Sinuway na naman kan mga Israelita si Jehova asin nagsaramba sa mga bakong tunay na diyos. Pitong taon na pigparahabon a kan mga Midianita su mga hayop kan mga Israelita asin pigpararaot su mga pananom ninda. Para makadulag, nagtarago an mga Israelita sa mga kuweba saka sa mga bukid. Nakimahirak sinda ki Jehova na iligtas sinda. Kaya isinugo ni Jehova an sarong anghel sa hoben na lalaking si Gideon. Sinabi kan anghel: ‘Pinili ka ni Jehova para magin matibay na parapakilaban.’ Naghapot si Gideon: ‘Siisay man ako para iligtas an Israel?’

Paano maaaraman ni Gideon na pinili siya ni Jehova? Nagbugtak siya nin barahibo nin karnero sa daga dangan nagsabi ki Jehova: ‘Sa aga, pag nabasa kan ambon an barahibo nin karnero pero mara an daga, diyan ko maaaraman na gusto mo pong iligtas ko an Israel.’ Kinaagahan, basa-basa an barahibo pero mara an daga! Pero hinagad pa ni Gideon na sa sunod na aga, dapat mara an barahibo pero basa an daga. Kan mangyari iyan, naniwala na si Gideon na pinili siya ni  Jehova. Tiniripon niya an saiyang mga suldados para labanan an mga Midianita.

Sinabi ni Jehova ki Gideon: ‘Papaganahon ko kamo. Pero dahil dakulon an suldados mo, ’baad isipon nindo na nanggana kamo sa ralaban dahil sa sadiri nindong kusog. Paulion mo na an siisay man na natatakot.’ Kaya 22,000 na suldados an nag-uli, asin 10,000 an natada. Pagkatapos, nagsabi si Jehova: ‘Dakulon pa man giraray kamo. Painumon mo sinda sa sapa. An iiba mo sa ralaban idto sanang mga nag-iinom pero naghihiling kun baga may kalaban.’ Sa gabos na nag-inom, 300 sana an naghiling kun baga may kalaban. Nangako si Jehova na dawa dikit sana sinda, dadaugon ninda an 135,000 na mga Midianita.

Kan bangging idto, sinabi ni Jehova ki Gideon: ‘Salakayon na nindo an mga Midianita!’ Tinawan ni Gideon an mga suldados niya nin mga hamudyong saka darakulang dulay na may nakatagong karaba sa laog. Sinabi niya sainda: ‘Arugon nindo an gigibuhon ko.’ Pinatanog ni Gideon an saiyang hamudyong, pinasa an dulay, itinaas an karaba, dangan nagkurahaw: ‘An espada ni Jehova asin ni Gideon!’ Inarog iyan kan 300 niyang tawuhan. Nagkatarakot an mga Midianita kaya bigla sindang nagdaralagan maski sain. Dahil nagkariribong, sinda-sinda lugod an nagralaban. Tinabangan giraray ni Jehova an mga Israelita na madaog an saindang mga kalaban.