasalamatan siya sa gabos na mamumuton na pagtabang sa sako kan namumutan kong mga amigo,” an sabi ni Steve. “Mas maugmahon na ako ngunyan.”

Kumusta si Jenny, na pagmati niya bako siyang angay para dangugon nin Diyos? Sabi niya, “Pag namamatian ko na dai nanggad ako nin halaga, nakikimahirak ako sa Diyos na tabangan niya ako na masabutan kun ta’no ta arog kaiyan an namamatian ko.” Paano iyan nakatabang saiya? “An pakikipag-ulay sa Diyos nakatabang sa sako na mansayon an sakong sadiri arog kan pagmansay niya sa sako, na dai niya ako kinokondenar, minsan ngani kinokondenar ako kan sakong puso. Natabangan man ako kaiyan na dai sumuko kundi magpadagos sana.” An resulta? “Nakatabang sako an pamibi na mahiling si Jehova bilang sarong tunay, mamumuton, mapagmakulog na Diyos, Ama, asin Amigo, na pirming yaon para sako asin tinatabangan ako basta hinihinguwa kong gibuhon an gusto niya.”

Pag-isipan man an eksperyensiya ni Isabel. Kan magbados siya, sinabi saiya kan mga doktor na an saiyang aki mamumundag na may grabeng diperensiya sa pisikal. Grabe an kamunduan niya. May mga nagsabi pa ngani saiya na magpalaglag. “Garo na ako magadan huli sa grabeng kamunduan.” Ano an ginibo niya? “Nagparapamibi ako sa Diyos para sa tabang,” an sabi niya. Pag-abot nin panahon, nangaki siya nin sarong aking lalaki, na si Gerard, asin igwa ini nin diperensiya sa pisikal. Namatian daw ni Isabel na sinimbag nin Diyos an saiyang mga pamibi? Iyo nanggad! Sa paanong paagi? “Pag pighihiling ko an aki ko, na 14 anyos na ngunyan, asin maugmahon sa ibong kan saiyang diperensiya sa pisikal,” an sabi ni Isabel, “napag-isip-isip ko na siya an pinakamarahay na simbag sa mga pamibi ko, an pinakadakulang bendisyon na itinao sa sako kan Diyos na Jehova.”

An siring na udok sa pusong mga kapahayagan makakatabang sa sato na isaisip an mga tataramon kan salmista: ‘An minamawot nin mga mapakumbaba hinihinanyog mo, O Jehova. Ika an [nagpaparigon] kan saindang puso asin hinihimati mo.’ (Salmo 10:17) Magayunon nanggad na mga dahilan para padagos na mamibi!

Mababasa sa Bibliya an dakul na pamibi ni Jesus. Siguradong an pinakabantog iyo idtong itinukdo niya sa saiyang mga disipulo. Ano an manunudan ta diyan?