1. Ano an maiisip ta pag hinuhurop-hurop ta an gabos na linalang ni Jehova?

 PAG hinuhurop-hurop ta an mahiwason na uniberso na linalang ni Jehova tibaad mamati ta an arog kan namatian ni salmista David, na naghapot paagi sa pamibi: ‘Pag minamasdan ko an kalangitan na saimong ginibo, an bulan asin an mga bituon na ibinugtak mo sa saindang mga lugar, ano an tawo ta ginigirumdom mo siya, asin an aki nin tawo ta inaataman mo siya?’ (Sal. 8:3, 4, An Marahay na Bareta Biblia) Dahil saditon lang kita kumpara sa mahiwason na uniberso, tibaad arog ni David, magngalas man kita na tinatawan kita ni Jehova nin atensiyon. Alagad arog kan maaaraman ta, dai lang tinawan ni Jehova nin atensiyon an inot na mga tawong si Adan asin Eva kundi ginibo niya man sindang parte kan saiyang pamilya.

2. Ano an katuyuhan kaidto ni Jehova para sa inot niyang mga aki digdi sa daga?

² Si Adan saka si Eva an inot na mga aki ni Jehova digdi sa daga asin si Jehova an saindang mamumuton na Ama sa langit. Inaasahan niya an mag-agom na ini na magin produktibong miyembro nin pamilya. Sinabi sainda nin Diyos: “Magkaigwa kamo nin mga aki asin magpakadakul kamo.” (Gen. 1:28, NWT) Gusto niya na magkaigwa sinda nin mga aki asin atamanon na marhay an daga na saindang istaran. Kun si Adan asin Eva masinunod na nakikooperar sa katuyuhan nin Diyos para sa sainda, sinda saka an mga gikan ninda magdadanay kutang miyembro kan pamilya nin Diyos sagkod lamang.

3. Taano ta masasabi ta na tinawan si Adan asin Eva nin onorableng lugar sa pamilya ni Jehova?

³ Si Adan asin Eva igwa kaidto nin onorableng lugar sa pamilya ni Jehova. Arog kan mababasa sa Salmo 8:5, ini an sinabi ni David manungod sa paglalang ni Jehova sa tawo: ‘Ginibo mo siya na hababa nin kadikit sa mga anghel, asin kinoronahan mo siya nin kamurawayan asin nin [kahanga-hangang kagayunan].’ Iyo, dai tinawan an  mga tawo kan kaparehong kapangyarihan, intelihensiya, asin mga kakayahan arog kan sa mga anghel. (Sal. 103:20) Pero, an mga tawo “hababa [lang] nin kadikit” kisa sa makapangyarihan na mga espiritung linalang na iyan. Isip-isipa iyan! Tinawan ni Jehova an satong inot na mga magurang nin magayunon na buhay.

4. Ano an nangyari sa lugar ni Adan asin Eva sa pamilya ni Jehova, asin ano an pag-uulayan ta sa artikulong ini?

 ⁴ Makamumundo, naiwara ni Adan asin Eva an saindang lugar sa pamilya ni Jehova. Nagkaigwa ini nin kapaha-pahamak na mga resulta sa mga gikan ninda arog kan maaaraman ta atyan sa artikulong ini. Pero dai nagbago an katuyuhan ni Jehova. Gusto niya na magin mga aki niya sagkod lamang an masinunod na mga tawo. Inot, pag-ulayan ta kun paano kita tinawan ni Jehova nin onra. Dangan, pag-uulayan ta kun ano an magigibo ta ngunyan para ipahiling ta na gusto tang magin parte kan pamilya nin Diyos. Panghuri, pag-ulayan ta an mga bendisyon na makakamtan sagkod lamang kan mga aki ni Jehova digdi sa daga.

5. Paano ta matatawan nin onra an Diyos dahil sa paggibo niya sato uyon sa saiyang ladawan?

⁵ Tinawan kita ni Jehova nin onra paagi sa paggibo sato uyon sa saiyang ladawan. (Gen. 1:26, 27) Dahil ginibo kita uyon sa ladawan nin Diyos, puwede tang mapatalubo asin maipahiling an dakul sa magagayon niyang kuwalidad arog kan pagkamuot, pagmalasakit, kaimbudan, asin katanusan. (Sal. 86:15; 145:17) Mantang pinapatalubo ta an siring na mga kuwalidad, tinatawan ta nin onra si Jehova asin pinapatunayan ta na nagpapasalamat kita saiya. (1 Ped. 1:14-16) Pag minagawi kita sa paaging nakakapaugma sa satong Ama sa langit, maugma kita asin kontento. Asin paagi sa paggibo sato uyon sa saiyang ladawan, tinawan kita ni Jehova kan kakayahan na magin an klase nin mga tawo na gusto niyang magin parte kan saiyang pamilya.

6. Paano tinawan ni Jehova nin onra an mga tawo kan inaandam niya an daga?

⁶ Nag-andam si Jehova nin sarong espesyal na istaran para sa sato. Haloy pa bago lalangon ni Jehova an inot na tawo, inandam niya na an daga para sa mga tawo. (Job 38:4-6; Jer. 10:12) Dahil mabuot saka matinao si Jehova, naglalang siya nin dakulon na mararahay na bagay para magin maugma kita. (Sal. 104:14, 15, 24) May mga pagkakataon kaidto na hinurop-hurop niya an manungod sa mga linalang niya, asin ‘nahiling niya na iyan marahay.’ (Gen. 1:10, 12, 31) Tinawan niya nin onra an mga tawo paagi sa pagtao sainda nin awtoridad na ‘pamahalaan’ an gabos na marahayon na bagay na linalang niya digdi sa daga. (Sal. 8:6, NWT) An katuyuhan nin Diyos iyo na mamatian kan perpektong mga tawo an kaugmahan sa pag-asikaso sa marahayon na mga linalang na ini sagkod lamang. Regular ka daw na nagpapasalamat ki Jehova sa pambihirang panugang iyan?

7. Paano ipinapahiling kan Josue 24:15 na an tawo igwa nin libertad na magdesisyon?

⁷ Tinawan kita ni Jehova kan regalong libertad na magdesisyon. Puwede kitang pumili kun anong klase nin buhay an gusto ta. (Basahon an Josue 24:15, NWT.) An kakayahan na pumili inaapod na libertad na magdesisyon. Nag-uugma an satong mamumuton na Diyos pag pinipili tang maglingkod saiya. (Sal. 84:11; Tal. 27:11) Puwede tang gamiton sa tamang paagi an satong libertad na magdesisyon sa dakul na aspekto. Pag-isipan an halimbawang ipinahiling ni Jesus.

8. Ano an sarong paagi na ginamit ni Jesus an kakayahan niyang pumili?

⁸ Maaarog ta an halimbawa ni Jesus paagi sa pagpili na inuton an kapakanan kan iba kisa kan sa sato. Sarong beses kan pagal-pagal si Jesus saka an mga apostol niya, nagduman sinda sa sarong tuninong na lugar na diyan puwede kuta sindang makapurupahingalo. Alagad, dai iyan nangyari. Nanumpungan sinda nin dakulon na tawo na gustong-gustong magpatukdo ki Jesus. Pero dai nauyam si Jesus. Imbes, nahirak siyang marhay sa mga tawo. Kaya, ano an ginibo ni Jesus?  “Nagpuon siyang magtukdo sa sainda nin dakul na bagay.” (Mar. 6:30-34) Pag inaarog ta si Jesus paagi sa pagtao kan satong panahon asin kusog para tabangan an iba, nagtatao kita nin kamurawayan sa satong Ama sa langit. (Mat. 5:14-16) Ipinapahiling ta man ki Jehova na gusto tang magin parte kan saiyang pamilya.

9. Ano an dapat na isaisip kan mga magurang?

⁹ Tinawan ni Jehova an mga tawo kan kakayahan na magkaigwa nin mga aki pati man kan paninimbagan na tukduan sinda na kamutan siya asin maglingkod sa saiya. Kun saro kang magurang, inaapresyar mo daw an espesyal na regalong ini? Dawa tinawan ni Jehova an mga anghel nin dakul na pambihirang mga kakayahan, dai sinda tinawan kan pribilehiyong ini. Kaya kun saro kang magurang, dapat mong pahalagahan na marhay an pribilehiyo mong magpadakula nin aki. Ipinagkatiwala sa mga magurang an sarong sagradong paninimbagan na padakulaon an saindang mga aki “sa disiplina asin sadol ni Jehova.” (Efe. 6:4; Deut. 6:5-7; Sal. 127:3) Tanganing matabangan an mga magurang, nagtatao an organisasyon nin Diyos nin dakul na pantabang na basado sa Bibliya, arog kan mga publikasyon, video, musika, asin mga artikulo sa satong website. Malinaw na an mga aki mahalagang marhay para sa satong Ama sa langit asin sa saiyang Aki. (Luc. 18:15-17) Pag an mga magurang nagsasarig ki Jehova asin ginigibo an saindang pinakamakakaya para atamanon an saindang namumutan na mga aki, nauugma si Jehova. Asin tinatawan kan mga magurang na iyan an saindang mga aki kan paglaom na magin parte an mga ini kan pamilya ni Jehova sagkod lamang!

10-11. Ano an pinagin posible ni Jehova para sato paagi kan pantubos?

¹⁰ Itinao ni Jehova an saiyang pinakanamumutan na Aki tanganing magin posible na magin miyembro giraray kita kan Saiyang pamilya. Arog kan sinambit ta sa  parapo 4, naiwara ni Adan asin Eva an lugar ninda sa pamilya ni Jehova, asin pati man an lugar na para sa saindang mga aki. (Roma 5:12) Tuyong nagsuway sa Diyos si Adan asin Eva, kaya maninigo sindang halion niya sa saiyang pamilya. Pero kumusta man an saindang mga gikan? Mamumuton na nagtao si Jehova nin sarong probisyon para sa mga maninigo na gikan ninda na ampunon sa saiyang pamilya. Ginibo niya ini paagi sa atang kan saiyang bugtong na Aki, si Jesu-Cristo. (Juan 3:16; Roma 5:19) Dahil sa atang ni Jesus, nagin posible na ampunon bilang mga aki nin Diyos an 144,000 na maimbod na mga tawo.—Roma 8:15-17; Kap. 14:1.

¹¹ Apuwera kaiyan, milyon-milyon na iba pang maimbod na mga tawo an masinunod na nagsasagibo kan kabutan nin Diyos. May paglaom sinda na magin lubos na miyembro kan pamilya nin Diyos pagkatapos kan pangultimong pagbalo pagkatapos kan Milenyo. (Sal. 25:14; Roma 8:20, 21) Isinasaisip ninda an paglaom na iyan, kaya dawa ngunyan inaapod nindang “Ama” si Jehova, na saindang Kaglalang. (Mat. 6:9) An mga bubuhayon liwat tatawan man kan oportunidad na maaraman kun ano an inaasahan sainda ni Jehova. An mga naghihimati sa paggiya niya magigin miyembro man kan saiyang pamilya pag-abot nin panahon.

12. Anong hapot an sisimbagon ta ngunyan?

¹² Arog kan naaraman ta, dakul na an ginibo ni Jehova para tawan nin onra an mga tawo. Inampon na niya an mga linahidan bilang saiyang mga aki asin tinawan niya na an “dakulang kadaklan” kan paglaom na magin lubos niyang mga aki sa bagong kinaban. (Kap. 7:9) Ano an puwede tang gibuhon ngunyan para ipahiling ki Jehova na gusto tang magin parte kan saiyang pamilya sagkod lamang?

13. Ano an puwede tang gibuhon para magin permanenteng parte kita kan pamilya nin Diyos? (Marcos 12:30)

¹³ Ipahiling an saimong pagkamuot ki Jehova paagi sa bilog na pusong paglilingkod sa saiya. (Basahon an Marcos 12:30.) Sa gabos na bagay na mabuot na itinao sato nin Diyos, an saro sa pinakanangungurog na regalo iyo an kakayahan  na sambahon siya. Ipinapahiling ta ki Jehova na namumutan ta siya paagi sa ‘pag-utob sa saiyang mga tugon.’ (1 Juan 5:3) An saro sa mga pagbuot na gusto ni Jehova na sunudon ta iyo an pagbuot na itinao ni Jesus sa sato na gumibo nin mga disipulo, na binabawtismuhan sinda. (Mat. 28:19) Ipinagbuot niya man sato na kamutan an lambang saro. (Juan 13:35) An mga masinunod ki Jehova gigibuhon niyang parte kan saiyang pambilog na kinaban na pamilya nin mga parasamba.—Sal. 15:1, 2.

14. Paano kita makakapahiling nin pagkamuot sa iba? (Mateo 9:36-38; Roma 12:10)

¹⁴ Magpahiling nin pagkamuot sa iba. An pagkamuot an pinakanangungurog na kuwalidad ni Jehova. (1 Juan 4:8) Pinahilingan na kita ni Jehova nin pagkamuot bago ta pa siya mamidbid. (1 Juan 4:9, 10) Inaarog ta siya pag nagpapahiling kita nin pagkamuot sa iba. (Efe. 5:1) An saro sa pinakamarahay na mga paagi na makakapahiling kita nin pagkamuot sa mga tawo iyo an pagtabang sainda na makanuod manungod ki Jehova mantang may panahon pa. (Basahon an Mateo 9:36-38.) Pag ginigibo ta iyan, tinatawan ta sinda nin oportunidad na magin potensiyal na mga miyembro kan pamilya nin Diyos. Pagkatapos na mabawtismuhan an sarong tawo, dapat na padagos ta siyang kamutan asin igalang. (1 Juan 4:20, 21) Paano ta gigibuhon iyan? An sarong paagi, iyo na magtiwala kita sa saiya nuarin man posible. Halimbawa, dai ta siya pagdududahan na may maraot o makasadiri siyang mga motibo. Imbes, papahilingan ta nin onra an satong tugang, na ibinibilang siyang mas urog kisa sato.—Basahon an Roma 12:10; Fil. 2:3.

15. Kiisay kita dapat magpahiling nin pagkahirak asin kabuutan?

¹⁵ Magpahiling nin pagkahirak asin kabuutan sa gabos na tawo. Kun gusto tang mapabilang sa mga maninigong mag-apod ki Jehova bilang saindang Ama sagkod lamang, dapat tang isabuhay an Tataramon nin Diyos. Halimbawa, itinukdo ni Jesus na dapat na magpahiling kita nin pagkahirak asin kabuutan sa gabos na tawo, dawa sa satong mga kaiwal. (Luc. 6:32-36) Kun minsan, tibaad nasasakitan kitang gibuhon iyan. Kun iyo, dapat tang arugon kun paano mag-isip si Jesus pati man an paggawi niya. Pag ginigibo ta an pinakamakakaya ta na sunudon si Jehova asin arugon si Jesus, ipinapahiling ta sa satong Ama sa langit na gusto tang magin parte kan pamilya niya sagkod lamang.

16. Paano ta mapoprotektaran an reputasyon kan pamilya ni Jehova?

¹⁶ Protektaran an reputasyon kan pamilya ni Jehova. Sa sarong literal na pamilya, sa parati inaarog kan aking lalaki an kuya niya. Kun an kuya isinasabuhay an mga prinsipyo sa Bibliya, magseserbi siyang marahay na halimbawa para sa mas nguhod niyang tugang. Pero kun an kuya naggigibo nin sala, tibaad arugon siya kan mas nguhod niyang tugang. Arog man kaiyan sa pamilya ni Jehova. Kun an sarong maimbod na Kristiyano magkaigwa nin apostatang kaisipan o pilion an sarong imoral o maraot na paagi nin pamumuhay, tibaad arugon na man siya kan iba asin gumibo naman nin maraot. An naggigibo kaiyan nakakaraot sa reputasyon kan pamilya ni Jehova nin mga parasamba. (1 Tes. 4:3-8) Dai ta nanggad dapat arugon an maraot na mga halimbawa asin dai nanggad niyato dapat pagtugutan an ano man na irayo kita sa satong mamumuton na Ama sa langit.

17. Anong kaisipan an dapat tang likayan, asin taano?

¹⁷ Magtiwala ki Jehova imbes na sa materyal na mga bagay. Nanunuga si Jehova na tatawan niya kita nin kakanon, isusulot, asin istaran kun iinuton ta an saiyang Kahadian asin mamumuhay kauyon kan saiyang matanos na mga pamantayan. (Sal. 55:22; Mat. 6:33) Huli kaiyan, lilikayan tang isipon na magtatao nin katiwasayan asin nagdadanay na kaugmahan an materyal na mga bagay na inaalok kan kinaban na ini. Aram ta na an solamenteng paagi na magkakaigwa kita nin tunay na katuninungan nin isip iyo an paggibo kan kabutan ni Jehova. (Fil. 4:6, 7) Dawa kun kaya tang magbakal nin dakul na bagay, dapat tang pag-isipan  kun baga talagang igwa kita kan panahon o kusog para gamiton o asikasuhon an mga bagay na iyan. Puwede daw mangyari na magin sobra-sobra an pagpapahalaga ta sa satong mga pagsadiri? Dapat tang tandaan na inaasahan sato nin Diyos na magin produktibong mga miyembro kita kan saiyang pamilya. Nangangahulugan iyan na dai ta dapat pagtugutan na mawara an pokus ta. Habo ta nanggad na magin arog kan hoben na lalaki na sinayumahan an oportunidad na maglingkod ki Jehova asin ampunon bilang saro sa mga aki niya—dahil sana ta sobra-sobra an pagpapahalaga niya sa pirang materyal na pagsadiri!—Mar. 10:17-22.

18. Anong dakulang onra asin mga bendisyon an makakamtan sagkod lamang kan masinunod na mga tawo?

¹⁸ Makakamtan kan masinunod na mga tawo an pinakanangungurog na onra sa gabos—an pribilehiyo na kamutan asin sambahon si Jehova sagkod lamang! Mamamatian man kan may mga daganon na paglaom an kaugmahan sa pag-ataman kan magayon na planetang ini na perpekto nanggad na dinisenyo ni Jehova para magin istaran ninda. Dai na mahahaloy, an daga asin an gabos na nabubuhay diyan magigin magayon giraray sa irarom kan pamamahala kan Kahadian. Reresolberan ni Jesus an gabos na problema na resulta kan desisyon ni Adan asin Eva na bayaan an pamilya nin Diyos. Bubuhayon liwat ni Jehova an milyon-milyon asin tatawan sinda kan oportunidad na mabuhay nin daing katapusan na may perpektong salud sa daga na ginibo nang paraiso. (Luc. 23:42, 43) Mantang luway-luway nang nagigin perpekto an daganon na kabtang kan pamilya ni Jehova nin mga parasamba, an lambang saro mapahiling kan “kamurawayan asin nin [kahanga-hangang kagayunan]” na isinurat ni David.—Sal. 8:5.

19. Ano an dapat tang isaisip?

¹⁹ Kun kabilang ka sa “dakulang kadaklan,” igwa ka nin magayunon na paglaom. Namumutan ka nin Diyos; gusto ka niyang magin miyembro kan saiyang pamilya. Kaya gibuhon an gabos mong makakaya para paugmahon siya. Mamuhay sa kada aldaw na isinasaisip asin isinasapuso an mga panuga nin Diyos. Pahalagahan an saimong pribilehiyo na sambahon an satong namumutan na Ama sa langit, asin pahalagahan na marhay an paglaom na sambahon siya sagkod lamang!