Sa Jerusalem natapos an ikatulong pagbiyahe ni Pablo sa paghuhulit. Dinakop siya duman tapos iprineso. Sarong banggi, paagi sa sarong bisyon, sinabi ni Jesus saiya: ‘Maduman ka sa Roma tapos mahulit ka duman.’ Hali sa Jerusalem, dinara si Pablo sa Cesarea, kun sain iprineso siya nin duwang taon. Kan si Pablo nasa atubangan ni Gobernador Festo huli sa kaso laban saiya, nagsabi si Pablo: ‘Gusto kong si Cesar sa Roma an magdesisyon sa kaso ko.’ Nagsabi si Festo: “Nag-apelar ka ki Cesar, di maduman ka ki Cesar.” Isinakay si Pablo sa sarong barko na pasiring sa Roma. Duwang Kristiyanong tugang an nag-iba saiya, si Lucas saka si Aristarco.

Kan nasa dagat na sinda, nagkaigwa nin makusugon na bagyo na naghaloy nin nagkapirang aldaw. Paghuna kan gabos magkakagaradan na sinda. Pero nagsabi si Pablo: ‘Mga amigo, sa pangaturugan, sinabi sako nin sarong anghel: “Dai ka matakot, Pablo. Makakaabot ka sa Roma, asin magigin ligtas an gabos na nakasakay sa barko.” Kusugi an buot nindo! Dai kita magagadan.’

Pakatapos kan pagrapado kan bagyo na uminabot nin 14 aldaw, nakahiling man giraray sinda nin daga—an isla nin Malta. Suminadsad an barko asin nagkararapak, pero ligtas na nakaabot sa baybayon an gabos na 276 na tawo na sakay kan barko. An iba luminangoy asin an iba ginibong palataw an mga nagkatarangkas na parte kan barko para makaabot sa baybayon. Inasikaso sinda kan mga taga Malta, na nagpalaad nin kalayo para makapahimbong sinda.

Pakalihis nin tulong bulan, dinara si Pablo sa Roma kan mga suldados sakay nin ibang barko. Pag-abot niya, sinabat siya kan mga tugang. Kan mahiling sinda ni Pablo, nagpasalamat siya ki Jehova asin kuminusog an saiyang buot. Maski ngani preso si Pablo, tinugutan siyang mag-istar sa sarong arkiladong harong mantang binabantayan nin sarong suldados. Nag-istar siya duman nin duwang taon. Dinudumanan siya kan mga tawo, asin hinulitan niya sinda manungod sa Kahadian nin Diyos saka tinukduan manungod ki Jesus. Naggibo man si Pablo nin mga surat para sa mga kongregasyon sa Asia Minor asin Judea. Talagang ginamit ni Jehova si Pablo para ipaabot an maugmang bareta sa mga nasyon.