SINASABI sa istorya kan Bibliya na mababasa sa Genesis 22:6 na tanganing makapagdulot nin atang sa sarong harayong lugar, ‘kinua ni Abraham an [kahoy] sa pag-atang, asin ipinapasan idto ki Isaac na aki niya. Asin binitbit niya an kalayo saka an kutsilyo, asin magkaiba sindang naglakaw.’

Mayong sinasabi an Bibliya kun paano nakakagibo nin kalayo kaidtong suanoy na panahon. Sarong komentarista an naniniwala na an kalayo sa istoryang iyan “haros imposibleng mapagdanay na naglalaad huli sa lawig kan binaklay” ni Abraham asin Isaac. Kaya, sinabi niya na an kalayong sinambit diyan tibaad nanunungod sa sarong kasangkapan na ginagamit tanganing makagibo nin kalayo.

Pero, sinasabi man kan iba na bakong madali an makagibo nin kalayo kaidtong suanoy na panahon. Mas gusto pa kan mga tawo kaidto na, sagkod na posible, maghagad na sana nin bága sa pagtaraid ninda, imbes na sinda mismo an maggibo nin kalayo. Kaya, naniniwala an nagkapirang iskolar na an dara ni Abraham sarong lalagan—tibaad sarong kuron na nakabitin sa kadena—na igwa nin bága na kinua sa kalayong ginamit sa nakaaging banggi. (Isa. 30:14) Kun may darang bága sa arog kaiyan na paagi, madali sanang makakagibo nin kalayo ano man na oras durante kan pagbaklay.