Mantang naglalakop an gibuhon na paghuhulit, mas nagdadakula man an pangangaipo sa mga literatura. An mga tugang sa Bethel sa Brooklyn nagpoprodusir nin mga magasin, pero nagdedepende pa man giraray sinda sa mga kompanya para makagibo nin hardcover na mga libro. Pagkatapos na magkaigwa nin kakulangan nin mga libro sa laog nin mga bulan na nakakaapektar na sa gibuhon na paghuhulit, hinapot ni Brother Rutherford si Brother Robert Martin, an factory manager, kun sa hiling kaini posibleng makaprodusir sinda nin mga libro.

“Sarong pambihirang ideya idto,” an sabi ni Brother Martin, “dahil an buot sabihon mabukas kami nin enterong bagong factory kun sain gigibuhon an pag-typeset, pag-electroplate, pag-imprenta, saka pag-bind.” Nag-arkila an mga brother nin building sa 18 Concord Street sa Brooklyn asin nagbakal nin kinakaipuhan na mga equipment.

May mga dai naugma sa pagbabagong ini. An presidente kan sarong kompanya na iyo kaidto an nagpoprodusir kan samong mga libro nagbisita sa bagong pasilidad. Sinabi niya: “Primera klase an imprentahan nindo, pero mayo ni saro saindo an tataong maggamit ka’yan. Pakalihis nin anom na bulan magkakararaot na nindo ’yan gabos.”

“Garo lohikal man idto,” an sabi ni Brother Martin, “pero dai niya naisip an Kagurangnan, na pirmi kaming tinatabangan.” Tama si Brother Martin. Dai nahaloy, nagpoprodusir na an bagong bindery nin 2,000 na libro kada aldaw.

Apuwera sa pag-imprenta kan nagkapira sa mga libro ninda, pinunan man kan mga lingkod ni Jehova na maggamit nin sarong bagong pamamaagi nin pagpalakop kan maugmang bareta—an pagbrodkast sa radyo. Kan Domingong hapon, Pebrero 26, 1922, nagpahayag si Brother Rutherford sa  radyo sa inot na pagkakataon. Itinao niya an pahayag na “An Minilyon na Nabubuhay Ngunyan Dai Na Nuarin Man Magagadan” sa istasyon nin radyo na KOG sa Los Angeles, California, U.S.A.

Kinakarkulong 25,000 an nakadangog kan programa. An nagkapira sa sainda nagpadara nin surat nin pasasalamat para sa brodkast. An saro sa mga surat na ini hali ki Willard Ashford, na residente kan Santa Ana, California. Kinomendaran niya si Brother Rutherford sa pahayag kaining “nakakalibang saka interesante.” Sinabi niya pa: “Tulo an may hilang sa harong mi kaya imposible para sa siisay man samo na madangog ka kun bako sa paaging ini, maski pa kun sa sunod na kanto ka lang nagpahayag.”

Nagkaigwa pa nin mga brodkast sa suminurunod na semana. Sa katapusan kan taon, kinarkulo kan The Watch Tower na “kisiyera 300,000 katawo an nakadangog kan mensahe” paagi sa radyo.

Napakusog an Mga Estudyante sa Bibliya kan mga surat asin komentong iyan, kaya nagdesisyon sinda na magkaigwa nin istasyon nin radyo sa sarong propyedad sa Staten Island, harani sa Bethel sa Brooklyn. Sa suminurunod na taon, ginamit kan Mga Estudyante sa Bibliya an istasyon na ini, an WBBR, tanganing ipalakop an mensahe kan Kahadian sa dakul na tawo asin sa dakul na lugar.

Ipinaisi sa Hunyo 15, 1922, na isyu kan The Watch Tower na magkakaigwa nin dakulang kumbensiyon sa Cedar Point, Ohio, puon Setyembre 5 sagkod 13, 1922. Excited na marhay an Mga Estudyante sa Bibliya kan mag-arabot sinda sa Cedar Point.

Sa inot na pahayag ni Brother Rutherford, sinabi niya sa mga nagdadangog: “Napag-isip-isip ko, nin may lubos na kumpiyansa, na an Kagurangnan . . . bebendisyunan an kumbensiyon na ini asin masagibo nin patotoo na dai pa lamang nangyari digdi sa daga.” Pauruutrong dinagka kan mga ispiker sa kumbensiyon na iyan an mga tugang na makikabtang sa gibuhon na paghuhulit.

Dangan kan Biyernes, Setyembre 8, mga 8,000 katawo an nagrilinya palaog sa awditoryum, asin gustong-gusto na nindang madangog an pahayag ni Brother Rutherford. Inaasahan ninda na ipapaliwanag niya an kahulugan kan “ADV,” na nakaimprenta sa imbitasyon ninda. Pagkatukaw ninda, siguradong narisa kan iba sainda an dakulang  banner na nakarolyo sa itaas kan plataporma. Si Arthur Claus, na nagbiyahe pasiring sa kumbensiyon haling Tulsa, Oklahoma, U.S.A., nakakua nin tukawan na diyan malinaw niyang madadangog an programa. Masakiton makakua nin arog kaiyan na puwesto ta kaidto mayo pang mikropono o loudspeaker.

Tanganing masigurado na mayong makakadisturbo sa pahayag, ipinaisi kan tsirman na an mga mahuhuri dai na papalaugon sa awditoryum pag nagpapahayag na si Brother Rutherford. Kan 9:30 na nin aga, pinunan ni Brother Rutherford an pahayag paagi sa pagkotar kan mga tataramon ni Jesus na nasa Mateo 4:17: “An kahadian nin langit harani na.” (King James Version) Mantang ipinapaliwanag kun paano madadangog kan mga tawo an manungod sa Kahadian na ini, sinabi niya: “Ihinayag mismo ni Jesus na sa panahon kan saiyang presensiya masagibo siya nin pag-ani nin mga lingkod niya, na durante kaiyan titiripunon niya sa saiya an tunay saka maimbod na mga lingkod niya.”

Si Brother Claus, na nakatukaw sa dakulang awditoryum, nag-istorya: “Pigdadangog mi talagang marhay su lambang tataramon.” Pero bigla na sanang naglain su pagmati niya kaya kinaipuhan niyang maghali sa awditoryum. Mamundong nagluwas si Arthur ta aram niyang dai na siya papalaugon giraray.

Pakalihis nin pirang minuto, nagrahay-rahay na su pagmati niya. Sinabi niya na mantang naglalakaw siya pabalik sa awditoryum, nakadangog siya nin makusog na paralakpakan. Dahil kaiyan, gustuhon niya nang makalaog giraray! Nagdesisyon siya na dapat niyang madangog an natatada pa sa magayunon na pahayag na idto, dawa pa kun kaipuhanon niyang magsakat sa atop. Si Brother Claus, na sarong 23 anyos na hoben na lalaki kan panahon na idto, nakahanap nin paagi na makasakat sa atop. Nakaburukas an darakulang bintana (skylight), asin mantang parani siya sa mga iyan, narisa niya na malinaw niyang nadadangog an pahayag.

 Pero bako lang si Arthur an yaon. An pira sa mga amigo niya yaon man sa atop. An saro sa sainda, si Frank Johnson, naghidali pasiring saiya asin hinapot siya, “Igwa ka diyan nin lanseta?”

“Iyo, igwa,” an sabi ni Arthur.

“Simbag ka sa pamibi mi,” an sabi ni Frank. “Nahiling mo ’yan na dakulang nakarolyong ’yan? Banner ’yan na nakagakod sa mga pakong ini. Magdangog kang marhay sa Judge. a Pag sinabi na niya, ‘asin dapat nindong ipaisi, ipaisi, ipaisi,’ putulon mo na an apat na lubid na ini.”

Kaya si Arthur, mantang kapot an lanseta, naghalat kan senyal pati an mga kairiba niya. Dai nahaloy, nakaabot na si Brother Rutherford sa pinakaimportanteng parte kan pahayag niya. Huli sa makusog na emosyon asin kaigutan, siguradong haros ikurahaw na ni Brother Rutherford: “Magin kamong maimbod asin tunay na mga saksi para sa Kagurangnan. Abante kamo sa pakikilaban sagkod na mapara na an gabos na gira nin Babilonya. Ibalangibog an mensahe sa gabos na lugar. Kaipuhan na maaraman kan kinaban na si Jehova an Diyos asin na si Jesu-Cristo an Hadi nin mga hadi asin Kagurangnan nin mga kagurangnan. Ini an aldaw nin gabos na aldaw. Uya, nagrereynar na an Hadi! Kamo an saiyang mga representante sa pagpaisi. Kun siring ipaisi, ipaisi, ipaisi, an Hadi asin an saiyang Kahadian!”

Inistorya ni Arthur na kan putulon na ninda an mga lubid, idto na gayod su pinakamagayon na pagbiklad nin banner. Kauyon kan mga letrang “ADV,” mababasa sa banner: “Advertise the King and Kingdom.”

An kumbensiyon sa Cedar Point nakatabang sa mga tugang na magpokus sa mahalagang gibuhon na paghuhulit kan Kahadian, asin an mga andam na maghulit maugma na makikabtang diyan. Sarong colporteur (na ngunyan inaapod na payunir) haling Oklahoma, U.S.A., an nagsurat, “An distrito na pighulitan mi yaon sa rehiyon na pigmiminahan nin karbon (coal), asin grabe an pagtios diyan.” Inistorya niya na sa parati pag nadadangog kan mga tawo an mensahe na nasa magasin na The Golden Age, “napapaluha sinda.” Sinabi niya, “Maugma kaming marhay ta nararanga mi sinda.”

Namatian kan mga Estudyante sa Bibliya na ini an pagkaapurado kan mga tataramon ni Jesus na nasa Lucas 10:2: “Dakulon an aanihon, pero dikit an paraani.” Sa pagtatapos kan taon, nagin mas determinado sinda kisa kasuarin man na ipaisi an mensahe kan Kahadian sa gabos na lugar.