LEKSIYON 85
Nagpaumay si Jesus sa Aldaw nin Sabbath
Anggot a ki Jesus an mga Fariseo asin gusto nindang makahanap nin dahilan para dakupon siya. Nagsabi sinda na dai siya dapat magpaumay nin mga may hilang pag aldaw nin Sabbath. Sarong aldaw, Sabbath kaidto, nakahiling si Jesus sa tinampo nin butang lalaki na nakikilimos. Sinabi niya sa mga disipulo: ‘Hilingon nindo kun paano tatabangan kan kapangyarihan nin Diyos an lalaking ini.’ Naggibo si Jesus nin laboy gamit an saiya mismong liwoy asin daga, tapos ilinahid niya iyan sa mga mata kan lalaki. Sinabi saiya ni Jesus: ‘Sige na, hugasan mo an mga mata mo sa karigusan nin Siloam.’ Ginibo iyan kan lalaki, asin sa inot na pagkakataon, nakahiling siya.
Nangalas an mga tawo. Nagsabi sinda: ‘Bakong iyo ini su lalaki na pirmi sanang nakatukaw asin nakikilimos, o kalalawgon niya lang ini?’ An lalaki nagsabi: ‘Ako idto, su ipinangaking buta!’ Hinapot siya kan mga tawo: ‘Ta’no ta nakakahiling ka na?’ Kan sabihon niya an nangyari, dinara ninda siya sa mga Fariseo.
Nagsabi an lalaki sa mga Fariseo: ‘Linahidan ni Jesus nin laboy an mga mata ko tapos sinabihan ako na hugason ko iyan. Ginibo ko idto, asin ngunyan nakakahiling na ako.’ Nagsabi an mga Fariseo: ‘Kun nagpapaumay si Jesus sa aldaw nin Sabbath, bako sa Diyos hali an kapangyarihan niya.’ Pero nagsabi an iba: ‘Kun bakong hali sa Diyos an kapangyarihan niya, dai kuta siya makakapaumay nin siisay man.’
Ipinaapod kan mga Fariseo an mga magurang kan lalaki asin hinapot: ‘Paano nangyari na nakakahiling na ngunyan an aki nindo?’ Natatakot an saiyang mga magurang dahil nagsabi an mga Fariseo na an siisay man na magtubod ki Jesus papalayason sa sinagoga. Kaya sinabi ninda: ‘Dai mi aram. Siya an haputon nindo.’ Pigparahapot pa kan mga Fariseo an lalaki sagkod na magsabi ini: ‘Sinabi ko na saindo an gabos. Ta’no ta pigpaparahapot pa nindo ako?’ Angguton an mga Fariseo kaya pinalayas ninda siya.
Hinanap ni Jesus an lalaki, dangan hinapot ini: ‘Nagtutubod ka sa Mesiyas?’ Nagsabi an lalaki: ‘Iyo kun bisto ko kun siisay siya.’ Nagsabi si Jesus: ‘Ako an Mesiyas.’ Marahayon an ginibo ni Jesus, ano? Dai niya lang pinaumayan an lalaki kundi tinabangan niya pa ining magkaigwa nin pagtubod.
“Sala kamo, dahil dai nindo aram an Kasuratan ni an kapangyarihan nin Diyos.”—Mateo 22:29
a O “dagit.”
Puwede Mo Man Magustuhan
SI JESUS—AN DALAN, AN KATOTOOHAN, AN BUHAY
Pinaumayan ni Jesus an Sarong Lalaking Namundag na Buta
Naghapot an mga disipulo kun taano ta namundag na buta an sarong lalaki. Nagkasala daw ini? Nagkasala daw an mga magurang kaini? Iba-iba an reaksiyon kan mga tawo kan paumayan ni Jesus an lalaki.
SI JESUS—AN DALAN, AN KATOTOOHAN, AN BUHAY
Kinumprontar kan mga Fariseo an Lalaki na Dating Buta
Naanggot an mga Fariseo sa mahusay na paliwanag kan lalaking dating buta. Arog kan ikinatakot kan mga magurang niya, itiniwalag siya kan mga Fariseo sa sinagoga.
AN BIBLIA—ANO AN MENSAHE KAIYAN?
Si Jesus Naggibo nin mga Milagro
Ano an ipinapaheling kan kapangyarihan ni Jesus na haleon an gutom, helang, kagadanan, peligrosong kamugtakan nin panahon, asin marompot na mga espiritu?
