1. Paano nanindugan para ki Jehova an tulong Saksi ni Jehova na sinambit sa parapong ini?

 PAG-ISIPAN an minasunod na tulong senaryo na kalabot an mga Saksi ni Jehova. (1) Sarong aldaw mantang nasa eskuwelahan an sarong aking babayi, sinabi kan maestra sa gabos na estudyante sa klase na makikabtang sa pagselebrar nin sarong kapiyestahan. Aram kan aking babayi na dai inuuyunan nin Diyos an kapiyestahan na ini, kaya magalang siyang nagsayumang mag-iba. (2) Sarong masusupgon na hoben na lalaki an naghaharong-harong. Nagirumduman niyang nakaistar palan sa sunod na harong an kaeskuwela niya na pigngisihan kaidto an mga Saksi ni Jehova. Pero dinumanan man giraray kan hoben an harong asin nagtuktok sa pinto. (3) Sarong lalaki an mahigos na nagtatrabaho tanganing sustentuhan an pamilya niya, dangan sarong aldaw sinabihan siya kan amo niya na gumibo nin sarong bagay na bakong onesto o ilegal. Dawa puwede siyang masisante, ipinaliwanag kan lalaki na dapat siyang magin onesto asin magsunod sa ley huling kahagadan iyan nin Diyos sa saiyang mga lingkod.—Roma 13:1-4; Heb. 13:18.

2. Anong mga hapot an pag-uulayan niyato, asin taano?

² Anong kuwalidad an nahiling mo sa saindang tulo? Tibaad nakahiling ka nin nagkapira, arog kan kusog nin buot asin pagigin onesto. Pero may nangingibabaw na kuwalidad na lalo nang mahalaga—an integridad. Nagpahiling nin kaimbudan ki Jehova an lambang saro sa sainda. An lambang saro nagsayumang ikompromiso an mga pamantayan nin Diyos. Pinahiro sinda nin integridad na siring an gibuhon. Siguradong ugmahon si Jehova sa lambang saro sa sainda huli sa ipinahiling nindang integridad. Gusto man niyatong paugmahon an satong Ama sa langit. Kaya pag-ulayan ta an mga hapot na ini: Ano an integridad? Taano ta kaipuhan niyato an integridad? Asin paano ta mapapakusog an satong determinasyon na magdanay na may integridad sa masakit na mga panahon na ini?

3. (a) Ano an integridad? (b) Magtao nin mga halimbawa na nagpapahiling na mahalaga sa sato an pagigin kumpleto, pagigin mayong depekto, o bilog.

³ Kun iaaplikar sa sato na mga lingkod nin Diyos, an integridad iyo an satong bilog na pusong pagkamuot asin dai kayang rauton na debosyon ki Jehova bilang Persona, kaya iniinot niyato an saiyang kabutan sa gabos tang desisyon. Pag-isipan an pirang impormasyon kun paano ginamit sa Bibliya an terminong iyan. An sarong simpleng kahulugan kan termino sa Bibliya para sa “integridad” iyo ini: kumpleto, mayong depekto, o bilog. Halimbawa, an mga Israelita nag-aatang nin mga hayop ki Jehova, asin sinabi sa Katugunan na an mga hayop dapat na mayong depekto o kaninan. b (Lev. 22:21, 22) An banwaan nin Diyos dai puwedeng mag-atang nin hayop na kulang nin bitis, talinga, o mata; dai man ninda puwedeng iatang an may hilang. Mahalaga ki Jehova na an hayop kumpleto, mayong depekto, o bilog. (Mal. 1:6-9) Masasabutan niyato kun taano ta mahalaga ki Jehova an pagigin mayong depekto o kumpleto. Pag may binabakal kita, iyan man prutas, libro, o kasangkapan, dai ta pipilion idtong kadakul labot o kulang nin mga parte. An gusto niyato idtong kumpleto, mayong depekto, o bilog. Arog man kaiyan an gusto ni Jehova kun dapit sa pagkamuot asin kaimbudan niyato sa saiya. Dapat na iyan kumpleto, mayong depekto, o bilog.

4. (a) Taano ta puwedeng magkaigwa nin integridad an sarong tawo na bakong perpekto? (b) Sigun sa Salmo 103:12-14, ano an hinahagad sa sato ni Jehova?

⁴ Iisipon daw niyato na dapat perpekto kita para magkaigwa nin integridad? Kun hihilingon kaya, tibaad pagmati ta may depekto kita o kadakul tang sala. Pag-isipan an duwang dahilan kaya dai ta dapat isipon iyan. Inot, si Jehova dai nagpopokus sa satong mga sala. An saiyang Tataramon nagsasabi: “O Jah, kun an mga sala an saimong binabantayan, siisay, O Jehova, an makakatindog sa saimong atubangan?” (Sal. 130:3, NW) Aram niya na bako kitang perpekto, na kita makasalan, pero bulaos niya kitang pinapatawad. (Sal. 86:5) Ikaduwa, aram ni Jehova an satong mga limitasyon, asin dai niya hinahagad sa sato an labi sa kaya niyatong gibuhon. (Basahon an Salmo 103:12-14.) Kun siring, sa anong paagi kita puwedeng magin kumpleto, mayong depekto, o bilog sa saiyang paghiling?

5. Para sa mga lingkod ni Jehova, taano ta an pagkamuot an pinakakaipuhan tanganing magkaigwa nin integridad?

⁵ Para sa mga lingkod ni Jehova, an pagkamuot an pinakakaipuhan tanganing magkaigwa nin integridad. An pagkamuot niyato sa Diyos asin an satong maimbod na debosyon sa saiya bilang satong Ama sa langit, dapat na magdanay na kumpleto, mayong depekto, o bilog. Kun an satong pagkamuot nagdadanay na arog kaiyan maski pag binabalo kita, may integridad kita. (1 Cron. 28:9; Mat. 22:37) Pag-isipan giraray an tulong Saksi na sinambit sa kapinunan. Taano ta arog kaidto an ginibo ninda? Habo daw kan aking babayi na magin maugma sa eskuwelahan, o gusto daw kan hoben na lalaki na ipasupog siya kan kagharong, o gusto daw kan pamilyadong lalaki na mawaran nin trabaho? Dai siyempre. Imbes, aram ninda na si Jehova igwa nin matanos na mga pamantayan, asin an saindang isip nakapokus sa kun ano an nakakapaugma sa saindang Ama sa langit. An pagkamuot ninda ki Jehova nakapahiro sa sainda na siya nguna an isipon pag naggigibo nin mga desisyon. Sa siring, ipinahiling ninda sa gibo an saindang integridad.

6. (a) Taano ta kaipuhan mo an integridad? (b) Taano ta dai nakapahiling nin integridad si Adan asin Eva?

⁶ An lambang saro sa sato kaipuhan na igwa nin integridad. Taano ta mahalagang marhay iyan? Kaipuhan mo an integridad huling kinuwestiyon ni Satanas si Jehova, asin kinuwestiyon ka man niya. Kaidto sa hardin nin Eden,  ginibo kan rebelyosong anghel na iyan an saiyang sadiri na Satanas, o “Paratumang.” Pinurbaran niyang rauton an marahay na pangaran ni Jehova paagi sa pagpalataw na an Diyos daa maraot, makasadiri, asin bakong onestong Tagapamahala. Nakakamundo, kuminampi ki Satanas si Adan asin Eva, asin nagrebelde ki Jehova. (Gen. 3:1-6) Kadakul ninda kaidtong oportunidad sa Eden tanganing pakusugon an pagkamuot ninda ki Jehova. Pero kan panahon kan pagkuwestiyon ni Satanas, an saindang pagkamuot may depekto, bakong kumpleto o bilog. May saro pang hapot na kaipuhan masimbag: Igwa daw nin mga tawong magdadanay na maimbod sa Diyos na Jehova huli sa pagkamuot sa Saiya? Sa ibang pagtaram, kaya daw nin mga tawo na magpahiling nin integridad? Ibinangon an hapot na iyan kan panahon ni Job.

7. Arog kan sinasabi sa Job 1:8-11, ano an paghiling ni Jehova asin ni Satanas sa integridad ni Job?

⁷ Nabuhay si Job kan panahon na an mga Israelita nasa Ehipto. Pambihira an saiyang integridad. Arog niyato, bako man siyang perpekto. Nakagibo siya nin mga sala. Alagad, namutan ni Jehova si Job huli sa saiyang integridad. Posibleng marhay na bago pa kaiyan, tinuya-tuya na ni Satanas si Jehova mapadapit sa integridad nin tawo. Kaya itinukdo ni Jehova ki Satanas si Job. Ipinahiling kan pamumuhay ni Job na putikon nanggad si Satanas! Hinagad ni Satanas na baluon an integridad ni Job. May tiwala si Jehova sa amigo niyang si Job kaya tinugutan Niya si Satanas na baluon ini.—Basahon an Job 1:8-11.

8. Paano inatake ni Satanas si Job?

⁸ Maringis asin paragadan si Satanas. Inatake niya an mga pagsadiri ni Job—an kayamanan kaini, mga uripon, asin an marahay na reputasyon kaini sa saindang lugar. Dangan an pamilya na man ni Job—ginaradan niya an sampulong padabang aki ni Job. Tapos an hawak na man ni Job—nagkaigwa ini nin makulog na mga pigsa puon payo sagkod bitis. Napurisaw na marhay asin grabe an kamunduan kan agom ni Job; sinabi niya ki  Job na sumuko na, na sumpaon an Diyos dangan magadan. Maski si Job gusto na man na magadan, pero pinagdanay niya pa man giraray an saiyang integridad. Dangan pinurbaran ni Satanas an ibang pamamaagi nin pag-atake. Ginamit niya an tulong amigo ni Job. Binisita ninda si Job sa laog nin pirang aldaw, pero dai ninda siya pigranga. Imbes, daing hirak ninda siyang sinermunan asin pig-anggutan. Sinabi ninda na an Diyos daa an dahilan kan saiyang mga problema asin na an Diyos warang pakiaram sa saiyang integridad. Pinaluwas pa ngani ninda na maraot na tawo si Job kaya tama lang sa saiya an makaturutristeng mga nangyayari sa saiya!—Job 1:13-22; 2:7-11; 15:4, 5; 22:3-6; 25:4-6.

9. Sa ibong nin mga pagbalo, ano an dai ginibo ni Job?

⁹ Ano an nagin reaksiyon ni Job sa gabos na kasakitan na iyan? Bako siyang perpekto. Anggot niyang sinaway an sagin na mga nagraranga sa saiya, asin nakataram siya nin mga bagay na inadmitir niyang dai niya pinag-isipan. Mas idinepensa niya an pagigin matanos niya kisa sa pagigin matanos nin Diyos. (Job 6:3; 13:4, 5; 32:2; 34:5) Dawa arog kaiyan, dai ni Job tinalikdan an Diyos na Jehova maski kan dipisil na marhay an kamugtakan niya. Dai siya naniwala sa mga kaputikan kan bakong tunay na mga amigong idto. Sinabi niya: “Dai mangyayari na ipahayag ko kamong matanos! Sagkod na ako magadan, dai ko tatalikdan an sakong integridad!” (Job 27:5, NW) Mahalagang marhay an sinabi niyang iyan. Dai nagsuko si Job; magigibo ta man iyan.

10. Paano ka kalabot sa isyung pinalataw ni Satanas may koneksiyon ki Job?

¹⁰ Arog man kaiyan an sahot ni Satanas sa lambang saro sa sato. Paano ka kalabot diyan? Garo man sana sinasabi niya na dai mo man talaga namumutan an Diyos na Jehova, na mapundo ka sa paglilingkod sa saiya tanganing mailigtas mo an sadiri mo, asin na dai ka magdadanay na may integridad! (Job 2:4, 5; Kap. 12:10) Ano an namamatian mo sa sahot na iyan? Bako daw na makulugon iyan sa saimo? Minsan siring, pag-isipan ini: May tiwala si Jehova sa saimo kaya tinawan ka niya nin sarong pambihirang oportunidad. Tinutugutan ni Jehova si Satanas na baluon an saimong integridad. Nagtitiwala si Jehova na kaya mong papagdanayon an saimong integridad asin na makakatabang kang patunayan na putikon si Satanas. Asin nanunuga Siya na tatabangan ka niyang magibo iyan. (Heb. 13:6) Dakulang pribilehiyo nanggad na pagtiwalaan kan Soberano kan uniberso! Nahihiling mo kun taano ta mahalagang marhay an integridad? Paagi kaiyan mapapahimutikan niyato an mga kaputikan ni Satanas asin maidedepensa ta an marahay na pangaran kan satong Ama asin masusuportaran ta an paagi niya nin pamamahala. Paano niyato mapapagdanay an mahalagang marhay na kuwalidad na ini?

11. Ano an manunudan ta ki Job?

¹¹ Sa “huring mga aldaw” na ini, lalong pinagrabe ni Satanas an saiyang mga pag-atake. (2 Tim. 3:1) Sa dipisil na mga panahon na ini, paano niyato mapapakusog an satong sadiri tanganing mapagdanay niyato an satong integridad? Sa giraray, dakul kitang manunudan ki Job. Bago pa mag-abot an mga pagbalo sa saiya, haloy nang pinagdadanay ni Job an saiyang integridad ki Jehova. Pag-isipan an tulong manunudan niyato sa saiya kun paano ta mapapakusog an satong sadiri tanganing mapagdanay an satong integridad.

12. (a) Arog kan sinasabi sa Job 26:7, 8, 14, ano an ginibo ni Job tanganing magrarom an saiyang paggalang asin paghanga ki Jehova? (b) Paano niyato papanuon an satong puso nin paggalang asin paghanga sa Diyos?

¹² Pinakusog ni Job an pagkamuot niya ki Jehova paagi sa pagpararom kan saiyang paggalang asin paghanga sa Saiya. Nagtao si Job nin panahon tanganing hurop-hurupon an makangangalas na mga linalang ni Jehova. (Basahon an Job 26:7, 8, 14.) Naghanga siyang marhay kan inisip-isip niya an dapit sa daga, kalangitan, mga panganuron, asin daguldol, pero inako niya  na dikiton sana an aram niya dapit sa gabos na linalang ni Jehova. Pinahalagahan man niyang marhay an mga tataramon ni Jehova. Mapadapit sa mga tataramon nin Diyos, sinabi ni Job: “Rinimpos ko an mga tataramon kan saiyang nguso.” (Job 23:12, An Banal na Biblia) Napahiro si Job kan saiyang paghanga asin paggalang ki Jehova. Namutan niya an saiyang Ama asin gusto niyang paugmahon Siya. Huli kaiyan, lalong nagkusog an determinasyon ni Job na pagdanayon an saiyang integridad. Kaipuhan man niyatong gibuhon an ginibo ni Job. Kumpara sa mga tawo kan panahon ni Job, mas dakul nanggad kitang aram mapadapit sa makangangalas na mga linalang. Asin igwa kita kan kumpletong ipinasabong na Bibliya tanganing tabangan kitang mamidbid kun siisay talaga si Jehova. An gabos niyatong nanunudan makakatabang na mapano an satong puso nin paghanga ki Jehova. Dangan, an satong paghanga asin paggalang ki Jehova magpapahiro sa sato na mamutan siya asin magsunod sa saiya saka urog na pakusugon an satong pagmawot na pagdanayon an satong integridad.—Job 28:28.

13-14. (a) Arog kan sinasabi sa Job 31:1, paano ipinahiling ni Job na talagang masinunod siya? (b) Paano ta maaarog si Job?

¹³ Pinakusog ni Job an saiyang sadiri na pagdanayon an saiyang integridad paagi sa pagkamasinunod. Aram ni Job na tanganing magkaigwa nin integridad, kaipuhan niyang magin masinunod. Sa katunayan, sa kada nagsusunod kita sa Diyos, lalo kitang nagigin determinado na pagdanayon an satong integridad. Pinagmaigutan ni Job na magsunod sa Diyos sa saiyang pang-aroaldaw na buhay. Halimbawa, nagin maingat siya kun dapit sa paggawi niya sa mga bakong kasekso. (Basahon an Job 31:1.) Bilang may agom, aram niya na sala na magtao nin romantikong atensiyon sa siisay man na babayi na bako niyang agom. Ngunyan, nabubuhay kita sa kinaban na bantad sa seksuwal na mga sugot. Arog ni Job, masayuma daw kitang magpahiling nin bakong angay na atensiyon sa siisay man na bako niyatong agom? Masayuma daw kitang maghiling nin ano man na porma nin malaswa o pornograpikong materyal? (Mat. 5:28) Kun hihinguwahon niyato kada aldaw na magpahiling nin  arog kaiyan na pagpupugol sa sadiri, mapapakusog niyato an satong sadiri na mapagdanay an satong integridad.

¹⁴ Sinunod man ni Job si Jehova kun dapit sa pagmansay niya sa materyal na mga bagay. Nahiling ni Job na kun magtitiwala siya sa saiyang mga pagsadiri, makakakomiter siya nin magabat na sala na maninigo sa padusa. (Job 31:24, 25, 28) Nabubuhay kita ngunyan sa materyalistikong marhay na kinaban. Kun magkakaigwa kita nin balanseng pagmansay sa kuwarta asin mga pagsadiri, arog kan isinasadol sa sato kan Bibliya, mapapakusog niyato an satong determinasyon na pagdanayon an satong integridad.—Tal. 30:8, 9; Mat. 6:19-21.

15. (a) An paglaom para sa anong balos an nakatabang ki Job na mapagdanay an saiyang integridad? (b) Taano ta puwede iyan na makatabang sa sato na pirming isaisip an paglaom na iinaalok ni Jehova?

¹⁵ Pinagdanay ni Job an saiyang integridad paagi sa pagpokus sa paglaom na babalusan siya nin Diyos. Nagtutubod siya na mahalaga sa Diyos an saiyang integridad. (Job 31:6) Sa ibong kan mga pagbalo sa saiya, tiwala si Job na babalusan siya ni Jehova pag-abot nin panahon. An pagtitiwalang ini siguradong nakatabang sa saiya na pagdanayon an saiyang integridad. Naugmang marhay si Jehova sa integridad ni Job kaya abunda niya ining binalusan maski bako pa ining perpekto! (Job 42:12-17; Sant. 5:11) Asin mas dakula pang mga balos an makakamtan ni Job pag-abot nin panahon. Makusog daw an paglaom mo na babalusan ni Jehova an saimong integridad? An satong Diyos dai nagbabago. (Mal. 3:6) Kun isasaisip niyato na pinapahalagahan niya an satong integridad, mapagdadanay niyatong buhay sa satong puso an satong paglaom para sa magayunon na puturo.—1 Tes. 5:8, 9.

16. Ano an dapat na magin determinado niyatong gibuhon?

¹⁶ Kaya, magin determinado nanggad na pagdanayon an saimong integridad! Kun minsan, tibaad pagmati mo solo ka lang na naggigibo kaiyan, pero dai ka nuarin man magsosolo. Magigin kabilang ka sa minilyon na maimbod na mga tawo sa bilog na kinaban na pinagdadanay an saindang integridad. Makakabilang ka man sa maimbod na mga lingkod kaidto na pinagdanay an saindang integridad, dawa sa atubang nin huma nin kagadanan. (Heb. 11:36-38; 12:1) Lugod na gabos kita magin determinado na mamuhay sigun sa sinabi ni Job: “Dai ko tatalikdan an sakong integridad!” Asin lugod na an satong integridad magtao nin kamurawayan ki Jehova sagkod lamang!