Isinisimbolo ninda an mga hukbo sa langit na may kabtang kaidto sa paglaglag sa Jerusalem asin magkakaigwa man nin kabtang sa Armagedon sa paglaglag sa maraot na sistema ni Satanas. Taano ta kaipuhan an pagbabagong ini sa satong dating pakasabot?

Bago an 607 B.C.E., tinawan si Ezequiel nin sarong bisyon kan mga mangyayari sa apostatang Jerusalem bago iyan malaglag. Pagkatapos niyang mahiling sa bisyon an mararaot na bagay na ginigibo sa siyudad, nakahiling siya nin anom na lalaki na may mga armas na pangrunot. Nakahiling man siya nin sarong lalaki na kaibanan ninda na “nagugubingan nin lino” asin may “tintero nin sekretaryo.” (Ezeq. 8:6-12; 9:2, 3, NW) Sinabi sa lalaking ini: ‘Umagi ka sa tahaw kan banwaan asin bugtakan mo nin sarong tanda an angog kan mga tawong nag-aaragagha asin [nag-aaragrangay] huli sa gabos na mga karumputan na ginigibo sa tahaw kaiyan.’ Dangan, sinabihan an mga lalaking may mga armas na pangrunot na garadanon an gabos na nasa siyudad na mayo kan tanda. (Ezeq. 9:4-7) Ano an itinutukdo sa sato kan bisyon na ini, asin siisay an lalaking may tintero nin sekretaryo?

Itinao an hulang ini kan 612 B.C.E., asin nagkaigwa nin inot na kautuban pakalihis sana nin limang taon—kan laglagon kan hukbo nin Babilonya an Jerusalem. Dawa paganong mga Babilonyo an tinugutan na manglaglag, nagserbi sindang mga parakastigo ni Jehova. (Jer. 25:9, 15-18) Iyan huli ta ginamit sinda ni Jehova para padusahan an saiyang apostatang banwaan. Pero, dai magigin daing pakundangan an paglaglag. Mga maraot sana an lalaglagon; dai madadamay an mga matanos. Mamumuton na naggibo si Jehova nin areglo tanganing mailigtas an mga Judiong dai uyon sa mararaot na bagay na ginigibo sa siyudad.

Dai kabali si Ezequiel sa pagbugtak kan tanda o sa mismong paglaglag. Imbes, sa mga anghel ipinagbuot an pagsagibo kan paghukom. Kaya, paagi kan hulang ini, garo baga ipinahiling sa sato an nangyayari sa mismong kalangitan. Isinugo ni Jehova an saiyang mga anghel bako sana para isagibo an paglaglag sa mga maraot kundi para isuway man an mga matanos tanganing iligtas. *

Ipinapaliwanag niyato kaidto na sa kautuban kan bisyon na ini sa presenteng panahon, an lalaking may tintero nin sekretaryo nagrerepresentar sa linahidan na mga natatada. Iniisip niyato kaidto na an mga nag-aako kan mensaheng ihinuhulit ta nabubugtakan na kan tanda para sa kaligtasan. Pero, sa nakaagi pa sanang mga taon, nagin malinaw na kaipuhan niyatong baguhon an paliwanag na ini. Uyon sa Mateo 25:31-33, si Jesus an naghuhukom sa mga tawo. Gigibuhon niya an pangultimong paghukom sa panahon kan dakulang kahurasaan, na diyan isusuway niya an makakaligtas na mga arog-karnero sa mga lalaglagon na arog-kanding.

Kaya, basado sa bagong pakasabot na ini, ano an manunudan ta sa bisyon ni Ezequiel? Igwa nin kisiyera limang leksiyon:

1.  Sa mga panahon bago laglagon an Jerusalem, arog kan ginibo kaidto ni Isaias, nagserbing bantay si Ezequiel siring man si Jeremias. Sa ngunyan, ginagamit ni Jehova an sarong sadit na grupo nin mga linahidan tanganing pakakanon an saiyang mga lingkod asin patanidan an iba pa bago magpuon an dakulang kahurasaan. An totoo, an gabos na lingkod ni Cristo sa harong igwa nin kabtang sa pagpaabot kan patanid na ini.—Mat. 24:45-47.

2.  Dai kabali si Ezequiel sa aktuwal na pagbugtak kan tanda para sa mga makakaligtas; siring man an mga lingkod nin Diyos ngunyan. Ipinapaabot sana ninda an mensahe ni Jehova na kabtang kan saindang  paghuhulit, na isinasagibo sa tabang kan mga anghel.—Kap. 14:6.

3.  Kan panahon ni Ezequiel, mayo nin nag-ako nin literal na tanda sa angog. Arog man kaiyan sa ngunyan. Ano an kaipuhan na gibuhon nin mga tawo para magkaigwa kan simbolikong tanda para sa kaligtasan? Kaipuhan nindang positibong maghimati sa isinasagibong paghuhulit, isulot an Kristiyanong personalidad, idusay an sadiri ki Jehova, asin maimbod na suportaran an mga tugang ni Cristo. (Mat. 25:35-40) An gabos na nagsasagibo kan mga bagay na ini mag-aako kan tanda para sa kaligtasan sa panahon kan nagdadangadang na dakulang kahurasaan.

4.  Sa kautuban sa presenteng panahon, an lalaking may tintero nin sekretaryo nagrerepresentar ki Jesu-Cristo, na iyo an mabugtak kan tanda duman sa mga makakaligtas. Aakuon kan dakulang kadaklan an saindang tanda pag nahukuman sinda bilang karnero sa panahon kan dakulang kahurasaan. Huli kaini, magkakaoportunidad sindang mabuhay sagkod lamang sa daga.—Mat. 25:34, 46. *

5.  Sa kautuban sa presenteng panahon, an anom na lalaking may mga armas na pangrunot nagrerepresentar sa mga hukbo sa langit na pinanginginutan mismo ni Jesus. Madali na nindang laglagon an mga nasyon asin tapuson an gabos na karatan.—Ezeq. 9:2, 6, 7; Kap. 19:11-21.

Mapapakusog kan mahalagang mga leksiyon na ini an satong pagtitiwala na dai madadamay an mga matanos pag linaglag ni Jehova an mga maraot. (2 Ped. 2:9; 3:9) Ipinapagirumdom man kaini sa sato an kahalagahan kan isinasagibong paghuhulit sa satong panahon. Kaipuhan na mapatanidan an gabos bago umabot an katapusan!—Mat. 24:14.