LEKSIYON 3
Nagtubod si Rahab ki Jehova
Isipon ta na nasa Jerico kita. An siyudad na ini yaon sa Canaan. An mga tawo digdi dai nagtutubod ki Jehova. Digdi nakaistar si Rahab.
Kan aki pa si Rahab, nadangog niya an mga istorya kun paano binanga ni Moises an Dagat na Pula saka kun paano niya giniyahan an mga Israelita paluwas sa Ehipto. Naaraman man niya kun paano sinda tinabangan ni Jehova na manggana sa mga laban ninda. Ngunyan nabaretaan niyang an mga Israelita nagkakampo harani sa Jerico!
Tinabangan ni Rahab an mga espiya ta nagtutubod siya ki Jehova
Sarong banggi, duwang Israelita an nagpa-Jerico para magmanman. Nagduman sinda sa harong ni Rahab. Pinadagos niya sinda. Kan bangging idto, naaraman kan hadi kan Jerico na may mga espiya sa siyudad asin na nagduman idto ki Rahab. Kaya nagsugo an hadi nin mga lalaki para dakupon sinda. Pigtago ni Rahab sa atop an duwang espiya tapos sinabihan niya an mga isinugo kan hadi: ‘Yaon sinda digdi kasubago, pero nakahali na sinda sa siyudad. Dalian nindo, ‘baad maabutan pa nindo sinda!’ Aram mo kun ta’no ta tinabangan ni Rahab an mga espiya?— Nagtutubod kaya siya ki Jehova saka aram niyang itatao ni Jehova an Canaan sa mga Israelita.
Bago maghali an mga espiya, nangako sinda na maliligtas si Rahab saka an mga kapamilya niya pag ginaba na an Jerico. Aram mo kun ano an ipinagibo ninda ki Rahab?— Sinabi ninda: ‘Isabit mo sa may bintana an pulang pising ini. Pag ginibo mo ‘yan, an gabos na nasa laog kan harong mo maliligtas.’ Ginibo talaga iyan ni Rahab. Aram mo kun ano an sunod na nangyari?—
Ilinigtas ni Jehova si Rahab saka an mga kapamilya niya
Pakatapos nin pirang aldaw, tuninong na nagmartsa sa palibot kan siyudad an mga Israelita. Anom na aldaw sindang nagmartsa, sarong beses kada aldaw. Pero kan ikapitong aldaw, pitong beses sindang nagmartsa. Tapos, gabos sinda nagkururahaw nin makusog. Pinabagsak ni Jehova an mga lanob kan siyudad. Pero an harong na may nakasabit na pulang pisi dai nagaba! Nahihiling mo ‘yan sa ritrato?— Ligtas si Rahab saka an mga kapamilya niya!
Ano an manunudan mo ki Rahab?— Nagtubod si Rahab ki Jehova huli sa makangangalas na mga bagay na nanudan niya manungod ki Jehova. Dakul ka man nanunudan na makangangalas na bagay manungod ki Jehova. Nagtutubod ka man ki Jehova arog ni Rahab?— Aram mi na nagtutubod ka!
