Sinabi ni Jehova ki Moises: ‘Magtukad ka digdi sako sa bukid. Isusurat ko sa mga tablang gapo an mga katugunan ko tapos itatao ko iyan saimo.’ Nagtukad si Moises sa bukid asin 40 aldaw saka 40 banggi siya duman. Isinurat ni Jehova an Sampulong Tugon sa duwang tablang gapo dangan itinao iyan ki Moises.

Dahil nahahaloy si Moises duman, inisip kan mga Israelita na binayaan na niya sinda. Sinabi ninda ki Aaron: ‘Gusto ming may maggiya samo. Gumibo ka nin diyos para samo!’ Suminabi si Aaron: ‘Itao nindo sako an mga bulawan nindo.’ Tinunaw niya iyan asin naggibo nin estatuwa nin ugbon na baka. Nagsarabi an mga Israelita: ‘An ugbon na bakang ini an Diyos ta na nagluwas sa sato sa daga nin Ehipto!’ Sinamba ninda iyan, asin nagpiyesta sinda. Sala daw iyan? Iyo, dahil nangako sinda na si Jehova sana an sasambahon ninda. Pero ngunyan dai ninda ginibo an pangakong iyan.

Nahihiling ni Jehova an nangyayari, kaya sinabi niya ki Moises: ‘Magbaba ka sa banwaan ko. Dai sinda nagsusunod sako,  nagsasamba sinda sa sarong bakong tunay na diyos.’ Nagbaba si Moises hali sa bukid na dara-dara an duwang tablang gapo.

Kan harani na si Moises sa kampo, nadangog niya an mga tawo na nagkakaranta. Dangan nahiling niya sinda na nagbabarayle asin nagruruluhod sa ugbon na baka. Angguton a si Moises. Ibinaribad niya sa daga su duwang tablang gapo, kaya nagkaparasa iyan. Rinaot niya tulos su estatuwa. Tapos hinapot niya si Aaron: ‘Paano ka ninda nakumbinsir na gibuhon an marauton na bagay na ini?’ Nagsabi si Aaron: ‘Dai ka maanggot. Bisto mo man an mga tawong ini. Gusto ninda nin sarong diyos, kaya pigtunaw ko sa kalayo su mga bulawan ninda asin uni, buminutwa ining ugbon na baka!’ Dai dapat idto ginibo ni Aaron. Nagbalik si Moises sa bukid asin nakimahirak ki Jehova na patawadon an mga Israelita.

Pinatawad ni Jehova su mga gustong sumunod sa saiya. Nahiling mo kun gurano kaimportante para sa mga Israelita na sunudon an mga sinasabi ni Moises?