LEKSIYON 2
Gusto ni Rebeca na Mapaugma si Jehova
Padaba ni Rebeca si Jehova. An pangaran kan agom niya Isaac. Padaba man ni Isaac si Jehova. Pa’no nabisto ni Rebeca si Isaac? Ano an ginibo ni Rebeca para ipahiling na gusto niyang mapaugma si Jehova? Aramon ta an istorya niya.
Aki ni Abraham asin Sara si Isaac. Nakaistar sinda sa Canaan. Dai nagsasamba ki Jehova an mga tawo duman. Pero gusto ni Abraham na an maagom kan aki niya nagsasamba man ki Jehova. Kaya isinugo niya an saiyang suruguon, puwedeng si Eliezer, para ihanap nin magigin agom si Isaac sa harayuon na lugar na inaapod na Haran. Duman nakaistar an mga kapamilya ni Abraham.
Dawa mapagal, nagkua si Rebeca nin tubig para sa mga kamelyo
Nagduman si Eliezer kaiba an ibang suruguon ni Abraham. Nagdara sinda nin sampulong kamelyo na may kargang mga kakanon saka regalo. Pa’no mapili si Eliezer nin magigin agom ni Isaac? Kan makaabot sinda sa Haran, nagpundo sinda sa may bubon ta aram ni Eliezer na igwang maduruman para magsarok nin tubig. Namibi siya ki Jehova: ‘Pag naghagad po ako nin tubig sa sarong daraga tapos tinawan niya ako pati an mga kamelyo mi, buot sabihon siya na po an babaying pinili nindo.’
Tapos nag-abot si Rebeca. Sinasabi kan Bibliya na magayunon siya. Kan maghagad nin tubig si Eliezer, nagsimbag si Rebeca: ‘Sige po. Tawan ko po kamo nin tubig, tapos ikukua ko man an mga kamelyo nindo.’ Isipon mo ‘yan! Makusugon mag-inom an pahang mga kamelyo. Kaya kaipuhan ni Rebeca na magpabalik-balik sa bubon. Nahihiling mo sa ritrato kun gurano siya kahigos?— Ngalason si Eliezer kun paano sinimbag ni Jehova an pamibi niya.
Pigtawan ni Eliezer si Rebeca nin dakul na magagayon na regalo. Inimbitaran ni Rebeca sa Eliezer sa harong ninda. Ipinaliwanag ni Eliezer kun ta’no ta pinaduman siya ni Abraham saka kun pa’no sinimbag ni Jehova an pamibi niya. Nagtugot an pamilya ni Rebeca na magin agom siya ni Isaac.
Nag-iba si Rebeca ki Eliezer pa-Canaan para magin agom ni Isaac
Pero sa hiling mo, gusto man daw ni Rebeca na magin agom si Isaac?— Aram ni Rebeca na si Jehova an nagsugo ki Eliezer duman. Kaya kan hinapot siya kan pamilya niya kun gusto niyang mag-iba sa Canaan tanganing magin agom ni Isaac, sinabi ni Rebeca: ‘Iyo po, gusto ko.’ Nag-iba tulos siya ki Eliezer pa-Canaan tapos nagin mag-agom na sinda ni Isaac.
Ginibo ni Rebeca an gusto ni Jehova, kaya binendisyunan siya ni Jehova. Pakalihis nin dakul na taon, namundag si Jesus sa linya kan pamilya niya! Kun ika arog ni Rebeca na pinapaugma si Jehova, bebendisyunan ka man niya.
