1. Anong kaugmahan asin onra an igwa kita?

 DAKULANG kaugmahan asin onra nanggad an magin Saksi ni Jehova! Dara ta an pangaran nin Diyos asin pinapatunayan niyato na mga saksi niya kita paagi sa pakikikabtang sa gibuhon na paghuhulit asin paggibo nin mga disipulo. Nauugma kita pag natatabangan tang magin Kristiyano an saro na “igwang pusong nasa tamang kamugtakan para sa buhay na daing katapusan.” (Gibo 13:48) An namamatian ta arog kan ki Jesus, na “nagin labi-labi an . . . kaugmahan dahil sa banal na espiritu” kan magbaralik an mga disipulo niya hali sa mapangganang kampanya sa paghuhulit.—Luc. 10:1, 17, 21.

2. Paano ta maipapahiling na sineseryoso ta an satong ministeryo?

² Sineseryoso ta an satong ministeryo. Dinagka ni apostol Pablo si Timoteo: “Pirmi mong tawan nin atensiyon an saimong sadiri asin an saimong pagtutukdo.” Sinabi pa ni Pablo: “Sa paggibo mo kaini maililigtas mo an saimong sadiri pati na an mga nagdadangog sa saimo.” (1 Tim. 4:16) Kaya buhay an nakataya. Pirmi tang tinatawan nin atensiyon an satong sadiri dahil mga sakop kita kan Kahadian nin Diyos. Pirmi tang gustong gumawi sa paaging nagtatao nin kaumawan ki Jehova asin kauyon kan maugmang bareta na ihinuhulit ta. (Fil. 1:27) Ipinapahiling niyato na ‘tinatawan ta nin atensiyon an satong pagtutukdo’ paagi sa pag-andam na marhay para sa ministeryo asin paghagad kan bendisyon ni Jehova bago maghulit.

3. Ano an posibleng magin reaksiyon kan mga tawo sa mensahe kan Kahadian? Magtao nin halimbawa.

³ Alagad dawa pag ginigibo ta an satong pinakamakakaya, tibaad dikit sana o mayo nganing mag-ako kan mensahe kan Kahadian sa satong teritoryo. Pag-isipan an eksperyensiya ni Brother Georg Lindal, na naghulit nin solo sa manlain-lain na parte kan Iceland puon 1929 sagkod 1947. Nakapasakamot siya nin manampulong ribong publikasyon; pero, mayo ni sarong nag-ako kan katotoohan.  Isinurat niya: “May mga tawo na garo baga kontra sa katotoohan, pero an kadaklan bako lang talagang interesado.” Dawa kan mag-abot an sinanay sa Gilead na mga misyonero asin magtabang sa gibuhon, siyam na taon pa an naglihis bago may nagkapirang taga Iceland na nagdusay ki Jehova asin nagpabawtismo. b

4. Ano an tibaad mamatian ta pag an mga tawo dai nagdadangog sa maugmang bareta?

⁴ Namumundo kita pag dai nagdadangog an mga tawo. Tibaad mamatian ta an arog kan ki Pablo, na nakamati nin “grabeng kamunduan asin dai nahahaling kulog” dahil an mga Judio sa pangkagabsan nagsayumang akuon si Jesus bilang an ipinanugang Mesiyas. (Roma 9:1-3) Paano kun sa ibong kan udok mong mga paghihinguwa asin mga pamibi para sa tinutukduan mo sa Bibliya, dai pa man giraray siya nag-uuswag asin kaipuhan mo nang ipundo an pag-Bible study saiya? O paano kun mayo ka pa lamang natabangan na mabawtismuhan? Dapat ka daw makonsiyensiya, na tibaad iniisip na dai ni Jehova binebendisyunan an ministeryo mo? Sa artikulong ini, pag-uulayan ta an duwang hapot: (1) Paano masasabing mapanggana an satong ministeryo? (2) Ano an dapat na realistiko tang asahan?

5. Taano ta kun minsan dai nagreresulta sa gusto tang mangyari an mga ginigibo ta para ki Jehova?

⁵ Manungod sa sarong tawo na naggigibo kan kabutan nin Diyos, ini an sabi kan Bibliya: “An gabos na ginigibo niya magigin mapanggana.” (Sal. 1:3) Dawa arog kaiyan, dai buot sabihon na an gabos na ginigibo ta para ki Jehova mangyayari arog kan gusto ta. An buhay nin tawo “pano nin kasakitan” dahil sa pagkabakong perpekto—niyato asin kan iba. (Job 14:1) Apuwera kaiyan, tibaad temporaryong magin mapanggana an mga nagkokontra na ulangon an satong mga paghihinguwa na isagibo an satong ministeryo sa normal na paagi. (1 Cor. 16:9; 1 Tes. 2:18) Sa ano ibinabase ni Jehova an kapangganahan kan satong ministeryo? Pag-isipan an nagkapirang prinsipyo sa Bibliya na makakatabang na masimbag an hapot na ini.

6. Sa ano ibinabase ni Jehova an kapangganahan kan satong ginigibo para saiya?

⁶ Pighihiling ni Jehova an satong mga paghihinguwa asin pakatagal. Para ki Jehova, mapanggana an satong ginigibo para saiya pag ginigibo ta iyan nin may kaigutan asin pagkamuot, dawa kun habong magdangog kan mga tawo. Nagsurat si Pablo: “An Diyos bakong biko para lingawan niya an saindong ginibo asin an pagkamuot na ipinahiling nindo para sa saiyang pangaran paagi sa paglilingkod asin padagos pang paglilingkod sa mga banal.” (Heb. 6:10) Ginigirumdom ni Jehova an satong mga paghihinguwa saka an satong pagkamuot, dawa pa kun dai iyan magkaigwa nin marahay na resulta. Kaya, puwede man magin totoo sa saimo an sinabi ni Pablo sa mga taga Corinto: “Bakong sayang an saindong pagpapagal may koneksiyon sa Kagurangnan,” dawa kun an resulta kan pagpapagal na iyan bako an gusto mo.—1 Cor. 15:58.

7. Ano an manunudan ta sa kun paano ilinadawan ni apostol Pablo an saiyang ministeryo?

 ⁷ Mahusayon na misyonero si apostol Pablo; sa tabang niya, nagkaigwa nin bagong mga kongregasyon sa dakul na siyudad. Dawa arog kaiyan, kan mamatian niyang kaipuhan niyang idepensa an saiyang mga kuwalipikasyon bilang ministro ni Cristo, dai niya idinuon kun gurano kadakul an natabangan niyang magin Kristiyano. Imbes, kaidtong pinapahimutikan niya an mga paghihingako kan mga nagsasabing nakakalabi sinda saiya, isinurat ni Pablo: “Mas dakul akong nagibo.” (2 Cor. 11:23) Arog ni Pablo, girumdumon na an mga paghihinguwa asin pakatagal an pinakapinapahalagahan ni Jehova.

8. Ano an dapat tang tandaan manungod sa satong ministeryo?

⁸ An satong ministeryo nakakapaugma ki Jehova. Nagsugo si Jesus nin 70 disipulo para ihulit an mensahe kan Kahadian, asin pagkatapos kan saindang kampanya sa pagpatotoo, “nagbalik [sinda] na may kaugmahan.” Taano ta naugma sinda? Sinabi ninda: “Maski an mga demonyo napapasunod mi paagi sa paggamit mi kan pangaran mo.” Pero, itinanos ni Jesus an kaisipan ninda kan sabihon niya sainda: “Dai kamo mag-ugma huli sana ta napapasunod nindo an mga espiritu, kundi mag-ugma kamo huling nakasurat na sa langit an mga pangaran nindo.” (Luc. 10:17-20) Aram ni Jesus na dai sinda pirming magkakaigwa nin arog kaiyan kapambihirang mga eksperyensiya sa saindang ministeryo. An totoo, dai ta aram kun pira sa mga nagdangog na idto sa mga disipulo an nagin mga Kristiyano. Kaipuhan kan mga disipulo na magin maugma bako lang dahil sa naisasagibo ninda kundi, an mas mahalaga, iyo na dahil ta aram ninda na nauugma si Jehova sa maigot nindang mga paghihinguwa.

9. Sigun sa Galacia 6:7-9, ano an makakamtan ta kun magtatagal kita sa satong ministeryo?

⁹ Kun magtatagal kita sa satong ministeryo, magkakamit kita nin buhay na daing katapusan. Mantang bilog na puso kitang nagsasabwag asin nagpapatalubo kan mga banhi kan katotoohan kan Kahadian, “nagtatanom [man kita] para sa espiritu” paagi sa pagtugot sa banal na espiritu nin Diyos na lubos na humiro sa satong buhay. Basta dai kita “magpundo” o ‘mapagal,’ sinisigurado ni Jehova na mag-aani kita nin buhay na daing katapusan, may matabangan man kitang bagong disipulo na magdusay sa Diyos o mayo.—Basahon an Galacia 6:7-9.

10. Sa ano nakadepende an reaksiyon kan mga tawo sa satong ministeryo?

¹⁰ An reaksiyon kan mga tawo nakadepende panginot na sa kamugtakan kan saindang puso. Ipinaliwanag ni Jesus an katotoohan na ini sa ilustrasyon niya manungod sa parasabwag na nagsabwag nin banhi sa manlain-lain na klase nin daga, asin saro sana diyan an nakaprodusir nin bunga. (Luc. 8:5-8) Sinabi ni Jesus na an manlain-lain na klase nin daga nagrerepresentar sa manlain-lain na klase nin tawo na an puso magkakaiba an reaksiyon sa “tataramon nin Diyos.” (Luc. 8:11-15) Arog kan parasabwag, dai ta kontrolado an magigin bunga kan satong gibuhon, huling nakadepende iyan sa kamugtakan kan puso kan mga hinuhulitan ta. An paninimbagan ta iyo na padagos na magsabwag kan marahay na banhi kan mensahe kan Kahadian. Arog kan pagkasabi ni apostol Pablo, “an lambang tawo maako kan balos niya sigun sa saiyang sadiring gibo,” bako sa resulta kan saiyang gibo.—1 Cor. 3:8.

11. Taano ta mapanggana si Noe bilang “sarong parahulit nin katanusan”? (Hilingon an ritrato sa cover.)

¹¹ An mga inot na saksi ni Jehova naghulit man sa mga tawong habong magdangog. Halimbawa, si Noe nagin “sarong parahulit nin katanusan,” posibleng marhay na sa laog nin mga dekada. (2 Ped. 2:5) Siguradong gusto niyang magdangog an mga tawo sa paghuhulit niya, pero mayong sinabi si Jehova na arog kaiyan an mangyayari. Imbes,  kan iniinstruksiyunan nin Diyos si Noe na gumibo nin arka, sinabi Niya: “Dapat kang lumaog sa arka, ika, an saimong mga aki, an saimong agom, asin an mga agom kan saimong mga aki.” (Gen. 6:18) Saka kun hihilingon ta an sukol saka kapasidad kan arka na ipinagibo saiya nin Diyos, posibleng narealisar ni Noe na kadikit sana an madangog sa paghuhulit niya. (Gen. 6:15) Asin arog kan nangyari, mayo ni sarong tawo sa madahas na kinaban na idto an nagdangog sa paghuhulit ni Noe. (Gen. 7:7) Inisip daw ni Jehova na dai nagin mapanggana si Noe? Dai! Para ki Jehova, mapangganang parahulit si Noe dahil maimbod niyang ginibo an ipinagibo saiya ni Jehova.—Gen. 6:22.

12. Paano nagin maugma si propeta Jeremias sa saiyang ministeryo sa ibong kan kawaran nin interes kan mga tawo asin pagkontra?

¹² Kaagid kaiyan, naghulit si propeta Jeremias sa laog nin mga dekada sa ibong kan kawaran nin interes kan mga tawo asin pagkontra. Nadisganar siyang marhay dahil ta “pigtutuya asin pigkakantiyawan” siya kan mga nagkokontra kaya inisip niyang magpundo na sa asignasyon niya. (Jer. 20:8, 9) Pero dai nanggad nagpundo si Jeremias! Ano an nakatabang saiya na makayanan an saiyang negatibong mga kaisipan asin magin maugma sa saiyang ministeryo? Nagpokus siya sa duwang mahalagang katotoohan. Inot, an mensahe nin Diyos na ipinapaabot ni Jeremias magtatao sa mga tawo nin “puturo asin paglaom.” (Jer. 29:11) Ikaduwa, pinili ni Jehova si Jeremias para magdara kan saiyang pangaran. (Jer. 15:16) Arog niya, nagdadara kita nin mensahe nin paglaom sa kinaban na ini na mayong paglaom, asin dara ta an pangaran ni Jehova bilang saiyang mga Saksi. Pag ipinopokus ta an satong atensiyon sa duwang mahalagang katotoohan na ini, magigin maugma kita ano man an reaksiyon kan mga tawo.

13. Ano an manunudan ta sa ilustrasyon ni Jesus na nasa Marcos 4:26-29?

¹³ An pag-uswag sa espirituwal nangyayari nin luway-luway. Itinukdo ni Jesus an katotoohan na ini sa ilustrasyon niya manungod sa parasabwag na nagturog. (Basahon an Marcos 4:26-29.) An bunga kan mga paghihinguwa kan parasabwag nangyari nin luway-luway, asin haros mayo talaga siyang kontrol diyan. Tibaad dai ka man makahiling nin resulta sa laog nin halawig na panahon na paggibo mo nin mga disipulo dahil an pagtalubo nangyayari nin luway-luway asin may proseso iyan. Kun paanong dai mapupuwersa kan parauma na magtalubo an saiyang mga pananom sa rikas na gusto niya, dai ta man mapupuwersa an satong mga tinutukduan sa Bibliya na umuswag sa espirituwal sa rikas na gusto ta. Kaya dai madisganar o pumundo kun naghahaloy an pag-uswag ninda kisa sa inaasahan mo. Arog sa pag-uma, nangangaipo nin pasensiya an paggibo nin mga disipulo.—Sant. 5:7, 8.

14. Magtao nin halimbawa na nagpapahiling na puwedeng magin luway-luway an resulta kan satong ministeryo.

¹⁴ Sa nagkapirang teritoryo, an resulta kan satong ministeryo tibaad dai marisa sa laog nin mga taon. Pag-isipan an eksperyensiya ni Gladys saka Ruby Allen, magtugang na sister na kan 1959 inasignar bilang mga regular payunir sa sarong banwa sa probinsiya nin Quebec sa Canada. c Dahil sa panggigipit kan komunidad asin sa impluwensiya kan iglesya Katolika, habo kan mga tawo na magdangog sa mensahe kan Kahadian. Nagigirumduman ni Gladys: “Naghaharong-harong kami kaidto walong oras kada aldaw sa laog nin duwang taon, tapos mayo lamang ni sarong nakipag-ulay samo! Minaduman lang sinda sa pinto tapos pigbababa na an blinds. Pero dai kami nagpundo.” Pag-abot nin panahon, nagin mas mainamigo na an mga tawo saka may mga nagdadangog na man. May tulong kongregasyon na ngunyan sa banwang iyan.—Isa. 60:22.

15. Ano an itinutukdo sato kan 1 Corinto 3:6, 7 manungod sa paggibo nin mga disipulo?

 ¹⁵ An paggibo nin mga disipulo pagtitinarabangan kan gabos. Sinasabi na kaipuhan an gabos sa kongregasyon para tabangan an saro sagkod na mabawtismuhan. (Basahon an 1 Corinto 3:6, 7.) Sarong brother an nagwalat nin tract o magasin sa sarong interesado. Dangan narealisar kan brother na dai kaya kan iskedyul niya na balikan ini, kaya pinakiulayan niya an ibang parahayag na iyo an magdalaw liwat. Nakapuon nin pag-adal sa Bibliya an parahayag. Dangan, nag-iimbitar man an parahayag nin nagkapirang tugang para ibanan siya sa pag-Bible study, asin an kada saro pinapakusog an tinutukduan sa magkakalain na paagi. An lambang tugang na nakakaulay kan tinutukduan makakatabang na mabaribi an banhi kan katotoohan. Sa arog kaiyan na paagi, arog kan sinabi ni Jesus, an parasabwag asin paraani puwedeng magkaibanan na mag-ugma sa espirituwal na pag-ani.—Juan 4:35-38.

16. Taano ta puwede kang magin maugma sa saimong ministeryo dawa kun limitado na an nagigibo mo dahil sa hilang o pagluya nin hawak?

¹⁶ Paano kun limitado na an nagigibo mo sa paghuhulit saka pagtutukdo kan maugmang bareta dahil sa hilang o pagluya nin hawak? Magigin maugma ka pa man giraray sa papel mo sa pag-ani. Pag-isipan an eksperyensiya ni Hading David asin kan mga tawuhan niya kan isalbar ninda an saindang pamilya saka mga pagsadiri sa nagsalakat na mga Amalekita. An 200 sa mga tawuhan dai na kayang makipaglaban huli sa sobrang kapagalan, kaya nagpawalat sinda para bantayan an mga bagahe. Kan manggana na sa laban, ipinagbuot ni David na pararehong kahirasan sa samsam an itatao sa gabos. (1 Sam. 30:21-25) Kaagid iyan kan satong pambilog na kinaban na gibuhon na paggibo nin mga disipulo. An lambang saro na ginigibo an pinakamakakaya niya puwedeng makamati kan kaparehong kaugmahan sa kada may bagong nasasalbar asin natatabangan na magpuon na maglakaw sa dalan pasiring sa buhay.

17. Sa ano kita dapat magpasalamat ki Jehova?

¹⁷ Nagpapasalamat kita ki Jehova dahil sa mamumuton niyang pagmansay sa paglilingkod ta saiya. Aram niya na dai ta kontrolado an resulta kan satong personal na mga paghihinguwa. Dawa arog kaiyan, naririsa niya an satong kaigutan asin marahay na mga motibo, asin binabalusan niya kita. Tinutukduan niya man kita kun paano kita magigin maugma sa satong papel sa dakulang gibuhon na pag-ani. (Juan 14:12) Makakasiguro kita na padagos kitang uuyunan nin Diyos basta dai kita magpundo!