AN NAKATINDOG na lalaki iyo si apostol Pedro. Nasa likod niya an mga amigo niya. Pero, ta’no ta may nakaluhod sa atubangan ni Pedro? Tama daw iyan? Aram mo kun si’say siya?

Siya si Cornelio, opisyal sa hukbong Romano. Dai niya bisto si Pedro, pero may nagsabi saiya na imbitaran an apostol sa harong niya. Aramon ta kun paano ini nangyari.

An inot na mga parasunod ni Jesus mga Judio. Bakong Judio si Cornelio, pero namumutan niya an Diyos, namimibi Saiya, asin naggigibo nin maray sa iba. Sarong hapon, may anghel na nagpahiling saiya asin nagsabi: ‘Nauugma saimo an Diyos. Sisimbagon niya an mga pamibi mo. Magsugo ka nin mga lingkod mo tanganing padigdihon an sarong lalaki na an ngaran Pedro. Nasa Jope siya sa harong ni Simon sa gilid kan dagat.’

Nagsugo tulos si Cornelio nin mga lalaki para hanapon si Pedro. Kan sunod na aldaw, mantang parani sinda sa Jope, yaon man si Pedro sa bubungan kan harong ni Simon. Diyan, may ipinahiling an Diyos ki Pedro na garo dakulang tamong na nagbababa hali sa langit. Nasa tamong an gabos na klase nin hayop. Uyon sa pagbuot nin Diyos, maati iyan asin dai dapat kakanon, pero sarong boses an nagtaram: ‘Tindog, Pedro. Magbuno ka asin magkakan.’

‘Dai!’ an simbag ni Pedro. ‘Dai pa lamang ako nagkakan nin maati.’ Pero sinabi kan boses: ‘Dai mo na pag-apudon na maati an lininig na nin Diyos.’ Tulong beses ining nangyari. Mantang iniisip-isip ni Pedro an kahulugan kaini, nag-abot an mga sinugo ni Cornelio.

Nagbaba si Pedro asin naghapot: ‘Anong tuyo nindo?’ Ipinaliwanag kan mga lalaki na may anghel na nagsabi ki Cornelio na imbitaran si Pedro. Kaya, kan sunod na aldaw, si Pedro asin an mga amigo niya nag-iba pasiring sa harong ni Cornelio sa Cesarea.

Tinipon ni Cornelio an mga kapamilya asin amigo niya. Pag-abot ni Pedro, nagluhod saka nagduko sa pamitisan niya si Cornelio, arog kan nahihiling mo. Pero sinabi ni Pedro: ‘Tumindog ka; tawo lang ako.’ Iyo, ipinapahiling kan Bibliya na salang magluhod asin magsamba sa tawo. Si Jehova sana an dapat sambahon.

Pinunan ni Pedro na ipahayag an maugmang bareta sa mga nagkatiripon. ‘Naiintindihan ko na ngunyan na inaako nin Diyos an gabos na gustong maglingkod saiya,’ an sabi ni Pedro. Miyentras na nagtataram siya, ibinubo nin Diyos sa mga nagkatiripon an saiyang banal na espiritu asin nagpuon sindang magtaram nin lain-lain na lengguwahe. Napangalas an mga Judiong disipulo na kaiba ni Pedro ta paghuna ninda mga Judio sana an pinapaburan nin Diyos. Nanudan ninda na para sa Diyos, mayong nasyon o lahi na urog sa iba. Magayon na tandaan iyan, bako daw?