ANO an misyon ni Jesus sa daga? Sia mismo nagsabi: “Dapat na ipahayag ko . . . an maogmang bareta kan kahadean nin Dios, huli ta dahel kaini ako isinugo.” (Lucas 4:43) Estudyare an apat na bagay na itinokdo ni Jesus manongod sa Kahadean, an pinakatema kan saiyang paghuhulit.

1. Si Jesus an designadong Hade. Direktang sinabi ni Jesus na sia an ihinulang Mesiyas. (Juan 4:25, 26) Ipinaheling man nia na sia an Hade na naheling ni propeta Daniel sa bisyon. Sinabi ni Jesus sa mga apostol nia na pag-abot nin panahon matukaw sia sa “mamurawayon na trono” asin na sinda matukaw man sa mga trono. (Mateo 19:28) Inapod nia an grupong ini nin mga mamamahala na saiyang “sadangoton na aripompon,” asin sinabi man nia na igwa sia nin “ibang mga karnero,” na bakong kabtang kan grupong iyan.​—Lucas 12:32; Juan 10:16.

2. Papalakopon kan Kahadean nin Dios an tunay na hustisya. Ipinarisa ni Jesus na hahaleon kan Kahadean an pinakagrabeng inhustisya paagi sa pagpakangbanal kan ngaran ni Jehova Dios asin paghale kan gabos na katuyawan na ginibo ni Satanas sa ngaran na iyan poon pa kan pagrebelde sa Eden. (Mateo 6:9, 10) Ipinaheling man ni Jesus aroaldaw an dai pagpaorog paagi sa pagtokdo sa mga lalaki asin babae, mayaman saka dukha, na mayong pagpalaenlaen. Minsan ngani an misyon nia sa pangenot magtokdo sa mga Israelita, sia naghingoa man na dumanan asin tabangan an mga Samaritano asin Hentil, o mga bakong Judio. Bakong arog kan mga namomoon sa relihion kan panahon nia, sia dai man lamang nagpaheling nin pagpaorog o paboritismo.

3. An Kahadean nin Dios bakong kabtang kan kinaban na ini. Si Jesus nabuhay sa panahon nin grabeng kariribokan. An saiyang sadiring lugar sakop nin ibang nasyon. Pero, kan probaran kan mga tawo na makikabtang sia sa politika kan panahon na idto, sia naghale. (Juan 6:14, 15) Sinabi nia sa sarong politiko: “An sakong kahadean bakong kabtang kan kinaban na ini.” (Juan 18:36) Sa mga parasunod nia, sia nagsabi: “Kamo bakong kabtang kan kinaban.” (Juan 15:19) Dai nia sinda tinogotan na gumamit nin mga armas sa pakikilaban, dawa sa pagdepensa mismo sa saiya.​—Mateo 26:51, 52.

4. An pamamahala ni Cristo basado sa pagkamoot. Si Jesus nanuga na papaginhawahon nia an mga tawo asin papagianon an mga pagabat sa sainda. (Mateo 11:28-30) Inotob nia an saiyang sinabi. Nagtao sia nin mamomoton asin praktikal na hatol dapit sa pag-atubang sa kahaditan, pagpaoswag sa relasyon sa iba, paglaban sa materyalismo, asin pakanompong nin kaogmahan. (Mateo, kapitulo 5-7) Para sa mga tawo gikan sa gabos na klase nin pamumuhay, sia madaling dolokon huling sia nagpaheling nin pagkamoot. Nagdorolok sa saiya pati an mga inaaping gayo, na igwang kompiansa na tatrataron nia sinda na may kabootan asin dignidad. Magigin marahayon nanggad na Namamahala si Jesus!

May saro pang mapuersang marhay na paagi nin pagtokdo ni Jesus manongod sa Kahadean nin Dios. Sia naggibo nin dakol na milagro. Taano ta ginibo nia iyan? Helingon niato.

​—Basado sa mga libro nin Mateo, Marcos, Lucas, asin Juan.