SI Daniel, na sarong hoben na may pambihirang integridad, idinistiero sa Babilonya bago laglagon an Jerusalem. Sia asin an nagkapirang iba pang Judio​—na idinistiero hale sa nadaog na kahadean nin Juda—​tinawan minsan paano nin katalingkasan duman kan mga nagbihag sa sainda. Durante kan halawig na buhay ni Daniel sa Babilonya, sia binendisyonan na marhay nin Dios, na nakaligtas pa ngani sa kagadanan sa lungib nin mga leon asin nag-ako nin mga bisyon na huli kaiyan naaraman nia an mangyayari sa ngapit. An pinakamahalagang mga hula ni Daniel nakasentro sa Mesiyas asin sa Saiyang pamamahala.

Naaraman ni Daniel kun noarin maabot an Mesiyas. Sinabi ki Daniel kun noarin puedeng asahan kan banwaan nin Dios an pag-abot kan “Mesiyas na Poon”​—69 semana nin mga taon pakatapos kan pagluwas kan pagboot na ibalik sa dati asin itogdok liwat an mga lanob nin Jerusalem. An normal na semana may pitong aldaw; an semana nin mga taon kompuesto nin pitong taon. An pagboot na iyan ilinuwas haloy pa pakatapos kan panahon ni Daniel, kaidto sanang 455 B.C.E. Poon dian, an 69 “semana” malawig nin 483 na taon, na matatapos sa taon 29 C.E. Sa sunod na kabtang kan publikasyon na ini, maheheling niato kun ano an nangyari sa taon na iyan. Naaraman man ni Daniel antes pa na an Mesiyas “tataposon,” o gagadanon, bilang kabayadan sa kasalan.​—Daniel 9:24-26.

An Mesiyas magigin Hade sa langit. Sa sarong pambihirang bisyon dapit sa langit mismo, naheling ni Daniel na an Mesiyas, na inaapod na “saro na kabaing nin aki nin tawo,” nagrani sa trono ni Jehova mismo. Itinao sa saiya ni Jehova an “pamamahala asin dignidad patin kahadean.” An Kahadean na iyan magdadanay sagkod lamang. Naaraman ni Daniel an saro pang nakakapukaw sa boot na detalye manongod sa Mesiyanikong Kahadean​—an Hade magkakaigwa nin iba pang kairibang namamahala, sarong grupo na inaapod na “mga banal kan Supremo.”​—Daniel 7:13, 14, 27.

Lalaglagon kan Kahadean an mga gobyerno sa kinaban na ini. Tinawan nin Dios si Daniel kan kakayahan na itao an kahulogan nin sarong pangatorogan na nakaribaraw ki Nabucodonosor, an hade nin Babilonya. An hade nakaheling nin dakulaon na imahen na an payo bulawan, an daghan asin mga takyag plata, an tulak asin mga paa tanso, an mga tabay batbat, saka an mga bitis batbat na may salak na dalipay. Sarong gapo na tinipak sa sarong bukid an tuminama sa matapong mga bitis asin napolbos an imahen. Ipinaliwanag ni Daniel na an mga kabtang kan imahen nagrerepresentar sa halawig na pagkasunodsunod nin pambilog na kinaban na mga kapangyarihan, na an enot iyo an Babilonya bilang an payo na bulawan. Naaraman ni Daniel antes pa na sa panahon kan huring namamahalang kapangyarihan sa maraot na kinaban na ini, mahiro an Kahadean nin Dios. Roronoton kaiyan an gabos na gobyerno sa kinaban na ini. Dangan iyan mamamahala sagkod lamang.​—Daniel, kapitulo 2.

Kan si Daniel gurangon na, naheling nia an pagbagsak kan Babilonya. Pinabagsak ni Hadeng Ciro an siudad siring kan ihinula kan mga propeta. Dai nahaloy, an mga Judio sa katapustapusi pinatalingkas sa pagkadistiero sa sainda​—nin eksakto sa panahon, pakatapos kan ihinulang 70 taon na dai iistaran an saindang sadiring daga. Pag-abot nin panahon, sa paggiya nin maimbod na mga gobernador, saserdote, asin propeta, ikinatogdok liwat kan mga Judio an Jerusalem asin ikinabalik ninda sa dati an templo ni Jehova. Pero, ano an mangyayari sa katapusan kan 483 na taon?

​—Basado sa libro nin Daniel.