Kan si Solomon na an hadi kan Israel, hinapot siya ni Jehova: ‘Ano an gusto mong itao ko saimo?’ Nagsabi si Solomon: ‘Aki pa ako, saka dai ko aram an gigibuhon ko. Tawan mo po ako nin kadunungan para maataman ko an saimong banwaan.’ Nagsabi si Jehova: ‘Dahil kadunungan an hinagad mo, gigibuhon takang pinakamadunong na tawo sa bilog na daga. Tatawan taka man nin dakulon na kayamanan. Kun susunudon mo ako, mabubuhay ka nin halawig.’

Pinunan ni Solomon an pagtugdok kan templo. Ginamit niya an pinakamarahay na bulawan, plata, kahoy, saka mamahalon na bato asin gapo. Rinibong mahuhusay na lalaki asin babayi an nagtrabaho diyan. Pakalihis nin pitong taon, handa nang idedikar ki Jehova an templo. Igwa iyan nin altar, asin may mga hayop na iaatang na nasa ibabaw kaiyan. Nagluhod si Solomon sa atubangan kan altar tapos namibi: ‘O Jehova, saditon po an templong ini. Bako pa lamang ining magayon para saimo, pero akuon mo po tabi an samong pagsamba asin mga pamibi.’ Ano an paghiling ni Jehova sa templo asin sa pamibi ni Solomon? Pakapamibi ni Solomon, may kalayong buminaba hali sa langit asin tinutong an mga atang sa altar. Inuyunan ni Jehova an templo. Naugma an mga Israelita kan mahiling ninda iyan.

Bistado si Hading Solomon sa bilog na Israel pati sa hararayong lugar dahil sa saiyang kadunungan. Nagduduman an mga tawo ki Solomon para magpatabang sa mga problema ninda. Pati ngani an reyna kan Sheba nagduman para testingon siya paagi sa masakit na mga hapot. Kan madangog kaini an saiyang mga simbag, nagsabi ini: ‘Dai ako naniwala sa mga sinabi sako manungod saimo, pero nahiling ko ngunyan na mas madunong ka pa palan kisa sa mga inistorya sako. Binendisyunan ka kan Diyos mong si Jehova.’ Magayon an buhay kaidto sa Israel, asin maugmahon an mga tawo duman. Pero mababago ini.