1, 2. Ano an narisa kan mga tawo dapit sa mga Saksi ni Jehova?

DAKUL an nagkokomento sa marahayon na mga kuwalidad na nahihiling sa banwaan ni Jehova. Halimbawa, inumaw kan awtor na si Anton Gill an satong mga tugang sa Nazi Germany. Isinurat niya: “Sa mga Saksi ni Jehova mas naanggot an mga Nazi. . . . Kan 1939, mga 6,000 sa sainda an nasa [mga kampo de konsentrasyon].” Sinabi pa kan awtor na sa ibong kan grabeng pagpersegir na inagihan kan mga Saksi, nagin “mapagtitiwalaan saka kalmado” sinda dawa sa masakit na sitwasyon saka napagdanay ninda an saindang “integridad saka pagkasararo.”

² Kasuarin pa sana, narisa man kan mga taga South Africa an magayunon na mga kuwalidad kan banwaan nin Diyos. May panahon kaidto na dai tinutugutan sa South Africa na magtiripon an mga Saksing magkakaiba an kulor kan kublit. Pero, kan Domingo nin Disyembre 18, 2011, nakakaugma nanggad mahiling an labing 78,000 na tugang na manlain-lain an rasa, hali sa South Africa saka sa kataraid na nasyon, na nagtitiripon sa pinakadakulang istadyum sa siyudad nin Johannesburg tanganing magdangog nin espirituwal na programa. Mapadapit sa mga Saksing nagtiripon, ini an komento kan saro sa mga namamahala sa istadyum: “Sa gabos na grupong nahiling ko sa istadyum, kamo an may pinakamarahay na paggawi. Husay an pagbado kan gabos. Saka lininigan nindong marhay an istadyum. Pero an pinakahinangaan ko iyo na  iba-iba an lahi nindo pero talagang nagkakasararo kamo.”

3. Taano ta naiibang marhay an satong kasararuan nin magturugang?

³ Ipinapahiling kan mga komentong iyan nin mga bakong Saksi na talagang naiiba an satong internasyonal na kasararuan nin magturugang. (1 Ped. 5:9) Pero taano ta naiiba kitang marhay sa gabos na organisasyon? Huling sa tabang kan Tataramon nin Diyos saka kan saiyang banal na espiritu, pinagmamaigutan niyatong ‘hubaon an lumang personalidad.’ Asin karibay kaiyan, ‘isinusulot niyato an bagong personalidad.’—Col. 3:9, 10.

4. Ano an mga pag-uulayan niyato sa artikulong ini, asin taano?

⁴ Apuwera sa kaipuhan niyatong hubaon an lumang personalidad, kaipuhan man niyatong hinguwahon na dai na iyan balikan. Sa artikulong ini, pag-uulayan niyato kun paano ta huhubaon an lumang personalidad, kun taano ta kaipuhan na niyatong gibuhon iyan tulos, asin kun taano ta posible pang magbago an saro gurano man kagrabe an tibaad nagibo niyang kasalan. Aaramon man niyato kun ano an puwedeng gibuhon kan mga haloy na sa katotoohan tanganing masigurado na dai na ninda maibalik an lumang personalidad. Taano ta kaipuhan na marhay an mga pagirumdom na iyan? Makamumundo, may mga dating naglingkod ki Jehova na dai nagdanay na maingat kaya nakabalik sa dati nindang salang mga gibo. Kaya, kaipuhan niyato gabos na isapuso an patanid na ini: “An siisay man na naghuhuna na siya nakatindog mag-ingat na dai siya bumagsak.”—1 Cor. 10:12.

5. (a) Magtao nin halimbawa kun taano ta kaipuhan niyatong halion tulos an lumang personalidad. (Hilingon an ritrato sa kapinunan kan artikulo.) (b) Sigun sa Colosas 3:5-9, anong mga gibo an kaiba sa lumang personalidad?

⁵ Ano an gigibuhon mo kun maati na an bado mo, o tibaad medyo may parong na ngani? Siguradong huhubaon mo tulos iyan. Kaagid kaiyan, kaipuhan man niyatong humiro tulos asin sunudon an pagbuot na hubaon an mga gibo na bakong kauyon kan personalidad nin Diyos. Gusto niyatong sunudon an malinaw na instruksiyon ni Pablo sa mga Kristiyano kan panahon niya: “Dapat nindong haralion iyan gabos sa saindo.” Pag-ulayan ta an duwa sa makasalan na mga gibo na sinabi ni Pablo—seksuwal na imoralidad asin karigsukan.​—Basahon an Colosas 3:5-9.

6, 7. (a) Paano ipinahiling kan mga sinabi ni Pablo na dakulang paghihinguwa an kaipuhan tanganing mahuba an lumang personalidad? (b) Ano an dating pamumuhay ni Sakura, asin ano an nakatabang sa saiya na bayaan iyan?

⁶ Seksuwal na imoralidad. Sa orihinal na termino sa Bibliya na itrinadusir na “seksuwal na imoralidad,” kaiba sa kahulugan kaiyan an seksuwal na relasyon nin mga tawo na bakong mag-agom asin an homoseksuwalidad. Sinabi ni Pablo sa mga kapwa niya Kristiyano na ‘gadanon an mga kabtang kan saindang hawak’—an buot sabihon, halion an ano man na pagmawot—“kun manungod sa seksuwal na imoralidad.” Malinaw sa pagkasabi ni Pablo na dakulang paghihinguwa an kaipuhan tanganing mahali an salang mga pagmawot na iyan. Dipisil, pero kaya niyatong madaog iyan.

⁷ Pag-isipan an nangyari ki Sakura * na taga Japan. Kan nagdadakula siya, parati siyang mamundo saka pagmati niya mayo siyang halaga. Tanganing mabawasan an saiyang kamunduan, nagkaigwa siya nin dakul na karelasyon puon kan mag-15 anyos siya. “Huli kaiyan,” an nasusupog niyang sinabi, “tulong beses akong nagpalaglag.” Sinabi niya: “Kan inot, nakakamati ako nin katiwasayan pag naggigibo ako nin seksuwal na imoralidad, huling pagmati ko importante ako saka pinapadaba ako. Pero mantang mas naggigibo ako kaiyan, lalo akong nagigin bakong tiwasay.” Nagpadagos an arog kaining pamumuhay ni Sakura sagkod na mag-23 anyos siya. Dangan nagpuon siyang makipag-adal nin Bibliya sa mga Saksi. Gustong-gusto ni Sakura an mga nanunudan niya, asin sa tabang ni Jehova napaglabanan niya an grabeng pagkakonsiyensiya asin pagkasupog saka  naipundo na niya an paggibo nin seksuwal na imoralidad. Regular payunir na ngunyan si Sakura asin dai na niya namamatian na solo sana siya. Imbes, arog kan sabi niya, “Maugma talaga ako huling namamatian ko an pagkamuot ni Jehova sa gabos na oras.”

8. Ano an nagkapirang gibo na puwedeng magin dahilan na magin maati kita sa paghiling nin Diyos?

⁸ Karigsukan o maating mga gibo. Mahiwas an kahulugan kan orihinal na termino sa Bibliya na trinadusir na “karigsukan.” Bako sanang seksuwal na mga kasalan an pinapanungdan kaiyan. Kabali man diyan an nakakaraot na mga bisyo arog kan paninigarilyo pati an malalaswang surubahan. (2 Cor. 7:1; Efe. 5:3, 4) Sakop man kaiyan an mga bagay na ginigibo sa pribado, arog nin pagbasa nin nakakapukaw sa seksong mga libro o paghiling nin pornograpiya, na puwedeng magresulta sa maating gibo na masturbasyon.​—Col. 3:5. *

9. Ano an puwedeng magin resulta kun magkaigwa an saro nin “daing kontrol na seksuwal na hurot”?

⁹ An mga tawong regular na naghihiling nin pornograpiya nagkakaigwa nin “daing kontrol na seksuwal na hurot,” asin puwede iyan magresulta sa pagigin adikto sa sekso. Sigun sa mga parasiyasat mahihiling man sa mga tawong adikto sa pornograpiya an mga sintomas na mahihiling sa mga alkoholiko asin sa mga adikto sa droga. Kaya dai na kita mangangalas na may maraot na mga resulta an paghiling nin pornograpiya​—arog nin sobrang pagkasupog, pagigin bakong produktibo sa trabaho, bakong maugmang buhay pamilya, diborsiyo, asin paghugot. Sarong lalaki na nakasarong taon nang dai naghihiling nin pornograpiya an nagsurat: “May respeto na giraray ako ngunyan sa sadiri ko.”

10. Paano nadaog ni Ribeiro an pagkaadikto niya sa pornograpiya?

¹⁰ Masakit para sa dakul na dagos-dagos nang mahali an bisyong ini. Pero arog kan mahihiling ta sa eksperyensiya ni Ribeiro na taga Brazil, kaya mong madaog an bisyong iyan. Naghali si Ribeiro sa saindang harong kan siya tin-edyer dangan pag-abot nin panahon nagtrabaho siya sa sarong planta na nagre-recycle nin papel, na diyan nabantad siya sa pornograpikong mga magasin. Sinabi niya: “Luway-luway akong nagin adikto sa pornograpiya. Uminabot pa ngani sa punto na gustong-gusto kong mayo sa harong an ka live-in ko tanganing makahiling ako nin pornograpikong mga video.” Dangan, sarong aldaw sa trabaho, napahiling siya sa sarong tambak nin mga ire-recycle na libro, asin narisa niya an sarong libro na may titulong An Sekreto sa Kaogmahan nin Pamilya. Kinua niya iyan dangan binasa. Huli sa mga nanudan niya, napahiro siya na makipag-adal nin Bibliya sa mga Saksi ni Jehova, pero haloy na panahon pa bago niya nahali an maraot na bisyo niya. Ano an nakatabang sa saiya? Sinabi niya: “Paagi sa pagpamibi, pag-adal nin Bibliya, asin paghurop-hurop sa mga nanunudan ko, lalo kong naapresyar an mga kuwalidad ni Jehova sagkod sa punto na nagin mas makusog na an pagkamuot ko ki Jehova kisa sa pagmawot kong maghiling nin pornograpiya.” Sa tabang kan puwersa kan Tataramon nin Diyos asin kan saiyang banal na espiritu, nagibong hubaon ni Ribeiro an luma niyang personalidad, nabawtismuhan siya, asin ngunyan saro na siyang elder sa kongregasyon.

11. Ano an kaipuhan na gibuhon nin sarong tawo tanganing makalikay siya sa pornograpiya?

¹¹ Bako sanang basta pag-adal nin Bibliya an kinaipuhan na gibuhon ni Ribeiro tanganing madaog an saiyang bisyo. Kinaipuhan niya nin panahon para maabot kan mensahe kan Bibliya an saiyang puso. Paagi sa pagpamibi asin paghurop-hurop, nadaog kan saiyang pagkamuot sa Diyos an makusog niyang pagmawot sa pornograpiya. An pagpakusog kan pagkamuot ki Jehova asin an pagkaungis sa kun ano an maraot iyo an pinakaepektibong paagi tanganing makalikay sa pornograpiya.​—Basahon an Salmo 97:10.

12. Ano an nakatabang ki Stephen na mahali an pagigin arangguton asin an mapang-insultong pagtaram?

¹² An mga tawong arangguton sa parati ilinuluwas an kaanggutan ninda paagi sa mapang-insultong pagtaram. Siyempre, dai nanggad iyan makakatabang na magin maugma an pamilya. Si Stephen, na sarong ama na taga Australia, nagsabi: “Pirmi ako kaidtong nagmumuda saka naaanggot tulos ako dawa sa saradit sanang bagay. Tulong beses kaming nagsuwayan kan agom ko saka madiborsiyo na kuta kami kaidto.” Dangan, may mga Saksing nagtukdo nin Bibliya sa mag-agom. Ano an nagin resulta kan sinusunod na ni Stephen an sadol kan Bibliya? Sinabi niya: “Talagang nagrahay an pag-iribanan mi bilang pamilya. Sa tabang ni Jehova, ngunyan mas nangingibabaw na sa sako an katuninungan saka mas kalmado na ako, kumpara kaidto na garo ako time bomb na dikit sanang bagay na nakakauyam asin nakakapaanggot, masabog na.” Sa ngunyan ministeryal na lingkod na si Stephen, asin pirang taon na man na regular payunir an saiyang agom. An mga elder sa kongregasyon ni Stephen nagsabi: “Tuninong saka mahigos si Stephen, tapos mapakumbaba siya.” Dai lamang ninda siya nahiling na naanggot. Dai nanggad inisip ni Stephen na huli ini sa sadiri niyang paghihinguwa. Sinabi niya: “Nungka kong makakamtan an marahayon na mga bendisyon na ini kun dai ko inako an tabang ni Jehova na lubos na baguhon an sakuyang personalidad.”

13. Taano ta peligrosong marhay an pagkaanggot, asin ano an ipinapatanid sa sato kan Bibliya?

¹³ Tama sana na nagpapatanid an Bibliya na likayan ta an kaanggutan, mapang-insultong pagtaram, asin sirilyakan. (Efe. 4:31) Sa parati nagreresulta an mga iyan sa kadahasan. Iniisip kan dakul sa kinaban ngunyan na normal sana an kaanggutan asin pagigin bayolente. Pero an totoo dai iyan nakakatao nin onra sa satong Kaglalang. Kinaipuhan kan dakul na tawo na halion an nakakaraot na mga gibong ini bago ninda naisulot an bagong personalidad.​—Basahon an Salmo 37:8-11.

14. Posible daw para sa sarong agresibong tawo na magin mahuyo?

¹⁴ Pag-isipan an eksperyensiya ni Hans, na elder sa sarong kongregasyon sa Austria. “Saro siya sa pinakamahuyong brother na gugustuhon mong mamidbid,” an sabi kan koordineytor kan grupo nin kamagurangan sa kongregasyon ni Hans. Pero bako siyang arog kaiyan dati. Kan tin-edyer siya, nagin alkoholiko siya asin huli kaiyan nagin siyang agresibo. Sarong beses huli sa grabeng kaanggutan dahil sa kaburatan, nagadan niya an kailusyon niya kaya nasentensiyahan siya nin 20 taon na pagkapreso. Kan inot, dai nabago kan buhay sa presuhan an pagigin agresibo ni Hans. Pag-abot nin panahon, pinakiulayan kan saiyang ina an sarong elder na dalawon siya, asin nagpuon si Hans na mag-adal nin Bibliya. Sinabi niya: “Nasakitan ako na hubaon an luma kong personalidad. An mga teksto sa Bibliya na nakatabang sa sako iyo an Isaias 55:7, na an sabi: ‘Bayaan na kan maraot na tawo an saiyang dalan,’ saka an 1 Corinto 6:11, na nagsabi dapit sa mga nagbaya na kan saindang makasalan na mga gibo: ‘Alagad ta arog kaiyan dati an nagkapira sa saindo.’ Sa laog nin dakul na taon, mapasensiya akong tinabangan ni Jehova paagi kan saiyang banal na espiritu na maisulot an bagong personalidad.” Nabawtismuhan si Hans mantang nasa presuhan pa, asin pinaluwas siya pagkatapos niyang mapreso nin 17 may kabangang taon. Sinabi niya: “Nagpapasalamat ako sa sobra-sobrang pagkahirak asin pagpapatawad sa sako ni Jehova.”

15. Anong gibo an lakop ngunyan, pero ano an sinasabi kan Bibliya dapit diyan?

¹⁵ Apuwera sa mapang-insultong pagtaram, an pagputik kabtang man kan lumang personalidad. Halimbawa, dakul na tawo an nagpuputik tanganing malikayan nindang magbayad nin buhis o tanganing malikayan an mga konsekwensiya kan saindang mga kasalan. Sa kabaliktaran, si Jehova “an Diyos nin katotoohan.” (Sal. 31:5, NW) Kaya hinahagad niya sa “lambang saro” sa saiyang mga  parasamba na “magtaram nin katotoohan sa saiyang kapwa” asin ‘dai magputik.’ (Efe. 4:25; Col. 3:9) Malinaw na dapat na magsabi kita nin totoo dawa pa kun tibaad mapasupog kita o bako iyan kumbenyente sa sato.—Tal. 6:16-19.

16. Ano an makakatabang sa saro para magibo niyang hubaon an lumang personalidad?

¹⁶ Kun sa sadiri sanang kusog, dai magigibo nin saro na hubaon an lumang personalidad. An mga indibidwal na sinambit sa artikulong ini—si Sakura, Ribeiro, Stephen, asin Hans—kinaipuhan na makipaglaban na marhay tanganing mahali an maraot nindang mga gibo. Nagibo ninda iyan huling binuksan ninda an saindang isip asin puso tanganing matabangan sinda kan puwersa kan Tataramon nin Diyos asin kan saiyang banal na espiritu. (Luc. 11:13; Heb. 4:12) Tanganing makinabang kita sa puwersa kan Bibliya, dapat niyatong aroaldaw na basahon saka hurop-hurupon iyan, asin pirming mamibi na tawan kita nin kadunungan asin kusog tanganing maiaplikar an mga sadol kan Bibliya. (Jos. 1:8; Sal. 119:97; 1 Tes. 5:17) Nakikinabang man kita sa Tataramon nin Diyos asin sa saiyang banal na espiritu pag nag-aandam kita asin nag-aatender sa mga pagtiripon kan kongregasyon. (Heb. 10:24, 25) Asin gusto niyatong gamiton an dakul na iba pang probisyon na itinatao sa sato kan organisasyon ni Jehova, arog kan mga magasin, JW Broadcasting, JW Library, asin jw.org.—Luc. 12:42.

17. Ano an pag-uulayan niyato sa sunod na artikulo?

¹⁷ Napag-ulayan ta an pirang maraot na mga gibo na dapat halion kan mga Kristiyano asin dai na balikan. Pero iyan sana daw an kaipuhan tanganing makamtan ta an pag-uyon nin Diyos? Bako. Dapat man niyatong isulot an bagong personalidad. Sa masunod na artikulo, pag-uulayan niyato an pirang aspekto kan bagong personalidad na kaipuhan na magin permanenteng kabtang kan satong piguratibong bado.