An Bibliya haluyon nang libro. Gurano na kahaloy iyan? Pinunan an pagsurat kaiyan sa Middle East mga 3,500 na taon na an nakaagi. Kapanahunan iyan kan makapangyarihan na dinastiyang Shang kan China, mga sampulong siglo bago magpuon an Budismo sa India.—Hilingon an kahon na “ Halipot na Impormasyon Manungod sa Bibliya.”

Nakakatabang asin kapaki-pakinabang na giya sa mga tawo an sarong libro kun iyan madaling masabutan asin angay sa sitwasyon ninda. Arog nanggad kaiyan an Bibliya. Nagtatao iyan nin nakakakontentong simbag sa pinakamahahalagang kahaputan sa buhay nin tawo.

Halimbawa, naihapot mo na daw, ‘Ta’no ta yaon kita digdi?’ Rinibong taon na iyan na pinag-iisipan nin mga tawo, asin sagkod ngunyan dai pa ninda nakukua an simbag. Pero an simbag yaon sa inot na duwang kapitulo kan inot na libro sa Bibliya, an Genesis. Isinasaysay kaiyan an mga pangyayari sa ‘kainot-inuti’—binilyon na taon na an nakaagi—kan maglataw an pisikal na uniberso, kaiba na an mga galaksiya, mga bituon, asin an daga. (Genesis 1:1) Dangan isinasaysay kaiyan nin pasunod-sunod kun paano nagin posible an buhay sa planetang daga, kun paano naglataw an manlain-lain na nabubuhay, asin kun paano naglataw an tawo—pati na an katuyuhan kan gabos na iyan.

Nagtatao an Bibliya nin praktikal na giya na makakatabang sa sato na maresolberan an mga problema sa aroaldaw. Madaling masabutan an giyang iyan huli sa duwang dahilan.

Inot, an mensahe kaiyan malinaw, direkta sa punto, asin interesante. Imbes na dakul na tataramon na dipisil masabutan o misteryoso, naggagamit iyan nin aktuwal na mga bagay na madaling masabutan. An dipisil na mga ideya ipinapahayag paagi sa mga tataramon na ginagamit niyato sa aroaldaw.

Halimbawa, nagtukdo si Jesus gamit an dakul na simpleng ilustrasyon base sa pang-aroaldaw na pamumuhay para maabot an puso nin tawo. An dakul sa mga ini yaon sa midbid na Sermon sa Bukid na nakarekord sa kapitulo 5 sagkod 7 kan libro nin Mateo. Sigun sa sarong komentarista, iyan “sarong praktikal na diskurso” na an katuyuhan iyo na “dai panuon an satong isip nin mga ideya, kundi giyahan kita tanganing mapakarhay an satong paggawi.” Matatapos mo iyan na basahon nin mga 15 sagkod 20 minutos, alagad  mangalas ka huling baga man simplehon an mga tataramon ni Jesus pero mapuwersahon iyan.

An saro pang dahilan kaya madaling masabutan an Bibliya iyo an laog kaiyan. Bako iyan libro nin mga alamat o mga pabula. Imbes, arog kan sinasabi kan The World Book Encyclopedia, an kadaklan na laog kaiyan “manungod sa midbid asin ordinaryong mga tawo” asin an saindang “inagihan na mga kadipisilan, mga paglaom, mga problemang nagkawsa nin pagkadesperado, asin mga kapangganahan.” Madali tang masabutan an mga salaysay na ini manungod sa tunay na mga tawo asin mga pangyayari saka an mahahalagang leksiyon na yaon diyan.—Roma 15:4.

Para masabutan an sarong libro, dapat na aram mo an lengguwahe kaiyan. Sa ngunyan, posibleng marhay na may Bibliya sa lengguwaheng nasasabutan mo, sain ka man nakaistar o ano man an nasyonalidad mo. Hilingon ta kun paano nagin posible an makangangalas na bagay na ini.

Pagtradusir. An orihinal na mga lengguwaheng ginamit sa pagsurat kan Bibliya iyo an Hebreo, Aramaiko, asin Griego. Huli kaini, limitado sana an makakabasa kaiyan. Para magkaigwa man nin Bibliya sa ibang mga lengguwahe, naghihinguwang marhay an sinserong mga paratradusir. Salamat sa saindang pagpapagal huli ta ngunyan naitradusir na an Bibliya, nin bilog o kabtang sana, sa mga 2,700 na lengguwahe. Buot sabihon, labing 90 porsiyento kan gabos na tawo sa kinaban an makakabasa kan Bibliya, dawa porsiyon sana kaiyan, sa lengguwaheng kinagimatan ninda.

Pagpublikar. An orihinal na Bibliya isinurat sa madaling maraot na mga materyales, arog nin anit asin papiro. Para mapreserbar an mensahe, kaipuhan iyan na maingat na kopyahon nin pauruutro gamit an kamot. Mamahalon an mga kopyang iyan kaya dikit sanang tawo an makakabakal kaiyan. Pero kan makaimbento si Gutenberg nin imprentahan labing 550 taon na an nakaagi, huminiwas na marhay an sirkulasyon kan Bibliya. Sigun sa sarong pagkarkulo, labi nang limang bilyon na kopya kan Bibliya, bilog man o kabtang sana, an naidistribwir na.

Mayong ibang libro na pangrelihiyon an makakapantay sa Bibliya sa mga aspektong iyan. Malinaw nanggad na an Bibliya sarong libro na dapat masabutan. Pero, tibaad masakitan kang sabuton iyan. Alagad makakakua ka nin tabang. Sain? Anong pakinabang an maitatao kaiyan sa saimo? Aramon iyan sa sunod na artikulo.