Sinuway kan inot na mag-agom na si Adan saka Eva an Diyos kaya nagkakasala kita, nagsasakit, saka nagagadan. a Pero dai buot sabihon na mayo na kitang paglaom. Naggibo si Jehova nin paagi para iligtas kita sa sumpa nin kasalan asin kagadanan paagi sa saiyang Aki, si Jesu-Cristo. Itinutukdo kan Bibliya na itinao ni Jesus an pantubos paagi sa saiyang kagadanan. An pantubos iyo an kantidad na ibinabayad para mabalukat o mapatalingkas an sarong tawo. An kantidad na ibinayad ni Jesus iyo an halaga kan saiyang perpektong buhay bilang tawo. (Basahon an Mateo 20:28.) Kan gikan sa buot na itinao ni Jesus an saiyang deretso na mabuhay nin daing katapusan digdi sa daga, tinawan niya kita nin paglaom na makamtan giraray an gabos na naiwara ni Adan saka ni Eva. Ipinahiling man ni Jesus kun gurano kadakula kan pagkamuot niya saka ni Jehova para sa sato. Tatabangan ka kan leksiyon na ini na mas mapararom pa an pagpapahalaga mo sa kagadanan ni Jesus.

1. Paano kita makikinabang ngunyan sa kagadanan ni Jesus?

Huling bako kitang perpekto, dakul kitang nagigibo na ikinakaanggot ni Jehova. Pero kun talagang pinagbabasulan ta an satong mga kasalan asin naghahagad nin tawad ki Jehova paagi ki Jesu-Cristo asin kun ginigibo ta an satong pinakamakakaya na dai na mautro an mga pagkakasalang iyan, magkakaigwa kita nin haraning relasyon sa Diyos. (1 Juan 2:1) Sinasabi kan Bibliya: “Si Cristo . . . nagadan nin saro sanang beses para sa gabos na panahon para sa mga kasalan, sarong matanos na tawo na nagadan para sa mga bakong matanos, tanganing giyahan kamo pasiring sa Diyos.”—1 Pedro 3:18.

2. Huli sa kagadanan ni Jesus, ano an puwede tang makamtan sa maabot na panahon?

Isinugo ni Jehova si Jesus para itao an saiyang perpektong buhay bilang tawo “tanganing an siisay man na nagtutubod [ki Jesus] dai malaglag kundi magkaigwa nin buhay na daing katapusan.” (Juan 3:16) Huli sa ginibo ni Jesus, madali nang halion ni Jehova an gabos na maraot na resulta kan pagsuway ni Adan. An buot sabihon, kun matubod kita sa atang ni Jesus, magkakaigwa kita nin oportunidad na mabuhay nin maugma sagkod pa man sa paraisong daga!—Isaias 65:21-23.

 ARAMON PA

3. An kagadanan ni Jesus nagpapatalingkas sa sato sa kasalan asin kagadanan

1. Si Adan perpektong tawo na dai nagsunod sa Diyos asin ibinugtak an mga tawo sa dalan pasiring sa kasalan asin kagadanan

2. Si Jesus perpektong tawo na nagsunod sa Diyos asin ibinugtak an mga tawo sa dalan pasiring sa pagkaperpekto asin buhay na daing katapusan

4. Puwedeng makinabang an gabos na tawo sa kagadanan ni Jesus

 5. An pantubos regalo sa saimo ni Jehova

Ibinibilang kan mga amigo ni Jehova na personal na regalo sa sainda nin Diyos an pantubos. Basahon an Galacia 2:20, dangan pag-ulayan an hapot na ini:

• Paano mahihiling sa sinabi ni apostol Pablo na ibinibilang niyang personal na regalo saiya nin Diyos an pantubos?

Kan magkasala si Adan, sinentensiyahan siya nin kagadanan asin nadamay man pati an gabos niyang gikan. Pero isinugo ni Jehova an saiyang Aki para itao an saiyang buhay tanganing magkaigwa ka nin oportunidad na mabuhay nin daing katapusan.

Mantang binabasa an mga bersikulo, isipa kun ano an posibleng marhay na namatian ni Jehova mantang nagsasakit an saiyang Aki. Basahon an Juan 19:1-7, 16-18, dangan pag-ulayan an hapot na ini:

• Ano an namamatian mo sa ginibo ni Jehova saka ni Jesus para saimo?

 SUMARYO

An kagadanan ni Jesus iyo an nagin basehan para patawadon ni Jehova an satong mga kasalan, asin nagtao iyan sa sato nin oportunidad na mabuhay nin maugma sagkod pa man.

Rebyu

• Taano ta nagadan si Jesus?

• Sa anong paagi nagin katimbang na pantubos an perpektong buhay ni Jesus bilang tawo?

• Paano ka makikinabang sa kagadanan ni Jesus?