Sa Filipos, may suruguon na babayi na igwang demonyo, na nagtatao saiya nin kakayahan na manghula. Kaya dakul na kuwarta an nakukua kan mga amo kan babayi. Kan mag-abot si Pablo saka si Silas sa Filipos, sigeng sunod sainda kan babayi sa laog nin dakul na aldaw. Pinakurahaw siya kan demonyo: “An mga lalaking ini mga uripon kan Kahuruhalangkawing Diyos.” Kan huri, tinaraman ni Pablo an demonyo: ‘Sa ngaran ni Jesus, lumuwas ka saiya!’ Binayaan kan demonyo an babayi.

Kan mahiling kan mga amo kan babayi na dai na ninda ini mapagkakakuwartahan, angguton sinda. Ginuyod ninda si Pablo saka Silas paduman sa mga huwes kan siyudad, asin nagsarabi: ‘Pigsusuway kan mga lalaking ini an pagbuot kan gobyerno asin nangriribok sa bilog na siyudad!’ Ipinagbuot kan mga huwes na rapaduhon nin pamakol si Pablo saka si Silas tapos ipreso. Ilinaag sinda kan bantay kan presuhan sa pinakatago saka pinakamadiklom na parte kan presuhan asin inipit nin mga pandog an mga bitis ninda.

Nagkanta si Pablo saka Silas nin mga pag-umaw ki Jehova. Nagdangog sainda an iba pang mga preso. Bigla na sana, kan matangang banggi, nayugyug nin makusog na linog an bilog na presuhan. Bigla man na nagkaburuksan an mga pinto kan presuhan, asin nagkatarangkas an mga kadena pati mga pandog kan mga preso. Pagdalagan kan bantay paduman sa pinakalaog na parte kan presuhan, nahiling niyang burukas na an mga pinto. Paghuna niya nakadulag an gabos na preso, kaya hinugkot niya an saiyang espada para maghugot.

Kan mahiling ini ni Pablo, kinurahawan niya ini: ‘Dai mo paggibuhon iyan! Yaon kami digdi gabos!’ Duminalagan an bantay pasiring ki Pablo asin Silas tapos luminuhod. Naghapot ini: “Ano an dapat kong gibuhon para maligtas?” Sinabi ninda saiya: ‘Ika asin an mga kairiba mo sa harong dapat na magtubod ki Jesus.’ Dangan, itinukdo sainda ni Pablo asin ni Silas an tataramon ni Jehova. An bantay kan presuhan asin an mga kairiba niya sa harong nabawtismuhan gabos.