HILINGA an mga burak asin hinog na almendras na nagtubo sa sugkod. Ini an sugkod ni Aaron. An mga burak asin bunga nagtubo sa sugkod ni Aaron sa laog sana nin sarong banggi! Ta’no daw?

Medyo haloy nang naglalagaw-lagaw an mga Israelita sa kaawagan. An nagkapira sa banwaan dai uyon na si Moises an magin lider, o na si Aaron an magin halangkaw na saserdote. An saro sainda iyo si Kora, asin iyo man si Datan, Abiram, saka an 250 lider kan banwaan. Gabos sinda nagduman ki Moises asin nagsabi: ‘Ano man ta naghahadi-hadian kamo samuya?’

Sinabi ni Moises ki Kora asin sa mga parasunod kaini: ‘Sa agang aga magdara kamo nin mga bugtakan nin kalayo saka lagan nindo nin insenso. Tapos magduman kamo sa tabernakulo ni Jehova. Mahihiling ta kun si’say an pipilion niya.’

Kinaagahan, si Kora asin an 250 parasunod niya nagduman sa tabernakulo. Dakul pa an nagsuportar sainda. Angguton si Jehova. ‘Rumayo kamo sa mga tolda kan maraot na mga tawong ini,’ an sabi ni Moises. ‘Dai nindo pagdutduton an arin man na sadiri ninda.’ Nagdangog an banwaan asin ruminayo sinda sa mga tolda ni Kora, Datan saka Abiram.

Dangan sinabi ni Moises: ‘Ngunyan mamimidbid nindo kun si’say an pinili ni Jehova. Mabuka an daga asin hahalunon an mga maraot na ini.’

Pagkataram kaini ni Moises, buminuka an daga. Hinalon kaiyan si Datan, Abiram saka an kairiba ninda, pati na an tolda asin mga pagsadiri ni Kora. Kan mahiling iyan kan banwaan, nagkururahaw sinda: ‘Dulag na! Tibaad halunon man kita kan daga!’

Si Kora asin an 250 parasunod niya yaon pa sa may tabernakulo. Kaya nagpaluwas si Jehova nin kalayo asin tinunaw sinda gabos. Sinabi ni Jehova ki Eleazar na aki ni Aaron na kuanon an mga bugtakan nin kalayo kan mga nagadan asin gibuhon ining pantakop sa altar. Magseserbi ining patanid sa mga Israelita na si Aaron sana asin an mga aki niya an puwedeng maglingkod na saserdote ni Jehova.

Pero gusto ni Jehova na magin malinaw sa gabos na si Aaron asin an mga aki kaini an pinili niyang magin mga saserdote. Kaya sinabi niya ki Moises: ‘Magdara nin sugkod an lider kan lambang tribo nin Israel. Para sa tribo ni Levi, si Aaron an madara nin sugkod. Ibugtak an mga sugkod na ini sa tabernakulo sa atubangan kan kaban kan tipan. An sugkod kan pinili ko bilang saserdote iyo an mamumurak.’

Pagduman ni Moises kinaagahan, nahiling niyang tinubuan nin mga burak asin hinog na almendras an sugkod ni Aaron! Ngunyan, aram mo na kun ta’no ta pinaburak ni Jehova an sugkod ni Aaron?