AN MGA tawong ini mga parasunod ni Jesus. Sinunod ninda an tugon niya na dai maghali sa Jerusalem. Mantang iriba sindang naghahalat, sarong makusog na ribok an nadangog sa bilog na harong. Garo iyan ragubrob nin duros. Dangan may mga kalayo na korteng dila na nahiling sa mga payo kan kada disipulo. Nahihiling mo iyan? Ano daw an kahulugan kaiyan?

Saro iyan na milagro! Nakabalik na si Jesus sa langit sa kaibanan kan saiyang Ama, asin ibinubo niya an banal na espiritu nin Diyos sa mga parasunod niya. Aram mo kun anong nagibo ninda dahil sa espiritung ini? Gabos sinda nakapagtaram nin lain-lain na lengguwahe.

Dakul sa Jerusalem an nakadangog kan ribok na garo makusog na paros asin nagrani para mahiling an nangyayari. An pira sainda hali pa sa ibang mga nasyon asin nagdigdi para sa Judiong kapiyestahan nin Pentecostes. Nagkabirigla an mga bisitang ini sa nadangog ninda! Pa’no kaya, sa mismong mga lengguwahe ninda nagtataram an mga disipulo manungod sa makangangalas na mga ginibo nin Diyos.

‘Mga taga Galilea sinda,’ an sabi kan mga bisita. ‘Ano ta nakakataram sinda sa lain-lain na lengguwaheng ini kan mga nasyon na pinaghalian niyato?’

Nagtindog ngunyan si Pedro asin nagpaliwanag. Sinabi niya sa mga yaon duman kun paano ginadan si Jesus asin kun paano siya binuhay giraray ni Jehova. ‘Nasa langit na si Jesus ngunyan asin nasa tuo nin Diyos,’ an sabi ni Pedro. ‘Ibinubo niya an ipinanuga niyang banal na espiritu. Iyan an dahilan kaya nahihiling asin nadadangog nindo an mga milagrong ini.’

Pagkataram kaini ni Pedro, dakul sa mga yaon duman an namundo sa nangyari ki Jesus. ‘Anong gigibuhon mi?’ an hapot ninda. Sinabi ni Pedro sainda: ‘Kaipuhan kamong magbago asin magpabawtismo.’ Kan aldaw mismong iyan, mga 3,000 an nabawtismuhan asin nagin mga parasunod ni Jesus.